Paulus nahine ina Priskila noo ama Akila mia kota Korintus
18
1-3 Lele' naa, hambu mane monae' Roma, naran Klaud'ius. Ana namanasa atahori Yahud'i ra, ma 'oi hendi se mia kota Roma sia profinsi Italia. De ara sea-saranggaa sia bee-b'ee. Hambu atahori Yahud'i esa naran Akila, noo saon, Priskila. Ru'a se rela lao hela Italia risi' kota esa, naran Korintus. Akila ia, mia profinsi Pontus. Eni mana tao saa-saa mia banda rou'.Lele' naa, Paulus o lao hela kota Atena boe, de lao nisi' Korintus neu. Sia naa, ana nahine Akila noo Priskila, huu ana o mana tao saa-saa mia banda rou' boe. Ara leo ma tao-ues ra'ab'ue.
4 Mete ma losa atahori Yahud'i ra fai hahae aon, na, Paulus maso' nisi' ume hule-o'e neu. Ana sob'a kokoe atahori Yahud'i ra roo atahori fea' ra, fo ramahere Lamatua' Yesus.
5 Lele' Silas noo Timotius rema mia profinsi Maked'onia ma, Paulus hahae tao sud'i 'a saa mia banda rou'. Hatu'-rerelon ana 'aka' a nafad'e atahori Yahud'i ra nae, “Atahori fo hita tahati eni' a ma'ahulun, fo Lamatualain helu nae haitua' a, Ana nema ena. Naeni, Yesus!”
6 Te atahori Yahud'i ruma 'aka' lab'an ma 'ola' ra'atutud'a' e. De Paulus nggafur afu mia buan, fo tao tanda nae, eni nda taoafi' neu se sa ena, huu ara nda nau simbo Hara-lii Malole' fo eni nafad'e' a sa. Ana 'ola' nae, “Hei seli ma! Hei mi'imbambake'! Te hela neu! Mete te hei lemba-misaa sala-kilu ma ra. Au nda tanggon hei sa ena. Mulai ma 'oras ia au nda tao mata' neu hei atahori Yahud'i ra sa ena. Au 'ae 'uu 'unori atahori fea' nda atahori Yahud'i ra sa.”
7 Hambu ume esa sia ume hule-o'e' a seri'. Tenu ume' a naran, Titius Yustus. Ana nda atahori Yahud'i sa, te ralan hii Lamatualain. Paulus lao hela atahori Yahud'i ra ma, ana maso' nisi' ama Titius ume na.
8 Nda doo' sa ma, malangga ume hule-o'e' a namahere Lamatua' Yesus. Naran, Krispus. Ume isi na ra o ramahere 'ona' atahori Korintus laen mana rena Paulus ra boe. Basa ma Paulus ator fo sarani basa se.
9 Tetemba' esa, 'ona' meit e, Paulus rena Lamatualain 'ola' nae, “Paulus! 'Afi' mumutau, ma 'afi' male-ma'a sia ue-tataos ia, te ue-tataom nda fe'e basa sa. Ho musi munori mukundoo Hara-lii Malole ngga neu atahori ia ra. 10 Musuned'a, e! Ho nda ue-tao aom sa. Te Au 'oo nggo. 'Ona' mae atahori sangga ra'asususa' nggo, te Au pasa ei ngga 'oo nggo. Au o tao mata' neu nggo hatu'-rerelo na. 'Afi' lilii', sia kota ia, atahori ngga ra nae'.”
11 Paulus rena nala ma, ana leo doo-d'oo mia kota Korintus. Ana nanori Lamatua' Dala Masod'an mia naa losa too esa seseri'.
12 Lele' naa, Galio dad'i hofernor sia profinsi Akaya.a Basa boe ma, atahori Yahud'i ruma ma'ira' fo roo Paulus nisi' hofernor, sia mamana nggero ded'eat. 13 Losa naa ma, ara kalaak Paulus rae, “Atahori ia kokoe atahori hetar fo tungga agama feu'. Te mana parenda Roma ra nda rataa agama naa sa!”
