Paulus noo Barnab'as sia Ikonium
14
Lele' Paulus noo Barnab'as losa kota Ikonium ma, ara maso' risi' atahori Yahud'i ra ume hule-o'e na. Sia naa, ara 'ola' loa'-naru' so'al Lamatualain Hara-lii Malolen, losa atahori Yahud'i hetar roo atahori fea' ra o, ramahere Lamatua' Yesus boe. 2 Te sia naa, atahori Yahud'i hira to'u rahere' sira agaman, de nda nau simbo Paulus se 'o'ola na ra sa. Ara ratatale atahori fea' ra fo ramanasa atahori mana ramahere Yesus. 3 Te Paulus se nda ramatau sa. Ara rafad'e Lamatua' Yesus Hara-lii Malolen neu sud'i 'a see. Ara rafad'e rae Lamatua' Yesus ralan nau simbo basa atahori. Ana fee koasa fo tao manad'ad'i manaseli' mata'-mata', fo atahori ra bub'ulu' Lamatualain pake se.Lele' naa, Paulus se leo doo' mia naa. 4 Doo-d'oo ma, bab'anggi' rua fela. Esa tungga atahori Yahud'i mana to'u nahere' sira agaman; ma esa fai nasala'e Lamatua' ded'enu na ra. Bab'anggi karua' naa ra rareresi rakandoo 'a.
5 Atahori Yahud'i mana to'u rahere' sira agama na ra ma'ira' roo atahori fea' ra, roo malangga na ra, fo tao ra'asususa' Lamatua' ded'enu na ra. Ara o rae mbia risa Paulus se. 6 Te hambu atahori rafad'e Paulus se rae, hambu bab'anggi' esa rae tao de'ulaka se. De ara rela reu sangga masod'a' sia kota Likonia, sia kota Listra ma kota Derbe, noo basa kambo-kambo' mana sia naa ra. 7 Sia naa, ara o dui-b'engga Lamatua' Yesus Hara-lii Malolen boe.
Paulus se sia kota Listra noo Derb'e
8 Paulus noo Barnab'as losa kota Listra ma, randaa roo tou' esa. Ei na ra ru'a se keko ra eni' a maman bonggi e. De ana nda fe'e lao' nita sa. 9 Atahori naa 'endo' rena Paulus dud'ui na. Paulus mete e, ma du'a nae, “Atahori ia nemeheren bisa tao nahai' e!” 10 De Paulus no'e e nae, “'A'a! Mumburii' leo!” Ana rena ta'o naa ma, ana rii-rii neu' ena, boe ma ana mulai lao'.
11 Atahori rita Paulus tao ta'o naa ma, basa se titindindii. Ara 'ola' ded'ea Likonia rae, “Rena dei! Atahori karua' ia ra, nda atahori raefafo' sa. Hita musi songgo se, huu ara 'onda mia lalai 'ona' a atahori raefafo' fo tulu-fali nggita.” 12 Ara 'ola' ta'o naa, huu rae ne'o Barnab'as, 'ona' Seus fo ara songgo' a. Ma Paulus, 'ona' a Seus mana 'ola-'olan, Hermes.a 13 Mia lelesu kota a dea', hambu Seus ume sosonggon esa. Seus mana songgo na ra rita Paulus se ma, ara rendi buna' ma sapi mone monae' hira, fo songgo Paulus se. Boe ma atahori hetar o tungga mana songgo' ra fo reu songgo Lamatua' Yesus ded'enu na ra boe.
