Sao tou'-sao ina' ra
7
Naa! Lele' ia au 'ae sura' so'al dala-d'ala' fo mitane sia hei susura ma mae, “'Ona bee? Malole lena', tou' ra 'afi' sao, do?”2 Ta'o ia: huu hambu kaka'e' nae' fo atahori bisa tud'a sia hohongge-b'ub'uni' a, naeni de malole lena' tou' esa sao 'aka' ina' esa. 'Ona' naa, ina' esa sao 'aka' tou' esa boe.
3 Sao tou' ra, e! 'Afi' mimopo saom hak na, fo sunggu' na'ab'ue noo nggo. Sao ina' ra, e! 'Afi' mimopo saom hak na, fo sunggu' na'ab'ue noo nggo. 4 Huu ina' fee aon fo dad'i tou' a 'enan ena. Boe ma tou' a o fee aon fo dad'i ina' a 'enan boe. 5 De esa 'afi' tola esa, huu hei ru'a nggi mi'ena hak! Te mete ma mae hule-o'e' a, ma nda nau du'a dala' laen ra sa, bisa mi'itataa' mbei fo nda sunggu' mi'ib'ue losa 'a sa. Sad'i tou'-ina' 'ola-'ola' noo malole' dei, ma mala hara' esa 'ona' naa. Boe ma mete ma hule-o'e basa, na, malole lena' ru'a nggi mi'ib'ue bali' leo. Mete ma nda ta'o naa sa, na, soe ena! Huu nitu ra malanggan kokoe mud'a' atahori nda mana ma'atataa' na'be'i aon sa. 6 Dala' ia au mana 'ola', nda Lamatualain hohoro-lalanen sa. 7 Tungga dud'u'a ngga, na, malole lena' atahori 'afi' sao, 'ona' au ia. Te Lamatualain fee atahori esa-esa' papala-b'ab'anggi' nandaa noo e. Hambu atahori ruma Ana fee se sao. Boe ma hambu atahori ruma fai Ana nda fee se sao sa.
8 Au 'ae 'ufad'e tou' ma ina' nda fe'e mana sao' sa, ma ina falu ra, fo, malole lena' 'afi' sao 'ona' au sie boe. 9 Te mete ma nda bisa mi'itataa' mala ao ma ra sa, na, malole lena' sao. Malole lena' atahori sao, te hoko' na, eni hihiin bisa nalutu bali' ao na.
10 Naa, ia nda mia 'a au mesa' nggo sa. Huu au 'ae 'ufad'e saa fo hita Malanggan parenda neu atahori manasao' ra nae, sao ina' nda bole mahela' noo sao na sa. 11 Te mete ma ana lao hela saon, na, sud'i boe sao selu' fai. Malole lena', heo' bali' fo bad'ame noo tou' a. 'Ona' naa boe, tou' nda bole mahela' noo saon sa.a
12 Naa, ia mia au mesa' nggo, nda mia hita Malanggan sa. Boe ma atahori laen ra, au 'ae 'ola' ta'o ia: mete ma hambu atahori sarani' fo sao inan nda namahere neu Kristus sa, na, 'afi' hela hendi e, mete ma saon nataa nasod'a nakandoo noo e. 13 'Ona' naa boe, mete ma hambu ina' fo saon nda namahere neu Kristus sa, na, 'afi' hela hendi tou' a, mete ma tou' a nau sira ru'a se rasod'a ra'ab'ue rakandoo. 14 Huu tou' fo nda namahere Kristus sa dad'i ndoo-meu' boe, huu nenepa'a' noo sao inan naa. Boe ma ina' fo nda mana namahere neu Lamatua' sa dad'i ndoo-meu' boe, huu nenepa'a' noo sao tou naa ena. Mete ma hoko', na, ana na ra nda ndoo-meu' sa. Te noo dala' ia, ara hambu cap ndoo-meu' sia Lamatualain matan ena. 15 Te mete ma hambu sao tou' do ina' nda ramahere neu Kristus sa, lao hela saon atahori mamahere', na, hela e neu leo. Huu tou' do ina mamahere' a nda nenepa'a' 'ona' naa sa ena. Lamatualain no'e nggi fo dad'i Eni atahorin, fo bisa misod'a noo nee-nee ma mole-d'ame. 16 Sao ina' mana mamahere' ra, e! Ne'o hei bisa fee masoi-masod'a' neu sao ma ra. Ma ne'o hoko' boe. Sao tou' mana mamahere' ra, e! Ne'ohei bisa fee masoi-masod'a' neu sao ma ra. Ma Ne'o hoko' boe. Hei nda mihine noo matetu' sa.
