So'al nanaat fo atahori songgo-tanggu rendi' a
(Dui Selu' Dala Masod'a' 4:35,39; 6:4)
8
Ia na, au 'ae 'ola' so'al sisi fo atahori songgo-tanggu rendi' a. Basa nggita tahine nae' ena, so'al dala' ia ra. Salan, mete ma atahori nahine nae', na, ana koao, huu ana du'a nae eni mahine' lena' atahori laen ra. Malole lena' ata sue-lai too atahori laen ra. Huu naa mana tao fee basa atahori dad'i mad'ere' fo bisa ra'atataa' rala doo'.2 Mete ma hambu atahori du'a nae eni nahine ena, naa natud'u 'oi, eni mahinen nda fe'e dai sa. 3 Te mete ma hambu atahori sue Lamatualain, Lamatualain nahine eni ena. Naa' fo pantiin.
4 Dad'i mete ma atahori esa naa nita sisi sosonggo', basa nggita bub'ulu' tae, sud'i 'a saa sosonggo' sia raefafo' ia, naa nda Lamatualain matetu' sa. Huu tahine tae, “Hambu 'aka' Lamatualain esa fo matetu'.” Ma, “basa sud'i 'a saa sosonggo' fo atahori be'utee mbali' a, nda na'ena sosoan saa sa boe.” 5 Hambu sud'i 'a saa hetar sia lalai noo raefafo' ia, atahori ro'e rae, ‘lamatua'’ do ‘malangga’.
6 Te soa' neu nggita, Lamatualain 'aka' esa' a.
Eni, hita Ama na.
Basa-b'asa' e ra'oka sia E.
Hita tao basa' e fee neu E.
Boe ma hita Malanggan mana na'ena hak parenda nggita, 'aka' esa' a.
Naeni, Yesus Kristus.
Lamatualain pake Yesus,
lele' Ana tao basa-b'asa' e.
Boe ma hambu tasod'a,
huu Yesus mana fee nggita tasod'a.
7 Te hambu atahori nda rahine dala' naa ra sa. Ara fe'e du'a rakandoo 'a so'al sud'i 'a saa sosonggo na ra, 'ona' dalahulun ara parnaa dud'u'a. Naeni de, lele' ara raa sisi fo atahori parnaa songgo rendi', ara du'a rae, “Nanaat ia dad'i tutunu-hohotu' fo songgo rendi' ena! Mete ma au 'ua sud'i 'a saa ia ra, na, au fe'e nenepa'a' 'oo dala de'ulaka' ra!” Dad'i naa mana tao nalutu dud'u'a na ra, losa ara nda bisa dud'u'a matetu' sa ena, huu rala na ra nda be'i sa. 8 Eni netehuun saa? Nanaat nda bisa nendi nggita teu tisi' Lamatualain matan sa, to? Mete ma nda taa sa, hita nda bau de'ulaka sa. Boe ma mete ma taa, na, nda tao nggita dad'i atahori malole' sa boe, to?
9 Te besa-b'esa, o! 'Ita' mae mu'ena hak fo tao dala' esa o, tantu naa nda fe'e dad'i malole' fee neu nggo sa. 'Ona' hambu toronoo' atahori mamahere' esa ralan nda be'i sa, de mete ma nita nggo tao dala' naa, basa ma ana na'atunu, na, naa nda malole' sa! 10 Ho bub'ulu' aom dala' naa nda dad'i neu saa sa boe. Te mete ma hambu toronoom atahori mamahere' ralan nda be'i sa, nita nggo 'endo' mua sia ume sosonggo' a rala, dei fo ana nae saa? Tantu ana du'a nae naa nanaa sosonggo' o nda dad'i so'al soa' neu eni sa boe, 'ita' mae ara songgo rendi'. 11 Muhine dala' hetar ena. Te mete ma ho tao ta'o naa, tao mulutu atahori fo ralan nda be'i sa. Ma atahori naa, ho toronoo atahori mamahere ma. Kristus o mate soa' neu e boe! 12 Malole lena' du'a ta'o ia: mete ma ho tao toronoom fo ralan nda manabe'i' a sa, tao dala' esa fo rae naa sala, na, ho tao musala' neu se ena. Ma tao musala' neu Kristus ena boe. 13 Dad'i mete ma au 'ua sud'i 'a saa fo mana tao toronoo ngga atahori mamahere' ra tud'a sala', na, malole lena' au 'afi' 'ua sisi mata' naa. Mae losa bab'asan o 'ona' leo. Huu au nda nau fo ara tud'a sala' rala reu sa.