Lasi-lasi Kristen ra ra'ab'ub'ue sia Yerusalem
15
Lele' naa, atahori Kristen Yahud'i hira rema mia doo-d'oo' mia profinsi Yud'ea risi' Antiokia. Losa naa ma, ranori Lamatua' Yesus atahori na ra rae, “Hei mimihere Yesus ena o, malole boe. Te naa nda fe'e dai sa. Mete ma hei teb'e-teb'e' mae misod'a, hei musi sunat dei, tungga hita 'ad'at na, fo Lamatualain fee neu ba'i Musa a.”a2 Te Paulus noo Barnab'as lab'an rahere' roo atahori naa ra 'o'ola na ra. Ara rareresi rala seli. Paulus se rae, “Naa sala! Atahori fea' nda Yahud'i ra sa, mana ramahere Yesus, nda parluu sunat tungga atahori Yahud'i ra 'ad'at sunat na sa!” Huu ara balab'an ta'o naa, de ra'etu' denu Paulus noo Barnab'as, ma nonoo na ra hira mia Antiokia, fo reu rendi ded'eat ia fee neu Lamatua' ded'enu na ra, roo lasi-lasi Kristen laen mana sia Yerusalem ra.
3 Naa de, atahori Kristen mana sia Antiokia ra denu Paulus se Yerusalem reu. Ara tungga mad'a' ata, seli profinsi Finisia ma profinsi Samaria. Sia dala' a, ara tuli atahori mamahere' ra ume na ra. Ara dui lutu'-lelo' rae, “Atahori nda Yahud'i ra sa, lao hela nemehere mbaraa na ra de ramahere neu Lamatua' ena boe!” Ara rena ta'o naa ma, basa se ramaho'o.
4 Ara losa Yerusalem ma, Yesus atahori na ra simbo se noo malole'. Lamatua' ded'enu na ra, roo lasi-lasi Kristen laen ra, simbo se boe. Basa naa ma, Paulus se dui basa saa fo Lamatualain tao fee sira, losa atahori fea' nae' o tungga Lamatua' Yesus boe. Ara o dui sira rareresi so'al sunat. 5 Atahori mana rena Paulus se dud'uin, hambu atahori Yahud'i Kristen hira mia partei Farisi. Ara fela rambarii' de 'ola' rahere' rae, “Rena malolole, e! Mete ma atahori nda Yahud'i sa nau tungga Yesus, na, ara musi tungga hita 'ad'at sunat na, ma atoran 'ad'at laen ra, fo Lamatualain fee neu ba'i Musa a.”
6 Basa de, atahori sarani' ra rala hara' esa rae, Lamatua' Yesus ded'enu na ra roo lasi-lasi Kristen ra, ra'ab'ue fo dud'u'a dala' naa. 7 Ara du'a neu-nema esa noo esa. Boe ma Petrus fela nambarii', de 'ola' nae, “Toronoo ngga ra, e! Hei bub'ulu', dalahulun, Lamatualain dud'u au mia hei talad'a ma ra, fo 'uu 'ufad'e Yesus Hara-lii Malolen neu atahori nda Yahud'i ra sa. Te Lamatualain o nau fo ara ramahere Yesus boe.b 8 Lamatualain nahine hita esa-esa' rala na ra. Ana fee Dula-d'ale Meumaren neu se, 'ona' Ana fee neu hita' a boe. Noo ta'o naa, hita tahine tae Lamatualain o simbo se boe.c 9 Ana nda pili-tad'a sira roo hita sa. Ana nda bingga-b'anggi sira roo hita sa. Ana tao nameu rala na ra, huu ramahere Yesus, 'ona' Ana o tao nameu rala ta ra boe.
10-11 De ta'o bee? Mete ma Lamatualain simbo se ena, na, ta'o bee de hita fe'e tao namab'era se noo 'ad'at sunat fai? Mete ma tae 'ola' tetu-tetu, hita too bei-ba'i ta ra nda lemba be'i basa hohoro-lalane agama naa ra sa. De 'afi' ta'asususa' se ta'o naa! Au 'ae 'utane ta'o ia: Lamatualain fee masoi-masod'a' neu nggita, huu hita tungga hohoro-lalane agama, do? Hoko'! Ana fee masoi-masod'a', huu Lamatua' Yesus sue ma natud'u rala malolen neu nggita. De 'afi' lilii'! Lamatualain o sue ma natud'u rala malolen neu atahori fea' ra boe.”