Tungga malolole Lamatualain Dala Masod'a na
17 'Ona' mae ta'o naa, te atahori tetende-nemberiin 'ona bee lele' Lamatualain no'e nala dad'i Eni atahorin, na, nasod'a nakandoo ta'o naa ena. 'Afi' tao laen fai, huu Lamatualain mana nauli ta'o naa. Au 'unori hohoro-lalane' ia ra neu basa atahori sarani' ra.
18 Conto 'ona' ia, mete ma hei parnaa sunat fo mitud'u mae, hei atahori Yahud'i, dei de Lamatualain no'e nggi, na, 'afi' mifinii sunat naa. Boe ma atahori fo nda fe'e sunat sa lele' Lamatua no'e se dad'i Eni 'enan, na, sud'i boe sunat fo dad'i tanda 'oi, sira dad'i Lamatualain atahorin ena. 19 Mete ma parnaa sunat, na, nda na'ena sosoan saa sa boe. Ma mete ma nda sunat sa boe o, naa o nda na'ena sosoan saa sa boe. Mana na'ena sosoa', naeni: hita tataon tungga Lamatualain parenda na ra. 20 Lele' Lamatualain pili nala nggi dad'i Eni atahorin, Ana nda denu nggi sunat, do 'afi' sunat sa. Dad'i hela neu fo ama ta'o 'a naa leo. 'Afi' tao laen fai.
21 Au fee nekendandaa' esa fai. Mete ma ho dad'i atahori aten lele' Lamatualain no'e nggo, na, hela neu fo dad'i ta'o 'a naa leo, nda saa sa boe. Te 'ita' mbei ma bisa dad'i atahori nenembo'i', na, dad'i ta'o' naa leo! Mete ma nda bisa dad'i atahori nenembo'it sa o, nda saa sa boe. 22 Huu lele' Lamatualain no'e atahori ate esa dad'i atahorin, ate naa dad'i 'ona' atahori nenembo'it mia ue-tataos fee neu Lamatua' sia ata'. Boe ma lele' Lamatualain no'e atahori nenembo'it esa dad'i Eni atahorin, lele' ia atahori naa dad'i Kristus aten ena. 23 Kristus bae na'etu' basa hei noo felin seli! Dad'i ama 'afi' dad'i ate soa' neu atahori laen.
24 Toronoo susue ngga ra, e! Lele' Lamatualain no'e nala nggi dad'i Eni atahorin, hei tetende-nemberiim ta'o bee, na, hela ta'o naa leo. 'Afi' tao laen fai. Hela neu ta'o 'a naa ena, fee neu Lamatualain.
So'al atahori nda mana sao' sa
25 Hei mitane au so'al nda fe'e masao' ra sa, mana nda parnaa sunggu'-soro ra'ab'ue sa. Lamatualain nda nafad'e au so'al dala' naa sa. Te hei bisa mimihere saa fo au 'ola', huu Lamatualain natud'u kasian neu au. Au du'a ta'o ia: 26 Lele' ia hita hambu doid'oso' mata'-mata'. Dad'i mete ma atahori 'ona bee, na, hela ta'o 'a naa leo. Au masud ngga ta'o ia: 27 Mete ma ho nenepa'a' moo saom, na, 'afi' mbo'i hendi e fai. Mete ma ho nda nenepa'a' moo sao ina ma sa ena, na, sud'i boe sangga mae sao selu' ina' laen fai. 28 Te mete ma ho dad'i sao, na, nda sala saa boe. Mete ma ina' nda fe'e parnaa sunggu' na'ab'ue noo tou' fo dad'i saon, na, ana nda tao sala' saa sa boe. Ma misined'a, te dei fo atahori masao' ra hambu sususa' mata'-mata' sia raefafo' ia. Au masud ngga naa fo ama 'afi' susa ta'o naa boe.
