Susue-lalai ndoo-tetu' a
13
'Ona' mae au bisa 'ola-'ola' basa ded'eat mata'-mata', atahori ded'ea na do, ded'eat mia Lamatualain ate na ra sia sorga do, te mete ma au nda 'u'ena susue' mbei sa boe, na, eni 'onton na saa? Au 'o'ola ngga naa rou' 'ona' me'o a 'aka' nalii, do daroom mana nalii ndu'u-ndu'u te rou'. 2 'Ona' au hambu bab'anggi-b'ab'a'e' fo dui-b'engga Lamatualain hehelu-fufulin neu atahori na ra, ma bub'ulu' basa rasia ra, ma 'uhine basa atahori mahine' ra dalan, ma mete ma nemehere ngga neu Lamatualain manggatee' losa au bisa lali lete' ra, te nda 'u'ena susue' mbei sa boe, naa nggunan saa? Basa saa fo au tao' naa ra, nda na'ena ngguna saa sa boe.a 3 Mete ma au seo basa hata-heto ngga ra, fo banggi fee neu atahori mana tud'a-loloe' ra, do fee ao ngga dad'i tutunu-hohotu',b te au nda 'u'ena susue' mbei sa boe, eni nggunan saa? Au nda 'u'ena netehuu' fo so'u-so'u ao ngga sa boe. Naa parsuma 'a! Nda 'onton saa sa boe.4 Huu susue' naa, malole'.
Susue' naa, na'amamate' nala rala na.
Ana nda horo-mbala nahine sa.
Ana nda so'u-so'u nahine aon sa.
Ana nda koao' nala' sa.
5 Ana nda mana nggurud'au' sa.
Ana nda nau nasenggi' mesa' ne sa.
Ana nda namanasa neu' ena sa.
Ana nda nambed'a nala' rala' sa.
6 Ana hii 'a dala ndoo-tetu'.
ma ana nda hii dala mana mbee seseri' mana nda matetu' sa.
7 Susue' naa, ne'etataa' sia sususa'.
Susue' naa, nemehere nekendoo' a.
Susue' naa, nemehena nekendoo' a nae, dei fo basa e dad'i malole'.
Susue' naa, ne'etataa' nekendoo' a.
8 Ma susue' naa nda nama'etu sa.
Te saa fo Lamatualain mana 'ola-'ola na ra dui-b'engga' naa, doo-d'oo te nda parluu sa ena. De mete ma atahori 'ola' rendi' ded'eat mata'-mata', doo-d'oo te nda parluu sa ena. Mete ma saa fo atahori mahine' ra bub'ulu', doo-d'oo te nda na'ena ngguna saa sa ena boe. 9 Lele' ia, hita tahine mbei 'a. Mete ma hita dad'i Lamatualain mana 'ola-'olan, na, hita tafad'e 'aka' dala nda fe'e manad'ai' sa. 10 Te losa fain, dei fo basa' e dad'i manad'ai'. Lele' naa, dala-d'ala nda manad'ai' ra sa, nda ra'ena ngguna sa ena.
11 Conto 'ona' ia: lele' au fe'e anad'iki', au 'ola-'ola' 'ona' anad'iki' ra biasa 'ola-'ola'. Au dud'u'a 'ona' anad'iki' ra biasa dud'u'a boe. Te ia na au 'u'umoko ena. Naeni de au nda tao ao ngga 'ona' anad'iki' sa ena.
12 Conto laen fai: ia na, hita hambu tita mbei ena, te nda fe'e manggarelo' sa, 'ona' mete rendi' doma mana fanggi'. Te doo-d'oo dei fo basa e dad'i manggarelo' boe. Hita tita nandaa 'ona' sia mata ta ra. Lele' ia au 'uhine mbei 'a. Te doo-d'oo dei fo au 'uhine basa' e, 'ona' Lamatualain nahine basa' e so'al ao ngga.
13 Dad'i lele' ia, hita musi tao dala' telu mana na'atataa' nakandoo. Naeni:
ata musi tamahere takandoo neu Lamatualain;
ata musi tamahena takandoo tae, dei fo Ana nauli basa' e dad'i malole';
boe ma ata musi esa sue-lai esa takandoo.
Mia dala katelu' ia ra, manaseli' a, naeni susue'. Huu susue' a malolen lena' mia basa' e.