12 Ara rena rala ma, nda hambu esa nau fee dud'u'at selu' sa ena boe.
Basa ma, Paulus noo Barnab'as dui selu', ta'o bee fo Lamatualain pake se. Ara dui manad'ad'i manaseli' ra fo Lamatualain tao mia atahori nda Yahud'i ra talad'a na ra sa. 13 Ara dui basa ma, atahori sa, naran Yakob'is, nambarii' de 'ola' nae, “Toronoo ngga ra, e! Rena au dei! 14 'A'a Petrusd fe'e dui basa nggita, nae Lamatualain so'u atahori nda Yahud'i ra sa, fo dad'i Lamatua' Yesus bob'onggi na. 15 Naa, ndaa noo saa fo Lamatualain mana 'ola-'ola na ra rafad'e eni' a dalahulu na. Ara sura' rae:
16 ‘Losa fain, Au bali'.
Huu Au 'ae 'ufefela bali' mane Daud parenda na.
Te Eni tititi-nonosi mana mambalulutu' naa ra,
Au 'ae 'ufefela bali', ma tao manggatetee e fai.
17-18 Noo ta'o naa, atahori mia nusa fea' ra rema sangga fo rae randaa roo Au.
Te Au o pili se dad'i atahori ngga ra.
Huu Lamatualain 'ola' ta'o naa mia dalahulun ena na!’e
19-20 De mia au, Yakob'is, ta'o ia: Mete ma atahori mia leo fea' ra rae tungga Lamatualain, hita atahori Yahud'i ra 'afi' tao ne'esususa' se. Ata 'afi' tao nemeb'era se ma denu se tungga hita 'ad'at sunat na. De ata musi sura' susura esa, fo haitua fee se tae, sira nda parluu tungga basa hita hohoro-lalane 'ad'at Yahud'i na ra sa. Ata o fee se nesenened'a' tae, 'afi' hohongge. 'Afi' raa sisi sosonggo'. 'Afi' raa sisi raa'. 'Afi' raa sisi mia banda mana nene'ee nisa' de raa na nda nandali dea nema sa.f 21 Dad'i mete ma hita tao dala' ta'o ia, naa nda dala feu' sa. Atahori hetar bub'ulu' ena, hita atahori Yahud'i ra 'ad'at na mema' ta'o naa ena. Tungga fai hahae ao' hita baca ba'i Musa se hohoro-lalanen naa sia ume hule-o'e ra sud'i 'a sia bee-b'ee. De atahori hetar mia leo fea' ra bub'ulu' ena. Au 'o'ola ngga ta'o naa ena. Makasi!”
Susura fee atahori mamahere' nda Yahud'i ra sa
22 Basa ma, Lamatua' ded'enu na ra roo lasi fea' ra roo basa atahori sarani ra sia Yerusalem, rala hara' esa fo denu atahori rafad'e sira ne'etun neu atahori sarani' sia bee-b'ee. De ara sangga atahori mamahere' mana nandaa noo ues naa, mana hambu had'a-hormat mia jama'at ra. Ara pili rala atahori rua. Esa naran Silas, ma esa fai naran Yud'as (fo ro'e rae Barsab'as). Ara denu ru'a se tungga Paulus ma Barnab'as sud'i 'a bee reu. 23 Ara rendi susura fee atahori nda Yahud'i ra sa sia kota Antiokia sia profinsi Siria, losa profinsi Kilikia. Susura naa, liin ta'o ia:
“Sod'a-mole' mia hai, Lamatua' Yesus ded'enu na ra ma lasi-lasi' laen sia Yerusalem ia. Hai sura' susura ia fee nggi, fo hai sue 'ona' 'od'i-'a'a bonggi' e.
