3 Mbei ma hei nda mihine sa mae, lele' hita nenesarani', naa dad'i tatanda' 'oi, hita lao hela masod'a mbaraa ta ra ena de dad'i atahori feu', naeni, mana nenefutu-pa'a' too Yesus Kristus. Naa 'ona' hita mate too E ena. 4 Lele' Kristus mate, ara ra'oi E. Lele' hita nenesarani', naa 'ona' hita mate lao hela masod'a mbaraa ta ra, de ara ra'oi nggita. Naa, Ama' Lamatualain pake koasa manaselin, fo tao nasod'a bali' Kristus mia mamate na. Ama' Lamatualain o nau hita simbo koasan naa, fo tasod'a bali' dad'i atahori feu'.^a

5 Naa 'ona' hita mate too Yesus. Dad'i hita mana nenefutu-pa'a' too E, ne'o hita o tasod'a bali' mia mamates, 'ona' Ana nasod'a bali' ena.

6 Fe'esa'an, hita dad'i atahori mana tao sala' mata'-mata'. Te masod'a mbara ta ra naa, nambalulutu ena, 'ona' ara mbaku risa nggita sia hau nggangge' too Kristus ena. Ia naa, de'ulaka' mana sia rala ta ra nda na'ena koasa fo nalalao nggita sa ena. Ia naa, hita nda nenefutu-pa'a' fo tao sala' sa ena. Huu hita nda 'afi' 'ona' ate mana nda na'ena hak fo pili nae tao saa sa. 7 Mete ma atahori mate ena, eni nenembo'it ena, to? Nda hambu esa sa boe bisa na'asusuu' e tao sala'.

8 Dad'i, huu naa 'ona' hita mate too Kristus ena, na, hita tamahere tae, dei fo ata tasod'a takandoo too E boe. 9 Hita tahine tae, huu Kristus nasod'a bali' mia mamaten ena, de Ana nda mate selu' sa ena. Huu nda hambu esa na'ena koasa fo tao nisa E sa boe. 10 Fe'esa'an, Ana mate lao esa 'a, fo lea hendi sala' koasan ena. De ia naa, Ana nasod'a fo natud'u had'a-hormat neu Lamatualain.

11 Hei o musi tao ao ma ra ta'o ia. 'Ona' hei mate ena, naa de sala' nda na'ena koasa neu nggi sa ena. De ia naa, hei musi misod'a fo mitud'u had'a-hormat neu Lamatualain, huu hei nenefutu-pa'a' moo Yesus Kristus ena.

12 'Afi' hela de'ulaka' mana sia ralam hambu koasa fo nalalao nggo fai, fo 'aka' tungga ao-sisim hihii-nanaun fo tao de'ulaka' ra. Te ne'o ho ao-sisim mate boe. 13 Boe ma 'afi' fee aom fo tao dala nda malole' ra sa, te naa sala boe. Te fee aom neu Lamatualain, fo Ana nalalao nggo. 'Ona' ho mate ena, basa ma musod'a bali'. Dad'i fee basa masod'am fo tao dala ndoo-tetu' ra, fee neu Lamatualain. 14 'Afi' fee sala' ra ralalao nggi, 'ona sala' ra dad'i hei malanggam. Ia naa, hei nda parluu misod'a tao tungga ba'i Musa hohoro-lalanen fai fo malole bali' moo Lamatualain. Te hei misod'a ndoos, huu Lamatualain natud'u rala malolen neu nggi. De ia naa, rala malolen naa, mana nalalao nggi.

15 Dad'i, ta'o bee? Mbei ma hei du'a mae, “Huu hita nda 'afi' tasod'a tungga ba'i Musa hohoro-lalanen sa ena, fo malole too Lamatualain, de hela neu fo ata tao sala' takandoo 'a leo. Huu Lamatualain fe'e nau natud'u rala malolen neu nggita!” Hei du'a ta'o naa, to? Au 'ufad'e, e! Naa sala!

16 Au fee conto 'ona' malangga noo ate. Mete ma hei fee ao ma ra fo tao ues fee atahori esa, na, hei musi rena e, ma tao ues tungga hihii-nanau na. Huu eni, hei malanggam, mana na'ena hak parenda nggi. Ma hei, eni ate na ra. 'Ona' naa boe, hei bisa pili mae tungga bee ka. Huu hei bisa pili fo tao sala', fo dad'i sala' a ate na. Te mete ma hei pili ta'o naa ena, na, hei tao ao ma ra saranggaa mia Lamatualain. Ma, hei o bisa pili fo tao ndoo-tetu', ma dad'i ate fo tao tungga saa fo Lamatualain denu nggi. Mete ma hei pili ta'o naa, na, hei bisa dad'i malole moo E!

17 Fe'esa'an hei hela sala' nalalao nggi, te ia naa, hei tungga rala ma ra, fo tao tungga saa fo atahori sarani' ra ranori neu nggi' a. Naeni de au 'o'e makasi neu Lamatualain. 18 Huu Lamatualain mbo'i nggi mia sala' koasan, losa sala' a nda nalalao nggi sa ena. De ia naa, dala ndoo-tetu' a nalalao nggi.

19 Au 'ola' ia 'endi' conto fais-fais mia malangga noo aten, naa fo mihine noo malolole au masud ngga. Fe'esa'an, hei fee ao ma ra dad'i ate fo tao sala', mana tao nggi dad'i manggenggeo-malaafu', tungga Musa Hohoro-lalane na. Te ia naa, hei musi fee ao ma ra dad'i ate fo misod'a tao ndoo-tetu' a, fo tao nggi dad'i meumare' sia Lamatualain mata na.

20 Fe'esa'an, lele' ama 'aka' rena ma tao tungga 'a sala' hihii-nanaun, hei nda 'afi' rena ma tao tungga ndoo-tetu' a sa ena. 21 De au 'ae 'utane ta'o ia: Hei hambu buna-b'oa malole' saa mia tatao-nono'i ma ra naa? Nese, to? Tao-tao te, buna-b'oa' fo hei hambu' naa, tao mamaet fee nggi. Huu Hei tao sala' ta'o naa, de neu mate'en, hei saranggaa mia Lamatualain.

22 Te ia naa, Lamatualain mbo'i hendi nggi ena mia malangga mbaraa' a, de ama sud'i boe tao sala' fai. Ia naa hei musi dad'i Lamatua' atahori mana tao ues na. Te mate'en, dei fo hei dad'i meumare' fee neu E, ma bisa misod'a ndoo-tetu' nda nama'etu sa. 23 Huu lele' hita tao sala', eni hahambun, naeni hita saranggaa mia Lamatualain losa doo ndu'u-d'oon neu. Mate nggita ena. Te huu Lamatualain sad'ia nala dala sosoi' esa ena. Huu Ana nae fee mud'a' nggita masod'a ndoo-tetu' nda mana'etu' sa. Ma hita hambu masod'a' naa, mete ma ata tungga dad'i teu hita Lamatuan Yesus Kristus atahori na.