3 Mae hita tao tungga Musa Hohoro-lalanen o, naa nda fee masoi-masod'a' neu nggita mia sala' koasan sa, huu hita atahori biasa 'a mana tao sala' nakandoo 'a. Te Lamatualain mana soi dala'. Huu Ana haitua Anan fo dad'i atahori biasa 'ona' nggita. Mae hita atahori mana tao sala' mata-mata', te Yesus nda tao nita sala' saa sa boe. Lena' fai, Ana dad'i tutunu-hohotu' fo 'ose hendi atahori ra sala na ra. Noo ta'o naa Ana tao nalutu sala' koasan fo ma'ahulun mana nauli nggita. 4 Lamatualain haitua Kristus fo Ana mate, naa fo hita bisa tao tungga basa dala ndoo-tetu', tungga Lamatualain Hohoro-lalane na ra. Ma, ia naa, hita tao dala-d'ala ndoo-tetu', tungga Lamatualain Dula-d'alen hihii-nanaun, ma nda tao tungga hita hihii-nanaun sa ena.

5 Atahori mana rasod'a tungga hihii-nanau na ra, rasod'a ta'o naa huu ara du'a 'aka' a dala-d'ala de'ulaka' rakandoo 'a. Te atahori mana rasod'a tungga Lamatualain Dula-d'alen hihii-nanaun, ara du'a 'aka' a dala-d'ala' mana tao Lamatualain Dula-d'alen namaho'o. 6 Atahori mana hela dala-d'ala de'ulaka' nalalao dud'u'an, ana 'ona' atahori nda mana rena nahine neu Lamatualain Dula-d'alen sa, naa de ralan na'ad'od'oo' mia Lamatualain ena. Te atahori mana hela Lamatualain Dula-d'alen nalalao dud'u'an, eni masod'an matetu', ma ralan nee-nee lino-lino.

7 Hita atahori hihii-nanaun balab'an seli noo Lamatualain hihii-nanau na. Ma, hita o nda be'utee fo rena neu Lamatualain sa, huu hita o nda bisa sa boe. 8 Huu atahori mana fee hihii-nanaun nalalao se, nau do nda nau sa o, nda bisa tao Lamatualain ralan namaho'o sa boe.

9 Te hei ia, atahori mana nda 'afi' rasod'a de'ulaka' tungga hihii-nanau ma ra sa. De mete ma Lamatualain Dula-d'alen nasod'a sia rala ma ra, na, hei tao dala-d'ala' mana tao namaho'o rala na. (Te mete ma hambu atahori fo Kristus Dula-d'alen nda nasod'a sia ralan sa, eni o nda dad'i Lamatualain 'enan sa boe.) 10 Dei fo ao ma ra mate, huu ma'ahulun hei tao sala'. Te, huu ia naa Kristus nasod'a sia rala ma ra ena, de dei fo hei ao samana ma ra rasod'a rakandoo, huu Lamatualain cap basa hei, atahori rala ndoos, ma hei malole bali' moo E ena. 11 Te Lamatualain mana tao nasod'a bali' Yesus mia mamaten nendi' Dula-d'ale Meumare na. Dad'i mae hita mate, te mete ma Lamatualain Dula-d'alen nasod'a sia rala ta ra, na, dei fo Ana tao nasod'a bali' nggita. Eni sosoan nae, Ana tao nasod'a bali' nggita, 'ona' Ana tao nasod'a bali' Kristus boe.^a

12 Dad'i ta'o ia, toronoo ngga ra, e! Hita ta'ena huta'. Naa nda huta' fo tasod'a tungga hita atahori hihii-nanaun sa, te huta' fo tasod'a tungga Lamatualain hihii-nanau na. 13 Te mete ma tasod'a tungga 'a de'ulaka' mana sia rala ta ra, ne'o Lamatualain nae hiru' nasad'ea nggita, ma hukun nisa nggita! Te, mete ma hita hela Lamatualain Dula-d'alen tao nalutu sala' koasan mana sia rala ta ra, na, dei fo hita fe'e bisa tasod'a ndoo-tetu' losa doo ndu'u-doo na ena.

