Mia pulu Malta
28
Lele' basa hai losa mad'a' ata noo masod'a', dei de hai bub'ulu' naa, pulu Malta. 2 Nusa' naa atahori na ra simbo hai noo malole'. Huu 'ud'an ma ma'arini' seli, de ara rani'i ai monae' sia retaan, ma ro'e hai mii dara. 3 Paulus o neu hehere hau ana', fo nae tao neu ai a. Te lele' ana ndae hau ra risi' ai a ma, 'aib'oi' ma, mengge marasot esa dea nema, huu nda na'atataa' ai a matob'in sa. De ana 'ero nakandika Paulus lima na. 4 Atahori Malta ra rita mengge a 'ero nahere' Paulus liman ma, ara 'ola-'ola 'oi, “Atahori ia, mana nisa atahori. Mae ana nasod'a mia rii-ree ra ena o, ua-nalen ta'o naa ena. Naa de, ana nda bisa nasod'a sa ena. Huu seka tao de'ulaka', na, ana musi lemba-d'oi e.” 5-6 Atahori naa ra du'a rae, mbei fai ena te, Paulus liman mbae, do nggengger te, ana mate neu' ena.
Te Paulus birus hendi mengge a ai rala neu. Ma ana nda med'a nambeta mbei sa boe. Boe ma, atahori naa ra mete-mete', te Paulus nda ta'o bee sa boe. Ma ara du'a 'oi, “Se'u te atahori ia, atahori ra songgo' a!”
7 Nda doo' noo mamana' naa sa, hambu hofernor ume noo rae loa na. Hofernor a naran, Pub'lius. Ana nema simbo hai mia retaan a, de no'e hai mii leo sia ume na. De ana mete-se'u hai fai telu mia naa.
8 Lele' naa, hofernor ama bonggin namahed'i mafeo-matob'i', ma sali nda naloe' sa. De Paulus neu se'u e mia kaman rala. Ana ndae liman neu atahori mamahed'i' naa, de hule-o'e fee ne. Boe ma ana hai neu' ena. 9 Ara rita hofernor aman hai ma, atahori mamahed'i' laen ra rema risi' Paulus. Ara ro'e tulun neu e, de ana na'ahahai' se. 10a Basa ma, atahori ra ratud'u makasi de rendi sud'i 'a saa nae' fee hai.
Paulus se sae 'ofa' lao hela Malta de risi' Italia
10b-11 Hai leo mia Malta fula telu losa fai rii-ree ra raloe'. Lele' naa, 'ofa' esa mia kota Aleksandria mananafu eni' a fai rii-ree sia pulu naa. 'Ofa' a naran, Ana Dua',a huu hambu paton sosonggot ana dua' sia 'ofa' a mata na. Hai mae sae 'ofa' naa fo lao mikindoo Roma mii. De hai mae sae 'ofa' a ma, atahori Malta ra rendi fee hai lepa-nggees ma sud'i 'a saa fo hai parluu sia 'ofa'.
12 Hai lao koe-koe losa kota Sirakusa sia pulu Sisilia. Boe ma, hai nafu mia naa fai telu. 13 Mia naa, hai lao tungga-tungga 'a tasi Sisilia suun, de losa kota Regium. Mbila fefetun fai, ma ani 'onas a fela, de hai lao mikindoo lai-lai. Fini-esan ma, hai losa namo sia kota esa naran Putioli. 14 Basa ma, hai 'onda hela 'ofa' a, de mii sangga Yesus atahori na ra. Hai mindaa moo se ma, ara ro'e fo hai leo moo sira. De hai numban moo se nggarei esa. Basa de, hai lao ei' a Roma mii.
15 Lele' Yesus atahori mana sia Roma na ra rena 'oi hai mae naa mii ma, ara rema soru hai mia dala' talad'a na. Ruma randaa roo hai mia pasar Apius; ma ruma randaa roo hai mia mamana' esa, naran Ume Tutuli' Telu.b Paulus nita se ma, ana no'e makasi nae-nae neu Lamatualain, ma ralan dad'i manggatee.
