Hita musi tafad'e relo-relo so'al Lamatua' Yesus mamaten sia hau nggangge' a neu basa atahori
2
Toronoo susue ngga ra, e! Dalahulun, lele' au 'uma mia nggi, au 'ola' ma 'ufad'e neu nggi Lamatualain rasian fo dalahulun atahori nda rahine' a sa. Te au nda 'ola' koaot 'endi' ded'ea-'o'ola' naa ra sa. Ma au o nda 'ola' 'endi' ded'ea mad'iku' fo 'utud'u mahine ngga sa. 2 Lele' au fe'e 'u'ub'ue 'oo nggi, au dud'u'a ngga ta'o ia: au 'ae 'utud'u 'a dala' esa, naeni Yesus Kristus. Eni, Atahori fo Lamatualain helu mema' eni' a lele ulu' a nae haitua nema. Te lele' Yesus nema, atahori mbaku risa E mia hau nggangge' ata. Huu 'aka' dala' naa, fo au 'uhine noo matetu'.3 Fai' naa, lele' au 'u'ub'ue 'oo nggi, au med'a nda talalu bisa sa, ma au o 'umutau ma ao ngga foti ngge'e-ngge'e boe.a 4 Au 'o'ola ngga ma helu-fuli ngga nda mad'iku' sa. Huu au nda 'ola' 'endi' ded'ea lena'-lena' fo kokoe nggi sa. Hoko'! Te lele' au 'ola', na, matetu' ena 'oi, Lamatualain Dula-d'ale Meumaren nauli au, noo koasan sia au boe. 5 Te au du'a nda malole' sa mete ma mimihere neu Lamatualain, huu hei rena 'a atahori ded'ea-'o'ola mahine na. Malole lena' ama mimihere neu Lamatualain, huu Ana natud'u koasan neu nggi.
Lamatualain nanori nggita so'al dala-d'ala mahine ndoo-tetu' a
6 Tao-tao te, lele' hai 'ola-'ola' moo atahori fo nemeheren teme-ao ena, hai minori mendi' ded'ea-'o'ola' mana maso' dud'u'at. Te nda maso' dud'u'at tungga raefafo' ia dud'u'an sa, do tungga saa fo 'ale' ia atahori mana to'u parenda' ra hii 'a ranori. Huu dei fo mopo hendi' se. 7 Te hai minori' a dala-d'ala mahine' fo Lamatualain na'onda' nema' a. Huu dalahulun, lele' raefafo' nda fe'e dad'i sa, Lamatualain na'afuni' dala' naa ra. Lele' ia, Ana na'etu' nae natud'u rasia naa neu nggita ena, naa fo hita o hambu bab'anggi' sia Lamatualain nara manaseli na. 8 Te atahori mana to'u parenda' lele' ia, ara nda rahine noo matetu' Lamatualain mahinen sa. Huu mete ma ara rahine, na, tantu ara nda mbaku risa hita Malangga mandete-masa'a'n naa sia hau nggangge' a sa.
9 Sia Susura Meumare' a nenesura' so'al Lamatualain rasian, fo lele ulu' a mana nenefuni' 'oi,
“Hambu dala' fo atahori nda fe'e parnaa rita noo matan sa,
ma hambu dala' fo atahori nda fe'e rena rita noo ndikin sa,
fo atahori nda bisa dud'u'a rala sa.
Tao-tao te, Lamatualain mana sad'ia mema' basa dala' naa ra ena,
fee atahori mana sue Eni.”b
10 Mema' dalahulun atahori nda rahine dala' naa ra sa, te lele' ia Lamatualain nafad'e relo-relo dala' naa ra neu nggita nendi' Dula-d'ale na.
Dad'i Lamatualain Dula-d'alen nahine basa dala' ra. Huu Ana o paresa' losa lutu'-lelo' Lamatualain ralan boe. 11 Hita o esa-esa' na'ena dula-d'ale' sia rala ta ra. Naeni de hita atahori dud'u'a ma tao dala' nda 'ona esa' sa. Boe ma nda hambu atahori laen rahine losa hita ralan sa, 'aka' hita dula-d'ale na. Lamatualain o 'ona' naa boe. Nda hambu atahori esa boe nahine Lamatualain rala na sa. 'Aka' Lamatualain Dula-d'alen fo mana nahine teb'e.
12 Naa, hita simbo tala Lamatualain Dula-d'alen ena, ma Eni mana nauli nggita. Naeni de hita nda tungga atahori sia raefafo' ia dud'u'a na ra sa. Huu Lamatualain Dula-d'alen sia rala ta ra ena, naa de hita bisa tahine basa dala malole' fo Ana tao fee nggita' a ena.
13 Dala' naa ra fo hita biasa 'ola-'ola'. Huu hai mifad'e dala-d'ala' fo Lamatualain Dula-d'alen nanori neu hai. Ma hai nda minori mendi' ded'ea-'o'ola' tungga atahori dud'u'an sa. Te hai minori mendi' ded'ea-'o'ola' mia Lamatualain Dula-d'alen, fee atahori mana rahine Lamatua'. 14 Te mete ma hambu atahori nda nahine Lamatualain Dula-d'alen sa, basa ma ana rena hai 'o'olam, ana nda nau simbo noo malole' sa. Te ana du'a nae, “Saa naa? Nda maso' dud'u'at sa!” Tao-tao te, mae ta'o bee o, atahori naa nda bisa nahine dala' naa ra sa, huu nda nenepa'a' noo Lamatualain Dula-d'alen sa. 15 Atahori mana nasod'a nenepa'a' noo Lamatualain Dula-d'alen, mana bisa nahine basa dala' naa ra, boe ma bisa bub'ulu' bee ka ndoo-tetu'. Te atahori laen ra nda uku-uli rala atahori naa sa. 16 Nda bisa sa? Te nenesura' sia Susura Meumare' 'oi:
“Seka bisa nahine Lamatualain dud'u'a na?
Do seka bisa nauli Lamatua',
fo Ana tao tungga atahori naa nenori na?
Nda hambu esa sa boe!”c
Tao-tao te, hita bisa tahine dala' naa ra, huu Kristus tulu-fali nggita fo ata bisa dud'u'a tungga Eni dud'u'a na.