Lamatualain kasian atahori Isra'el ra
11
Dad'i au 'ae 'utane ta'o ia: mbei ma hei du'a mae, “Huu atahori Isra'el ra nda nau rena Lamatualain sa, naeni de Ana nda simbo se sa.” Ta'o naa, do? Hoko'! Te au ia mia se boe! Au ia, mia leo Benyamin. Benyamin aman, Yakob. Eni ba'in, Isak. Isak aman, Abraham, mana dad'i basa atahori Isra'el ra bei-ba'i na ra.a 2 Lamatualain nda parnaa fo nae nda simbo Eni atahori na ra sa. Sira ia ra, Ana nahine mema' se eni' a mia lele ulu' a. Hei fe'e misined'a saa fo nenesura' sia Lamatualain Susura Meumaren so'al ba'i Elia, to? Ana unggu-remu Lamatualain so'al atahori Isra'el ra, boe ma ana no'e fo Lamatualain fee se huku-d'oki', 3 nae,“Lamatua'! Atahori ia ra tao risa mana 'ola-'ola' ra,
fo Lamatualain haitua nema' ra.
Ara o ofe lenggu-b'ara hendi mei tunu-hotu' a,
sia mamana' fo atahori be'utee neu Lamatualain.
Mia basa Lamatualain mana 'ola-'ola na ra,
'aka' au mesa' nggo fe'e masod'a'.
Te ara o sangga dala' fai,
fo rae tao risa au boe!”b
4 Te Lamatualain nataa nae, ta'o ia: “'O'olam naa, sala! Huu Au atahori ngga ra mana be'utee neu Au, fe'e hambu atahori rifon hitu. Ara ra'atataa' rahere' ma nda songgo-tanggu Ba'al sa!”c
5-6 'Ale' ia 'ona' naa boe. Te nda basa atahori Yahud'i ra hiru' rasad'ea Lamatualain sa. Fe'e hela atahori ruma mia hita e fo Lamatualain pili nala, nae fee masoi-masod'a', huu Ana nae natud'u rala malolen neu nggita, nda huu hita tao dala malole' sa! Te mete ma Ana musi pili nala hita huu hita tao malole', naa sosoan nae, Ana nda bisa na'etu' fo nae natud'u, do nda natud'u rala malolen neu nggita sa. Mete ma ta'o naa, naa naran nda ‘natud'u rala malolen’ sa ena.d 7 Dad'i neu mate'en, ta'o ia: atahori Yahud'i hetar sangga-sangga' fo Lamatualain natud'u rala malolen neu se, naa fo sira bisa malole bali' roo E. Te nda nau hambu sa, huu rala na ra manggatee' seli de nda nau rena E sa. Te ruma hambu. Sira ia ra, Lamatualain pili nala mema' ena. 8 Sia Lamatualain Susura Meumaren nenesura' so'al mana langga fatu' naa ra 'oi,
“Lamatualain fee se,
mata' nda mana nita' sa,
ndiki' nda mana rena' sa,
ma dud'u'a mbakat nda mana du'a rahine' sa.
De losa lele' ia,
ara nda rahine bee teb'e sa boe.”e
9 Mane Daud o sura' sia Susura Meumare' a so'al nusa Yahud'i ra boe nae,
“Hela neu fo ara feta-d'ote sia sira mei hehelin, ma du'a rae basa' e malole ena,
te feta-d'ote na ra te'e-sii bali' se,
huu sira ue-tatao ma'ahulu na.
Ma hata-heto na ra mana tao se ra'atunu.
10 Hela neu fo mata na ra ma'ahatu,
fo 'afi' rita saa-saa boe!
Hela neu fo ara lemba-rasaa mamab'era' rakandoo 'a,
fo nggarasa rui na ra bau ruku-tele!”f
Lamatualain nae fee masoi-masod'a' neu atahori nda Yahud'i ra sa boe
11 Dad'i au 'ae 'utane ta'o ia: ta'o bee de atahori Yahud'i ra ra'atunu? Ara tud'a ena, do? Hoko'! Te huu ara nda nau rena Lamatualain sa, ma nda nau ramahere neu Kristus sa, de naa mana soi dala' fee atahori nda Yahud'i ra sa, fo ara hambu masoi-masod'a' mia sala-kilu na ra. Noo Eni tataon naa, Lamatualain nau fo atahori Yahud'i ra horo-mbala, fo ara tungga bali' Eni fai. 12 Matetun, atahori Yahud'i ra ralena-langga ndoo-tetu' a. Naeni de atahori fea' mia ndule raefafo' ia bisa med'a Lamatualain rala malolen boe. De atahori Yahud'i ra, runggi monae'. Te naa tao atahori nda Yahud'i ra sa 'onton monae'. Naa, doo-d'oo, mete ma basa atahori Yahud'i ra malole bali' roo Lamatualain, na, naa malole' lena' fai!
