Atahori bisa malole roo Lamatualain sad'i ramahere neu Yesus Kristus
5
Dad'i, huu tamahere neu Lamatualain, naa de Ana cap nggita atahori rala ndoos. De rala ta ra dad'i meumare' fee neu Lamatualain, huu hita Lamatuan Yesus Kristus, fo Lamatualain haitua' nema' a, soi dala' fo ata bad'ame ta'o naa. 2 Kristus natud'u rala malolen neu nggita 'ona' naa, huu tamahere neu E ena. Naa de rala ta ra dad'i manggatee. Ma tamaho'o, huu ata tahine tae, dei fo Lamatualain nau so'u nggita fo med'a tita Eni Mandete-masa'a na.3 Mae hita hambu sususa' mata'-mata', te tamaho'o takandoo 'a. Ata bub'ulu' tae, tanori mia sususa', fo bisa ta'atataa' noo ma'ad'ere' lena' fai. 4 Mete ma ta'atataa' sia sususa' rala, na, naa tao nggita nda tud'a sa, ma masod'a ta ra tao namaho'o Lamatualain rala na. Mete ma hita tasod'a tahere' ta'o naa, na, naa tao nemehere ta ra bau mahere', ma, Lamatualain nae natud'u rala malolen neu nggita. 5 Mete ma nemehere ta ra bau mahere' ta'o naa, na, hita nda mae sa. Huu Lamatualain fee nggita Dula-d'ale Meumaren, fo tahine sia rala ta ra tae, Ana sue nala nggita naen seli.
6 Ana natud'u susuen ta'o ia: lele' hita nda bisa tao ao ta ra malole too Lamatualain sa, tao-tao te Ana haitua Kristus fo mate nggati hita mana tasod'a nda taoafi' neu Lamatualain sa. Lamatualain pili fain nandaa ta'o naa. 7 Du'a malolole dei! Matasala' dei fo hambu atahori nau mate nggati nonoon rala ndoos. Ne'o hambu atahori ruma rae mate fo tulun atahori rala malole'. 8 Te Lamatualain natud'u rala susuen nae-nae neu nggita ena. Huu, lele' hita fe'e tao sala', te Kristus mate nggati hita ena.
9 Lamatualain cap nggita atahori rala ndoos mana malole too E, huu Kristus fee raan nandali fo mate soa' neu nggita. Tao-tao te, mete ma atahori tao sala', na, Lamatualain namanasa. Te huu Kristus tataon, de hita mana tao sala' ra nda nenehukun sa ena.
10 Fe'esa'an, hita fe'e musu too Lamatualain. Te Lamatualain Anan mate fo tao ma'asufu Lamatualain ralan, fo noo ta'o naa hita bad'ame bali' too Lamatualain. Dad'i ia naa, hita nda bamusu' sa ena, te malole bali' ena. Lelenan fai, huu Kristus nasod'a bali' ena, de dei fo sia fai matete'en Ana fee masoi-masod'a' neu nggita fo 'afi' hambu Lamatualain huku-d'okin fai. 11 Nda ta'o 'a naa sa! Ata tamaho'o tae, “Lamatualain naa, manaseli teb'e'!” huu hita nenepa'a' too E. Hita dad'i Eni atahorin, huu hita Lamatuan Yesus Kristus, mate nggati hita ena, fo tao nggita dame too Lamatualain.
Mete ma ta'asasama' Adam noo Kristus, na, hambu mana nae 'a 'ona esa', ma hambu manafea' boe
12 Dad'i mia lele ulu' a, atahori fefeun, naeni ba'i Adam, mana tao sala' na'ahulu'. Naeni de Lamatualain nda fee ne nasod'a nakandoo sa. De eni' a mia lele' naa, basa atahori sia raefafo' ia tungga tao sala' 'ona' ba'i Adam boe. Ma huu sira tao sala' 'ona' ba'i Adam, de basa se musi mate 'ona' ba'i Adam boe.a 13 Ma'ahulun, lele' Lamatualain nda fe'e na'onda' Hohoro-lalane na ra sa, atahori sia ndule raefafo' ia tao sala'. Te huu nda fe'e hambu Hohoro-lalane' raa sa, de atahori sala-kilu na ra nda nene'ito-reken sa. 14 Mia ba'i Adam losa ba'i Musa simbo Lamatualain Hohoro-lalanen, basa atahori dei fo mate. Mae ara nda ralena-langga neu Lamatua' parendan fo Ana fee neu ba'i Adam a sa, te ara fe'e tao sala-kilu' mata'-mata'. Naa de ara musi mate 'ona' Adam.
