Atahori Antiokia ra denu Barnab'as noo Saulus ue-tao Lamatualain tatao na
13
Sia kota Antiokia, atahori hetar ramahere Lamatua' Yesus ena. Ruma dad'i Lamatualain mana 'ola-'olan, ma ruma fai ranori atahori ra. Nara na ra, naeni:Barnab'as,
Simeon, fo atahori ro'e e rae, ‘Tou nggeo'’.a
Lukius, mia kota Kirene,
Menahem, fo ara ra'ab'oi e na'ab'ue noo mane Herod'es eni' a 'a'anan.b
ma Saulus.
2 Fai' sa, ara puasa ma ra'ab'ue fo koa-kio Lamatualain. Boe ma Dula-d'ale Meumaren nafad'e se nae, “Pili mala Barnab'as noo Saulus. Te Au ue-tatao ngga nae'. De ara musi tao ues fo Au 'ae fee neu se' a.”
3 Lele' ara puasa noo hule-o'e basa ma, ara ndae lima na ra neu Barnab'as noo Saulus langga na ra, de tab'is se. Boe ma denu ru'a se reu ue-tao Lamatualain tatao na.
Barnab'as noo Saulus risi' pulu Siprus
4-5 Lamatualain Dula-d'ale Meumaren parenda Barnab'as noo Saulus, fo lao ndule nusa'. Fefeun, ara risi' kota esa sia tasi suun, naran Seleukia. Yohanis (fo ro'e rae Markus), tungga noo se boe. Losa naa ma, ara sae 'ofa' de lao pulu Siprus reu. Basa ma, ara 'onda mia kota esa, naran Salamis. Sia naa, ara hii reu risi' atahori Yahud'i ra ume hule-o'en fo ranori Lamatualain Ded'ea-'o'ola na.
6-8 Basa ma, ara lao tuli kambo-kambo', de losa kota sa sia pulu a bob'oan, naran Pafos. Hofernor Sergius Paulus leo sia naa. Hofernor ia, mahinen seli. Ana rena Barnab'as se reu sia naa ma, ana denu atahori reu ro'e se, huu ralan hii rena Lamatualain nenori na.
Sia naa, hambu atahori Yahud'i sa, naran Bar Yesus (nara laen na sia ded'ea Yunani 'oi ‘Elimas’). Eni ia, atahori mana suanggi'! Ana hii pepeko-leleko' atahori 'oi eni, Lamatualain mana 'ola-'ola na. Ana malole noo hofernor. Dad'i Barnab'as se rema ma, ana 'ira hofernor fo 'afi' simbo se. Ana soba-soba nae tao hofernor fo 'afi' namahere Yesus.
9 Te Lamatualain Dula-d'ale Meumaren fee koasa neu Saulus (fo ara o ro'e rae Paulus), de ana mete na'atetee' tou mana suanggi' a. Ana 'ola' 'oi, 10 “He! Elimas! Ho ana nitu'! Mana pepeko-leleko'! Ho mae tipu-laka atahori losa fai hira'! Ho lab'an basa malole' ra. Huu naa, hai mihine ho tungga nitu ra malanggan. 'Afi' tao ta'o naa fai! Ho 'afi' sob'a-sob'a tatana Lamatualain dala ndoo-tetun fai! 11 Rena, e! Dei fo Lamatualain huku-d'oki nggo. Ho matam poke, ma nda mita saa sa boe, losa fai hira.”
Paulus 'ola' basa ta'o naa ma, atahori naa matan poke neu' ena boe. Ana lao' nafaroroe sangga atahori to'u liman, fo roo e lao.
12 Lele' hofernor nita naa noo mata-aon, ma rena Barnab'as se ranori so'al Yesus, ma Ana titindindii. Basa ma ana namahere Yesus.
