3 Au 'ae 'utaa bali' mbali atahori mana hii 'a fua sala' neu au, ta'o ia: 4 Hei du'a mae, au 'oo Barnab'as nda mi'ena hak fo simbo nanaa-nininu' mia atahori fo hai minori' ra sa, do? 5 Hei du'a mae, hai nda mi'ena hak fo sao ina Kristen mana bisa tungga hai mii milalao ue-tataos sia mamana' laen ra, do? Tao-tao te Lamatua' ded'enun laen ra roo sira sao na ra boe. Lamatua' 'od'i na ra 'ona' naa boe. Petrus o tao 'ona' naa boe!^a 6 Do, hei du'a mae, 'aka' au 'oo Barnab'as mesa' nggi musi tao ues sangga doi', fo misod'a ma minori atahori? 7 Hei dud'u'a ma ra naa, netehuu na saa? Mete sold'ad'u ra dei. Ara nda hasa sira nanaan ma bua-b'a'un sa. Mete atahori mana ue-tao sia osi anggor a. Esa nda 'ena-'ai e nae, “'Afi' mua anggor boa na ra!” Mete manatad'a ra. Ara ra'ena hak fo hese susu mia bib'i fo ara ranea' ra.

8 Au nda 'ola' ta'o naa tungga 'a au, atahori biasa ia dud'u'an sa. Huu Lamatualain Hohoro-lalane na ra o rafad'e dala' 'ona' naa boe. 9 Sia ba'i Musa hohoro-lalanen nenesura' 'oi, “Lele' sapi a tatab'u are fo 'ou hendi deke na ra mia mbulen, 'afi' rapa bafan fo nda naa nala sa.” Hei du'a mae Lamatualain nae hela neu fo 'aka' sapi a naa nala, do?^b 10-11 Hoko'! Ana o 'ola' nae tao mata' neu nggita boe! Huu nenesura' 'oi, “Atahori mana tatati rae, ma atahori mana poko 'etu-'oru' ra, lele' ara tao ues, ara o bub'ulu' rae, dei fo sira simbo bab'anggin boe.” 'Ona' naa boe, malole' mete ma ded'enu' atahori Kristen ra bisa simbo bab'anggi' mia sira ue-tataon mbule-b'oa na ra. Huu lele' hai minori nggi dala-d'ala' mia Lamatualain Dula-d'alen, naa 'ona' atahori mana tao tine-osi esa sela nggari. Dad'i lele' hai minori basa, na, nda saa sa boe mete ma hai simbo nanaa-nininu' mia nggi. Huu naa mema' nandaa!^c 12 Atahori laen mana nanori nggi na'ena hak fo simbo nanaat noo sud'i 'a saa laen mia nggi, to? Boe ma hai naa, ta'o bee? Hai hak ma lena' se fai!

Te hei bub'ulu' ena mae, hai nda parnaa mi'isusuu' mendi' hai hak ma ta'o naa sa. Hai mi'itataa' sia dala' mata'-mata', fo nda tao kai-b'aa mbali nggi sa. Noo ta'o naa, ama hii rena Kristus Hara-lii Malolen fo hai dui neu nggi' a. 13 Du'a sob'a! Malangga agama mana nalalao sia atahori Yahud'i ra Ume Hule-o'e Huu na, rasod'a mia tutunu-hohotu' fo atahori ra rendi' a. Boe ma atahori mana lole-lau sia mei tunu-hotu' a, bisa raa sisi mia banda fo atahori rendi' a.^d 14 'Ona' naa boe, Lamatualain helu-fuli nae, atahori mana lao' dui-b'engga Kristus Hara-lii Malolen, rasod'a mia sira ue-tataon buna-b'oa na. 'Ona' naa fo matetu'.^e