14 Atahori mana rena-rena' neu Lamatualain Dula-d'alen fo Ana nalalao se, na, sira, Lamatualain ana na ra. 15 Mete ma hita hela Lamatualain Dula-d'alen nalalao nggita, na, Ana nda tao nggita dad'i 'ona' ate mana nasod'a noo nemetaus sa. Fe'esa'an, hita 'ona' naa. Te, huu hita simbo Lamatualain Dula-d'alen ena fo nalalao nggita, ma tahine tae ata dad'i Lamatualain ana na ra ena. Naa de Ana nau rena, mete ma hita to'e tae, “Ama susue', e!”^b

16 Hita ralan mana nafad'e nae, hita dad'i Lamatualain ana na ra. Ma Lamatualain Dula-d'alen o nafad'e na'o naa boe. 17 Mete ma hita dad'i Lamatualain ana na ra, naa sosoan nae, dei fo hita simbo tala Eni pusakan, huu Ana dad'i hita Ama na. Dad'i mete ma Ama' fee pusakan neu Anan Kristus, hita o simbo pusaka naa too E boe. Te hambu dala' esa fai: hita musi hambu doid'oso', 'ona' Kristus hambu doid'oso', dei fo Lamatualain bisa so'u nananaru nggita, 'ona' Ana so'u nananaru Kristus.^c

18 Te tungga au, doid'oso' fo hita hambu lele' ia, nda na'ena sosoa-ndandaa' sa, mete ma ta'asasama' noo dala-d'ala mandete-masa'a' fo Lamatualain nae natud'u neu nggita' a. 19 Tao-tao te, basa saa fo Lamatualain na'ad'ad'ad'i' nala sia lalai noo raefafo' ia, rahani ma hii-nau rae rita Ana natud'u ana ndoo-tetu na ra, seka. Ma Ana nau natud'u neu se noo rala nemeho'ot. 20 Huu Lamatualain na'ad'ad'ad'i' lalai ma raefafo' noo basa isi-oen, fo tao tungga Eni masud na. Te nda dad'i-d'ad'i sa, nda huu ara nda nau sa, te huu tungga Lamatualain hihii-nanaun, huu Ana hukun se ma hela se rambalutu. Mae 'ona' naa o, fe'e hambu nemehenat.^d 21 Te ia naa, basa saa fo Lamatualain na'ad'ad'ad'i' naa ra, rambalutu ena, ma nda hambu dala' sa ena. Te dei fo, Lamatualain nau mbo'i hendi se mia huku-d'oki', fo nda rambalutu sa ena, te ara bisa dad'i manaseli' tungga Eni masud na. Ana o nau so'u nananaru ana na ra, fo ara o nenembo'it mia mana mambalutu' ra. Ma lele' naa o basa' e dad'i feu' boe.

22 Hita bub'ulu' tae, hambu sususa' noo doid'oso' nae' sia raefafo' ia. Mia lele ulu' a losa lele' ia, basa saa fo Lamatualain na'ad'ad'ad'i' naa, nggasi huu ramed'a mambetas, lele' rahani fo Lamatualain tao basa' e dad'i feu'. Naa 'ona' ina' mana nggasi named'a mambetas lele' ana nae bonggi. 23 Nda 'aka' raefafo' ia rahani sa, te hita o tahani 'ona' naa boe. Mae Lamatualain fee Dula-d'alen na'ahulu' neu nggita, te hita o nggasi sia rala ta ra boe. Huu hita tahehere fo tahani Lamatualain so'u nggita dad'i Ana ndoo-tetu na ra ma hita o tahani fo Ana mbo'i hendi ao ta ra mia basa mana mambalutu' ra.^e

24 Lele' Lamatualain fee masoi-masod'a' neu nggita, Ana o nafad'e, so'al dei fo Eni nae tao ta'o bee. Te ia naa, hita fe'e tahani, huu nda fe'e dad'i sa. Mete ma hita tita dala' sa dad'i ena, na, hita nda parluu tahani fai fo tae tita dala' naa sa. Te atahori nda rahani fo rae rita dala' esa mana dad'i ena, to? 25 Huu mete ma tahani tae tita dala' esa fo nda fe'e mana dad'i' sa, na, ata fe'e bisa ta'atataa' ma ta'amamate'.

