Lamatualain o namanasa atahori Yahud'i fo Ana pili nala' ra boe
2
Rena basa de'ulaka' mata-mata' ra ena, to? De mbei ma du'a mae, “Awee! Atahori naa ra de'ulaka na ra seli teb'e ena!” Mete ma ho du'a ta'o naa ena, na, besa-b'esa, o! Te ho o de'ulaka ma 'ona' naa boe. Naa de nda mu'ena toto'u-nonoet sa fo musula'e ao ma, mae ho, seka. Mete ma mae, atahori laen ra de'ulaka' ma randaa hambu huku-d'oki', na, 'afi' lilii', te ho fua sala' neu aom boe. Huu ho o tao sala' 'ona' naa boe.a 2 Te hai bub'ulu' mae, mete ma Lamatualain hukun atahori mana tao de'ulaka' ra, na, Ana na'etu' ded'ea na ra noo ndoo-tetu'. 3 Do, ta'o bee? Mbei ma du'a mae, “Atahori mana tao de'ulaka' ra, randaa hambu huku-d'oki' mia Lamatualain.” Tao-tao te ho tao de'ulaka' 'ona' se boe. Te du'a mae, “Lamatualain huku-d'okin nda dai au sa.” Te huun saa?4 Lamatualain natud'u rala malolen neu nggo. Ma Ana na'atataa' so'al tatao-nono'i ma ra. Te ta'o bee de mete E mendi 'a mata seseri'? Mbei ma nda muhine mae, Ana natud'u rala malolen neu nggo, fo lao hela sala-kilu ma ra, fo bali' misi' E.
5 Te ho ia, langga fatu ma nda nau rena sa! Ma nda nau lao hela sala ma ra mbei sa boe! Dad'i noo tataom ho huku-d'okim boe namab'era. Te mete ma raefafo' sambu-lalo, na, Lamatualain nae timba-tai basa atahori ra masod'a na ra. Ma dei fo basa atahori rahine rae, Lamatualain nggero-furi atahori sala-kilu na ra noo ndoo-tetu'. Lele' naa, Ana hukun nggo beran seli, huu Ana nda simbo tatao-nono'i ma ra sa. 6 Masod'am ta'o bee, na, Lamatualain o bala-b'ae nggo ta'o naa boe.b
7 Te atahori mana tao nakandoo 'a dala malole' ra, dei fo Ana fee se masod'a ndoo-tetu' nda mana'etu' sa. Sira mana simbo had'a-hormat, nara malole', ma rasod'a rakandoo roo E. 8 Te Lamatualain nda simbo atahori mana tao de'ulaka' ra sa. Ana namanasa se seli, huu rahine 'a balab'an. Ara nda tao tungga dala ndoo-tetu' sa, te rahine 'aka' tao 'a dala de'ulaka' ra.
9 Basa atahori mana tao de'ulaka' ra, dei fo hambu sususa' ma doid'oso'. Mae atahori Yahud'i do, nda Yahud'i sa o, dei fo basa se hambu.c 10 Te basa atahori mana tao dala malole' ra, dei fo Lamatualain so'u nananaru se, ma fee se had'a-hormat ma rasod'a noo mole-d'ame. Mae sira atahori Yahud'i do, nda Yahud'i sa o, basa se hambu. 11 Huu Lamatualain nda mete mata' sa!d
12 Lamatualain Hohoro-lalanen dai basa atahori. Naa! Mete ma hambu atahori nda rahine Hohoro-lalane' naa sa, de tao sala', dei fo ana saranggaa mia Lamatualain. Ma mete ma hambu atahori bub'ulu' hohoro-lalane' naa ena, te ana tao sala', naa dei fo Lamatualain nggero-furi sala na ra nendi' hohoro-lalane' naa. Dei fo ara o saranggaa mia Lamatualain, huu ralena-langga neu Hohoro-lalane na. 13 Mete ma mae malolole moo Lamatualain, na, nda 'aka' rena 'a Hohoro-lalanen sa. Te atahori o musi tao tungga Eni Hohoro-lalanen boe, dei fo Ana fe'e simbo se ena. 'Afi' rena 'a!
14 Mae atahori nda Yahud'i ra sa nda rahine Lamatualain Hohoro-lalanen sosoan sa o, te mia sira e hambu ruma tao tungga Hohoro-lalane' naa boe. Huu rala na ra mana rafad'e se, bee ndaa ma bee sala. 15 Noo ta'o naa, ara ratud'u rae, Lamatualain Hohoro-lalanen nenesura' sia rala na ra, 'ona' 'ab'as fo Lamatualain tenu sia rala na ra. Rala na ra mana timba-tai saa fo sira tao' ra. Ma dud'u'a na ra rafad'e bali' se mete ma ara tao sala', ma rafad'e se mete ma ara tao tungga ndoo na. 16 De mete ma Lamatualain so'u Yesus Kristus dad'i Mana Nggero-furi Ded'eat, na, Ana nau paresa' lutu'-lelo' dala-d'ala ma'afuni' ra sia atahori rala na ra. Au 'unori ta'o naa, 'ona' nenesura' sia Lamatua' Hara-lii Malole na.
