Atahori Yahud'i ra rema rad'ed'ea roo Paulus sia Kaisarea
24
Seli fai lima ma, atahori Yahud'i mana rae rad'ed'ea roo Paulus ra losa kota Kaisarea. Sia nononggo' naa, hambu Ananias, naeni agama Yahud'i malangga monae na. Malangga laen ra o rema boe. Ara rema roo atahori laen esa, naran Tertulus. Ana 'ola' nahine. Naa de ara roo e dad'i sira mana 'ola-'olan fo lab'an Paulus. 2-3 Lele' basa atahori ra ra'ab'ue mia mamana nggenggero ded'eat ena ma, hofernor denu ara roo Paulus maso'. Boe ma Tertulus fela nambarii', nae 'ola' na'atutud'a' Paulus. Ana fee had'at neu hofernor, ma 'ola' nae,“Ama hofernor nenefee had'a-hormat! Doo basa ia, eni' a ama' to'u parenda' sia ia, ama' bub'ulu' saa malole' fo fee neu hai. Ma ama' tao malole' dala' nae', losa hai atahori Yahud'i ra misod'a noo sod'a-mole'. De fai' ia hai mae mo'e makasi nae' neu ama'. Te see fai mana bisa tao malole' nae' sia bee-b'ee 'ona' ama' ia. 4 Au nda 'ola' nae' sa. Au 'ola' neu 'a sosoa na. Dad'i au 'o'e ama' rena malolole, saa fo au 'ae 'ufad'e so'al Paulus ia.
5 Ta'o ia, ama'. Soa' neu hai atahori Yahud'i ra, Paulus ia, 'ona' hed'is esa mana lali mia mamana' esa nisi' mamana' laen. Ana hii 'a lab'an hai agamam ma tao nalulutu hai 'ad'at ma sia bee-b'ee. Ana bee neu o, atahori Yahud'i ra rad'ed'ea esa noo esa. Eni, malangga mana matatale mia partei agama mana tungga atahori Nasaret esa, fo hai mae ‘partei Nasarani’. Te saa fo ranori' naa, sala noo hai agamam nanori na. 6 Atahori ia nae nanggenggeo hai Ume Hule-o'e Huu meumarem, huu ana nendi atahori dintiu nisi' rala neu. Naa de, hai to'u e. [Tungga hai hihiim, hai mae hukun e tungga hai atoran ma. 7 Te malangga sold'ad'u Lisias nema lea nala e mia hai lima ma ra. 8 Boe ma ana parenda 'oi, mete ma hambu atahori rae rad'ed'ea roo Paulus, na, rema randaa roo ama' sia Kaisarea. Ana nau 'a, hofernor mana nggero ded'eat ia aom].a Naa de, hai 'ima fo ama' paresa' ded'eat ia. Dei fo ama' bub'ulu' basa saa fo hai 'ola' ia, mema' teb'e.
Hai 'o'olam, ba'u 'a ia ena. Makasi, ama'.”
9 Tertulus 'ola' basa ma, atahori Yahud'i laen ra ra'ahei' tungga rae, “Teb'e, ama'! Mema' ta'o naa.”
Paulus nasala'e aon mia Feliks mata na
10 Basa naa ma, hofernor sein Paulus 'oi, “Au fee nggo musula'e ao ma.”
Paulus fela nambarii' ma 'ola' nae, “Ama' hofernor! Ama' parenda sia hita profinsi na ia, doo' ena. Ama' bub'ulu' basa hai atahori Yahud'i masod'am sia ia. Huu naa, au nda 'umutau 'usula'e ao ngga sia ama' matan sa. 11 Mbei ma fai sanahulu rua mana neu' naa, au 'isi' Yerusalem fo 'uu hule-o'e sia Ume Hule-o'e Huu' a. Ama' bisa natane atahori mana hule-o'e roo au' ra. 12 Au nda 'ureresi saa-saa sa boe sia Ume Hule-o'e Huu' a. Ma sia ume hule-o'e' laen ra o, au nda 'u'ub'ue atahori fo ramue sa. Au o nda tao nemuet sia Yerusalem sa boe.