26 'Ona' naa boe, lele' hita tahani, Lamatualain Dula-d'alen tulu-fali nggita, huu hita nda ma'ad'ere' sa, ma nda hule-o'e tala noo matetu' sa. Te Lamatualain Dula-d'alen hule-o'e nggati hita, mae hita nda tahine tae hule-o'e tendi' ded'eat saa sa boe fo to'e saa fo hita hii teb'e-teb'e' a. 27 Lamatualain nahine basa saa fo hita tae 'ola' sia rala ta ra. Ana o nahine Dula-d'alen dud'u'an boe. Naa de Ana nahine basa dala' fo Dula-d'alen nae 'ola' tulu-fali nggita. Huu Lamatualain Dula-d'alen dud'u'an, 'ona' Lamatualain dud'u'an boe. Ma Dula-d'alen hule-o'e neu Lamatualain, no'e Lamatualain tulun atahori mamahere' ra. Te Dula-d'ale' naa hule-o'e tungga Lamatualain hihii-nanau na.

28 Ia naa tahine ta'o ia ena: Lamatualain tao basa' e dad'i malole' fee neu atahori mana sue E. Eni' a lele ulu' a, Lamatualain ator mema' so'al Ana nau tao ta'o bee fee neu se. Ma Ana no'e se ena nae, “'Ima leo! 'Ima dad'i Au atahori ngga!” 29 Huu dalahulun, Ana nahine mema' se ena, ma pili nala se fo tao se dad'i mata' esa 'ona' Kristus, Eni Ana na. Huu Kristus ia ulu', ma laen ra dad'i 'od'i na ra. 30 Atahori fo Lamatualain nahine eni' a lele ulu' a, Ana o no'e nala se dad'i Eni atahori na boe. Ma atahori naa ra o, fo ma'ahulun atahori mana masala-singgo' ra, Ana tao se dad'i atahori rala ndoos fo ara malolole bali' roo E. Ma Ana o so'u nananaru se boe.

31 Dad'i hita fe'e tae saa fai so'al dala' naa ra? Lamatualain nanea nahere' nggita. Noo ta'o naa, see bisa lab'an hita fai? Nda hambu saa, to? 32 Lamatualain nda na'anggee nala Anan sa. Te Ana fee Anan fo mate dad'i tutunu-hohotu', fo tulu-fali basa nggita. Huu Lamatualain nda na'anggee nala Anan mbei sa boe, de ata bisa tahine tae, dei fo Ana parseen nggita basa dala-d'ala malole' ra. Teb'e, to?

33 Mbei ma hei du'a mae, fe'e hambu atahori bisa fua sala' neu atahori fo Lamatualain pili nala' ra, do? Te nda hambu sa, to? Huu Lamatualain mesa' ne mana cap nggita nae, atahori rala ndoos nda masala-kilu' sa ena, fo ata malole too E.

34 Mbei ma hei du'a mae, fe'e hambu atahori bisa 'ola' nae Lamatualain musi hukun atahori, fo Ana pili nala' ra. Te nda bisa sa! Huu Yesus mate ena. Lelenan fai, Lamatualain tao nasod'a bali' E mia mamaten ena. Basa ma, Lamatualain so'u E fo 'endo' sia mamana nenefee had'a-hormat sia Eni bob'oa 'ona na. Sia naa Ana hule-o'e nakandoo 'a fee nggita.

35 Mbei ma hei du'a mae, hambu atahori do hambu dala', mana bisa na'asusuu' Kristus fo Ana nda sue nggita sa ena, do? Nda bisa sa! 'Ita' mae hita hambu ded'eat, sususa-sosona', doid'oso', ndoe-la'as, bua-lo'as nese, hambu sosoe', ma atahori rae tati-mbau risa nggita o, Kristus sue-lai nakandoo nggita boe. Nda hambu saa o bisa 'ena-'ai E, fo Ana naloe' sue nggita! 36 Sia Lamatualain Susura Meumaren nenesura' 'oi,

37 Dad'i mae hita hambu sususa' ta'o bee o, hita tasenggi' ena, huu Kristus sue nala nggita seli!

38 Au 'uhine teb'e-teb'e' ta'o ia: nda hambu dala' esa fo bisa tao Lamatualain naloe' sue nggita sa. Mae hita masod'a' do, hita mates do, hambu ate mia sorga do, mana to'u parenda' do, hambu koasa do, saa-saa mana sia lele' ia do, saa-saa mana nema' do, 39 koasa sia lalai do, sia raefafo' do, ma sud'i 'a saa laen ra fo Lamatualain tao nala' ra — nda hambu esa bisa tao sea-saranggaa nggita too Lamatualain, ma bisa tao E nda sue nggita sa ena! Huu hita nenefutu-pa'a' too hita Lamatuan Yesus Kristus, fo Lamatualain haitua nema' a.