Ara rendi Hara-lii Malole' nisi' kota Antiokia laen sia nusa Pisid'ia
13 Basa naa ma, Paulus se sae 'ofa' mia kota Pafos lao hela pulu Siprus, de risi' kota esa sia profinsi Pamfilia, naran Perga. Losa naa ma, ara 'onda ma Yohanis Markus lao hela se de bali' Yerusalem neu. 14 De ara lao ei 'a mia Perga risi' kota Antiokia sia nusa Pisid'ia.
Ara losa kota naa, ma nandaa noo atahori Yahud'i ra fai hahae aon, ma ara reu tungga hule-o'e sia atahori Yahud'i ra ume hule-o'e na. 15 Lele' naa, ara baca mia ba'i Musa susuran ma mia Lamatualain mana 'ola-'ola laen na ra susura na ra boe. Boe ma malangga ume hule-o'e' ra ro'e Paulus se rae, “Ama ngga ra, e. Mete ma mae mifad'e hai saa, na, hai mo'e fo 'ola' fee hai rala ma ra manggatee.”
Paulus 'ola' fee atahori Yahud'i ra sia Antiokia
16 Basa ma, Paulus fela mata' neu. Ana boti' liman no'e se nee-nee. De 'ola' nae, “Toronoo atahori Isra'el ra, e. Ma toronoo fea' ra, e. Hei maso' agama Yahud'i huu hei o hii atahori Isra'el ra Lamatualain na. Au 'o'e basa nggi pasa ndiki ma ra fo rena!
17 Lamatualain pili basa hita atahori Isra'el ra bei-ba'i na ra eni' a mia dalahulun neu. Ara reu leo sia rae Masir, fo nda sira nusan sa. Sia naa Lamatualain fee se leo noo sod'a-mole', de tititi-nonosi na ra boe ramaheta. Boe ma, Lamatualain pake koasa manaselin fo noo se lao hela Masir.c 18 Ara rasod'a lali-lali' mia mamana rou' losa too haa nulu. Mae ara langga-fatu rakandoo 'a, te Lamatualain na'atataa' noo se rakandoo 'a.d 19 Basa naa ma, Lamatualain tao sea-saranggaa leo hitu sia rae Kana'an. De Ana bab'anggi rae a fee hita bei-ba'i na ra, fo dad'i rae pusaka na ra.e 20 Ara rasod'a 'ona' naa, losa too natun haa lima nulu.
Basa de, Lamatualain so'u fee se mana ma'etu' ded'eat ra, fo ralalao se losa Lamatualain so'u mana 'ola-'olan esa, naran Samuel.f 21 Lele' Samuel dad'i mana 'ola-'olan, hita bei-ba'i na ra nau 'a hambu mane' esa. De Lamatualain so'u Kis anan, naran Saul, mia leo Benyamin. Saul to'u parenda' too haa nulu.g 22 Boe ma Lamatualain na'onda' e. Ana so'u Isai anan Daud, fo nggati Saul dad'i mane feu'. Lamatualain nahine teb'e Daud ralan nae, ‘Isai anan Daud ia, ndaa noo Au rala ngga. Dei fo ana tao tungga Au basa au hihii ngga ra.’h 23 Lele' naa, Lamatualain helu nae haitua Daud tititi-nonosin esa, fo fee masoi-masod'a' neu atahori Isra'el ra mia sala-kilu' koasa na ra. Dad'i au 'ae 'ufad'e toronoo' ra ta'o ia: Daud tititi-nonosin fo Lamatualain helu' a, naeni Yesus.”
