Conto mia ba'i Abraham. Ana malole noo Lamatualain, huu namahere neu E
4
Dad'i mete conto mia hita atahori Yahud'i ra, ba'i Abraham na. Hita bisa tanori saa mia e, so'al atahori malole roo Lamatualain, huu ramahere neu Kristus?2 Hita bisa tanori ta'o ia: mete ma Abraham bisa malole noo Lamatualain huu ana tao dala malole', na, ana na'ena netehuu' de mbarani 'ola' nae' sia atahori mata na ra. Te sia Lamatualain matan, ana nda mbarani 'ola' saa sa boe. 3 Te nenesura' sia Lamatualain Susura Meumaren 'oi,
“Huu Abraham namahere neu Lamatualain,
naa de Lamatualain cap e, atahori rala ndoos mana malole noo Eni.”a
4 Naa, atahori mana tao ues simbo nggad'i na. Nggad'in naa nda doi' parseen sa, te doi' fo malangga bae fo nggati atahori naa beb'engge na. Huu atahori mana tao ues naa hak na naa. 5 Te nda hambu atahori bisa tao rala dala' esa, fo ana malolole noo Lamatualain sa. Huu atahori musi ramahere neu Yesus Kristus, naa fo Lamatualain cap se 'ona' atahori rala ndoos, ma simbo e. Huu Lamatualain mana na'ena hak fo nae, atahori mana namahere neu Yesus Kristus bisa malole bali' noo E, mae dalahulun atahori naa tao sala' ma nda taoafi' mbali Lamatualain sa.
6 Mane Daud o nafad'e' nae, atahori ralan ma'ahee lele' Lamatualain cap se nae, sira atahori rala ndoos, mae ara nda tao tungga hohoro-lalane' noo matetu' sa. Huu Daud sura' nae:
7 “Mae atahori ia ra ralena-langga Lamatualain Hohoro-lalanen,
te Ana 'ose hendi sala na ra ena.
Naa de ara 'onton seli!
Atahori mana tao de'ulaka' ra,
Lamatualain lilii' hendi sala na ra ena.
8 Te mete ma Lamatualain nda 'ito-reken atahori sala na ra sa,
na, atahori naa 'onton teb'e-teb'e'!”b
9 Naa, mbei ma hei du'a mae, 'aka' atahori Yahud'i mana sunat ra, mana 'onton fo malole roo Lamatualain, do? Ma atahori nusa fea' nda mana sunat ra sa, nda bisa sa, do? Hoko'! Dud'u'at naa, sala! Naa de hai fee nesenened'a' neu nggi mae, huu Abraham namahere neu Lamatualain, naa de Lamatualain cap e, atahori rala ndoos mana malole noo E. 10 Eni bees Lamatualain cap Abraham ta'o naa? Lele' ana sunat ena, do nda fe'e sunat sa? Matetun, nda lele' ana sunat basa sa, te lele' ana nda fe'e sunat sa.
11 Teb'e! Lele' Abraham nda fe'e sunat sa, te Lamatualain cap e, nae atahori rala ndoos mana malole noo Lamatualain. Doo-d'oo, dei de ana sunat fo dad'i bukti 'oi, eni dad'i atahori mamahere' neu Lamatualain. Noo ta'o naa, Abraham mana soi dala' fee neu basa atahori mana ramahere Lamatualain. Huu Lamatualain simbo basa atahori mana ramahere neu E, fo ara malole roo Lamatua', mae ara mana nenesunat, do hoko'.c 12 Abraham o soi dala' fee hita atahori Yahud'i mana sunat ra boe. Nda huu hita sunat sa, te huu hita tamahere Kristus, 'ona' Abraham namahere Lamatualain lele' ana nda fe'e sunat sa.
Mete ma tamahere Lamatualain, na, hita simbo saa fo Ana helu-fuli' a
13 Lamatualain hengge-nee hehelu-fufulin noo Abraham ma tititi-nonosi na ra nae, doo-d'oo te raefafo' dad'i sira hata-heto na ra. Lamatualain helu-fuli ta'o naa, huu Abraham namahere E, de Lamatualain cap e nae, atahori rala ndoos ma mana malole noo Eni. Te Lamatualain nda helu-fuli ta'o naa sa, huu Abraham tao tungga Eni Hohoro-lalane na.d
14 Huu mete ma atahori mana tao tungga 'a Lamatualain Hohoro-lalanen bisa simbo nala hata-heto' fo Lamatualain helu-fuli' naa, naa sosoan nae, parsuma 'a nemehere neu Lamatualain. Ma Lamatualain hehelu-fufulin naa o nda na'ena ngguna sa boe.e 15 Sia bee hambu Lamatualain Hohoro-lalanen, na, sia naa o atahori ralena-langga Hohoro-lalane' naa ra boe. Ma mete ma atahori ralena-langga Hohoro-lalanen, na, Lamatualain namanasa, de huku-d'oki se. 'Ona' Lamatualain Hohoro-lalanen nese, na, ne'o nda hambu atahori ralena-langga Hohoro-lalane' naa sa. Te mema' hohoro-lalane naa sia.
16 Naa de hita musi tamahere E. Naa, nenendin seli lena' basa' e. Te Lamatualain hii 'a natud'u rala malolen neu atahori mana ramahere neu E. De mete ma tamahere neu E 'ona' Abraham, ne'o hita tae simbo saa fo Ana helu-fuli' a, mae hita atahori Yahud'i mana tao tungga Hohoro-lalanen, do hoko'. Dad'i basa hita mana tamahere' ra, 'ona' Abraham tititi-nonosi na ra.f 17 Sia Lamatualain Susura Meumaren, Ana helu-fuli neu Abraham ena nae, “Au tao fo dad'i muu nusa' hetar bei-ba'i na ra.” Abraham namahere neu Lamatualain. De doo-d'oo ma Lamatualain tao natetu hehelu-fufuli na. Ana o mana tao nasod'a bali' atahori mates ra. Ana 'ola 'a, na, saa nese o, dad'i neu' ena boe.g
18 Abraham namahere Lamatualain, ma nahani E, mae ana nda fe'e maana' sa. Naeni de Lamatualain tao e dad'i “Nusa' hetar bei-ba'i na ra.” Naa 'ona' mana nenesura' sia Susura Meumare' a nae, “Dei fo tititi-nonosi' hetar lao' mia nggo.”h 19 Abraham namahere teb'e-teb'e' neu Lamatualain, mae ana bub'ulu' eni lasi kakalu' ena, too natun esa ena. Ma Sara mamana anan na'ate'eme, ma ana nggonggoo ena.i 20 Te Abraham nemeheren nda nanggongga sa, do du'a nae Lamatualain nda bisa tao natetu hehelu-fufulin sa. Nemeheren neu Lamatualain bau manggatee lele' ana so'u nananaru Lamatualain nara na. 21 Abraham namahere teb'e-teb'e' nae, saa fo Lamatua helu-fuli ena, Ana bisa tao natetu e. 22 Naa de Lamatualain cap Abraham, atahori rala ndoos mana malole noo E.
23 Te Lamatualain Susura Meumaren nae, Lamatualain nda 'ito-reken ta'o naa fee neu 'a Abraham sa, 24 te fee neu nggita boe! Huu mete ma tamahere neu E, Ana o cap nggita atahori rala ndoos mana malole too E. Lamatualain naa, mana tao nasod'a bali' hita Lamatuan Yesus mia mamate na. 25 Yesus mate, huu sala-singgo ta ra. Basa boe ma, Ana nasod'a bali' fo soi dala', naa fo ata bisa malole bali' too Lamatualain.j