Lamatualain Dula-d'alen fee atahori na ra, esa-esa' noo ue-tatao na
14
Tao mihere' fo esa sue-lai esa sia basa dala' ra. Huu nda hambu dala' laen manaseli' lena' sa. Sangga dala' fo Lamatualain Dula-d'alen fee nggi koasa ma bab'anggi-b'ab'a'e' fo ama bisa tao dala-d'ala malole' ra. Boe ma malolen, naeni mete ma ama hambu bab'anggi-b'ab'a'e' fo dui-b'engga Lamatualain hehelu-fufuli na. 2 Huu mete ma atahori hambu bab'anggi-b'ab'a'e' fo dui-b'engga pake ded'eat laen, na, Lamatualain Dula-d'alen fee ne koasa fo nafad'e dala' fe'e mana ma'afuni'. Ana nda 'ola' noo atahori laen sa, te ana 'ola' noo 'a Lamatualain. Nda hambu atahori mia mana ra'ab'ue sia naa sa, rahine atahori naa 'o'ola na. 3 Te mete ma atahori hambu bab'anggi-b'ab'a'e' fo dui-b'engga Lamatualain hehelu-fufulin, na, ana dui-bengga hehelu-fufuli' na neu basa atahori mana sia naa ra. Ana nafefela atahori ra nemeheren neu Lamatualain, tao manggatee rala na ra, boe ma tao namaho'o mana susa-sona' ra. 4 Atahori mana 'ola' nendi' ded'eat laen, tao ma'ad'ere ao na. Te atahori mana 'ola' dui-b'engga Lamatualain hehelu-fufulin, ana tao ma'ad'ere basa atahori mana ma'ab'ue' ra, naa fo basa atahori sarani' dad'i ma'ad'ere' lena'.5 Au hii 'a basa hei 'ola' mendi' ded'eat laen. Te au hii lena' fai, mete ma hei 'ola' dui-b'engga Lamatualain hehelu-fufuli na. Huu atahori mana 'ola' dui-b'engga Lamatualain hehelu-fufulin, nggunan lena' mia atahori mana 'ola' nendi 'a ded'eat laen. Mete ma hita 'ola' tendi' ded'eat laen, naa malole' boe, sad'i hambu atahori nafad'e nahine ded'eat naa sosoa na. Noo ta'o naa, hehelu-fufuli' naa bisa tao basa atahori sarani' ra basa se rahine.
6 Toronoo susue ngga ra, e! Du'a sob'a dala' ia. 'Ona' a au 'uma sia nggi, fo au 'ola' 'endi' ded'eat fo ama nda mihine sa, na, hei hambu 'onton saa? Nda hambu sa, to? Te mete ma au 'ola' fee nggi, malole lena' mete ma au dui-b'engga Lamatualain hihii-nanau na. Malole lena' au 'utud'u dala' fo ma'ahulun nda fe'e manggarelo' a sa. Malole lena' au tulun hei fo mihine dala' ra noo malole' lena' fai. Malole lena' au fee nesenened'a' so'al Lamatualain Ded'ea-'o'ola na. Malole lena' au 'unori nggi. Ta'o naa, fo fe'e na'ena ngguna soa' neu nggi, to?
7 'Ona' naa boe noo sud'i 'a saa mana malii' ra. Malii' naa ra nda masod'a' sa, te ara tao lii' mata'-mata'. Pake sulin do, sasando do, gitar do, te mete ma nda ub'a noot na sa, na, ne'o atahori nda bisa rahine 'oi na'amina' sosod'at bee sa boe, to? 8 Mete ma tao tarompet liin sambu-sambu, na, ta'o bee fo sold'ad'u ra rena ma bub'ulu' fo rahehere reu ratati? Hoko', to? 9 Hei o 'ona' naa boe. Mete ma hei 'ola' mendi' ded'eat laen, do 'ola' mendi' a ded'eat fo atahori nda rahine noo matetu' sa, naa 'ona' hei 'ola' moo anin. Parsuma 'a, huu atahori nda rahine masud ma sa! 10 Hambu ded'eat mata' hetar sia raefafo' ia. Ded'eat ra esa-esa' noo eni sosoa-ndandaa na! 11 Te mete ma au nda 'uhine atahori laen ded'ean sa, na, naa nda na'ena sosoan saa fee au sa boe. Au nda 'uhine se sa, ma ara o nda rahine au sa boe. De hai esa moo esa dad'i 'ona' atahori fui' ra.
12 Hei o 'ona' naa boe. Hei nau hambu koasa ma bab'anggi-b'ab'a'e' mia Lamatualain. Naa malole. Te malole lena' hei tao mihere' fo hambu koasa noo bab'anggi-b'ab'a'e', fo ama bisa pake fo tulun tao ma'ad'ere atahori sarani' hetar!
