Paulus haitua hara' fee toronoo' ra sia Roma
16
Sia susura ia, au nau 'ae fee nggi mihine hita toronoon 'a'a Febe, ma 'o'e fo ama simbo e. Ara so'u e fo nalalao jama'at sia kota Kengkrea. 2 Au 'o'e fo simbo e noo malole', 'ona' hei simbo atahori sarani' ra, huu eni nenepa'a' noo hita Lamatua na. Ana parluu saa, na, tulu-fali e neu' ena. Huu ana tulu-fali au o atahori nae' eni' a ma'ahulu na.3 Fee hara sod'a-mole ngga neu 'a'a Priskilaa noo saon, 'a'a Akila. Hai milalao Yesus Kristus ue-tataon naen seli ena.b 4 Hela 'a mbei na ru'a see mate huu rasala'e au. Te nda 'aka' au mesa' nggo mana 'o'e makasi neu se. Huu atahori nda Yahud'i ra sa mana dad'i atahori sarani' sia bee-b'ee, ara o ro'e makasi huu sira tutulu-fafali na.
5 Fee hara sod'a-mole ngga neu basa atahori mana ra'ab'ue fo nggarei sia Priskila ma Akila umen.
Fee hara sod'a-mole' neu nonoo ngga, 'a'a Epenetus. Eni, atahori kaesan mana namahere neu Kristus sia profinsi Asia.
6 Fee hara sod'a-mole' neu 'a'a Maria. Ana tao ues nita' mamaten sia talad'a ma ra.
7 Fee hara sod'a-mole' neu 'a'a Andronikus noo 'a'a Yunia.c Sira atahori Yahud'i, 'ona' au boe. Ara ramahere neu Kristus ena lele' au nda fe'e 'umuhere sa. Fe'esa'an ara mia bui rala roo au. Ara o dad'i Lamatua' ded'enun, ma atahori hetar rahine se boe.
8 Fee hara sod'a-mole' neu 'a'a Ampliatus. Au sue e, huu ana nenepa'a' noo hita Lamatua na.
9 Fee hara sod'a-mole' neu 'a'a Urbanus. Ana o nalalao Kristus ue-tataon na'ab'ue noo hai boe.
Fee hara sod'a-mole' neu 'a'a Stakis fo au sue' a.
10 Fee hara sod'a-mole' neu 'a'a Apeles. Ana hambu sosob'a-d'od'ou', te ana nala seri. Dad'i teb'e-teb'e' ana namahere Kristus.
Fee hara sod'a-mole' neu basa 'a'a Aristob'ulus bob'onggi na ra.
11 Fee hara sod'a-mole' neu 'a'a Herodion. Eni o atahori Yahud'i 'ona' au boe.
Fee hara sod'a-mole' neu basa Narkisus bob'onggin mana ramahere neu Kristus ena.
12 Fee hara sod'a-mole' neu 'a'a Trifena noo 'a'a Trifosa. Ina karua' ia ra o ralalao hita Lamatuan ue-tataon boe.
Fee hara sod'a-mole' neu nonoo ngga, 'a'a Persis. Huu ina' ia tao ues nita' mamaten soa' neu hita Lamatuan boe.
13 Fee hara sod'a-mole' neu 'a'a Rufus. Hita Lamatuan mana pili nala e.
Fee hara sod'a-mole' neu maman boe. Huu eni, 'ona' au mama bonggi ngga boe.d
14 Fee hara sod'a-mole' neu 'a'a Asinkritus, 'a'a Flegon, 'a'a Hermes, 'a'a Patrobas, 'a'a Hermas, ma basa toronoo' mana leo roo se.
15 Fee hara sod'a-mole' neu 'a'a Filologus, 'a'a Yulia, 'a'a Olimpas, 'a'a Nereus noo feton, ma basa atahori sarani' mana ra'ab'ue roo se.
16 Mete ma basa nggi mi'ib'ue, na, esa 'id'u esa noo susue-lalai' mana nandaa soa' neu atahori mamahere' ra. Kristus Jama'at na ra mana sia ia ra o fee nggi hara sod'a-mole' boe.e
Paulus nanori-nefad'e se
17 Toronoo' ra, e! Au 'o'e nggi besa-b'esa, o! Minea malolole, huu hambu atahori tao nggi sea-saranggaa, rae ra'ahehengge-ra'atutud'a' nggi. Saa fo ara rafad'e neu nggi, lab'an neu saa fo hai mifad'e neu nggi ena. De 'afi' mi'ib'ue moo atahori mata' naa ra! 18 Ara nda ue-tao fee hita Lamatuan Yesus Kristus sa, te ara ue-tao soa' neu 'a ao na ra. Ara 'ola' noo maa mina na ra neu atahori nda mana fe'e rahine bee malole' ma bee de'ulaka' sa. Ara tipu-laka atahori noo maa mina na ra.
19 Basa atahori rena rae, hei tungga Lamatualain hihii-nanaun mikindoo 'a. Naa de rala ngga namaho'o huu hei. Au nau fo ama mihine dala malole' ra, ma 'afi' mi'ib'ue moo dala de'ulaka' ra. 20 Lamatualain, mana bisa fee nggita tasod'a noo mole-d'ame. Dei fo Eni mana tao nalutu nitu ra malanggan koasan, ma natud'u nae, hei misenggi'. Nda doo' sa te Ana nalutu e ena. Au hule-o'e mbali hita Lamatuan Yesus Kristus fo natud'u rala malolen neu nggi.
21 'Od'i Timotius, mana ue-tao noo au, ana haitua hara sod'a-mole' fee nggi.
'A'a Lukius, 'a'a Yason, noo 'a'a Sosipater o haitua hara sod'a-mole' boe. Sira atahori Yahud'i 'ona' au boe.f
22 (Au ia, Tertius, mana sura' susura ia tungga saa fo 'a'a Paulus denu sura' a. Sod'a-mole' mia au boe, huu au o hita Lamatuan atahorin boe.)
23 Au, Paulus, numban sia 'a'a Gayus ume na. Basa atahori sarani' sia ia hii 'a ra'ab'ue fo nggarei sia ume na. Ana o haitua hara sod'a-mole' boe.
'A'a Erastus, mana to'u doi' sia kota, noo hita toronoon Kuartus o haitua hara sod'a-mole' boe.g
24 [Au 'o'e fo hita Lamatuan Yesus Kristus natud'u rala malolen neu basa nggi. Ta'o 'a naa ena]h
Lamatualain naa, manaseli'
25 Koa-kio Lamatua'! Huu Eni mana na'ena koasa fo tao nggi ma'ad'ere. Hara-lii Malolen nafad'e ta'o naa, ma au o 'unori atahori ta'o naa boe, lele' au 'ufad'e se so'al Yesus Kristus. Lamatualain mana natud'u dala' neu basa hita so'al Kristus, fo atahori ma'ahulu' ra nda rahine sa, huu fe'e ma'afuni'. 26 Te ia naa, saa fo Lamatualain mana 'ola-'ola na ra sura' sia Susura Meumare' a, nenenehine' ena. Lamatualain, nda mana mate' a sa, Ana mana ator fo atahori mia basa nusa' ra rahine saa fo ma'ahulun ma'afuni'. Noo ta'o naa, ara bisa ramahere neu E, ma tao tungga hihii-nanau na. 27 'Aka' Mesa' ne, Lamatualain. 'Aka' mesa' ne nahine basa dala' ra. Au hii so'u kokoa-kikio' neu E, huu Yesus Kristus tataon! Naa teb'e!
Susura ngga losa 'a ia.
Sod'a-mole',
Paulus