10
Toronoo ngga ra, e! Au nau fo atahori Isra'el ra dad'i ta'o bee? Au hule-o'e fo ara nau Lamatualain fee masoi-masod'a' neu se mia sala-kilu na ra. Mete ma dad'i ta'o naa, dei fo rala ngga fe'e namaho'o ena na!2 Au bisa 'ufad'e so'al atahori ia ra tatao-nono'i na ra: ara manggate nau tungga Lamatualain. Te mae ara manggate 'ona' naa o, ara nda rahine dala' ndoo-tetu' a sa. 3 Huu ara nda rahine dala masod'a ndoo-tetu' a sa, fo mana tao atahori malole roo Lamatualain, naa de ara rae sangga dala' ao na ra fo sob'a-sob'a malole roo Lamatualain. Noo ta'o naa, ara nda nau rena E sa.
4 Mete ma atahori tao tungga 'aka' a hohoro-lalane' ra, naa fo Lamatualain simbo se, na, naa nda fe'e dai sa. Naeni de Kristus tao natetu basa' e ena, fo ata bisa malole too Lamatualain. Ma ia naa, basa atahori mana ramahere neu Kristus bisa malole roo Lamatualain ena.
Lamatualain nae fee masoi-masod'a' neu basa atahori mia sala-kilu na ra
5 Naa, dalahulun ba'i Musa natud'u dala' sia Susura Meumare', fo atahori bisa malole roo Lamatualain, sad'i ara tao tungga basa-basa Lamatualain Hohoro-lalane na. Ana sura' nae, “Atahori mana tao tungga basa Hohoro-lalane' ia ra, dei fo ara hambu rasod'a matetu'.”a
6 Te Lamatualain Susura Meumaren natud'u dala' laen fai nae, atahori bisa malole roo Lamatualain sad'i ramahere neu Kristus. Nenesura' 'oi, “Sud'i mitane mae, ‘Seka bisa hene sorga neu?’” (Naa 'ona' atahori rae reu rafad'e Kristus 'oi, hai atahori ra mae 'a doo bee fo Kristus 'onda nema fee masoi-masod'a' neu hai.) 7 Sia Susura Meumare' a o nenesura' 'oi, “Sud'i boe mitane mae, ‘Seka nau 'onda nisi' Ndola Naraka, sia mamana atahori mates ra?’” (Naa 'ona' atahori rae 'onda reu fo roo bali' Kristus mia mamaten fo fee masoi-masod'a' neu nggita.)
8 Sud'i ta'o naa! Huu sia Lamatualain Susura Meumaren o nenesura' 'oi, “Lamatualain hehelu-fufulin sia matam ena! Huu hehelu-fufulin naa sia bafam noo ralam.” Hehelu-fufuli' fo hita tafad'e neu atahori tae, “Mete ma mae sangga masoi-masod'a', na, musi mumuhere Kristus!”b 9 Mete ma mutaa pake bafam mae, “Yesus naa, au Lamatua ngga, mana hak parenda au” Ma mumuhere sia ralam mae, Lamatualain tao nasod'a bali' Yesus Kristus mia mamaten, na, Lamatualain soi-tefa nggo mia sala-kilu ma ra. 10 Te mete ma mumuhere neu Kristus mendi' ralam, na, Lamatualain cap nggo nae, atahori rala ndoos mana malole noo Eni. Ma mete ma ho mutaa mendi' bafam mae, Yesus dad'i Lamatuam, mana hak parenda nggo, na, Lamatualain nae fee nggo masoi-masod'a' mia sala-kilu' ra koasa na ra. 11 Sia Lamatualain Susura Meumaren nenesura' 'oi, “Atahori mana ramahere neu Lamatualain, dei fo ana nda hambu mamaet sa, huu Lamatualain nae tao natetu, basa saa fo Eni 'ola' ra.”c 12 Atahori Yahud'i roo atahori nda Yahud'i ra sa, 'ona esa'. Nda laen sa. Huu Lamatualain 'aka' esa 'a, Ana dad'i Lamatua' neu basa nusa' ra'. Ana nau natud'u rala malolen nae-nae neu basa atahori mana ro'e tutulu-fafali' mia E. 13 Te sia Susura Meumare' nenesura' 'oi, “Basa atahori mana ro'e tutulu-fafali' mbali Lamatualain, dei fo Ana fee se masoi-masod'a' mia sala-kilu na ra koasa na ra.”d
14 Te ta'o bee fo atahori bisa ro'e tutulu-fafali' mbali atahori esa, mete ma ara nda fe'e ramahere e sa? Boe ma ta'o bee fo ara bisa ramahere e, mete ma ara nda fe'e rena rita dud'uin sa? Ta'o bee fo ara rena dud'uin, mete ma esa o nda fe'e dui se sa boe? 15 Ta'o bee fo ara bisa dui atahori, mete ma esa nda denu se sa boe? Sia Susura Meumare' a nenesura' 'oi, “Mete ma atahori rendi hara-lii malole', na, sira nenema na ra malolen seli!”e
16 Te hei mihine ena mae, hambu atahori Isra'el ruma nda nau rena Lamatualain Hara-lii Malolen sa. Te Lamatualain mana 'ola-'olan Yesaya sura' nae,
“Lamatua', e!
Atahori nda nau ramahere hehelu-fufuli'
fo ara rena mia hai e sa!”f
17 Dad'i mete ma nau tamahere neu Lamatualain, na, musi rena Ded'ea-'o'olan dei. Ma mete ma ata nau rena Lamatualain hehelu-fufulin, na, musi rena so'al Kristus dei.
18 Au 'utane sob'a ta'o ia: mbei ma hei du'a mae, atahori Isra'el ra nda fe'e rena rita so'al Kristus sa, do? Ara rena ena! 'Ona' nenesura' sia Lamatualain Susura Meumaren mia lele ulu' a nae,
“Lamatualain mana 'ola-'ola na ra hehelu-fufulin so'al Lamatualain
nened'ui-b'engga' ndule raefafo' a;
ded'ea-'o'ola na ra
losa raefafo' suun ena.”g
19 Au 'ae 'utane dala' esa fai 'ae, “Atahori Isra'el ra nda rahine Lamatualain dalan sa, do?” Ba'i Musa naa, atahori kaesan mana sura' dala' naa nae, Lamatualain nafad'e atahori Isra'el ta'o ia:
“Au 'ae tao dala' esa
fee atahori nusa' laen ra.
Dei fo dala' naa tao rala ma ra mera.
Ma Au o 'ae tao dala' esa boe,
fee neu atahori fo hei mae nggoa' ra.
Dei fo dala' naa tao nggi mingginggio.”h
20 Mia ma'ab'uin, ba'i Yesaya sura' relo-relo so'al atahori nda Yahud'i ra sa nae,
“Hambu atahori ma'ahulun nda sangga Au sa,
te ara randaa roo Au ena.
Hambu atahori ma'ahulun nda ro'e fo rita Au sa,
te 'utud'u ao ngga neu se ena.”i
21 Ma so'al atahori Isra'el ra, na, Lamatualain nafad'e ta'o ia ena:
“Hatu'-rerelon, Au 'ukumbembela lima ngga ra loa-loa,
'uhani atahori Isra'el rema risi' Au.
Te ara nda nau rena Au sa,
ma ara hii 'a lab'an Au.”j