Mae atahori Yahud'i ra tao tungga Lamatualain Hohoro-lalanen o, naa nda fee se masoi-masod'a' sa
17 De hei atahori Yahud'i ra, e, ta'o bee? Hei hii 'a minanaru ao ma ra mae, hei mesa' nggi to'u Lamatualain Hohoro-lalanen fo Ana fee neu ba'i Musa, to? Hei o hii 'ola' nae' so'al hei netonggo-nendaam moo Lamatualain boe. 18 Teb'e! Hei mihine Lamatualain hihii-nanaun ena. Hei mihine bee malole' lena'. Hei mihine basa dala' ia ra ena, huu mesen ra ranori hei mia Lamatualain Hohoro-lalanen ena. 19 Hei mimihere ao ma ra mae, hei bisa mitud'u dala' soa' neu atahori nda mana rita' rae bee reu sa boe. Hei tao ao ma ra 'ona' manggarelo' mana naronda neu basa atahori mana rasod'a sia ma'ahatu' a. 20 Huu hei to'u Lamatualain Hohoro-lalanen, de du'a mae mihine basa' e ena, ma to'u mala basa ndoo-tetu' ra ena, to? Naa de hei du'a mae bisa minori atahori nggoa' ma anadiki' nda mana rahine saa-saa sa boe.
21 Dad'i au 'ae 'utane ta'o ia: hei hii 'a minori atahori fea' ra, te ta'o bee de nda nau minori saa sa boe?! Hei hii 'a hene mimbar, fo parenda mae, “'Afi' mimina'o.” Te ta'o bee de hei mimina'o?! 22 Hei minori mae, “'Afi' hohongge.” Te ta'o bee de hei hohongge?! Hei nda hii teb'e-teb'e' sosonggo-tatanggu' ra sa, te ta'o bee de hei mimina'o sud'i 'a saa mia ume sosonggo' a?! 23 Hei 'ola' nae' so'al Lamatualain Hohoro-lalanen, te ta'o bee de milena-langga Hohoro-lalane' naa ra, ma mi'imamae' Lamatualain ta'o naa?! 24 Te mia doon, nenesura' sia Lamatualain Susura Meumaren 'oi, “Huu hei atahori Yahud'i ra de'ulaka ma ra, to? Naa de atahori fea' ra 'aka' ra'amuti-ra'amuu Lamatualain nara malole na.”e
Mae atahori Yahud'i ra sunat o, naa nda fee se masoi-masod'a' sa boe
25 Hei atahori Yahud'i ra musi sunat tungga Lamatualain Hohoro-lalanen, to? Naa dad'i bukti 'oi, hei mana mi'ena hak simbo Lamatualain hehelu-fufuli na. Te mete ma hei milena-langga neu Lamatualain Hohoro-lalanen, na, Lamatualain nda simbo nggi sa. Hei dad'i 'ona' atahori nda Yahud'i sa, ma 'ona' atahori nda fe'e nenesunat sa. 26 Du'a matalolole! Huu mete ma atahori nda nenesunat sa, tao tungga Lamatualain Hohoro-lalanen, dei fo Lamatualain simbo e, 'ona' atahori Yahud'i nenesunat ena, to? 27 De besa-b'esa, o! Te mete ma atahori nda Yahud'i fo nda nenesunat sa, tao tungga Lamatualain Hohoro-lalanen, na, ara ratud'u saa? Ara ratud'u hei sala ma ra rae, hei atahori Yahud'i mana nenesunat ra, milena-langga Lamatualain Hohoro-lalanen, mae hei to'u Hohoro-lalane' naa ra eni' a lele ulu' a.
28 'Afi' du'a mae, atahori mana dad'i ba'i Abraham tititi-nonosin, ma nenesunat sia rou na ra ena, na, naa mana tao e dad'i Lamatualain atahorin teb'e ena. Hoko'! 29 Mana teb'e-teb'e' dad'i Lamatualain atahorin, naeni atahori mana malole roo Lamatualain. Te sunat matetu' a, mana tao atahori dad'i Lamatualain anan, nda tatanda' sia 'a rou' sa, te tatanda' sia rala' fo Lamatualain Dula-d'alen tao' a. Lamatualain koa atahori mata' naa ra, te atahori nda koa se sa.f