13 Dad'i, au 'ae 'ufad'e hei atahori nda Yahud'i ra sa, ta'o ia: Lamatua' denu au fo 'eti 'ufad'e nggi so'al Eni Hara-lii Malole na. Naeni de au manggate 'ulalao ue-tataos fo malolen seli ia. 14 Te mete ma au 'ulalao ue-tataos ia noo malole, se'u te au tao atahori Yahud'i ngga ra horo-mbala losa sira ruma hambu masoi-masod'a' mia sala-kilu na ra. 15 Lele' Lamatualain nda simbo Eni atahori Yahud'i na ra sa, naa soi dala' fo atahori fea' ra hambu kaka'e' fo ara bisa maso' dad'i Lamatua' atahori na. Te dei fo, mete ma ara dame bali' roo Lamatualain, naa malolen seli. Huu naa 'ona' sira rasod'a bali' mia mamate na ra ena!
16 Ha'i conto mia atahori rae tao roti. Mete ma ana ha'i nala tarigu mbei fo fee neu Lamatualain, dei fo basa roti naa ra dad'i Eni 'enan mana meumare'. Ma mete ma atahori fee Lamatualain hau esa 'okan esa dad'i boa ulu', dei fo hau naa lala'en dad'i Lamatualain 'enan mana meumare'.
17 Au 'ae 'u'usasama' nusa Yahud'i noo hau huu saitun esa mana mori sia osi. Lamatualain tati hendi hau naa danan ruma ena. Te hei atahori nda Yahud'i ra sa, 'ona' saitun fui. Basa ma, Lamatualain tati nala dana ma ra ruma de tute na'ab'ue neu hau huu' mana sia osi rala. Noo ta'o naa, dana' mia hau huu' mana sia dea' a, simbo nala masod'a' mia hau huu' mana sia rala' a. Naa 'ona' hei atahori nda Yahud'i ra sa, simbo mala Lamatualain rala malolen, fo Ana nae fee neu atahori Yahud'i na ra. 18 Te besa-b'esa, o! 'Afi' koao fo du'a mae hei mana mia dea' naa malole lena' dana' fo Lamatualain tati hendi' ra! Mete ma mae so'u-so'u' aom, na, 'afi' lilii', te ho dana' esa 'a! Ho nda mana tao ma'ad'ere hau huu' naa sa. Te 'okan mana tao hau huu' a ma'ad'ere!
19 Mbei ma ho mae, “Lamatualain tati hendi dana' esa mia hau huu' mana mori sia osin rala, fo Ana bisa tute bali' au sia naa, fo nggati dana mbaraa' a.” 20 Naa teb'e. Te 'afi' lilii' mae, Lamatualain tati hendi dana' naa ra ena, huu ara nda ramahere Kristus sa. Ma ho nggati se, huu mumuhere neu E. Dad'i 'afi' koao! Malole lena', ho besa-b'esa, ma 'afi' mata'-mata'! 21 Huu atahori Yahud'i ra, 'ona' dana matetu' mana mori na'ahulu'. Te huu Lamatualain nda hela se ra'atataa' doo' sia naa sa. De mete ma nda mumuhere mukundoo neu E sa, na, 'afi' mumuhena mae Ana nau hela nggo mu'utataa' sia naa!
22 Dad'i hei musi du'a malolole dei. Lamatualain na'ena rala malole'. Te Ana o nahine fee huku-d'oki mamab'era' boe. Dei fo Ana huku-d'oki atahori mana tud'a' ra, mana nda malole roo E sa. Te soa' neu atahori nda Yahud'i ra sa, Lamatualain natud'u rala malolen neu nggi, sad'i hei dad'i esa mikindoo moo E, ma hela neu fo Ana tao malole' fee nggi. Te mete ma hei nda hela neu fo Ana tao ta'o naa sa, na, Ana o nau tati hendi nggi mia Eni hau huu na boe. 23 Atahori Yahud'i ra o 'ona' naa boe. Mete ma ara doa', fo ramahere neu Kristus, dei fo Lamatualain nau tute bali' se reu hau huu matetu' naa. Huu Ana na'ena koasa fo tao ta'o naa! 24 Te hei atahori nda Yahud'i ra sa, 'ona' dana' mia saitun fui fo fe'esa'an mana mori leli sia osi a dea'. Te Lamatualain pili nala bali' nggi de Ana tute neu hau saitun malole', fo Ana sela sia osin, naa fo hau huu fui a mesa' ne fea, ma hau huu' mana sia osi a mesa' ne fea. Te mete ma atahori nda Yahud'i sa bisa dad'i 'ona' naa ena, na, saa fo atahori Yahud'i fai. Naa bisa lena' fai, mete ma Lamatualain tute bali' se neu sira hau huu ine na.