14 Paulus nae 'ola' nasalae' aon ma, hofernor 'ola' nggero e. Ana na'anggee atahori mana kalaak Paulus nae, “We! Atahori Yahud'i ra, e, pasa ndiki' ma ra! Mete ma hei mae mendi atahori mana tao de'ulaka' do atahori mana ratati', na, au musi rena hei ded'ea ma ra. 15 Te ded'eat fo hei mendi' ia, hei ded'ea ume rala ma. Hei mireresi 'aka' a hohoro-lalane' agama Yahud'i, noo ded'ea-'o'olan ma nara na ra. Ded'eat naa, nda mana parenda ia ra urusan na sa!”b
16 Boe ma, hofernor mbuu hendi' se mia mamana nggenggero ded'eat naa. 17 Atahori Yunani ra o to'u rala atahori esa, naran Sostenes. Eni, malangga sia atahori Yahud'i ra ume hule-o'e na. Ara to'u rendi e, de momoko e mia hofernor mata na. Te hofernor nda tao mata' neu se sa.
Mia Korintus, Paulus neu selu' nisi' Antiokia sia profinsi Siria
18-19 Basa ma, Paulus leo nakandoo sia Korintus. Te doo-d'oo ma, ana natea atahori mamahere' sia naa ra. Boe ma Ana noo Priskila ma Akila risi' kota' esa, naran Kengkrea, fo rahani 'ofa'. Sia naa, Paulus 'eu namboli' langgan, fo dad'i tanda 'oi, saa fo eni helu neu Lamatualain, ia naa, eni tao basa ena.c Dei de ara sae 'ofa' lao risi' kota Efesus. Losa naa ma, ara 'onda. Paulus lao hela nonoon karua' ra, de nisi' atahori Yahud'i ra ume hule-o'en, de 'ola-'ola' noo atahori mana sia naa ra. 20 Ara 'ola-'ola' ma, atahori Yahud'i ra ro'e Paulus leo doo-d'oo noo se. Te ana tola noo na'us, 21 ma natea se nae, “Toronoo ngga ra, e! 'Afi' ha'i rala', e! Mete ma Lamatualain soi dala', dei fo au 'uma se'u selu' nggi fai.” 'ola' basa ma, ana lao hela Efesus.d
22 Basa ma, ana sae 'ofa' nakandoo kota Kaisarea neu, de 'onda mia naa. Boe ma, ana hene Yerusalem neu, fo neu natea atahori mamahere' mana sia naa ra. Basa ma, ana bali' nisi' kota Antiokia. 23 Ana leo doo-d'oo mia naa. De basa ma, ana lao ndule profinsi Galatia noo profinsi Frigia fo tao manggatee atahori mamahere' ra rala na ra.
Apolos mia kota Efesus noo kota Korintus
24 Lele' naa, hambu atahori Yahud'i sa mia kota Aleksandria sia profinsi Masir. Naran, Apolos. Eni, atahori mana 'ola' mahine'. Ma nahine basa Lamatualain Susura Meumaren isi na. Fai' naa, ana fe'e losa Efesus ena. 25 Ana rena dud'uit so'al Yesus ena, ma ana o hii dui selu' neu atahori laen ra boe. Ana dui noo manggarulit, ma saa fo ana 'ola' naa, mema' teb'e. Te ana nda fe'e nahine basa dala' ra sa. Ana nahine 'aka' a Yohanis sarani atahori, mete ma ara doa' tao sala' ena. 26 Lao esa boe, ana 'ola' nda bambi-b'ambi sa mia atahori Yahud'i ra ume hule-o'e na. Priskila noo Akila o rena e boe. Ara hule-o'e basa ma, ro'e rendi e nisi' sira ume na. Ara rafad'e e, Lamatua' Yesus Dala Masod'an losa lutu'-lelo'.
27 Basa naa ma, Apolos na'etu' fo nisi' profinsi Akaya. Atahori mamahere' sia Efesus ra rala' esa roo hihii na. Ara tao susura esa fee toronoo na ra sia Akaya, fo ro'e se simbo Apolos noo malole. Apolos to'u nala susura ma, ana lao. Losa Akaya, ma ana tulu-fali teb'e-teb'e' atahori mamahere' sia naa ra. 28 Ana o naselu-b'ale noo atahori Yahud'i sia atahori hetar mata na ra, te nda rasenggi' e sa. Ana 'ola' nendi' Lamatualain Susura Meumaren fo nanori se nae, “Atahori fo Lamatualain helu nae haitua' a, fo hita tahani' a, naeni Yesus!”