2 Au fee conto mia hohoro-lalane' soa' neu mana masao' ra. Mete ma ina' esa sao nala saon, tungga hukun hohoro-lalane' a, na, ru'a se esa sao esa losa mate. Te mete ma tou' a mate, na, ina falu naa nda nenefutu-pa'a' noo hohoro-lalane' naa sa ena. De ana bisa sao selu'. 3 Te mete ma ina' a sao selu' lele' saon fe'e masod'a', na, tungga hohoro-lalane' a, ana hohongge ena. Te mete ma saon mate ena, na, hohoro-lalane' naa nda dai e sa ena. Eni nenembo'it ena. Dad'i mete ma ana sao selu' noo tou' laen, na, tungga hohoro-lalane' a, na, eni nda hohongge sa.

4 'Ona' naa boe hei mana mamahere' ra! Ta'o ia: Kristus mate ena. Naa o 'ona' hei mate moo E, ma lao hela masod'a mbaraa ma ra ena. De hukun hohoro-lalane' nda dai hei sa ena. Ia naa hei nenembo'it mia hohoro-lalane' naa ra ena, ma hei nenefutu-pa'a' moo Kristus, mana masod'a bali' mia mamate na. Naa 'ona' ina falu mana sao selu' a. Nda masala sa. De ia naa, basa saa fo hei tao' naa, tao fee neu Lamatualain.

5 Ma'ahulun hita tao tungga 'a ao-sisi' ta ra hihii-nanau na. Huu hita tahine hohoro-lalane' a, de naa mana tao nggita hii 'a talena-langga neu hohoro-lalane' ra, fo tao 'a dala nda matetu' ra sa. Naa! Hita salan naa, mana tao Lamatualain hiru' nasad'ea nggita. 6 Fe'esa'an, hita musi tao tungga hohoro-lalane' ra. Te ia naa hohoro-lalane' ra nda dai hita sa ena, huu hita mbo'i hendi masod'a mbaraa' ta ra ena. Tungga dala mbaraa' hihii-nanaun, na, Musa hohoro-lalanen mana nenesura' sia Susura Meumare' a, futu-pa'a nggita. Te tungga dala feu' a hihii-nanaun, hita nenembo'it mia hohoro-lalane' naa. Huu Lamatualain Dula-d'alen mana nalalao nggita! Naa de, ia naa, hita tao ues fee neu 'a Lamatualain.

7 Dad'i hita tae saa fai? Mbei ma hei du'a mae, “Hohoro-lalane' fo Lamatualain fee Musa naa, sala!” Hoko'! Huu mete ma au nda 'uhine hohoro-lalane' naa sa, ne'o au o nda 'uhine dala-d'ala de'ulaka' mana sia rala ngga sa. Conto 'ona' a, hambu hohoro-lalane' 'oi, “'Afi' hii mae ha'i mala atahori sud'i 'a saa na.” Te ta'o bee fo au 'uhine 'ae au hihii ngga naa, sala, mete ma au nda bub'ulu' hambu hohoro-lalanen sa? Nda bisa sa!^a 8 Te, huu hambu hohoro-lalane' mana nafad'e ta'o naa, naa 'ona' dala-d'ala de'ulaka' sia rala ngga tao fee au hii 'ae ha'i 'ala atahori sud'i 'a saa na ra mata'-mata'. Mete ma nda hambu hohoro-lalane' 'ena-'ai sa, na, sala-kilu' a nda na'ena koasa fo nalalao atahori sa.

9 Mia masod'a dalahulu ngga, au nda 'uhine matetu' dala' mia Lamatualain Hohoro-lalanen sa. Doo-d'oo, dei de au fe'e 'uhine matetu' ena. Naa de au fe'e 'uhine 'ae, au 'ulena-langga Hohoro-lalane' a ma tao sala-kilu' ena. Ma sala-kilu' a hahambun, naeni au musi mate. 10 Boe ma rala ngga nambalulutu, huu au 'uhine 'ae, au nda bisa malolole 'oo Lamatualain sa, mete ma au tao tungga 'aka' a Eni Hohoro-lalane na. Au 'undaa hambu Lamatualain nasa-b'oriin, naeni hukun mate, huu au 'ulena-langga Hohoro-lalanen ena. Tao-tao te, Hohoro-lalane' sia fo bisa tao atahori rasod'a noo ndoo-tetu'. Te soa' neu au, Hohoro-lalane' naa tao nalutu au, ma tao Lamatualain hiru' nasad'ea au. 11 Hohoro-lalane' naa, mema' natud'u dala masod'a ndoo-tetu'. Te huu hambu de'ulaka' mana nasod'a sia rala ngga, de au tipu-laka 'ala bali' ao ngga, ma du'a 'ae, au bisa malole 'oo Lamatualain sad'i au tao tungga Hohoro-lalane na. Boe ma, 'ona' Hohoro-lalane' naa mana tao losa Lamatualain melumud'u au, ma nda nau na'ab'ue noo au sa.^b