13 Te ia naa, atahori ia ra rae ra'atutud'a' au. Te saa fo ara 'ola' faa' ra, naa nda ma bukti saa sa boe. 14 Ta'o ia, ama' hofernor. Au musi 'utaa dala' esa neu ama'. Au tungga partei feu' esa, fo atahori ra ranara rae, ‘Lamatua' Yesus Dala Masod'a na.’ Au hule-o'e neu Lamatualain, 'ona' a au bei-ba'i ngga ra hule-o'e neu E boe. Au o tungga ba'i Musa atoran na ra, ma 'umuhere teb'e-teb'e' neu saa fo Lamatualain mana 'ola-'ola na ra sura' hela fee hai. 15 Au 'umuhena Lamatualain 'ona' atahori ia ra, fo mana rambarii' lab'an au ra. Hai mimihere mae, Lamatualain tao nasod'a bali' atahori mates ra: mae atahori malole', do de'ulaka' o, 'ona esa'. 16 Naa de, au manggate 'ukundoo 'a fo 'usod'a noo rala ndoos sia Lamatualain ma atahori mata na. Noo ta'o naa, nda hambu atahori bisa ra'atutud'a' au sa.
17 Au tao ues too hira ena sia rae Isra'el dea', dei de au bali' Yerusalem 'uma. Au 'uma 'endi doi' fo atahori ra'ad'uru, fo tulu-fali neu hai atahori manasusa ma ra. Boe ma, au o 'isi' Ume Hule-o'e Huu' a, fo 'ae hule-o'e ma fee tutunu-hohotu' mata'-mata' neu Lamatualain. 18 Te au fe'e 'umeu ao ngga sia naa tungga hai atoran 'ad'at ma ma, ara rema rae to'u au. Lele' naa, atahori hid'a 'a mia naa, ma esa nda namue saa mia naa sa boe!b 19 Sia naa, hambu 'aka' a atahori Yahud'i hira mana rema mia profinsi Asia fo rae hule-o'e. De mete ma ara ra'ena so'al roo au, na, sira mana rad'ed'ea roo au sia ia. Te nda ama' ia ra sa! 20 Te atahori naa ra nda rema sa. De ama' natane sob'a atahori ia ra, au sala ngga saa? Fai' naa, ara paresa' au mia mamana nggenggero ded'eat agama, te ara nda hambu au sala ngga saa sa boe. Ama' natane se 'a! 21 'Aka' a mbei ma dala' esa, mana tao se ramue ma nda hii au sa. Lele' au 'ola' 'uhere' 'ae, ‘Hei mae hukun au, huu au 'umuhere 'ae, Lamatualain bisa tao nasod'a bali' atahori mates ra!’”c
22 Paulus 'ola' ta'o naa te, huu hofernor Feliks nahine nae' ena, so'al ‘Lamatua' Yesus Dala Masod'a na’, de ana nate'e ne'eb'u'et naa 'oi, “Ta'o ia! Au 'ae 'o'e malangga Lisias, fo rena dud'uin dei. Au 'ola' basa 'oo e, fo au fe'e 'u'etu' ded'eat ia ena.” 23 Boe ma ana denu malangga sold'ad'u esa neu 'ai hela Paulus. Te ana parenda fo fee fai loa' mbei neu Paulus, ma 'afi' na'anggee nonoo na ra rema tao mata neu e.
Paulus 'ola' noo Feliks ma saon Drusila
24 Hofernor Feliks saon, atahori Yahud'i, naran Drusila. Seli fai hira ma, ana sangga fai loa' fo noo saon rae 'ola-'ola' roo Paulus. Naa de, ana denu rendi Paulus neu nandaa noo ru'a se. Boe ma Paulus nafad'e ru'a se ta'o bee fo atahori ramahere neu Yesus Kristus, atahori fo Lamatualain helu basa mia dalahulu na. 25 Ana o nafad'e ta'o bee fo atahori rasod'a ndoos ma ranea ao na ra fo 'afi' tao sala'. Ana o nafad'e 'oi, dei fo Lamatualain hukun basa atahori.
Lele' Feliks rena nala ma, ana namatau, de nafad'e Paulus nae, “Paulus. Dai ena. Losa' a ia leo! Mete ma hambu fai loa' fai fo, au 'o'e selu' nggo.” 26 Mae Feliks ralan namatau, te 'onaa' o ana sangga dala' fo Paulus soro fee ne doi', fo ana mbo'i e. Naa de, ana 'aka' a no'e Paulus fo 'ola-'ola' noo e.
27 Te huu sia dala esa fai, hofernor Feliks o ha'i rala' noo atahori Yahud'i ra moko-monae na ra boe. Naa de, ana nda na'etu' lai-lai Paulus ded'ean sa. Ana hela ded'eat naa losa too rua. Basa ma, hofernor feu' sa, naran Porkius Festus nema nggati Feliks. Te ara fe'e hela Paulus sia bui rala.