Hita atahori mamahere' ra musi tao ues noo rala' esa fee neu Lamatualain, boe ma 'afi' nereresi ia-naa
3
Toronoo susue' ra, e! Fai' naa lele' au sia naa, hei 'ona' atahori nda fe'e nenepa'a malole moo Lamatualain Dula-d'alen sa. Huu fe'e mihine tungga 'aka' hei mesa' nggi hihii-nanau ma ra, 'ona' atahori biasa. Naeni de au nda bisa 'ola-'ola' 'oo nggi 'ona' atahori moko ra sa, huu hei 'ona' anad'iki' re. 2 Au musi 'unori nggi so'al dala nggafat ra, huu ama nda fe'e bisa simbo dala mamabera' sa, 'ona' anad'iki' nda fe'e bisa naa sisi sa. Tao-tao te, hei musi dad'i ma'ad'ere', 'ona' atahori moko ra mana biasa raa sisi. Te lele' ia hei 'ona' anad'iki mana susu' fe'e ninu nahine' a susu.a 3 Huu hei fe'e du'a doa' 'ona' atahori mana nahine tungga 'aka' mesa' ne hihii-nanau na. Mete ma hambu atahori lena' hei naa, hei mburu-oe' moo se, ma mireresi ia-naa! Naeni de au 'ola' 'ae hei mihine tungga 'aka' mesa' nggi hihii-nanau ma ra. Noo ta'o naa, hei 'ona' atahori biasa sia raefafo' ia. 4 Huu hei ruma mae, “Au ia, Paulus atahori na!” Boe ma hambu ruma fai rae, “Au ia, Apolos atahori na!” Lele' hei 'ola' ta'o naa, hei mitud'u mae, hei 'ona' atahori biasa nda mana nahine Kristus sa.bHei 'ona' osi esa
5 Tao-tao te, Apolos naa, seka? Ma au, Paulus ia, seka? Huu hai ru'a nggi dad'i' a ate. Hai mana mitud'u dala' fee nggi fo bisa mimihere Kristus. Apolos nalalao ue-tataon tungga Lamatualain parenda na. Au o ta'o naa boe! 6 Au mana 'ufad'e 'u'uhulu' nggi so'al Kristus. Naa 'ona' au mana sela fini. Basa ma Apolos nema nanori nggi. Naa 'ona' eni mana nema 'o'oni fini fo au sela' a. Te Lamatualain mana tao fini a mori ma na'amoko.c
7 Dad'i atahori mana sela fini a nda na'ena sosoa' sa. Boe ma mana 'o'oni a o nda na'ena sosoa' sa boe. 'Aka' dala' esa fo na'ena sosoa-ndandaa'. Naeni Lamatualain. Huu Eni mana tao fini a mori. 8 Atahori mana sela nggari noo atahori mana 'o'oni a, ara tao ues ra'ab'u'e reu esa, 'ona' sira sia nononggo' esa. Boe ma, basa atahori mana nalalao Lamatua' ue-tataon, dei fo Ana bala-b'ae beb'engge na ra. 9a Huu hai ru'a nggi dad'i Lamatualain atahori mana tao ues na ra. Boe ma hei dad'i 'ona' Lamatualain osin fo Ana nae tao' a.
Hei 'ona' ume esa
9b 'Ona' naa boe, hei 'ona' ume esa fo Lamatualain nae naririi e. 10 Naa, Lamatualain natud'u rala malolen neu au ena. Naeni de au 'ona' malangga tukan. Lamatualain tulu-fali au de 'unori dala-d'ala netehuu' ra neu nggi mia fefeun, fo neririi netehuu' a manggatee' sia masod'a ma ra. Boe ma atahori laen ra ranori nggi, de raririi sia netehuu' fo au tao' naa. Te tukan ra esa-esa' musi tao noo malole' ma naririi noo matetu'. 11 Netehuu manggatee' a sia ena. Naeni Yesus Kristus. Dad'i nda hambu atahori bisa naririi netehuu' laen sia rala ma ra, huu Lamatualain tao netehuu matetu' ena.
12 Tantu hambu atahori mana rae rafefela sia netehuu' naa rendi' sud'i 'a saa mata'-mata'. Ruma rae pake sud'i 'a saa mafelit 'ona' lilo, doi fula', do fatu makahahad'o' naa. Ruma rae pake sud'i 'a saa 'ona' hau, uru, do uru fii a. 13 Te tukan ra esa-esa' ue-tataon dei fo nenenita', boe ma basa atahori bub'ulu' sira ue-tatao na ra, malole' do hoko'. Huu dei fo mete ma neu fai matete'en, Lamatualain nau uji se, Ana natud'u atahori esa-esa' noo tatao-nono'in nendi' ai fo natud'u atahori esa-esa' tatao-nono'in na'atataa', do hoko'. 14 Mete ma uji atahori esa tatao-nono'in nendi' ai ena, boe ma sud'i 'a saa fo eni tao nendi' naa fe'e na'atataa', dei fo Lamatualain fee ne bab'ae' sia sorga. 15 Te mete ma uji atahori tatao-nono'in nendi' ai, boe ma sud'i 'a saa fo tao nendi' neu netehuu' a ata, na, kad'e hendi e, na, Lamatualain nda fee atahori naa bab'ae' saa sa boe. Te tukan a fe'e hambu masoi-masod'a', mae 'ona' atahori mana nela dea neu mia ume mana kad'e hendi' a ma nae 'a mate.
Hei 'ona' Lamatualain ume hule-o'en esa
16 Hei musi mihine mae, hei 'ona' Lamatualain ume hule-o'en esa, ma Dula-d'alen leo sia rala.d 17 De mete ma hambu atahori tao nanggenggeo Lamatualain ume hule-o'en, naeni mamana leleon naa, na, besa-b'esa, o! Dei fo Lamatualain huku-d'oki e boe! Huu Lamatualain ume hule-o'en naa, meumare'. Naeni de hei musi meumare' boe.
18 Hei 'afi' pepeko-leleko' ao ma ra! Mete ma mae ho mahine', ma muhine tungga basa atahori raefafo' ia mahine na ra, naa sosoan nae nda muhine saa sa boe. Mete ma muhine ena mae, ho nda muhine saa-saa sa boe, dei fo ho fe'e bisa munori ena. 19 Atahori raefafo' lele' ia dud'u'a na ra, Lamatualain nae, nggoa' ra. Huu sia Susura Meumare' nenesura' 'oi:
“Hambu atahori rae sira mahine' re,
te dei fo Lamatualain pake sira dud'u'a de'ulaka na ra,
de te'e-sii bali' fo tao nalutu se!”e
20 Sia tatad'a' laen nenesura' 'oi,
“Hita Malanggan bub'ulu' saa fo atahori mahine' ra dud'u'a' ra ena,
boe ma atahori mana nahine eni nae tao ta'o bee,
Ana bub'ulu' ara du'a' a dala-d'ala mana parsuma' ra.”f
21-22 De ama 'afi' koa-koa' atahori esa mae, manaseli'. Huu Lamatualain mana so'u atahori fo nalalao nggi. Basa e dad'i hei 'enam ena. Dad'i hei malangga ma ra, 'ona': au, 'a'a Apolos, ma 'a'a Petrus,g basa hai dad'i mii hei 'ena ma ra ena. Boe ma basa dala' sia raefafo' ia dad'i hei 'ena ma ra ena, de mae hei misod'a do mate o, sia lele' ia do fai mana nema', basa' e dad'i hei 'ena ma ra. 23 Ma hei dad'i Kristus 'ena na. Ma Kristus dad'i Lamatualain 'ena na!