Naa! Mete ma ta'asasama' ba'i Adam noo Lamatua' Yesus, hambu mana nae 'a 'ona esa', ma hambu manafea' boe. Huu Adam 'ona' nggambar esa mana natud'u Yesus mata-aon, mana sangga sou nema. 15 Te Adam ue-tao salan esa, nda 'ona' Yesus ue-tao malolen esa soa' neu nggita sa. Te atahori esa, naeni Adam, nalena-langga Lamatualain parenda na. Naa de basa atahori musi mate. Te atahori esa fai, naeni Yesus Kristus, tao malole manaseli' esa, ma nda nahani atahori bala-b'ae malolen sa. Atahori esa tataon esa, dai ena soa' neu basa atahori, huu Lamatualain rala malolen, de Ana hii 'a tao malole' fee nggita. 16 Lamatualain fee neu nggita' naa, manafea' noo sala' fo atahori kaesa' naa, Adam, tao' a. Lele' ana tao sala', Lamatualain na'etu' nae, “Ho sala. Dad'i musi hambu huku-d'oki'!” Te mae atahori tao sala' naen seli o, Lamatualain, mana paresa' basa atahori masod'an, fe'e nau natud'u rala malolen, ma na'etu' nae, “Au cap nggo nda sala sa. Dad'i ia naa ho nenembo'it ma nda hambu huku-d'oki' sa ena. 'Uma fo malole bali' moo Au!” 17 Dad'i atahori esa, Adam, tao sala', ma nalena-langga Lamatualain parenda na. Naa de, ia naa, basa e musi mate. Te Atahori esa fai, naeni Yesus Kristus, Ana tao malole'. Huu tatao malolen naa, naa de hita bisa malole too Lamatualain. Naa 'ona' saa esa fo Ana fee hie' neu nggita. Ana nau fee nggita tasod'a ndoo-tetu' 'ona' hita Mane' nonoo na ra.
18 Dad'i atahori esa salan esa, soi dala' fo basa atahori musi nene'oi' mia Lamatualain mata na. Ma Atahori esa fai tatao ndoo-tetun esa, soi dala' fo basa atahori malole bali' roo Lamatualain, fo rasod'a ndoo-tetu' roo E. 19 Au masud ngga ta'o ia: Adam naa, atahori esa nda mana nau rena Lamatualain sa, ma nalena-langga parenda na. De atahori hetar o tungga tao sala' 'ona' e boe. Ma Yesus naa, Atahori esa mana rena neu Lamatualain, ma tao tungga hihii-nanau na. Eni mana soi dala' fo atahori hetar bisa malole bali' roo Lamatualain.
20 Lamatualain na'onda' Hohoro-lalanen neu ba'i Musa, fo basa atahori rahine teb'e, bee sala. Ma sia bee-b'ee atahori sala na ra boe fua-fua', sia naa Lamatualain natud'u rala malolen nae' neu se. 21 Fe'esa'an, de'ulaka' mana sia atahori ra ralan na'ena koasa fo nalalao se, losa ara tao sala' mana nendi huku-d'oki mamates. Te ia naa, dala malole' fo hita Lamatuan Yesus Kristus tao' naa, Lamatualain pake fo natud'u rala malolen neu nggita. Ma dala malole' naa na'ena koasa fo nalalao nggita, ma ata bisa malole too Lamatualain, ma tasod'a ndoo-tetu' too E takandoo 'a.