Nehehere fo bau tao ma'ad'ere atahori laen ra nemehere na ra
15
Hita mana tamahere tahere' ra, musi ta'atataa' fo tulu-fali atahori fo nemehere na ra nda fe'e manggatee' ra sa, naa fo ara ra'atataa' sia sususa'. Nda malole' sa mete ma hita 'aka' tao tamaho'o 'a ao ta ra. 2 Au masud ngga ta'o ia: hita esa-esa' musi tahehere fo tao malole' soa' neu toronoo atahori sarani ta ra, naa fo nemehere na ra bau manggatee. Noo ta'o naa, ara ramaho'o roo nggita. 3 Huu Yesus Kristus o nda tao ue-tataon fo tao namaho'o 'a aon sa, te Ana nau tao namaho'o Lamatualain ralan boe. Naa 'ona' mana nenesura' mema' sia Lamatualain Susura Meumaren so'al saa sangga nae dad'i neu Yesus 'oi,“Ne'emuti na ra soa' neu nggo,
tud'a dai Au boe.”a
4 Basa saa fo atahori sura' mia lele ulu' a sia Lamatualain Susura Meumare na ra, nenesura' fo nenori neu nggita. Ana natud'u dala' fo tao nggita bau manggatee, bau ne'etataa' nehere, ma Ded'ea-'o'olan o fee nggita neserembot. Noo ta'o naa, hita tahani fo nau tita Lamatualain natud'u rala malolen neu nggita.
5 Lamatualain mana tao atahori ra'atataa' rala ao na ra mia sosob'a-d'od'ou'. Ma Eni mana fee rala ta ra ma'ad'ere. Au hule-o'e fo Ana natud'u dala' fo tasod'a noo rala' esa tungga Yesus Kristus hihii-nanau na. 6 Huu mete ma hei rala' esa ta'o naa, na, hei bisa mi'ib'ue so'u kokoa-kikio' soa' neu Lamatualain. Eni, hita Lamatuan Yesus Kristus Ama na.
Lamatualain Hara-lii Malolen soa' neu atahori Yahud'i ma atahori nda Yahud'i ra sa boe
7 Dad'i hei musi simbo esa noo esa, 'ona' Kristus simbo hei. Huu mete ma misod'a ta'o naa, na, dei fo atahori ra so'u rananaru Lamatualain nara na. 8 Au 'ufad'e ta'o ia: Kristus tao aon 'ona' atahori ded'enu' fo tulu-fali atahori Yahud'i ra fo rahine 'oi, Lamatualain 'ola' teb'e. Ma Kristus o tao aon 'ona' atahori ded'enu' fo tao natetu basa dala' fo Lamatualain helu-fuli nae tao fee neu bei-ba'i ta ra. 9 Noo ta'o naa, basa nusa' laen nda Yahud'i ra sa, so'u koa-kio neu Lamatualain. Huu ara rahine rae, Ana na'ena susue' soa' neu basa nggita. Naa 'ona' Daud sura' mia lele ulu' a sia Susura Meumare' a nae,
“Naeni de au nau so'u 'unanaru Naram,
neu nusa-nusa' laen ra.
Au nau sod'a sosod'a kokoa-kikio' so'al nggo
sia nusa' laen ra mata na ra.”b
10 Sia tatad'a' laen sia Susura Meumare' a nenesura' 'oi,
“Wee! Hei atahori dea' mia mamana' laen ra, e.
Tao rala ma ra ramaho'o,
mi'ib'ue moo Lamatualain atahori na ra.”c
11 Sia tatad'a' laen sia Susura Meumare' a, Daud sura' nae,
“Hei mana mia nusa' laen ra, e,
mii mifad'e basa atahori so'al Lamatualain manaselin,
fo ara o so'u koa-kio neu hita Lamatuan boe.”d
12 Sia tatad'a' laen fai, sia Susura Meumare' a, ba'i Yesaya sura' nae,
“Mia Isai anan, mane Daud,
dei fo tititi-nonosin esa nema.
Dei fo Eni mana to'u parenda' soa' neu nusa' laen ra.
Ara rahine neneman ena.
De ara nea-nea' E,
huu ara rahine Eni seka.”e
13 Lamatualain dad'i neu netehuu' mia basa hita nemehena na. Au hule-o'e 'ae huu hei mimihere neu E, de dei fo Ana tao rala ma ra ramaho'o ma nee-nee lino-lino. Ma Lamatualain koasa Dula-d'ale Meumaren, tao rala ma ra bau mimihere neu saa fo Ana nae tao' naa.
