Mae atahori Yahud'i ra ra'ena hak simbo hata-heto' mia Lamatualain Hehelu-fufulin o, naa o nda fee se masoi-masod'a' sa boe
3
Mete ma ta'o naa, na, dad'i atahori Yahud'i nenesunat, hahambun saa? Mbei ma ama du'a mae, atahori Yahud'i ra hambu nae' ma malole' lena' mia atahori nda Yahud'i ra sa, to? 2 Teb'e! Dad'i atahori Yahud'i, hambu hahambu' sia dala' nae'. Kaesan, huu Lamatualain fee ue-taos neu atahori Yahud'i fo sura' ma ranea ma'ab'eb'esa Eni Ded'ea-'o'ola na. 3 De ta'o bee? Mbei ma hei du'a mae, Lamatualain nda bisa tao tungga 'o'olan sa, huu atahori Yahud'i ruma nda ramahere E sa, do? 4 Nda bisa sa! Te mae basa atahori sia raefafo' ia mana peko-leleko' o, Lamatualain mesa' ne 'ola' noo ndoo-tetu' nakandoo 'a! Misined'a, huu nenesura' sia Lamatualain Susura Meumaren so'al Lamatua' 'oi,“Hambu atahori mbia sala' 'oi,
Ana nda na'etu' ded'e'at ra noo ndoo-tetu' sa.
Te dei fo ara bub'ulu' rae,
saa fo Ana 'ola' naa, mema' teb'e.
Dei fo Ana nasenggi',
huu Ana nda bisa 'ola' sala sa.”a
5 Te mete ma hita tao sala', ma sala' naa natud'u meu-meu neu basa atahori 'oi, saa fo Lamatualain tao' naa, mema' teb'e. Mete ma ta'o naa, na, hita tae saa fai? Tae Lamatualain nda ndoo-tetu' sa, mete ma Ana huku-d'oki hita, do? (Huu hambu atahori ruma 'ola' ta'o naa.) 6 Nda bisa sa! Lamatualain huku-d'oki hita o nda sala sa. Huu na'ena hak fo huku-d'oki atahori mana tao sala' sia raefafo' ia.
7 Naa! Mete ma au leleko', naa natud'u nae, Lamatualain huku-d'okin naa, ndaa. Mete ma au 'utud'u mandete-masa'an ta'o naa, na, saa de Ana paresa' masod'a ngga, ma na'etu' ded'e'a ngga nae, saa fo au tao' naa sala? 8 'Afi' ta'o naa! Mete ma mae tungga dud'u'at 'ona' naa, hei tungga atahori mana rae, “Hela fo ata tao de'ulaka' naen seli, naa fo malole' a o boe namanae!” Atahori mana 'ola' ta'o naa, nandaa hambu huku-d'oki'. Te hambu atahori ruma 'ola' ralutu nara ngga 'oi, au 'unori atahori ta'o naa.
Nda hambu atahori esa o rala ndoos sa boe, huu basa e mana tao sala' ra
9 Dad'i ta'o bee? Hei du'a mae hita atahori Yahud'i ra malole' lena' atahori nda Yahud'i ra sa, do? Nda bisa ta'o naa sa! Te au 'utud'u hei ena 'ae, basa atahori tud'a sala', mae eni atahori Yahud'i, do atahori nda Yahud'i sa. 10 Huu nenesura' sia Lamatualain Susura Meumaren 'oi,
“Nda hambu atahori esa sa boe nasod'a noo ndoo-tetu' nakandoo 'a sa.
Nda esa sa boe!
11 Nda hambu atahori esa sa boe nahine teb'e so'al Lamatualain.
Nda hambu esa sangga nae nahine Lamatualain sa.
12 Basa se lao dinggo' hela dala masod'a ndoo-tetu' a.
Ma ara nda dad'i papake' sa ena.
Nda hambu atahori esa sa boe natud'u rala malole' sa.
Nda esa sa boe!b
13 Ded'ea-'o'ola na ra ma'afoo mburu,
'Ona' rates fo atahori 'ali bali'.
Bafa na ra rahine 'a 'ola' pepeko-leleko'.
Ded'ea-'o'ola' mana kalua mia bafa na ra,
'Ona' mengge a raso na.c
14 Bafa na ra rahine 'a rarai-oole atahori,
ma 'ola' ra'amuti fo tao atahori rala na ra mera,
te naa mana kalua mia rala de'ulaka na ra.d
15 Ara nda ramatau tao risa atahori sa.
16 Ara bee reu, na,
hii 'a ramue-raanggi sia naa,
ma tao sususa' mata'-mata' neu atahori.