24 Hai sura' susura ia, huu hai rena mae, atahori hira mia Yerusalem ia reti randaa roo nggi ena. Ara ranori leli losa ra'asususa' ma tao nggi bingun. Sad'i ama bub'ulu', hai nda denu atahori naa ra sa. 25 Hai rena atahori tao ra'asususa' nggi ta'o naa ma, hai mi'ib'ue de du'a dala' naa. Hai rala' esa, ma mi'etu' basa dala' naa ena. De hai pili atahori fo reti rafad'e nggi, hai ne'etum naa. Ara rema roo Paulus ma Barnab'as fo hai sue' ra. 26 Hita atahori karua na ra naa ra lemba doid'oso rae' a mate ena, huu tungga hita Malanggan, Yesus Kristus. 27 Naa de, hai denu Yud'as noo Silas, fo rafad'e hei susura ia isi na.
28 Lamatualain Dula-d'ale Meumaren nafad'e hai, de mitaa ta'o naa mae, hei nda parluu tungga basa hai 'ad'at Yahud'i ma ra, 'ona' 'ad'at sunat a. Te 'ad'at naa tao namab'era' a hei. Te hambu dala' esa do rua, fo mema' hei musi misined'a:
29 'Afi' hohongge.
'Afi' mia sisi sosonggo'.
'Afi' mia raa'.
Ma 'afi' mia sisi mia banda mana nene'ee nisa' losa raan nda nandali dea nema sa.
Mete ma hei minea ao ma ra mia basa dala' naa ra, na, hei nda tao melumud'u toronoo atahori Yahud'i Kristen ra sa. Noo 'ona' naa, hei mi'ib'ue malolole moo se. Susura ia liin, ta'o a naa ena. Sod'a-mole'.”
30 Ara simbo rala susura naa ma, Paulus se ratea, de lao risi' kota Antiokia. Losa naa ma, ara ra'ab'ue basa atahori sarani' ra, de fee susura a neu se. 31 Ara baca basa susura ma, basa atahori naa ra ramaho'o, huu susura liin tao rala na ra manggatee ena.
32 Lamatualain o pake Yud'as noo Silas dad'i mana 'ola-'ola na. Ru'a se, dui-b'engga nae' neu atahori mamahere' sia kota naa. Ara fee nenori' ma tao manggatee rala na ra. 33 Ru'a se leo mia naa doo-d'oo' mbei ma, atahori sarani' sia Antiokia ra fee se bali' risi' atahori mana denu se. Ara mbo'i ru'a se noo sod'a-mole'. 34 [Te Silas nae leo nakandoo sia Antiokia.]g
35 Paulus noo Barnab'as leo doo-d'oo mia naa. Ara o tulu-fali atahori laen mana ranori Lamatua' Yesus Dala Masod'a na.
Paulus noo Barnab'as saranggaa
36 Paulus noo Barnab'as leo doo-d'oo mbei mia Antiokia ma, Paulus 'ola' noo Barnab'as nae, “'A'a! 'Uma fo bali' teu sia basa mamana' fo fe'esa'an hita tuli' ra. Teu se'u sob'a toronoo' ra masod'a na ra. Ara ta'o bee, e? Huu ara ramahere Lamatua' Yesus nda fe'e doo' sa. Fe'esa'an naa, hita mana mulai tanori se. De 'uma fo teu se'u se dei.” 37 Barnab'as rena Paulus na'o naa ma, ana na'ahei' a.
Barnab'as nau noo Yohanis (fo ro'e rae Markus) fo tungga noo se. 38 Te Paulus nda nau sa. Huu ma'ahulun, Markus fela lao hela se mia profinsi Pamfilia.h 39 Paulus noo Barnab'as rareresi seli losa ru'a se saranggaa. De Barnab'as noo Markus sae 'ofa' risi' pulu Siprus.
40 Te Paulus no'e noo Silas. Ara rae lao ma, atahori mamahere' sia Antiokia ra hule-o'e ro'e Lamatualain nanea se, ma natud'u rala malolen neu se. Ara hule-o'e basa ma, ru'a se lao. 41 Ara reu ndule profinsi Siria ma profinsi Kilikia. Ara tao manggatee atahori mamahere' ra rala na ra, sia sud'i 'a bee-b'ee.