Rena-rena' neu atahori mana to'u parenda' ra
13
Basa atahori musi rena-rena' neu atahori mana to'u parenda' ra. Huu sira ra'ena hak noo koasa fo parenda atahori. Te sira to'u koasa parenda' naa, huu Lamatualaian mana fee neu se. Mana to'u koasa ia ra sia, huu Lamatualain so'u se ena. 2 Dad'i mete ma atahori lab'an atahori mana to'u parenda' ta'o naa, na, naa 'ona' ara lab'an saa fo Lamatualain so'u' a ena. Mete ma ara tao ta'o naa, dei fo ara hambu huku-d'oki' mia Lamatualain.3 Mete ma hei tao ndoo-tetu', na, 'afi' mimitau neu atahori mana to'u parenda' ra. Te mete ma hei tao de'ulaka', malole lena' ama mimitau se! Dad'i minea aom fo tao ndoo-tetu', fo sud'i mimitau se fai. Ma mete ma hei tao ta'o naa, na, dei fo ara koa nggi. 4 Te atahori mana to'u parenda' naa ra, Lamatualain pili nala se fo mete-se'u nggi. Te mete ma hei tao sala-kilu' mikindoo 'a, malole lena' ama besa-b'esa leo! Huu nda hie-hie 'a sa ara ra'ena hak fo huku-d'oki. Sira ia ra, 'ona Lamatualain atahori ded'enun fo ara huku-d'oki atahori mana tao de'ulaka' ra. Huu Lamatualain nda simbo dala de'ulaka' fo atahori tao' ra sa; Ana namanasa se.
5 Naeni de hei musi rena neu atahori mana to'u parenda' ra. Huu ama bub'ulu' sia rala ma ra mae, naa teb'e. Ma hei o bub'ulu' boe mae, Lamatualain namanasa mete ma hita nda tao ndoo-tetu' a sa.
6 'Ona' naa boe, hei musi bae bea mana nenene'etu' ena', huu atahori mana to'u parenda' ra ralalao Lamatualain ue-tatao na. 7 Dad'i hei musi bae basa e noo matetu'. Bae neu mana 'ed'a bea ra, basa bea fo hei musi bae' a. Fee had'a-hormat neu basa atahori mana ra'ena hak simbo had'a-hormat. Ma mete ma hambu atahori tao dala malole' nakandoo 'a, na, so'u nara na ra fo basa atahori bub'ulu' ara tao malole'.a
Misod'a esa sue-lai esa
8 Bae mu'etu' huta-b'uku ma ra, fo 'afi' musod'a moo 'a huta-b'uku'. Huu hita tae tahuta sia 'a dala' esa 'a, naeni susue-lalai' a. Mete ma hei sue atahori, na, hei tao tungga Lamatualain hohoro-lalane na ra ena. 9 Huu Hohoro-lalane' naa ra rae, “'Afi' hohongge; 'afi' misa atahori; 'afi' mimina'o; 'afi hii 'a hambu atahori sud'i 'a saan,” ma laen ra fai. Mete ma nau tao tungga basa Hohoro-lalane' ra, na, musi tao tungga Hohoro-lalane' esa ia, mana nae, “Ho musi sue atahori laen ra, 'ona' ho sue aom boe.”b 10 Huu mete ma hita tatud'u susue' neu atahori laen, na, hita nda tao de'ulaka' mbali e sa, to? Dad'i mete ma ata tatud'u susue' takandoo 'a, na, hita bisa tao tungga basa Hohoro-lalane' mia Lamatualain.
Nda doo' sa te, Kristus nae bali' nema ena
11 Lamatualain nae mbo'i nggita mia atahori sia raefafo' ia de'ulaka na ra. Ma lele' ia, eni fain fo fee masoi-masod'a' neu atahori, deka lena' mia lele' ata fe'e na tamahere neu Yesus Kristus ena. Naeni de, ata musi tasod'a noo susue', huu tahine dala' naa ena. 'Ona' fe'esa'an naa, hita fe'e mana sunggu' ra. Te lele' ia, losa fain ena fo ata musi fela leo! 12 Nda doo' sa te, tetemba' a basa ena, ma manggarelo' a losa boe. Dad'i malole lena', ata taloe' mia de'ulaka ta ra leo. Naa 'ona' atahori mana rasod'a sia ma'ahatu' rala noo tao 'a de'ulaka', huu ara du'a rae nda hambu atahori rita se sa. Te 'ale' ia, ata musi dad'i 'ona' sold'ad'u mana pake tee-tande netatis, fo tahehere tao dala malole' ra, 'ona' atahori mana rasod'a sia manggarelo' a rala. 13 Ata musi tasod'a noo ndoo-tetu', fo basa atahori bisa rita nggita tao dala malole' ra. Nda malole' sa, mete ma hita 'aka' feta-d'ote ma tinu mafu. Nda malole' sa, mete ma hita 'aka' hohongge. Nda malole' sa, mete ma hita 'aka' tatofa-tauu' dii-'ona'. Ma nda malole' sa, mete ma hita 'aka' horo-mbala huu nda hii atahori lena' nggita sa. 14 Te malole lena', hei 'ub'a rala mara fo dad'i 'ona' hita Lamatuan Yesus Kristus fo Lamatualain haitua nema' a. Ma mete ma ho hii 'a tao dala nda ndoo-tetu' ra sa, na, 'afi' hela aom tungga 'a hihii-nanaum mana tao leli' a. Mu'utataa' aom!