Paulus mia Roma
16 Losa Roma ma, [sold'ad'u ra tao atahori bui ra bui rala reu.]c Te ara fee Paulus seb'a ume esa. Ana leo noo sold'ad'u esa fo nanea nahere' e. Ara rante ra'ab'ue ru'a se lima na ra be'e esa'.d
17 Basa fai telu ma, Paulus no'e lasi-lasi' Yahud'i ra sia naa, fo rema randaa roo e. Ara ra'ab'ue ma, ana nafad'e se nae, “Toronoo ngga ra, e! Au sia ia, huu malangga Yahud'i ra to'u au mia Yerusalem. Basa de, ara fee au 'isi' mana parenda Roma lima na. Te au nda tao sala saa sa boe. Au nda tao saa fo lab'an neu hita atahori na ra sa. Au o nda lab'an hita atoran 'ad'at fo hita simbo mia bei-ba'i ta ra sa. 18 Manaparenda ra paresa' au ded'ea ngga sia naa ena. Te ara nda hambu sala ngga saa sa boe, nandaa noo hukun mate. Naa de, ara rae mbo'i au. 19 Te malangga Yahud'i ra nda simbo mana parenda ra ne'etun sa. Naa de, nau nda nau sa o, au musi hene 'isi' mana parenda ata' a. Au tao ta'o naa, te au nda 'ae kalaak au atahori ngga ra sa.e 20 Huu ded'eat naa, au 'u'ub'ue basa toronoo' se sia ia. Naa fo, ata 'ola-'ola' saa fo atahori Yahud'i ra rahani' a. Basa hita tamahena neu Mane' fo Lamatualain nae haitua fo tao nasod'a hita atahori Isra'el ra. Huu naa, ara pa'a au noo rante ia.”
21 Boe ma ara rataa 'oi, “Losa fai' ia, hai nda fe'e simbo susura esa sa boe mia Yud'ea, mana nafad'e toronoo' ded'ean ia sa. Ma toronoo' mana rema mia naa ra o, nda 'ola' saa-saa so'al 'a'a Paul sa. 22 Te hai hii rena saa fo toronoo' namahere' a, huu hai rena sia bee-b'ee atahori ra nda simbo partei Kristen nenorin sa. Te hai nda fe'e bub'ulu' matetun sa. De toronoo' tulun mufad'e hai dei.”
23 Basa ma, ara rala hara' esa, de helu fai esa, fo rae randaa selu'. Losa fain ma, atahori nae' rema ra'ab'ue sia Paulus ume na. De ana dui se Lamatualain parenda na. Ana 'ola' nendi' ba'i Musa ma Lamatualain mana 'ola-'ola na ra susura na ra, fo tao se ramahere Yesus. Ana 'ola' mia fefetun losa bob'o'.
24 Ara rena basa Paulus 'o'olan ma, ruma ramahere, te ruma hoko'. 25 Ara rareresi losa ruma rae bali'. Te Paulus 'ola' nae, “Hei mireresima ia, ndaa noo saa fo dalahulun Lamatualain Dula-d'ale Meumaren nafad'e neu ba'i Yesaya, 26 nae,
‘Muu mufad'e atahori nusa' ia mae,
“Dei fo hei rena mikindoo 'a Au 'o'ola ngga,
te nda mihine mbei sa boe!
Dei fo hei mete mikindoo 'a Au tatao ngga,
te nda taoafi' neu sa.”
27 Huu atahori nusa' ia rala na ra manggateen seli ena.
Naa de, ara nda nau rena sa ena,
ma ara nda nau rita sa ena.
De hela neu fo ara sud'i boe rena fai,
ma ara sud'i boe rita fai.
Hela neu fo rala na ra o ra'ateme rakandoo boe,
losa ara nda rahine dala' bali' nisi' Au sa ena.
De au bisa 'u'uhahai' se ta'o bee fai?’”f
28 Boe ma, Paulus nate'e 'o'olan nae, “Toronoo ngga ra e, ta'o ia! Hei musi bub'ulu' ia naa Lamatualain sad'ia masoi-masod'a' fee atahori nda Yahud'i ra sa, huu ara o rae rena E boe.” 29 [Paulus 'ola' basa ma, atahori naa ra bali'. Te dud'u'a na ra nda rato'u sa, huu ara 'aka' rareresi.]g
30 Basa naa ma, Paulus leo mia ume seseb'an too rua. Ana simbo malole basa atahori mana rema randaa roo e.
31 Noo ta'o naa, ana hambu kaka'e' fo dui se, Lamatualain parendan, ma nanori se Lamatua' Yesus Dala Masod'a na. Ana mbarani 'ola' relo-relo, ma nda hambu saa kai-b'aa sa boe.
Ama Teofilus nenesue'. Au dud'ui ngga losa 'a ia ena.
Makasi.
Mia au, Lukas