Paulus se bali' risi' profinsi Maked'onia
20
Atahori ra nda ramue-raanggi' sa ena ma, kota Efesus malole bali'. Boe ma Paulus na'ab'ue bali' atahori mamahere' mana sia naa ra, fo tao manggatee rala na ra. Basa naa ma, ana natea, de lao bali' profinsi Maked'onia neu. 2 Ana lao ndule basa kambo' mana sia naa ra, fo tao manggatee atahori mamahere' ra rala na ra. Ana tao ta'o naa, losa ana maso' profinsi Yunani neu. 3 Ana leo fula telu mia Yunani. Basa ma, ana naote nae sae 'ofa' nisi' profinsi Siria. Te ana rena, atahori Yahud'i ra ma'ira' fo rae risa e sia naa. Naa de, ana nda nau lao tute' profinsi Siria neu sa. Dad'i ana lao bali' tungga profinsi Maked'onia.4 Hambu atahori nononggo ana' esa tungga Paulus naeni, Timotius noo ama Pirus anan Sopater mia kota Berea; atahori rua mia Tesalonika, nara na ra Aristarkus ma Sekundus; esa mia kota Derb'e, naran Gayus; ma rua mia profinsi Asia, nara na ra, Tikikus ma Trofimos.
5-6 Boe ma, au (naeni Lukas mana sura' susura ia), 'undaa selu' 'oo Paulus mia profinsi Maked'onia. Paulus ana mana tungga na ra lao ra'ahulu', de rahani hai mia kota Troas sia tasi' a seri'. Atahori Yahud'i ra fai Paska na basa ma,a hai ru'a nggi sae 'ofa', de lao misi' kota Troas. Lele' naa, hai fai lima mia tasi' ata. Losa Troas ma, hai 'onda ma mindaa moo bali' nonoo laen ra, de leo nggarei esa mia naa.
Yutikus tud'a mia jendela sia kota Troas
7 Fai' naa, nandaa noo nggarei. Paulus na'etu' basa nae, “Toronoo ngga ra, e. Fetu na, au 'ae lao 'ukundoo.” Dad'i basa hita atahori mamahere' ra ta'ab'ue fo ata taa-tinu. Huu Paulus nae lao, de ana 'ola' noo hai losa fai banggi rua. 8 Hai mi'ib'ue mia ume sa tatad'a' katelun a. Tetemba' naa, ara ded'e lambu hetar.
9 Sia naa, hambu ana tou' esa, naran Yutikus.Tungga Ana 'endo' mia jendela. Ana o tungga rena Paulus boe. Doo-d'oo ma ana nduar, de sunggu' nasambeta. 'Aib'oi' ma, ana tud'a, de mate. 10 Paulus 'onda, de holu nala e ma 'ola' nae, “'Afi' mimitau. Te masod'a'.” 11-12 Basa hai mimiho'o, huu ana tou' naa masod'a'. Dei de roo bali' e nisi' umen neu. Basa ma hai hene bali' ata mii, de 'endo' mia mi'ib'ue. Ma Paulus 'ola' nakandoo losa fetu na. Relo a tod'a ma, hai mitea, de lao.
Mia kota Troas misi' kota Miletus
13 Basa ma, hai mala rala' fo saranggaa losa mindaa sia kota esa, naran Asos. Hai sae 'ofa' misi' Asos, te Paulus lao ei' a naa neu.
14 Hai losa Asos ma, mindaa moo Paulus. Ana hene 'ofa' ata neu, de hai lao minkindoo misi' kota Metilene. 15 Mia Metilene, hai lao' mikindoo. Boe ma mbila fefetun ma, hai deka-d'eka moo pulu esa, naran Kios. Fini esa' ma, hai lao mbali pulu Samos. De fini rua' ma, hai losa kota Miletus. 16 Hai lao lai-lai, huu Paulus nae 'a doo bee fo losa Yerusalem, fo tungga fai Pentakosta sia naa. Naa de, ana nda nau nggari fai lao' Efesus neu sa, huu nda hambu fai sa ena.
Paulus 'ola-'ola' noo lasi-lasi Kristen ra sia kota Efesus
17 Dad'i mia Miletus, Paulus fee hara' neu lasi-lasi Kristen ra sia Efesus, fo rema randaa roo e. 18 Ara losa ma, Paulus nafad'e se nae, “Toronoo ngga ra, e. Hei bub'ulu' au masod'a ngga, eni' a fefeun au tab'u ei ngga sia profinsi Asia, losa fai' ia. 19 Hei o bub'ulu' au manggate ue-tao sia talad'a ma ra, ma nda parnaa koa-b'o'u ao ngga sa. Sia au ue-tatao ngga ia, luu ngga titi, ma au susa seli. Au o hambu doid'oso' nae' mia atahori Yahud'i ra dud'u'a de'ulaka na ra. 20 Au 'unori hei basa saa malole' fo au 'uhine' ra. Ma au 'unori hei sia mata ma ra. Au o 'isi' atahori ra ume na ra esa-esa', fo fee se nesenened'a' so'al Lamatualain hihii na. 21 Au o 'ufad'e atahori Yahud'i ra noo atahori nda Yahud'i ra sa, fo raloe' tao sala', fo tungga Lamatualain. Ma ara musi ramahere neu Lamatua' Yesus, mana na'ena hak parenda nggita.
