'Afi' kartiik leli toronoo atahori sarani ma ra
14
Hambu atahori ramahere neu Lamatua' ena, te nemeheren nda fe'e mahere' sa ma nda fe'e nahine dala' hetar sa. De mikimbela lima ma ra fo simbo mala e noo malole'. 'Afi' mireresi so'al dud'u'a na. Hela e na'ab'ue noo nggi. 2 Hambu atahori mana ramahere neu Lamatua' du'a rae, atahori sarani' bisa raa sud'i 'a saa, 'ona' sisi do, saa do. Te atahori sarani' laen, fo nemehere na ra nda mahere' sa, raa 'aka' uta' hau roo. Huu ara raluli sisi. 3 Te rena, e! Atahori sarani' mana nae eni bisa naa sud'i 'a saa, 'afi' neloe-ned'ae atahori nda mana nau naa sisi sa. 'Ona' naa boe, atahori sarani' nda mana nau naa sisi sa, 'afi' mifad'e atahori mana naa sisi a mae, “Weh! Mia sisi, na, sala!” Huu Lamatualain simbo ru'a se fo dad'i Eni atahorin ena!4 Mete ma ho 'aka' kartiik toronoo atahori mamahere ma ta'o naa, na, du'a mae ho ia seka? Mu'ena hak saa fo fee sala' neu atahori laen? Eni nda atahori mana tao ues ma sa! Ma ho, nda eni malanggan sa. Huu 'aka' eni Lamatuan, mana na'ena hak fo nafad'e relo-relo, eni tao' naa, ndaa do sala. Te 'afi' lilii'. Dei fo Eni Lamatuan mana simbo atahori naa noo malole', huu Lamatuan bisa tao e dad'i ma'ad'ere' fo ana bisa na'atataa'.
5 Hambu atahori ruma ra'etu' rae, fai esa malole' lena' fai laen ra. Hambu atahori laen du'a rae, basa fai ra 'ona esa', nda hambu fai esa fea noo esa sa boe. Atahori esa-esa' musi na'etu' ded'eat naa ao na. 6 Mete ma atahori mana du'a nae hambu fai esa malole' lena' fai laen, na, ana tao ta'o naa fo natud'u had'a-hormat neu hita Lamatua na. Atahori mana naa sisi noo naa sud'i 'a saa laen, ana bisa naa fo natud'u had'a-hormat neu hita Lamatuan, huu ana no'e makasi mbali Lamatualain. 'Ona' naa boe atahori nda mana naa sisi a sa. Ana o nae natud'u had'a-hormat neu hita Lamatuan, ma ana no'e makasi neu Lamatua' boe.a
7 Naa, lele' hita tasod'a, hita nda tasod'a fee neu 'a ao ta ra sa. Boe ma mete ma hita mate o, hita nda mate fee neu 'aka' ao ta ra sa. 8 Te mete ma hita fe'e tasod'a, hita ta'ab'ue teu esa too hita Lamatua na. 'Ona' naa boe, mete ma hita mate, hita fe'e ta'ab'ue teu esa too hita Lamatua na. Dad'i mae tasod'a, do ata mate o, hita fe'e dad'i Eni 'ena na boe. 9 Naeni de Kristus mate, basa ma nasod'a bali'. Ana tao ta'o naa, naa fo Ana dad'i Lamatua' soa' neu atahori mana mate' ra ena, ma soa' neu atahori masod'a' ra boe.
10 Dad'i, ta'o bee de so'u aom 'ona' mana ma'etu' ded'eat, fo kartiik toronoo atahori sarani ma? Ta'o bee de muloe-mud'ae e? Te dei fo basa nggita musi teu tandaa too Lamatualain, fo Ana paresa' hita esa-esa' masod'a na.b 11 Nenesura' mia lele ulu' sia Lamatualain Susura Meumaren 'oi,
“Hita Lamatuan mana nafad'e nae,
‘Dei fo basa atahori sende' lulu-langga na ra fo be'utee neu Au,
ma ratud'u had'a-hormat neu Au.
