Lamatualain pili nala atahori Isra'el ra
9
Hita fo mana nenefutu-pa'a' too Kristus, 'ola' teteb'es. Dad'i au nda 'ola' pepeko-leleko' neu nggi sa. Au rala ngga nafad'e au nae, Lamatualain Dula-d'alen mana nalalao rala ngga. 2-3 Au 'ufad'e ta'o ia: rala ngga susa-sona. Au med'a beran ta'o naa, huu 'usuned'a atahori ngga ra. Au nau fo nusa Yahud'i ngga raa o nenefutu-pa'a' roo Kristus boe, te sira hetar nda ramahere E sa. 'Ona' au bisa soi dala' fee se, au sad'ia 'o'e fo Lamatualain huku-d'oki au, fo nggati se. Ma au o sad'ia 'o'e fo Lamatualain na'ad'od'oo' au mia Kristus, naa fo atahori ngga ra bisa nenefutu-pa'a' roo E. 4 Tao-tao te sira, atahori Isra'el, naeni nusa' esa mana 'onton seli. Lamatualain so'u nala se dad'i eni ana na ra eni' a lele ulu' a. Ana natud'u koasan manaseli' neu se. Ana hengge-nee hehelu-fufuli' mata'-mata' noo se. Ana fee hohoro-lalanen neu se. Sira mana rahine' be'utee neu E, ma tao ues fee neu E. Ana helu-fuli nae natud'u rala malolen neu se.b 5 Sira lao' mia bei-ba'i ta ra, naeni: ba'i Abraham, ba'i Isak, ma ba'i Yakob (atahori ha'i nara' ‘Isra'el’ mia e). Ma Kristus, fo Lamatualain helu-fuli mema' mia lele ulu' a fo nae haitua nema' naa, lao' mia hita nusa Yahud'i ra bei-ba'i ta ra. Kristus naa o, naeni Lamatualain mana parenda basa-b'asa' e boe. Dad'i nandaa mete ma so'u rananaru E losa doo ndu'u-d'oon neu. Teb'e!c6 'Ona' mae atahori Isra'el hetar nda fe'e simbo Kristus sa, te atahori nda bisa 'ola' rae, Lamatualain hehelu-fufulin naa nda dad'i sa. Ma 'afi' du'a mae, basa atahori mana lao' mia bei-ba'i Isra'el naa, dad'i nusa Isra'el fo Lamatualain pili nala dad'i Eni atahori na. 7 Conto 'ona', atahori hetar lao' mia bei-ba'i ta ra, ba'i Abraham. Te basa se nda Abraham tititi-nonosin fo Lamatualain pili nala' ra sa. Huu Lamatualain nafad'e basa Abraham nae, “Tititi-nonosim fo au 'uhine' ra, 'aka' mana lao' mia Isak ana na ra.”d
8 Sosoan nae, mia ma'ahulun losa 'oras ia, nda basa tititi-nonosi' mana lao' mia hita atahori Yahud'i ra ba'in Abraham, dad'i Lamatualain ana na ra. 'Aka' tititi-nonosin mana lao' mia Lamatualain hehelu-fufulin fee neu Abraham, fo Lamatualain reken se dad'i eni ana matetu na ra. 9 Huu Lamatualain hengge-nee hehelu-fufuli' nae, “Mbei ma too mana nema' ia, Au bali' 'uma. Lele' naa, saom Sara bonggi ana tou' esa ena.”e
10 Nda ta'o 'a naa sa. Huu hita ba'i Isak na noo saon Ribka bonggi rala ana dua' ra. 11-12 Lele' Ribka nda fe'e bonggi nala se sa, ara nda fe'e tao dala malole' do dala de'ulaka' sa. Mae ta'o naa o, Lamatualain nafad'e mema' Ribka so'al ana dua' mana dea neu na'ahulu a nae, “Dei fo 'a'ak a tao ues fee 'od'i na.” Lamatualain nafad'e ta'o naa, fo natud'u nae, mete ma Eni pili nala atahori esa ena, Eni nahine nae pake atahorin fo tao ta'o bee. De Lamatualain pili nala 'od'ik a fo dad'i atahori na. Ana nda parluu nahati fo mete sob'a 'od'ik a nae tao ta'o bee sa boe, huu Lamatua' nahine mema' ena.f 13 Huu Lamatualain 'ola' sia Susura Meumaren so'al ana dua' naa ra nae,
“Au pili 'ala Yakob,
te au nda simbo Esau sa.”g
14 Dad'i ata fe'e tae saa fai? Mbei ma hambu ruma rae, “Lamatualain nda na'etu' ded'eat noo matetu' sa, do?” Nda bisa sa! 15 Huu mia lele ulu' a Lamatualain nafad'e neu ba'i Musa nae,
“Au 'utud'u susue ngga neu atahori fo Au pili 'ala' ra.
Ma Au kasian neu atahori fo Au dud'u ao ngga.”h
16 Dad'i atahori naa nda med'a Lamatualain susuen sa huu eni hihii-nanaun, do huu eni tatao-nono'i na. Te huu Lamatualain mesa' ne mana nae natud'u susuen neu atahori naa. 17 Huu sia Susura Meumare' a, Lamatualain 'ola' noo mane Masir nae, “Au so'u nggo dad'i mane', huu Au 'ae pake koasa ngga fo lab'an nggo fo atahori hetar rita. Noo ta'o naa, basa atahori sia raefafo' ia so'u rananaru Au nara ngga.”i
18 Dad'i mete ma Lamatualain nae natud'u kasian neu atahori esa, na, Ana tao neu' ena. Ma mete ma Ana nae tao atahori esa ralan manggate, na, Ana o tao neu' ena boe.j
Lamatualain bisa natud'u Eni susue-lalain, te Ana o nda simbo de'ulaka' sa boe
19 Naa! Mete ma hambu atahori nda simbo au rae, “Mete ma ta'o naa, 'ona' Lamatualain nae tao dala' esa, na, seka bisa lab'an E? Nda hambu sa, to? Dad'i, ta'o bee fo Eni nae mbia sala' neu nggita? Naa nda matetu' sa!”