13 Dad'i atahori mana 'ola' nendi' ded'eat laen, malole lena' hule-o'e no'e Lamatualain fee ne bab'anggi-b'ab'a'e', fo bisa nafad'e ded'eat laen naa sosoa na. 14 Mete ma au hule-o'e 'endi' ded'eat laen, na, au hule-o'e sia 'a rala ngga, te nda 'uhine 'ae au 'ola' saa sa boe. 15 Dad'i malolen, au tao ta'o bee? Au pake ru'a se, te esa-esa' noo fai na. Au 'ae hule-o'e 'endi' a rala ngga. Ma au o 'ae hule-o'e 'endi' ded'ea-'o'ola' fo 'uhine' a. Au 'ae koa-kio sia rala ngga neu Lamatualain 'endi' sosod'a koa-kio'. Boe ma au o bisa sod'a sosod'at 'endi' ded'eat fo 'uhine' a. 16 Huu mete ma ho pake ded'eat laen fo koa-kio Lamatualain mia ralam, ma hambu atahori sia naa nda nahine dala' naa ra sa, ta'o bee fo ana bisa rala' esa noo nggo? Lele' ho mo'e makasi mbali Lamatualain mendi' ded'eat laen, ta'o bee fo ana na'ahei' noo nggo nae, “Naa, teb'e!” Nda bisa sa, to? Huu nda nahine ded'eam sa. 17 Ho bisa mo'e makasi mbali Lamatualain ta'o naa. Te naa nda tao manggatetee atahori laen ralan sa.
18 Mbei ma hei nda bub'ulu' sa, te au 'ola' 'endi' ded'eat laen lena' basa nggi. Au 'o'e makasi mbali Lamatualain, huu Ana tao au bisa 'ola' ta'o naa. 19 Te mete ma atahori mamahere' ra ra'ab'ue, malole lena' au 'ola' 'endi' a ded'ea 'e'eku' deke' lima' a, mana tao se bisa rahine, fo au 'unori se, 'afi' losa au 'ola' loa-naru' 'endi' ded'eat laen, ma pake ded'eat mana le'u-lolo' fo ara nda rahine' a sa.
20 Toronoo susue ngga ra, e! Mete ma hei nau mihine sob'a dala' esa, na, hei musi minori dud'u'a 'ona' atahori moko ra. 'Afi' dud'u'a 'ona' anad'iki' ra! Te neu dala de'ulaka' ra, hei musi 'ona' anad'iki', nda mana nahine tao dala de'ulaka' ra sa, huu rala na ra meu'. 21 Sia Lamatualain Susura Meumaren, nenesura' 'oi:
“Hita Malanggan 'ola' nae,
‘Au 'ae pake atahori mana 'ola' nendi' ded'eat laen ra,
fo Au 'ola' fee neu atahori nusa Isra'el ra.
Te mae au 'ola' ta'o bee boe o,
ara nda nau rena Au sa.’”a
22 Huu naa, hei mita mae, mete ma atahori 'ola' rendi' ded'eat laen, naa dad'i tanda fee atahori mana nda fe'e ramahere Lamatualain sa, fo rita koasa na. Naa nda tulun atahori mana ramahere neu Lamatualain sa ena. Te mete ma atahori 'ola' dui-b'engga Lamatualain hehelu-fufulin, naa tulun atahori mana ramahere neu E ena. Naa nda tulun atahori mana nda fe'e ramahere neu E sa. 23 Mete ma basa hei mi'ib'ue, ma basa nggi 'ola' mendi' ded'eat laen-laen, ma atahori nda fe'e ramahere sa, do atahori mana nda fe'e rahine dala' ia ra sa, maso' sia talad'a ma ra ena, na, dei fo ara du'a ta'o bee? Tantu ara rae, “Atahori mana sia ia ra ramulu ena!”
24 Ma mete ma basa hei 'ola-'ola' dui-b'engga Lamatualain hehelu-fufulin, ma hambu atahori nda fe'e namahere sa, do atahori nda fe'e nahine dala' ia ra sa, maso' nisi' hei talad'a ma ra, na, tantu atahori naa nae rena saa fo hei 'ola-'ola' naa. Dad'i saa fo hei 'ola' naa natud'u sala-kilu na ra, de ana nau paresa' masod'an noo lutu'-lelo'. 25 Boe ma dala-d'ala de'ulaka' fo ana na'afuni' sia ralan, dei fo tab'uka fo basa atahori rahine. Boe ma dei fo atahori naa sende' lulu-langgan mbali Lamatualain nae, “Wii! Lamatualain sia talad'a ma ra ena!”