15 Mae au 'u'ena hak 'usod'a ta'o naa o, au nda hii tao ta'o naa sa. Au sura' susura ia nda 'u'ena masud fo hei fee sud'i 'a saa sa. Doo' ena au mete-se'u nggi te nda 'o'e saa-saa sia nggi sa boe. Dad'i malole lena' au mate, te hoko' na, atahori du'a rakandoo 'a rae au mulai hule-hule'. 16 Mae au 'ufad'e atahori 'ukundoo 'a so'al Kristus Hara-lii Malolen, te naa nda dad'i netehuu' fo au 'ola' nae' sa. Au musi 'ufad'e atahori so'al Lamatua', huu Lamatua' mana denu au ta'o naa ena. Mete ma au nda tao tungga ue-tatao ngga 'ona' naa sa, na, au soe ena ma! Ne'o huku-d'oki' a dai au. 17 Mete ma au tao ue-tataos ia ra huu 'aka' au hihii-nanau ngga, na, au hambu sud'i 'a saa naa ra, 'ona' atahori mana tao ues ra simbo nggad'i' neu' ena. Te mete ma au tao ue-tataos huu Lamatua' mana denu au, na, naa laen. Ana namahere au 'unea sud'i 'a saa mafeli na ra. 18 Dad'i mete ma ta'o naa, na, nggad'i ngga saa? Au nda parluu simbo nggad'i' sa? Au dui-b'engga Lamatualain Hara-lii Malolen, te nda 'o'e saa sa boe. Naa mana tao au rasa 'ae naa dai ena. Boe ma nemed'a dai ngga naa, 'ona' au nggad'i ngga boe. Dad'i mae au 'u'ena hak mata'-mata' 'ona' atahori mana na'ena ue-tataos fo dui-b'engga Hara-lii Malolen, te au nda nau pake basa hak ngga naa ra sa.

19 Au ia, atahori beb'as mana tao ues tungga hihii-nanau ngga. Atahori nda ra'ena hak fo denu au tao ues ia, do naa sa. Mae 'ona' naa o, au tao ao ngga 'ona' ate, fo basa atahori ra'ena hak denu au. Noo ta'o naa, au bisa tulu-fali atahori hetar lena' fai, fo ara ra'atataa' tungga Lamatualain. 20 Dad'i mete ma au 'u'ub'ue 'oo atahori Yahud'i ra, na, tao ao ngga 'ona' atahori Yahud'i ra, fo tulu-fali atahori Yahud'i ra fo rahine Lamatua'. Mete ma au 'u'ub'ue 'oo atahori mana to'u rahere' Lamatualain Hohoro-lalanen, au tao tungga Lamatualain Hohoro-lalanen, naa fo au bisa tulu-fali se fo rahine Lamatua', (mae au 'uhine 'ae, tao tungga Hohoro-Lalanen naa, nda bisa tao au malole 'oo Lamatualain sa). 21 Mete ma au 'u'ub'ue 'oo atahori mana nda fe'e rahine Lamatualain Hohoro-lalanen sa, na, au dad'i 'ona' se boe, fo 'oo se risi' Lamatualain. (Au nda mbo'i hendi Lamatualain Hohoro-lalanen fo Ana na'onda' fee ba'i Musa sa, te 'ale' ia au 'usod'a 'endi' Kristus Hohoro-lalane na).^f 22 Soa' neu atahori rala nda manab'e'i' ra sa, na, au tao rala ngga 'ona' nda manab'e'i' sa boe, fo bisa kokoe se risi' Lamatualain. Soa' neu basa atahori, au tao ao ngga 'ona' se, naa fo 'ona bee, na, au bisa tulu-fali fee masoi-masod'a' neu atahori ruma. 23 Au tao basa dala' ia ra, naa fo basa atahori bisa ramahere Lamatualain Hara-lii Malole na. Noo ta'o naa, hita bisa hambu bab'anggi' sia basa dala malole' ra, fo Lamatualain hii nae fee nggita' a.

24 Au fee nekendandaa' mia mana rela masesesu' ra. Atahori hetar tungga rela', te mana nasenggi' a, 'aka' atahori esa' a. Dad'i hei esa-esa' musi mela mihere' fo misenggi' soa' neu Lamatualain. 25 Basa atahori mana tungga rela' ra, musi rela' teb'e-teb'e' tungga neu 'aka' saa fo mana nanori' a nafad'e, to? Ara tao ues rita' mamate na ra 'ona' naa, fo hambu 'a solo sesenggi' mana dei fo mopo. Te hita tao ues hambu baba'e' mana na'atataa' losa doon neu. 26 Dad'i au nda 'ela' leli sa. Te au 'uhehere 'uhere' fo 'ela' ndoos losa nggaris mate'e na. Mete ma ne'esasama' au 'oo mana matutu' ra, na, au nda tutu anin sa, te au tutu dai se. 27 Au tao tungga dalan ma 'unori noo teb'e-teb'e' fo bisa 'u'utataa'. Huu mete ma au 'ufad'e atahori laen ra so'al Lamatualain, tao-tao te au mesa' nggo 'ulena-langga hohoro-lalane', ne'o Lamatualain nda simbo au sia masesesu' naa sa.