Paulus nae Yesus naa, Atahori fo Lamatualain helu nae haitua' a
24 Paulus 'ola' nakandoo nae, “Lamatua' Yesus nda fe'e so'u ue-tataon sa, te atahori sa, naran Yohanis, nafad'e atahori Isra'el ra nae ara musi hahae tao sala'. Ma ara musi sarani fo dad'i bukti sira malole roo Lamatualain ena.i 25 Te lele' Yohanis ue-tataon nae 'a basa, ma ana nafad'e atahori ra nae, ‘Hei 'afi' du'a mae au ia, Atahori fo Lamatualain helu eni' a fai ma'ahulun fo nae haitua' a. Misined'a malole! Hei musi mihani Atahori esa, mana nae nema. Ana manaseli' lena' au de 'ona' mae dad'i' a ded'enun o, au nda 'undaa sa.’j
26 Toronoo ngga ra, e! Hei ruma ba'i Abraham tititi-nonosin, ma hei ruma atahori fea', te rala ma ra hii neu Lamatualain. Hei rena au dei! Lamatualain nafad'e ia neu nggita fo tahine Dala Masod'a na. Ana mbo'i nggita mia sala-kilu' ta ra. 27 Mia dalahulun, Lamatualain pake mana 'ola-'ola na ra fo sura' rafad'e atahori so'al Atahori fo Ana helu nae fee nema' a. Boe ma hita malangga agama Yahud'i na ra roo atahori laen sia Yerusalem, baca rasafafali saa fo mana 'ola-'ola' ra sura' hela' a. Tungga fai hahae ao', ara risi' ume hule-o'e' rala, fo baca Lamatualain Susura Meumare na.
Te ara nda rahine rae atahori fo Lamatualain helu nae fee' naa, naeni Yesus sa. Basa ma ara sangga dala' de hukun risa E. Te dala' ia ndaa noo saa fo mana 'ola-'ola' ra sura' hela ena. 28 Ara tao-tao' a ded'eat roo Yesus fo rae ra'atutud'a' E, te ara nda hambu salan saa sa boe. Mae 'ona' naa o, ara ro'e hofernor Pilatus fo tao risa E.k 29 Hofernor o na'ahei' boe, de mbaku E mia hau nggangge' losa mate. Basa ia ra o, ndaa noo saa fo mana 'ola-'ola ra sura' hela ena. Ara ra'onda' Yesus ao-sisin mia hau nggangge', de 'o'o rendi E tao rates rala neu.l 30 Te Lamatualain pake koasan fo tao nasod'a bali' E mia mamaten.
31 Lele' Yesus nasod'a bali' ma, Ana natud'u aon nasafafali neu atahori ra. Sira ia, mana rema roo E mia nusa Galilea risi' Yerusalem. Ma sira o, mana dad'i sakasii fee atahori Isra'el ra 'oras ia.”m
Paulus natud'u nae Lamatualain pake mana 'ola-'ola na ra fo rafad'e mema' so'al Yesus
32-33 Paulus 'ola' nakandoo nae, “Ta'o ia! Hai ru'a nggi, naeni au 'oo Barnab'as, 'ima mia doo-d'oo' mae mifad'e nggi, fo mihine mae, saa fo Lamatualain helu neu hita bei-ba'i na ra, ia naa dad'i ena. Lamatualain tao nasod'a bali' Yesus ena. Sia Sosod'a Koa-kio tatad'a' karuan, Lamatualain pake atahori fo sura' so'al Yesus, naeni Atahori fo Ana helu nae fee nema' a, nae:
‘Ho ia, Au ana ngga.
Fai' ia, Au so'u nggo to'u parenda'.’n
34 Mia dalahulun, Lamatualain helu nae, dei fo Eni tao nasod'a bali' Atahori fo nae haitua' a. Ma Atahori naa nda 'afi' mate sa ena. Huu naa, Lamatualain pake mana 'ola-'olan fo sura' nae,
‘Eni' a ma'ahulun Au helu-fuli neu mane Daud 'ae fee papala-b'ab'anggi' neu e.