Lamatua' denu Paulus fo neu dui-b'engga Hara-lii Malolen
14 Toronoo ngga ra, e! Au 'umuhere ena 'ae, hei rala ma ra sofe' noo dala-d'ala malole' ra ena, mihine naen seli ena, ma hei o bisa minori esa noo esa ena. 15 Au sura' relo-relo ta'o ia sia susura ia, fo fee nesenened'a' neu nggi lao esa fai so'al ded'eat mata'-mata'. Au sura' ta'o ia, huu Lamatua' natud'u rala malolen neu au, 16 lele' Ana so'u au dad'i Yesus Kristus ded'enun mana musi neu dui-b'engga Lamatualain Hara-lii Malolen neu atahori nda Yahud'i ra sa. Au 'ulalao ue-tatao ngga naa, 'ona' malangga agama esa mana nae tao nahehere atahori nae' dad'i 'ona' tutunu-hohotu' esa mana tao nemeho'o Lamatualain rala na. Te Lamatualain Dula-d'ale Meumaren naa, tao fee se dad'i meumare', fo Lamatualain bisa simbo se.
17 Huu au nenepa'a' 'oo Yesus Kristus, naeni de au boti' 'ala mata ngga sia Lamatualain mata na. 18 Au nda 'umburani 'ola' dala' laen sa. Au dui-b'engga 'a Kristus ue-tataon, ma ta'o bee fo Ana pake au. Ia naa hambu atahori nda Yahud'i ra sa rena neu Kristus, huu Lamatua' pake au, fo 'utud'u dala' 'endi' ded'ea-'o'ola ngga ma ue-tatao ngga. 19 Kristus fee koasa neu au mia Lamatualain Dula-d'alen, fo au bisa tao manad'ad'i manaseli' mata'-mata'. Ana fee koasa naa neu au fo nae natud'u 'oi, Kristus naa, seka. Noo ta'o naa, au 'ufad'e atahori sia bee-b'ee, so'al Kristus Hara-lii Malolen ena. Naeni, au 'ufad'e mia kota Yerusalem, rereo' losa Ilirikum deka Italia. 20 Eni' a lele ulu' a, au dud'u'a 'ae, “Au hii dui-b'engga so'al Kristus neu atahori nda fe'e mana rena neu Hara-lii Malolen sa!” Huu au nda hii 'unori sia mamana' fo atahori laen ra ranori basa ena sa. 21 Sia Lamatualain Susura Meumaren, nenesura' 'oi,
“Nusa' mana nda fe'e rena rita so'al Lamatualain sa,
dei fo sira mana rita E.
Atahori mana nda fe'e rena saa-saa sa boe,
dei fo sira mana rahine so'al Eni.”f
Paulus du'a nae neu sia kota Roma
22 Huu au ue-tatao ngga ta'o naa, de au nda fe'e dad'i 'eti se'u nggi sa.g 23 Te ia naa, au ue-tatao ngga mana sia ia ra basa ena. Ma eni' a doon seli losa too-too ena, au rala ngga hii 'ae 'eti se'u 'ita nggi. 24 Dei fo mete ma au 'uu sia nusa Spanyol, au 'ae tuli fo se'u 'ita nggi. Ma mete ma au tuli sia nggi, na, hei o bisa tulun fee au doi dala' mbei fo lao Spanyol 'uu.
25 Te ia naa, au 'ae 'uu sia Yerusalem dei, fo mete-se'u Lamatua' atahori mamahere na ra sia naa. 26 Huu hita toronoo na ra mana sia profinsi Maked'onia noo profinsi Akaya, fee doi kolekte fo tulu-fali atahori mana tud'a-loloe' mana ramahere neu Kristus sia Yerusalem.h 27 Ara nau tao ta'o naa, huu ramed'a rahuta toronoo ta ra sia Yerusalem. Te atahori mia nusa' laen sia sud'i 'a bee-b'ee o simbo dala malole' fo Lamatualain Dula-d'alen fee neu atahori Yahud'i ma'ahulu' ra boe. Dad'i mete ma atahori sarani' nda Yahud'i ra sa, nau rae tulu-fali toronoo Yahud'i na ra rendi' hata-heto na ra, naa nandaa.i
28 Dad'i mete ma au tao 'ute'e ue-tataos ia, fo tulu-fali toronoo ta ra sia Yerusalem ena, na, au 'ae tuli fo se'u nggi lele' au lao Spanyol 'uu. 29 Dei fo mete ma au 'uma, au 'ae 'endi papala-b'ab'anggi' nae' mia Kristus.
30 Toronoo ngga ra, e! Huu Yesus Kristus dad'i hei Lamatuam, ma huu Lamatualain Dula-d'alen tao nggi esa sue-lai esa, naeni de au 'o'e fo ama hule-o'e teb'e-teb'e' fo Lamatualain tulu-fali au. 31 Mo'e Lamatualain nanea au sia profinsi Yud'ea, fo atahori nda mana nau ramahere Lamatua' sa 'afi' tao de'ulaka au. Ma mo'e fo mete ma au 'uu mete-se'u atahori sarani' sia Yerusalem, na, ara simbo au noo malole'. 32 Ma, mete ma tungga Lamatualain hihii-nanaun, au bisa 'uma se'u nggi noo rala nemeho'ot boe. Au 'ae hahae 'ala ao ngga mbei sia hei e. 33 Au hule-o'e fo Lamatualain na'ab'ue noo nggi. Huu Eni mana bisa tao atahori rasod'a noo mole-d'ame. Teb'e!