20 Mete ma hambu ruma du'a ta'o naa, na, au 'utaa, ta'o ia: “Du'a mae ho ia, seka?! Ho mae 'ola' lab'an Lamatualain, do?” 'Afi' ta'o naa! Huu sia Lamatualain Susura Meumaren nenesura' nae, “Mete ma atahori tao saa esa, na, ta'o bee de saa fo ana tao' naa natane bali' atahori mana tao e nae, ‘Ta'o bee de ho tao au ta'o ia!?’”k 21 Conto 'ona' mana tao hura'. Mia rae hura' bub'ue' esa, ana na'ena hak fo nae tao nggusi makahahad'ok esa fo atahori koa e. Ana o na'ena hak pake rae bub'ue' naa fo tao neu mamana manggarau' tungga 'a eni hihii-nanau na.
22 'Ona' naa boe Lamatualain. Ana na'ena hak fo tao tungga hihii-nanau na. Nae natud'u neu basa atahori nae, Eni namanasa, ma nda simbo atahori tatao de'ulaka nara sa. Ana o nau fo atahori bub'ulu' rae, Eni na'ena koasa naen seli. Fo atahori rahine ta'o naa, na, Ana na'atataa' aon noo atahori mana tao de'ulaka' mata'-mata'. Te atahori mana tao de'ulaka' ra, rahani 'a fain fo rambalutu 'eto-'eto'. 23 Ana tao ta'o naa, fo nae natud'u neu atahori hetar 'oi, Eni nae natud'u susue-lalain neu atahori ruma. Sira, fo Ana pili nala mema', fo nae so'u nananaru se. Ma Ana nau atahori bub'ulu' rae, Eni mesa' ne mandete-masa'a'. 24 Te hita ia ra, fo Ana pili mema' dad'i atahori na ra. Hita ia ra, ruma mia atahori Yahud'i, boe ma ruma mia nusa fea' ra. 25 Fe'esa'an Lamatualain pake mana 'ola-'olan Hosea, fo sura' so'al atahori nda Yahud'i ra sa 'oi,
“Hambu atahori ruma dalahulun nda Au atahori ngga sa,
te Au 'ae 'o'e se 'ae,
‘Hei, Au atahori ngga ra,’
Ma hambu nusa' fo dalahulun Au nda sue sa,
te Au 'ae 'o'e se 'ae,
‘Hei, nusa' fo Au sue' a.’”l
26 Ana o sura' 'oi,
“Sia naa,
sia mamana' fo Lamatualain nafad'e neu se 'oi,
‘Hei nda dad'i Au atahori ngga sa!’
Dei fo Lamatualain mana Masod'a' a nae nafad'e nggi nae,
‘Ia naa, hei dad'i Au ana ngga ra ena!’”m
Ana 'ola' ta'o naa, huu Ana kasian atahori nda Yahud'i ra sa.
27 Lamatualain mana 'ola-'olan laen, naeni Yesaya, 'ola' nita so'al nusa Isra'el ra leleo-lalao na ra nae,
“'Ona' mae atahori Isra'el ra dad'i naen seli,
'ona' sara'ae' sia tasi suun,
te dei fo Lamatualain fee masoi-masod'a' neu 'a sira hid'a 'a,
mia sala-kilu na ra.
28 Te dei fo losa fai neneman,
fo Lamatualain na'etu' ded'eat fee basa atahori sia ndule raefafo' ia,
'ona' Ana nafad'e mema' ena.
Te Ana nda nahati sa,
huu Ana tao nab'asa' noo lai-lai!”n
29 Dalahulun Yesaya nafad'e so'al atahori Yahud'i nae,
“Hita 'onton,
huu Lamatualain mana na'ena koasa manaseli',
hela hita tititi-nonosi ta ra ruma hambu masod'a'.
Huu mete ma nda ta'o naa saa, na,
basa hendi hita ena,
'ona' atahori kota Sod'om noo kota Gomora ra.”o
Hara-lii Malole' fee neu nusa Isra'el, mana nda nau rena Lamatualain sa
30 Dad'i ata fe'e tae saa fai? 'Ola' tae, atahori nda Yahud'i ra mia bee-b'ee, fo dalahulun nda sangga fo rae malole roo Lamatualain sa, ia naa malole roo E ena, huu ramahere neu Yesus Kristus. 31 Tao-tao te atahori Isra'el ra sob'a tao tungga Musa hohoro-lalanen, fo ara bisa malolole roo Lamatualain, te nda dad'i malole roo E sa.
32-33 Saa de ara nda bisa malole roo Lamatualain sa? Huu ara nau tao tungga 'aka' a hohoro-lalane' naa, fo Ana simbo sira 'ona' atahori rala ndoos, te ara nda ramahere neu Yesus Kristus sa. Dad'i 'ona' ara ra'atunu dai “fatu ne'etunus”. Ia fo Lamatualain Susura Meumaren sosoan nae,
“Mete ia dei!
Te Au tao Atahori esa
sia lete Sion, sia kota Yerusalem.
Atahori naa 'ona' fatu esa,
mana tao atahori ra'atunu.
Te seka namahere neu E, na,
'afi' mae.”
Fatu naa, naeni Yesus. Te atahori Isra'el ra nda simbo E sa. Naa 'ona' ara ra'atunu, boe ma ra'aloli huu fatu naa.p