Mete ma hita nenepa'a' too Kristus, na, masod'a feu ta ra musi ta'o bee?
12
Toronoo susue ngga ra, e! Huu Lamatualain natud'u susue-lalain neu nggita ena, naeni de au 'o'e fo ama fee basa masod'a ma ra neu E, 'ona' tutunu-hohotu masod'a'. Naa mana tao Lamatualain ralan namaho'o. Mihehere fo tao tungga hihii-nanaun ma misod'a meumare', huu naa natud'u hei susuem noo had'a-hormat ma neu E. Mema' nandaa hei be'utee ta'o naa neu E. 2 'Afi' hela atahori raefafo' 'ale' ia denu nggi musi tao ta'o bee dei, fo misod'a ta'o bee tungga hihii-nanau na ra. 'Afi' tungga-tungga 'a dud'u'a na ra, masod'a na ra, do, had'a-d'ala na ra neu' ena. Te malole lena', ama hela fo Lamatualain tao dud'u'a ma ra dad'i feu', fo ama mete basa naa ra tungga dala feu'. Noo ta'o naa, hei bub'ulu' Lamatualain hihii-nanaun soa' neu nggi. Te Lamatualain hihii-nanaun naa, malole', matetu-manad'ai', ma tao nemeho'o rala na.3 Huu Lamatua' denu au ma natud'u rala malolen neu au, naeni de au 'ufad'e nggi, ta'o ia: timba-tai ao ma ra noo dala ndoo-tetu' a! 'Afi' so'u-so'u' ao ma ra lena' ndoo-tetu' a. 'Afi' timba-tai mendi' saa fo nda na'ena netehuu' sa. Atahori esa-esa' musi sangga fo nahine bab'anggi-b'ab'a'e' fo Lamatualain fee neu e' a, huu namahere neu Kristus.
4 Ha'i conto mia atahori ao na. Ao' esa bab'anggin mata'-mata'. Ma bab'anggi' esa-esa' noo ue-tatao na. 5 Hita mana ta'ab'ue teu esa too Kristus o 'ona' naa boe. Hita atahori hetar, te ta'ab'ue teu esa 'ona' ao' esa. Ma atahori esa-esa' noo ue-tataon, 'ona' ao' a bab'anggi na ra. Esa parluu esa. 'Ona' lima' nenetati hendi' mia aon, na, nda na'ena ngguna saa sa ena, to?a
6 Au masud ngga ta'o ia: Lamatualain fee koasan neu basa nggita fo talalao ue-tataos mata'-mata', huu Ana hii 'a natud'u rala malolen neu nggita. 'Ona' mete ma Lamatualain fee koasan neu nggo fo mufad'e hehelu-fufulin, na, musi mumuhere teb'e-teb'e' fo mufad'e basa hehelu-fufuli na. Te 'afi' mufad'e lena' mia hehelu-fufuli' naa.b 7 Mete ma Lamatualain fee bab'anggi-b'ab'a'e' neu nggo fo mete-se'u atahori laen, na, ho musi mete-se'u mendi' koasa naa. Mete ma Ana fee bab'anggi-b'ab'a'e' neu nggo fo munori so'al Eni neu atahori, na, ho musi munori mendi' koasa naa. 8 Mete ma Ana fee bab'anggi-b'ab'a'e' neu nggo fo fee masi'et neu atahori, na, musi fee nesi'et mendi' koasa naa. Mete ma Ana fee koasa neu nggo fo tulu-fali atahori laen mendi' hata-hetom, na, fee hata-hetom fo tulu-fali neu se. Mete ma Ana fee bab'anggi-b'ab'a'e' neu nggo fo mulalao mala atahori fo ara ralalao Eni ue-tataon noo malole', na, musi manggate mulalao se mendi' koasa naa. Mete ma Ana banggi-b'a'e fee nggo rala susue-lalai' fo tulu-fali neu atahori mana susa-sona' ra, na, musi tulun se noo rala nemeho'ot.c
Kristus atahori na ra musi rasod'a ta'o bee?
9 Mete ma hei mitud'u susuem neu atahori, na, mitud'u susue' noo matetu'; 'afi' dea-rala'. Misid'ea basa dala de'ulaka', ma to'u mala basa dala malole' ra. 10 Hei atahori sarani' ra esa musi sue esa noo malole'. Mihehere fo mitud'u had'a-hormat esa noo esa. 11 Mete ma ama tao ues, na, tao ues noo manggate', 'afi' tao noo rala seseri'. Naa fo rala ma ra ramaho'o lele' ama tao ues. Ma tao ues fee neu hita Lamatua na. 12 Hei rala ma ra musi mimiho'o hatu'-rerelon, huu hei bub'ulu' Lamatualain nae tao ta'o bee fee nggi ena. Mete ma hambu doid'oso', na, mi'itataa'. Hule-o'e hatu'-rerelon; 'afi' mimed'a bengge. 13 Tulu-fali atahori mamahere' ra mendi' hata-heto ma ra. Mete ma hambu atahori rema mia mamana' laen, na, simbo se fo fee se raa-rinu ma numban sia ume ma ra. Noo ta'o naa, hei mitud'u susue ma ra neu se.
14 Mete ma hambu atahori tao ra'asususa' nggi rakandoo 'a, na, mo'e Lamatualain tao dala malole' fee se. Teb'e! 'Afi' sumba-ndoon se!d 15 Mete ma hambu atahori ralan namaho'o, na, mimiho'o moo e. Ma mete ma hambu atahori nggae luu-mbinu huu ana susa, na, nggae moo e. 16 Misod'a esa sue-lai esa noo rala' esa. 'Afi' minanaru rala ma ra. Malole lena', ama eko-d'a'i moo atahori mana tud'a-loloe' ra. 'Afi' so'u-so'u' aom fo du'a mae, 'aka' mesa' nggo muhine.e
17 Mete ma atahori tao de'ulaka' neu nggo, na, 'afi' bala-b'ae noo de'ulaka'. Te ho musi sob'a-sob'a sangga dala malole', fo basa atahori bisa simbo. 18 Mete ma bisa, na, sangga dala' fo misod'a noo mole-d'ame moo basa atahori.
19 Toronoo susue ngga ra, e! 'Afi' bala-b'ae noo nambed'a' rala. Hela neu fo Lamatualain mana bala-b'ae. Huu mete ma atahori tao de'ulaka', na, Ana namanasa, 'ona' nenesura' sia Susura Meumare' rala 'oi,
“Hita Lamatuan mesa' ne mana 'ola' nae,
Au mana 'u'ena hak bala-b'ae tatao-nonoi de'ulaka'.
Te Au mana huku-d'oki atahori de'ulaka na ra.”f
20 Malole lena' tao tungga saa fo nenesura' sia Susura Meumare' a mia lele' ulu' a nae,
“Mete ma musu ma ndoe,
na, fee ne naa.
Mete ma musu ma na'amad'a,
na, fee ne ninu.
Huu mete ma tao ta'o naa, dei fo ana mae,
ma fee had'a-hormat bali' neu nggo.”g h
21 'Afi' hela fee dala de'ulaka ra ralalao nggo. Te malole lena', dala malole' ra mana ralalao nggo. Noo ta'o naa, musenggi' dala de'ulaka' ra.