17 Ara rasod'a nda rahine mole-d'ame sa,
ma nda rahine rasod'a nee-nee lino-lino sa.e
18 Ara nda ra'atataa' rala ao na ra sa,
huu nda ramatau Lamatualain mbei sa boe.”f
19 Naa! Hita tahine tae, Lamatualain fee Hohoro-lalanen neu atahori mana tungga neu Hohoro-lalane' naa ra. Noo ta'o naa, ara nda hambu toto'u-nonoet saa-saa sa ena boe. Dei fo basa atahori sia raefafo' ia, musi reu randaa roo Lamatualain fo Ana na'etu' ded'ea na ra nae, ara sala, do hoko'. 20 Naa de, nda hambu atahori esa sa boe bisa 'ola' nae, “Lamatualain cap nae, au atahori rala ndoos, huu au tao tungga basa Hohoro-lalane na.” Nda bisa ta'o naa sa! Huu Lamatualain Hohoro-lalanen natud'u 'oi, basa hita tao sala'.g
Hita musi tamahere neu Lamatua' Yesus, dei fo Lamatualain cap nae hita atahori rala ndoos
21 'Afi' bingun so'al Lamatualain dud'u'an mana natud'u dala' fo hita malolole bali' too E. Matetun, hita bisa malolole too E, te ndaa huu hita tao tungga Hohoro-lalanen sa. Huu nenesura' sia Hohoro-lalanen ta'o naa, ma mana 'ola-'ola dalahulu na ra rafad'e ta'o naa sia Lamatualain Susura Meumare na. 22 Lamatualain nae hita atahori rala ndoos ma malole' too Eni lele' hita tamahere neu Yesus Kristus. Ana nda mete mata' sa, te Ana tao ta'o naa neu basa atahori mana ramahere neu Yesus.h
23 Lamatualain naa meumare' ma ndoo-tetu'. Ma tungga Lamatualain, hita o musi meumare' ma ndoo-tetu' boe, dei fo Ana bisa simbo nala nggita. Te basa atahori tao sala'. Naa de hita atahori sob'a-sob'a tao ao ta ra malole noo Lamatualain, te nda bisa tao tala tungga Lamatualain meumaren, mana mandete-masa'a' naa sa. 24 Mae ta'o naa o, Lamatualain natud'u rala malolen, ma na'etu' nae, hita nda sala sa ena. Ana simbo nala hita 'ona' naa, huu Yesus Kristus soi-tefa nala nggita mia sala-kilu ta ra ena.
25-26 Lamatualain dud'u nala Yesus dad'i tutunu-hohotu' fo tatana mamaet ma soi-tefa hita sala na ra. Te hita musi tamahere E tae, Ana simbo huku-d'oki ta ra. De Ana fee raan nandali, ma mate nggati hita. Noo ta'o naa, Lamatualain natud'u nae, saa fo Eni na'etu' naa, teb'e. Dalahulun, Eni na'atataa' seli ena, de na'etu' fo lilii' hendi sala-sala' fo atahori tao mia dalahulu na. Te Ana musi hukun atahori masala' ra, mete ma hoko', na, Eni nda ndoo-tetu' sa. Dad'i Ana soi dala' fo Yesus Kristus lemba-d'oi hita atahori masala' ra huku-d'oki ta ra. Ia naa, Ana natud'u neu basa atahori nae, Eni tao malole' nakandoo 'a. Boe ma, basa atahori masala', mana ramahere neu Yesus, Ana na'etu' fo cap se 'ona' atahori rala ndoos.
27 De ta'o bee? Mbei ma hei du'a mae hei bisa 'ola' nae', huu Lamatualain simbo nggi ena, do? Nda bisa sa! Nau netud'u Hohoro-lalane' saa mana tao nggi malole' moo Lamatualain, do? Ne'o hei mae Lamatualain simbo nggi huu ama tao dala malole', do? Nda bisa sa! Hai bisa mitud'u 'a Hohoro-lalane' mana 'oi, Lamatualain simbo nala nggita, huu tamahere neu Yesus. 'Aka' naa ena!
28 Naa de ia naa hita tahine ta'o ia ena: atahori bisa malole roo Lamatualain huu ramahere E, te nda huu sira tao tungga 'a Eni Hohoro-lalanen sa.
29 Naa, au 'ae 'utane ta'o ia: Lamatualain simbo 'aka' atahori Yahud'i ra do, Ana simbo atahori fea' ra boe? Teb'e! Ana simbo basa se!
30 Huu Lamatualain naa, esa 'a. Ma 'aka' dala' esa fo Ana simbo, fo hita atahori bisa malole' too E. Naeni, huu tamahere neu Kristus. Dala' naa, fee neu atahori Yahud'i ma atahori nda Yahud'i ra sa boe.i
31 Dad'i au 'ae 'utane ta'o ia: mete ma tamahere neu Lamatualain, na, naa nemopo' hendi Hohoro-lalanen, do? Hoko'! Matetun, naa tao natetu Hohoro-lalane na.