Kristus ded'enu na ra fo Ana denu se reu sia bee-b'ee
4
Dad'i hei musi tao hai ta'o ia: 'afi' koa-koa' hai, huu hai 'aka' Kristus ded'enu na. Ma Lamatualain namahere hai fo minea matalolole dala-d'ala' fo dalahulun fe'e mana ma'afuni'. 2 Naa, atahori mana nanea malanggan sud'i 'a saa na ra, eni musi dad'i atahori mana tao tungga ndoo-tetu'. 3 Au 'ona bee? Au tatao ngga ra tungga ndoo-tetu' a, do hoko'? Au nda taoafi' hei mae nile au ta'o bee sa boe. Boe ma au nda taoafi' atahori laen ra nile au 'ona bee sa boe. Au o nda 'ita' 'ae nile ao ngga ta'o bee sa boe. 4 Huu 'ita' mae rala ngga nae au malole', nda fe'e bub'ulu' sosoan nae au malole' sa. Te pantiin na, Lamatualain nile au 'ona bee. 5 Boe ma, 'afi' tao ao ma ra 'ona' mana ma'etu' ded'eat fo nile atahori laen ra. Hela fo Lamatua' bali' nema dei. Te dei fo Eni mana natud'u basa dala' ra. Eni mana natud'u basa dala de'ulaka' fo atahori ra'afuni' se sia ma'ahatu' a. Ana nae natud'u dala-d'ala' fo atahori dud'u'a sia rala na ra. Boe ma Lamatualain nae nafad'e dala-d'ala malole' fo atahori tao' ra ena.6 Toronoo ngga ra, e! Au 'ola-'ola' so'al au 'oo 'a'a Apolos, 'ona' au fee conto esa fo hei bisa minori dala' sa mia hai, ta'o ia: Tao tungga 'a dala-d'ala' fo nenesura' sia Lamatualain Susura Meumare na. 'Afi' tao tungga laen ra fai. Mete ma hei minori dala' naa, ama sud'i boe tungga leli atahori, boe ma 'ola' nae' huu tungga atahori esa, boe ma miloe-mid'ae laen ra. 7 Dad'i, ta'o bee? Hei tao ao ma ra sia ata' laen moo laen ra, do? 'Afi'! Huu hei simbo basa' e mia Lamatualain. Dad'i mete ma ta'o naa, 'ona bee de ama koao, 'ona' hei mesa' nggi mana tao ao ma ra? 8 'Ona' basa' e fo hei parluu' ra, hei hambu ena. 'Ona' hei mimisu'i ena! Ama tao ao ma ra 'ona' atahori moko-monaen, 'ona' mane' e, de hai nda mib'ali saa-saa sa boe. Tao-tao te, Lamatualain fee saa fo ama parluu' ra. Te dei fo mete ma hei dad'i mane' teteb'es, mbei ma hai bisa to'u parenda' moo nggi boe, to?
9 Hai ia ra, Lamatualain mana denu mii sia bee-b'ee sia raefafo' ia, fo mifad'e atahori so'al Kristus. Te lao-lao esa, na, au du'a 'ona' Lamatualain denu hai mimbirii' sia dea-d'ea', 'ona' atahori bui mana nahani sira huku-d'oki mamate na ra. Boe ma Ana fee basa atahori sia raefafo' ia, ma ate na ra sia sorga, fo ara ranilu nggita. 10 Hei manaseli' teb'e ena! Huu hambu atahori rae hei ia ra, mahine', huu ama nenepa'a' moo Kristus ena. Te ara rae hai ia ra nggoa ma ra seli, huu hai dad'i Kristus atahori na. Mbei ma ara du'a rae hei ma'ad'ere ma ra seli teb'e ena. Te hai ia ra, mana male-ma'a' ra. Mbei ma ara so'u rananaru nggi. Te ara nda fee had'a-hormat mbei neu hai saa boe. Manaseli' ri teb'e! 11 Losa lele' ia o, hai mimed'a ndoe ma mi'imad'a. Hai bua-b'a'u ma ra mana sid'e-sid'e' re. Atahori ra 'aka' poko-paru hai. Hai 'ona' mana tara-koo' nda ma ume loo' sa. 12 Hai bengge tao ues mendi' lima ma ra. Mete ma atahori 'ola' mata'-mata' mbali hai, na, hai mitaa mae, “Hai mo'e Lamatualain tao dala malole' fee nggi.” Mete ma atahori tao ra'asususa' hai, na, hela neu fo hai mi'itataa' a.a 13 Mete ma atahori 'ola' ra'amuti hai nara ma ra, na, hai 'ola' moo se noo ded'ea-'o'ola se'e-na'us. Mae 'ona' naa o, atahori fe'e rae hai ia ra 'ona' see', do manggarau manggenggeo', nandaa ngganggari'.b
14 Au sura' dala' ia ra, nda 'ae tao 'u'umamae' nggi sa. Te au 'ae 'ena-'ai nggi, huu au sue nggi 'ona' au sue ana bonggi ngga boe. Naeni de au 'ufad'e nggi, fo tungga bali' dala ndoo-tetu' a. 15 Mae hambu atahori rifo-rata' bisa ratud'u nggi dala' so'al Kristus, te 'aka' au mesa' nggo mana dad'i hei ama ma. Huu au ia, atahori ma'ahulu' mana 'ufad'e nggi so'al Yesus Kristus Hara-lii Malole na. Naeni de ama mimihere neu E. Au tao ta'o naa, huu au nenepa'a malole' 'oo E. 16 De au 'o'e fo ama tungga noo malole' conto ngga ia.c
17 Naeni de au haitua Timotius fo tulu-fali nggi. Au sue e 'ona' au sue ana bonggi ngga boe. Au 'umuhere e, huu ana o nenepa'a' noo hita Malanggan boe. Dei fo ana tulu-fali fo fee nesenened'a' au dala masod'a ngga neu nggi. Au masod'a ngga 'ona' naa huu au nenepa'a' 'oo Yesus Kristus, fo Lamatualain haitua nema' a. Boe ma naa 'ona' saa fo au 'unori neu atahori sarani' mana ra'ab'ue sia bee-b'ee.
18 Hambu sia hei e dud'u'a mae, au nda dad'i 'eti sia naa sa. Naeni de ara koao. 19 Te mete ma hita Malanggan nau, na, nda doo' sa, te au 'eti sia kota Korintus ena. Dei fo au bub'ulu' mema', mete ma atahori ia ra 'ola' nae' 'a, do teb'e ra'ena koasa! 20 Huu Lamatualain, Mane' mana na'ena koasa. De atahori na ra nda maa mina fo rafefela atahori nemehere na ra sa, te rafefela rendi' koasa ndoo-tetu' a. 21 De hihii-nanau ma ra ta'o bee? Mete ma au 'uma, na, au 'ola' noo deres ma hukun nggi, do? Do 'uma 'utud'u susue' noo rala se'e-na'us ngga?