29 Toronoo susue ngga ra, e! Tungga au dud'u'a ngga, ta'o ia: fula-fai ra boe ra'ae'eku, boe ma fai matete'en deka-d'eka ena. De atahori fo masao' ra, 'afi' mete-se'u neu 'a saom, te musi taoafi' neu Lamatualain boe. 30 'Ona' naa boe, mete ma atahori nggae, malole lena' tao manggatee ralan fo sud'i nggae, naa fo bisa taoafi' neu Lamatualain. Mete ma hambu ruma rala na ra ramaho'o, malole lena' tao aon 'ona' nda ramaho'o sa, naa fo bisa taoafi' neu Lamatualain. Mete ma hambu mana bisa banda-hasa' nakandoo 'a, malole lena' masod'an 'ona' atahori nda mana na'ena saa-saa sa boe, naa fo ana bisa taoafi' neu Lamatualain. 31 Mete ma hambu mana pake sud'i 'a saa sia raefafo' ia, malole lena' ana tao aon 'ona' atahori nda mana namahena neu 'a sud'i 'a saa sia raefafo' ia sa, naa fo ana bisa taoafi' neu Lamatualain. Huu raefafo' ia lalaon dei fo sambu-lalo hendi se.
32 Au nau fo ama 'afi' dud'u'a ia-naa'. Huu atahori fo nda sao sa, fai kaka'e'n naen seli soa' neu Lamatualain hihii-nanau na. Naeni de ana bisa sangga dala' fo ue-tao namaho'o Lamatualain rala na. 33-34 Te atahori mana sao ena o musi taoafi' neu raefafo' ia hihii-nanaun boe. Ana nau taoafi' neu so'al Lamatualain hihii-nanaun boe, te eni o musi sangga dala' fo tao nemeho'o saon boe. Naa mana tao ralan bingga-b'anggi ia-naa.
'Ona' naa boe, ina' fo saon nese ena, ma ina' fo nda fe'e sao sa. Ara taoafi' neu so'al Lamatualain hihii-nanaun, naa fo ao na ra ma rala na ra o meu' boe. Te ina masao' ra, rala na ra ra'ab'ab'anggi ia-naa. Huu ana nau taoafi' neu Lamatualain hihii-nanaun, ma ana musi sangga dala' fo tao nemeho'o saon rala na. 35 Au 'ufad'e dala' ia ra neu nggi, naa fo ama hambu mita malole na ra. Au nda nau fo hei nenete'e-sii nala' sa. Au nanau ngga, hei tao ndoo-tetu', boe ma taoafi' neu Lamatualain hihii-nanaun, naa fo dud'u'a ma ra 'afi' bab'anggi ia-naa'.
36 Mete ma hambu tou' esa nae sao nala ina' esa, toon dai ena, na, hela se sao leo. Lelenan fai, mete ma tou' naa nda na'atataa' nala aon sa. Noo ta'o naa, ara nda tao sala' saa sa boe. 'Afi' losa ara 'aka' ra'ad'ed'ea' rakandoo 'a, boe ma neu fai ma'ab'uin ma, tou' naa tao dala nda matetu' ra sa. 37 Te mete ma ana na'atataa' nala aon, na, 'afi' ne'esusuu' e sao lai-lai. Huu ana nahine eni nae tao saa. Hela neu fo ana na'atataa' doo' o malole boe. 38 Dad'i tou' mana sao nala ina' fo eni hii' a, naa malole'. Boe ma nda manasao' a saa o, malole lena' fai.
So'al ina falu ra