2 Mete ma ara losa mamana' esa fo hambu ume hule-o'e' sia naa, nandaa noo fai hahae ao', na, Paulus biasa maso' neu hule-o'e noo atahori ra. Losa Tesalonika ma, ana o maso' nisi' ume hule-o'e na. Ara 'ola-'ola' esa noo esa rendi' Lamatualain Susura Meumare na. Ana tungga hule-o'e noo se ta'o naa tungga fai hahae ao', nggarei telu tute-tute. 3 Ana nafad'e se nae, “Mete ma hita paresa' malolole sia Lamatualain Susuran, na, hita bub'ulu' tae, ara 'ola' mia dalahulun rae, Atahori fo Lamatualain helu nae haitua' a, dei fo doid'oso nae' losa Ana mate. Te Lamatualain koasan tao nasod'a' bali' E. Ia naa, hita bub'ulu' Atahori fo Lamatualain helu' naa, naeni Yesus!”

4 Ara rena basa ma, hambu atahori Yahud'i ruma simbo Paulus 'o'olan, de ra'ab'ue roo se. Mia mana simbo ra, hambu atahori Yunani hetar ra rala na ra hii Lamatualain, ma hambu Ina' monaen hira sia kota naa.

5 Te atahori Yahud'i ra malangga na ra, boto-nggara na ra teme' ma rala na ra mera. Ara ratatale mana rolo-koo' ra fo tao kaco. De atahori ra ra'ab'ue, ma reu tao kaco mia kota naa. Ara sangga Paulus noo Silas, fo rendi se risi' atahori mana ramue' naa ra. De ara reu heo rala Yason umen fo sangga se, huu ara numban sia naa. 6-7 Te ara nda hambu se sia naa sa. De ara rendi Yason noo atahori mamahere' laen ra hira risi' mamana nggero ded'eat. Ara tud'u Yason se rae, “'Ale' ia atahori rema sia hita kota na. Ara reu sia bee, na, ara tao kaco sia naa! 'Ale' ia ara rema fo rae nggari hita atoran na, fo nggati noo sira atoran na! Yason ia, simbo atahori ia ra numban sia ume na! Te basa se lab'an hita atoran na, huu ara nda nau rataa mane keser monae' a sa. Ara rataa 'a sira malangga monaen esa, naran Yesus.”

8 Boe ma atahori monaen ra roo atahori mana sia naa ra rena rala ma, dud'u'a na ra mulai rela leli. 9 Ara denu Yason noo atahori mamahere' ra bae doi', fo dad'i bukti sira nda tao kaco sa ena, ma nda rela sa. Yason se bae basa ma, ara mbo'i se.

10 Tetemba' naa, atahori mamahere' mia Tesalonika, dud'u'a rae malole lena' Paulus noo Silas risi' mamana' laen. Basa de, ara haitua ru'a se risi' kota esa, naran Berea. Losa naa, ara risi' atahori Yahud'i ra ume hule-o'e na. 11 Te atahori Yahud'i mana sia Berea ra, nda 'ona' atahori mana sia Tesalonika ra sa. Ara hii rena ma rae simbo Paulus se 'o'ola na ra. Ara rena malolole Paulus se, ma mete malolole Lamatualain Susura Meumaren, fo rae rahine, Paulus se 'o'olan, teb'e, do hoko'. Naa de, ara paresa' lutu'-lelo' Lamatualain Susuran hatu'-rerelo na. 12 Huu naa, atahori Yahud'i nae' ma atahori Yunani nae' ramahere Yesus. Mia atahori Yunani ra, hambu tou' ma ina' mana ra'ena pangaru monae'.

13 Atahori Yahud'i mia Tesalonika ra rena Paulus se ranori Lamatualain Ded'ea-'o'olan sia Berea ma, ara rema tungga, de ratatale atahori fo tao kaco sia naa. 14 Naa de, atahori mamahere' sia Berea ra, roo Paulus lai-lai tasi suun reu. Te Timotius noo Silas leo rakandoo sia Berea. 15 Ara roo Paulus losa kota esa, naran Atena. Basa ma ara lao hela e, fo bali' Berea reu. Ara rendi hara' mia Paulus 'oi, Silas noo Timotius rema lai-lai fo ra'ab'ue roo e.

16 Lele' Paulus nea-nea Silas noo Timotius rereman risi' Atena ma, ralan susa, huu nita mamana sosonggo' sia bee-b'ee sia kota naa.