22 Dad'i au 'ae 'ufad'e ta'o ia: 'ale' ia, au 'ae Yerusalem 'uu, huu Lamatualain Dula-d'alen nore au fo naa 'uu. Mae au nda bub'ulu' saa dad'i neu au sia naa sa o, au tungga 'a. 23 Te mia kota esa misi' esa, Dula-d'ale Meumaren nafad'e na'ahulu' au nae, dei fo au maso' bui noo lemba doid'oso' sia naa. 24 Au bub'ulu' basa ta'o naa, huu Lamatua' Yesus mana fua ues ia neu aru ngga, fo 'uu 'ufad'e Hara-lii Malole' 'ae, Lamatualain sue nggita, ma ralan o malole noo nggita boe. Mete ma au nda tungga hihiin sa, fo tao 'ub'asa' ue-tatao' ia ra, na, au du'a 'ae masod'a ngga nda ngguna saa sa boe.b
25 Ia naa, au bub'ulu' 'ae, hei nda 'afi' mita au sa ena. Naeni, hei fo au 'unori nggi doo' ena so'al maso' dad'i Lamatualain bob'onggi na ra. 26-28 Huu naa, rena malolole. Au tao basa ue-tatao ngga sia hei ena. De ia naa, hei mesa' nggi musi ue-tao mikindoo. Mete ma hambu atahori mia hei nda maso' dad'i Lamatualain bob'onggin sa, na, hei mana tanggon, o! Te naa nda au sala ngga sa. Misined'a malolole! Au 'ufad'e basa Lamatualain hihii-nanaun neu nggi ena. Au nda 'u'ufuni' saa neu nggi sa boe. De musi minea malolole masod'a ma ra. Ma mi'ib'oi malolole basa atahori fo Dula-d'ale Meumaren denu hei minea' ra. 'Afi' lilii' Lamatua' Yesus mate, de bae basa atahori naa ra nendi' raa na. Ana o dud'u hei fo mete se, 'ona' manatad'a na'ab'oi bib'i-lombo na ra.
29 De ia naa, au lao hela nggi. Te misined'a, e! Dei fo atahori rema ranori leli sia talad'a ma ra. Ara 'ona' busa ma'erot maso' risi' bib'i-lombo ra lalaet na. 30 Mana 'ombon-koson 'ona' naa ra, rema mia dea'. Te misined'a, huu ruma o rema mia hei e boe. Ara ranori nda matetu' sa, ma nau 'a atahori tungga' sira hihii na ra. Naa de, ara sob'a-sob'a lea atahori ra fo 'afi' sud'i tungga Yesus. 31 Huu naa, hei musi minea ao ma ra malolole. 'Afi' lilii', te au leo 'oo nggi too telu ena. Au o 'unori nggi hatu'-rerelon, nda du'a beb'engge ngga sa. Luu ngga titi nae-nae' ena, huu hei.
32 Ia naa, hita tae saranggaa ena. Dad'i au fee basa nggi mii Lamatualain liman, fo Ana na'ab'oi nggi. Ma hei o musi to'u mihere', basa saa fo au 'ufad'e eni' a fefeun so'al Lamatualain rala malole na. Lamatualain ma koasa', fo tao nggi mi'id'ere. Ana o helu-fuli nae fee papala-b'ab'anggi' neu atahori na ra. Dad'i mete ma hei tungga mikindoo E noo rala meumare', na, hei o hambu papala-b'ab'anggin boe.
33 Lele' au ue-tao mia hei talad'a ma ra, au nda dale hei saa ma sa boe. Au nda 'o'e 'ita hei lilo mbilas, do lilo fula', do bua-b'a'us, do saa ma sa boe. 34 Hei o bub'ulu', lele' au leo 'oo nggi, au manggate ue-tao fo tanggon neu masod'a ngga. Au ue-tao nda soa' neu 'a au sa, te soa' neu mana tungga ngga ra boe. 35 Dad'i noo basa ia ra, au 'utud'u dala' neu nggi fo tulu-fali atahori mana to'a-taa' ra. Misined'a malolole, Lamatua' Yesus 'o'olan nae, ‘Hita fee, na, malole lena' mia hita simbo.’”