Basa dala' fo hita tao' a, tao tungga matetu na. 'Afi' nemue-neanggi
26 Dad'i toronoo susue ngga ra, e! Lele' hei mi'ib'ue, atahori esa-esa' noo bab'anggi-b'ab'a'e na. Ruma sod'a sosod'at koa-kio Lamatualain. Ruma ranori atahori so'al Lamatualain. Ruma fai rafad'e dala' mana mia Lamatualain, fo ma'ahulun fe'e mana ma'afuni' a. Ruma 'ola' rendi' ded'eat laen. Boe ma ruma fai bisa rafad'e ded'eat naa sosoa na. Basa dala' naa ra, ara musi tao fo tao ma'ad'ere atahori laen ra nemehere na.
27 Mete ma hambu ruma hii 'a 'ola' rendi' ded'eat laen, na, naa malole. Te 'ita' atahori rua do telu o, dai ena. Nda parluu atahori hetar sa. Esa 'ola' basa, dei fo esa 'ola' fai. Boe ma musi hambu atahori mana bisa nafad'e sira ded'ean sosoa na. 28 Mete ma nda hambu atahori bisa nafad'e ded'eat naa sosoan sa, na, 'afi' 'ola' mendi' ded'eat laen sia atahori hetar mata na. Hela fo ara 'ola' 'ona' naa sia 'a rala na ra. Sira o bisa 'ola' roo Lamatualain 'ona' naa boe.
29 Lele' ama mi'ib'ue, mae atahori rua do telu' a 'ola' rafad'e Lamatualain hehelu-fufulin, na, laen ra musi timba-tai malolole 'o'ola na ra. 30 Te mete ma Lamatualain natud'u fo mihine dala' esa dalahulun fe'e ma'afuni', fee neu atahori esa mana 'endo' rena sia naa, atahori naa musi nafad'e hehelu-fufuli' naa neu basa mana sia naa ra. Boe ma atahori mana 'ola' sia mata' musi naloe', fo fee kaka'e' neu atahori mana fe'e nema rena mia Lamatualain, fo ana 'ola'. 31 Matetun, basa hei bisa dui-b'engga Lamatualain hehelu-fufuli na. Te hela' atahori esa 'ola' dei, dei fo fe'e fee nonoon ena. Noo ta'o naa, basa atahori bisa rena, basa se bisa ranori, ma ara bisa med'a rala na ra boe manggatee lena' fai. 32 Misined'a te, atahori mana 'ola' dui-b'engga Lamatualain hehelu-fufulin, musi nauli nahine ao na. Boe ma, esa bisa nahani esa, ma laen ra ra'atataa' rala ao na ra. 33 Te sia Lamatualain nda hambu nemue-neanggi sa. Basa' e nenelinu-afi' noo malole'.
Sia bee-b'ee, mete ma atahori mamahere' ra ra'ab'ue, naa biasa 'ona' ia: 34 Ina' ra musi 'endo' nee-nee. Sira 'afi' 'ola' nae'. Musi tao rerena' neu malangga na ra. Huu Lamatualain Hohoro-lalanen 'ola' na'o naa boe, to? 35 De mete ma ina' ruma rae ratane dala' esa, na, hela fo bali' na natane sia 'a sao na. Te mete ma ina' ra ramue-raanggi sia ume hule-o'e' a, na, naa tao ne'emamae' a!
36 Hei dud'u'a ma ra 'ona bee? Huu Lamatualain Ded'ea-'o'olan nda nema mia nggi sa! Boe ma Ded'ea-'o'olan nda fee neu 'a hei mana sia kota Korintus sa! Du'a malolole dei! 37 Mete ma hambu atahori sa nae eni bisa dui-b'engga nala' Lamatualain hehelu-fufulin, do, du'a 'oi eni simbo koasa mia Lamatualain Dula-d'alen, na, eni mesa' ne bub'ulu' 'oi dala' naa fo au sura' fee neu nggi, naa nda hohoro-lalane' mia au sa, te parenda' naa mia Yesus, hita Malangga na. 38 Mete ma hambu atahori nda nau simbo dala' ia ra sa, na, ama 'afi' simbo e boe.
39 Toronoo susue ngga ra, e! Mihehere fo ama hambu koasa dui-b'engga Lamatualain hehelu-fufuli na. Boe ma 'afi' 'ena-'ai atahori mae, sud'i boe 'ola' mendi' ded'eat laen fai. 40 Dad'i mete ma hei mi'ib'ue, na, milalao basa dala' ia ra noo matetu', tungga ndoo na. Dala' esa lao' dei, dei fo laen ra tungga. Milalao basa dala' ra noo malole'. 'Afi' nemue-neanggi.