17 Sia naa, hambu atahori Yahud'i hira, ma atahori nda Yahud'i ra sa hira mana hii hule-o'e neu Lamatualain. Paulus maso' nisi' ume hule-o'e na ra, de esa fee esa dud'u'at. Tungga fai, ana o nisi' mamana neseo-nehasa' fo 'ola-'ola' noo sud'i 'a see. 18 Ana naselu-nataa noo meser hira mia bab'anggi karua' sia kota naa, naeni bab'anggi' Epikuros noo bab'anggi' Stoa.^a Ana 'ola' so'al Yesus nae, Ana nasod'a bali' ena ma, hambu ruma puras miru, rae “Puuh! Mana ombon koson ra ba'i na!” Ma ruma ra'a'e'ei' rae, “Wueh! Atahori ia nae na'asusuu' hita fo songgo sira lamatua fea' na ra!”

19-21 Atahori Atena ma atahori dea' mana leo sia kota naa, mete ma rena dala feu', 'ona' nenori feu' do dud'u'a feu', na, sira atahori mahine na ra 'endo' ra'ab'ue fo esa fee esa dud'u'at sia mbuku ana' esa, naran Areopagus. De hambu ruma mia sira e rema rendi Paulus nisi' mbuku' naa, de ro'e e rae, “Mufad'e sob'a nenori feu' naa! Te nenorim tao hai bingun. De hai mo'e 'ola' mukunduu fo hai bisa mihine.”

22-23 Basa naa ma, Paulus nambarii' de 'ola' nae, “Atahori Atena ra, e! Au lao' ndule hei kota ma ia, de mete-'ita hei manggate tungga agama. Au 'ita hei mamana sosonggo ma ra sia bee-b'ee. Au 'ita fatu sosonggo' esa nenesura' 'oi, ‘Sosonggo' ia fee lamatua' nda nenenehine' sa.’ Sosoan, hei songgo Lamatualain ena, te nda fe'e mihine E sa. Eni ia, fo au 'ufad'e neu nggi 'oras ia.

24 Huu Eni ia, mana na'ad'ad'ad'i' lalai noo raefafo' noo basa isi-oe na ra. Eni o mana na'ena hak parenda basa mana sia lalai noo raefafo'. De Ana nda leo sia ume sosonggo' fo atahori tao' sa. 25 Ana mana fee hahae' ma masod'a' neu atahori. E'ekun, Ana fee hita sud'i 'a saa fo hita parluu a. Te Eni nda parluu saa sa boe. Huu naa, atahori nda bisa tulu-fali E sa.^b 26 Mia atahori esa' a, Ana tao basa leo sia raefafo' ia. Ana mana banggi fee leo esa-esa' noo rae na. Ma Ana mana ator fo basa leo naa ra hehene na ra noo tutud'a na ra, esa-esa' noo fai na.

27 Ana tao ta'o naa, huu Ana nau hita atahori sangga fo tahine E noo malolole. Mema' atahori sangga fo rae randaa roo E. Tao-tao te, Ana nda na'ad'od'oo' noo nggita sa. 28 Hambu atahori 'ola' rita rae,

Ma hambu hei manahelom esa 'ola' nita nae,

29 Mema', naa teb'e. Basa hita, Lamatualain tititi-nonosi na. De 'afi' du'a mae, Lamatualain 'ona' paton sosonggo' fo atahori tao mia lilo, do doi fula', do fatu tungga sira dud'u'a na ra. 30 Dalahulun, atahori nda fe'e rahine dala' naa sa. Naa de, Lamatualain hela nggita tasod'a tungga nggoa ta ra. Te 'ale' ia, Ana nda nau hita tasod'a ta'o naa sa ena. De Ana parenda nae hita musi lao hela sosonggo' ra, fo tungga E leo. 31 Ana o dud'u fai' esa, nae hukun raefafo' noo basa isi-oe na ra, huu sala-kilu na ra. Ma Ana dud'u Atahori sa dad'i mana nggero-furi. Dei fo Atahori naa huku-d'oki noo matetu'. 'Ale' ia, manggarelo' ena, mana nggero a, seka. Naeni, mana mate' a, te Lamatualain tao nasod'a bali' E ena.”

32 Atahori mana ra'ab'ue sia naa ra rena Paulus nae, “hambu atahori nasod'a bali' mia mamaten ena”, ma ara mali ra'a'e'ei' e. Te atahori hira taoafi' neu e. Ara rafad'e e rae, “Hai fe'e hii ama' 'ola' dala' naa. Te fai' ruma dei.” 33 Basa ma, Paulus lao hela mamana' naa. 34 Te ruma ra'ab'ue roo e, huu ramahere Lamatua' Yesus. Mia sira e, hambu atahori mahine' esa sia Areopagus, naran Dionisius. Ma ina' esa, naran Damaris. Ma hambu atahori laen hira o tungga ra'ab'ue roo se boe.