Ma, dei fo basa atahori rataa rendi' bafa na ra,
rae, Au dad'i sira Lamatuan,
huu Au ia, Lamatualain.’”c
12 Dad'i dei fo basa nggita musi tataa tala fo tafad'e Lamatualain tae, hita tao saa, ma saa de hita tao ta'o naa.
'Afi' tao mu'ututud'a' toronoom atahori sarani' ra
13 Fe'esa'an, hei mana sia Roma ra 'aka' fua sala' neu toronoom atahori sarani' ra. 'Afi' ta'o naa fai! Malole lena', ata ta'etu' ta'o ia: Ata 'afi' tao toronoo ta ra ra'atunu. Ata besa-b'esa fo 'afi' ne'etutud'a' se risi' sala'.
14 Huu au nenepa'a' 'oo hita Lamatuan Yesus, de au 'uhine teb'e, ta'o ia: nda hambu nanaat mata' esa sa boe bisa tao nanggenggeo atahori, losa ana nda bisa hule-o'e nala neu Lamatualain sa. Te mete ma atahori esa du'a nae saa esa tao e nanggenggeo, losa ana nda med'a nae eni nda na'ena hak hule-o'e sa ena, na, hela fo naa dad'i neluli' soa' neu e. 15 'Ona' mete ma mua sisi, ma naa tao toronoom ralan susa, na, ho nda mutud'u susuem neu e sa, to? Mu'utataa' aom dei! 'Afi' tao mulutu toronoom, huu hii mae mua saa esa! Huu Kristus o mate soa' neu atahori naa boe. 16 Nda malole' sa mete ma ho tao dala' esa fo mae naa malole', te atahori laen ra 'ola' ra'amuti naram, huu ara rae tataom naa, de'ulaka'.
17 Du'a malolole! Lamatualain naa, hita Mane na. Te hita nda dad'i teu Mane' a atahorin sa, huu hita taa-tinu tungga 'a hohoro lalane' a. Hoko'! Hita o musi tao dala ndoo-tetu', rala ta ra meumare', tasod'a noo ndoos ma mole-d'ame, ma rala ta ra tamaho'o boe. Basa ia ra dad'i, mete ma hita nenepa'a' takandoo too Lamatualain Dula-d'ale Meumare na. 18 Atahori mana mete-se'u Kristus ta'o naa, tao namaho'o Lamatualain rala na. Ma atahori laen o paresa' ralolole atahori naa masod'an boe, basa fo so'u atahori naa naran rae, “Eni, malole'!”
19 Dad'i ata musi tahehere fo tasod'a noo mole-d'ame, ma esa tao ma'ad'ere esa. 20 'Afi' tao nelutu Lamatualain ue-tataon sia atahori laen masod'an huu 'aka' so'al nanaa-nininu 'a. Lamatualain nae bole mua sud'i 'a saa, huu basa se meumare'. Te mete ma mureresi moo toronoom huu 'aka' so'al nanaa-nininu 'a, na, ho ia sala. 'Afi' ta'o naa!
21 Malole lena', mu'utataa' aom. 'Afi' mua sisi, 'afi' minu oe anggor, do mua-minu saa mana tao toronoom tud'a sala'. 22 Au masud ngga ta'o ia: mete ma mala hara' moo Lamatualain ena, basa ma mu'etu' mae, ho mumuhere E so'al nanana-nininu', na, ho 'onton, huu namandoo ena. Sud'i boe du'a-d'u'a' fo sangga muhine mae ho tao sala', do hoko'. Huu mu'etu' ta'o naa ena na. 23 Te mete ma ralam na'ab'ab'anggi, basa ma mua saa esa fo med'a mae naa mana tao nggo munggenggeo, na, Lamatualain fee sala' neu nggo, huu nda tao tungga saa fo mumuhere sia ralam lele' mua-minu. Huu mete ma mae tao sud'i 'a saa, te mumuhere mae, naa nda teb'e sia Lamatualain matan sa, na, naa sala ena.