12 Dad'i mete ma faa' ra atahori 'oi, “Hohoro-lalane' fo Lamatualain fee neu Musa naa, sala,” na, au 'utaa 'ae, “Hoko'! Lamatualain Hohoro-lalanen naa, meumare'!” Boe ma basa parenda' mana sia Hohoro-lalane' naa, meumare', ndoo-tetu', ma malole'.

13 Mbei ma hei o du'a mae, Hohoro-lalane' naa mana tao Lamatualain hiru' nasad'ea au, to? Hoko'! Te mae au bub'ulu' Hohoro-lalane' naa, te au fe'e rena neu de'ulaka' mana sia rala ngga, losa au tao sala-kilu'. Naa, au ue-tatao sala ngga naa, mana tao fee Lamatualain hiru' nasad'ea au. Hohoro-lalane' mema' malole', huu ana natud'u dala-d'ala de'ulaka', mana tao nggita saranggaa too Lamatualain. Dad'i lele' Lamatualain natud'u dala masod'a ndoo-tetu', Hohoro lalane' naa mana tao manggarelo nae, dala de'ulaka' mana sia rala ta ra naa, nda malole' sa.

14 Hita bub'ulu' tae, Hohoro-lalane' fo Lamatualain fee neu ba'i Musa, naa lao' mia Lamatualain Dula-d'ale na. Te au ia atahori biasa de rala ngga nda manggatee' sa. Ma au rena 'a dala de'ulaka' mana sia rala de'ulaka ngga, losa au tao sala'. Naa 'ona' sala' a dad'i neu malangga ngga, ma au dad'i 'uu sala' a ate na. 15 Au nda 'ita' 'ae du'a ta'o bee sa ena boe. Au nda 'uhine saa fo au tao' a sa boe. Huu au nda tao tungga saa malole' fo au nau tao' a sa. Te au tao tungga saa fo au nda nau tao' a sa.^c 16 Mete ma au tao tungga saa fo au nda nau tao' a sa, na, au 'utaa 'ae, Lamatualain Hohoro-lalanen naa, ndaa. 17 Dad'i au nda mana 'ulalao ao ngga sa. Te de'ulaka' mana sia rala ngga nalalao au!

18 Au bub'ulu' ena 'ae, nda hambu dala malole' nasod'a sia rala ngga sa. Huu au ia, atahori rala de'ulaka'. Nau do nda nau sa o, au nda bisa 'u'ususuu' ao ngga fo tao ndoo-tetu' sa. Au nau, te nda dad'i tao sa! 19 Au hii 'ae tao malole', te au nda tao sa. Ma au nda nau tao de'ulaka' sa, te au tao 'ukundoo 'a! 20 Naa! Mete ma au tao tungga saa fo au nda nau tao' a sa, naa nda huu au mesa' nggo sa, te huu de'ulaka' mana nasod'a sia rala ngga.

21 Naa natud'u dud'u'at esa, ta'o ia: mae au 'ae tao malole', te hambu de'ulaka' sia rala ngga lab'an. 22 Tao-tao te, rala ngga namaho'o nala seli, mete ma au du'a so'al Lamatualain Hohoro-lalane na. 23 Te 'ona' hambu koasa sia rala ngga mana tao nambalutu au. Huu, au nau tao malole', te nda dad'i malole' sa. Naa 'ona' koasa de'ulaka' mana sia rala ngga to'u nala au, fo na'asusuu' au tungga 'a eni. 24 Ad'uu, kasian, e! Au atahori mana doid'oso'! See bisa fee masoi-masod'a' neu au mia koasa de'ulaka' mana nasod'a sia rala ngga, mana tao Lamatualain melumud'u au losa Ana hiru' nasad'ea au?

25 Te, awii! Lamatualain mesa' ne soi dala' fo mbo'i au! Makasi nae-nae' soa' neu E, huu hita Lamatuan Yesus Kristus bisa fee masoi-masod'a' neu au! Dad'i mete ma au 'usod'a 'umuhena neu 'a ao ngga, au doid'oso. Mae au hii 'ae tao tungga basa Lamatualain Hohoro-lalane na ra, te hambu de'ulaka' sia rala ngga kokoe au fo tao sala' 'ukundoo 'a.