14 Te lele' Paulus noo Barnab'as rita atahori ra rae songgo se ma, ara nda simbo sa. Boe ma rela risi' atahori naa ra mata na ra, de sii bad'u na ra fo dad'i tanda 'oi, sira nda nau saa fo atahori rae tao' naa sa. De ru'a se nggasi rae, 15 “Awii! Ta'o bee de hei tao ta'o ia? 'Afi' songgo hai. Hai o atahori 'ona' hei boe. Hai 'ima mifad'e hei dud'ui malole' esa. Hei musi lao hela sosonggo ma ra, huu ara nda papake' sa. Hei musi tungga Lamatualain mana masod'a' a. Eni mana na'ad'ad'ad'i' lalai, raefafo' noo basa isi-oe na ra.b 16 Mia dalahulun, atahori mia basa nusa' ra rasod'a tungga 'a hihii-nanau na ra. Lamatualain o hela se ta'o a naa. 17 Te Ana nda lilii' fee tanda mata'-mata', fo basa atahori bub'ulu', Lamatualain malole'. Ana mana na'onda' 'ud'an fee nggita. Ana mana fee hita osi na ra rambule-rab'oa'. Ana mana fee nggita nanaat, ma tao namaho'o rala ta ra.”
18 Mae Paulus noo Barnab'as 'ai se fo 'afi' tao ta'o naa, te atahori naa ra nau 'a rendi sosonggot naa fee neu se.
19 Lele' naa, hambu atahori Yahud'i hira rema mia kota Antiokia ma Ikonium risi' kota Listra. Ara ratatale atahori ra fo lab'an Lamatua' Yesus ded'enu na ra. Ara mbia Paulus de rae ne'o mate ena. Basa de, ara lea rendi e nggari nisi' kota a dea'.
20 Te lele' Yesus atahori mamahere na ra rambarii' rereo' Paulus, ma ana fela. Boe ma ana bali' kota rala neu. Mbila' neu ma, noo Barnab'as lao risi' kota sa, naran Derb'e.
Paulus noo Barnab'as bali' risi' jama'at sia kota Antiokia sia profinsi Siria
21 Paulus noo Barnab'as rafad'e Lamatua' Yesus Hara-lii Malolen sia Derb'e, de atahori hetar ramahere E. Basa ma, ru'a se reu selu' sia Listra. Basa de bali' risi' Ikonium. Mia naa, ara lao' rakandoo risi' Antiokia sia profinsi Pisid'ia. 22 Ara tao manggatetee atahori mana tungga Yesus ra rala na ra. Ara fee se nesenened'a' rae, “Toronoo ngga ra, e! Mete ma hita dad'i Lamatualain atahorin, na, 'afi' mae hita nda susa sa ena. Te ta'o bee boe o, hita musi susa, de ta'atataa' tungga Yesus losa bab'asan.” Ru'a se ranori ta'o naa neu Yesus atahori na ra sia kota naa ra.
23 Basa naa ma, Paulus noo Barnab'as sangga atahori fo so'u dad'i malanggac sia jama'at esa-esa'. Ara hule-o'e ma puasa ratane Lamatualain hihii na. De ara ndae lima na ra, de hule-o'e so'u atahori fo Lamatualain natud'u' ra, fo dad'i malangga jama'at.
24 Basa ma, Paulus noo Barnab'as lao tungga nusa Pisid'ia, de risi' profinsi Pamfilia. 25 Ara losa kota sa, naran Perga, de rafad'e Lamatualain Ded'ea-'o'ola na. Basa de, ara lao' rakandoo, nda doo' sa ma, ara losa kota Atalia. 26 Mia naa, ara sae 'ofa', de lao bali' kota Antiokia sia profinsi Siria reu. Fe'esa'an naa, Lamatua' Yesus atahori na ra mana sia Antiokia denu se, ma fee se risi' Lamatualain liman fo nanea se. De Paulus se rae bali' fo rafad'e jama'at Antiokia ra rae, sira tao basa ue-tataos naa ra ena.
27 Paulus se losa Antiokia ma, ara ra'ab'ub'ue basa Lamatua' atahori na ra. De ara dui loa'-naru' basa saa fo Lamatualain tao fee sira' ra. De ara dui rae Lamatualain soi dala' de atahori nda Yahud'i sa o ramahere neu Yesus boe. 28 Basa naa ma, Paulus noo Barnab'as leo doo' roo Lamatua' Yesus atahori na ra mana sia naa ra.