Dei fo atahori Yahud'i ra malolole bali' roo Lamatualain
25 Toronoo' mana sia Roma ra, e! Hei musi mihine dala' ia fo fe'esa'an fe'e ma'afuni'. Huu mete ma hei mihine ena, na, ama 'afi' koao, du'a mae, hei mahine'. Te ta'o ia: 'ale' ia, atahori Yahud'i ra rala na ra manggatee' ma nda nau ramahere Kristus sa. Te ara nda 'ona' naa rakandoo 'a sa. De mete ma basa atahori nda Yahud'i ra sa fo Lamatualain pili nala' ra ramahere Kristus ena, dei fo atahori Yahud'i ra o ramahere Kristus boe. 26 Dad'i mete ma fain losa ena, na, dei fo Lamatualain fee masoi-masod'a' neu basa atahori Yahud'i mia sala-kilu na ra. Naa 'ona' mana nenesura' sia Susura Meumare' a 'oi,
“Dei fo Atahori esa nema,
mana fee nggita tasod'a mia sosoe' a.
Ana nema mia lete Sion, sia kota Yerusalem.
Dei fo Eni mana tao Yakob tititi-nonosi na ra doa'.
Huu ara rasod'a nda taoafi' neu Au sa,
ara o hiru' rasad'ea Au dala masod'a ndoo-tetu ngga ena boe.g
27 Au 'ae 'ose hendi sala-kilu na ra,
huu Au helu-fuli basa 'oo se ta'o naa ena.”h
28 Lele' atahori Yahud'i ra rena Kristus Hara-lii Malolen, ara tao ao na ra 'ona' musu mana lab'an E. Noo ta'o naa, ara fee hei atahori nda Yahud'i ra sa hambu kaka'e'! Mae ta'o naa o, Lamatualain fe'e sue se boe, huu Ana sue bei-ba'i na ra ma pili nala se dad'i atahori na ra ena. 29 Huu mete ma Lamatualain fee saa esa ena, na, Ana nda lea nala bali' sa. Ma mete ma Ana no'e nala atahori nae, “Wae! 'Ima, tungga Au! 'Ima dad'i Au atahori ngga leo!”, na, Ana nda 'oi hendi se sa ena.
30 Fe'esa'an, hei atahori nda Yahud'i ra sa nda nau rena Lamatualain sa. Te ia naa, hei mana simbo Lamatualain susue-lalain, huu atahori Yahud'i ra mana nda nau rena E sa. 31 Dad'i 'ale' ia, sira mana nda nau tao tungga Lamatualain hihii-nanaun sa. Naeni de Lamatualain fe'e nau natud'u susue-lalain neu nggi. Ma dei fo Ana nau kasian se boe. 32 'Ale' ia, Lamatualain mete atahori Yahud'i ra 'ona' atahori nda Yahud'i ra sa boe. Huu basa se nda nau tao tungga hihii-nanaun sa, 'ona' ara nenerongga' ma nda rita' rae dea reu ta'o bee sa boe. Ana hela se ta'o naa, fo Ana nae natud'u susue-lalain neu basa atahori ra.
Lamatualain naa, rala malolen seli!
33 Lamatualain mahinen seli!
Ma Ana pake mahinen fo tao 'a malole' ra.
Nda hambu atahori bisa rahine E noo matetu' sa.
Nda hambu atahori rahine noo matetu' so'al Ana na'etu' ded'eat sa.
Nda hambu atahori esa o nahine,
ta'o bee fo Lamatualain tao dala' esa sa boe.i
34 Nda hambu atahori rahine noo matetu' hita Lamatuan dud'u'an sa.
Nda hambu esa o bisa fee nenori' neu E sa boe.j
35 Nda hambu atahori bisa fee hie' saa esa neu Lamatualain sa.
Nda hambu atahori bisa ra'asusuu' Lamatualain fo Ana bala-b'ae bali' se!k
36 Huu basa-b'asa' e ra'oka sia Lamatualain!
Basa' e dad'i, huu Eni!
Basa saa fo hita tao' a,
hita ue-tao fee neu E.
Hita so'u kokoa-kikio' soa' neu E,
losa doo ndu'u-d'oon neu!
Teb'e ta'o naa!l