De ia naa, Au 'ae tao hehelu-fufuli' naa 'oo nggo, huu ho dad'i Daud tititi-nonosi na.’o
35 Sosod'a Koa-kio' esa fai nae,
‘Lamatualain nda hela Ho Atahori Meumarem ao-sisin,
fo nambalulutu sia raten rala sa.’p
36-37 Matetun ta'o ia: Sosod'a Koa-kio' ia nda 'ola' so'al Daud sa! Hita bub'ulu ta'o naa, huu mane Daud tao dala malole' nae' fee neu atahori na ra tungga Lamatualain hihii-nanau na. Basa ma ana mate, de ra'oi e. Boe ma, ao-sisin nambalulutu. Naa de hita bub'ulu tae Sosod'a Koa-kio' ia nda 'ola' so'al Daud sa, te 'ola' so'al atahori laen. Mete ma atahori naa mate, na, Lamatualain tao nasod'a bali' E. Dad'i ao-sisin nda nambalulutu sa.
38-39 De toronoo ngga ra e, rena malolole! Atahori naa, naeni Yesus! Mete ma hita tamahere neu E, na, ana lemba hita sala-singgo ta ra. Matetun, hita musi lemba ao ta ra. Te mete ma hita tamahere neu Yesus, Lamatualain 'ose hendi sala-singgo ta ra. Hita o bub'ulu' 'ona' mae hita tungga basa ba'i Musa hohoro-lalane 'ad'at na ra o, naa nda fe'e tao hita ndoos sia Lamatualain matan sa. 40-41 Naa de, hei musi du'a malolole. 'Afi' losa, saa fo Lamatualain mana 'ola-'ola na ra rafad'e eni' a ma'ahulun, tud'a neu nggi. Ara sura' mema' rae,
‘Hei mana ma'ae'ei' ra, hii 'a miloe-mid'ae atahori ra, ama besa-b'esa!
Huu Au, Lamatualain tao dala' mana tao atahori titindindii.
Dei fo hei simbo hahambu ma ra, fo ama mate ndua'.
Au tao dala' esa lele' hei fe'e masod'a',
te hei nda nau simbo sa.
Mae atahori rafad'e hei ena o,
hei nda nau mihine sa.
Malole lena' hei du'a malolole dala' ia ra, fo hei tungga titindindii boe.’q
Dad'i toronoo ngga ra, e. Du'a malolole saa fo au 'ufad'e faa' ra. 'Afi' nggari hendi sa fo hei rena' a, 'ona' mana ma'ae'ei' ra tatao na ra. Au 'o'ola ngga, ba'u a naa ena. Makasi nae'!”
42 Paulus noo Barnab'as 'ola' basa ma, ara rambarii' rae lao hela ume hule-o'e' a. Boe ma atahori naa ra roe fo nggarei nasafali na rema, fo rafad'e lutu'-lelo' saa fo sira 'ola' faa' ra. 43 Paulus noo Barnab'as lao hela ume hule-o'e' a ma, atahori hetar tungga se. Basa ma ru'a se ranori se rae, “Hita bub'ulu' tae Lamatualain rala malolen seli neu nggita. Naa de, hei musi to'u mihere' E.”
Atahori Yahud'i ra malangga na ra mbuu hendi Paulus se
44 Nggarei mana nema' ma, nandaa noo atahori Yahud'i ra fai hahaen, nae 'a basa atahori sia kota naa rema rae rena Lamatualain Ded'ea-'o'ola na. 45 Atahori Yahud'i ra malangga na ra rita atahori nae' rema rae rena Paulus se, ma rala na ra mera. Lele' Paulus 'ola', ara lab'an leli e, ma 'ola' ra'atutud'a' Paulus se.
46 Te Paulus se nda ra'ad'ed'ea' sa, ma ara 'ola' nda bambi-b'ambi' sa. Ara 'oi, “Lamatualain soi dala' na'ahulu' fee hita atahori Yahud'i ra, ma Ana o fee na'ahulu' Hara-lii Malolen neu nggita boe. Mema' nandaa! Te hei nda nau simbo sa. Noo ta'o naa, hei mitud'u mae hei nda mindaa misod'a mikindoo moo Lamatualain sa. De ia naa, hai mae mendi Hara-lii Malole' neu atahori nusa fea' ra, huu hei nda nau simbo e sa. 47 Lamatualain denu hai, 'ona' a Yesaya sura' ena nae,
‘Au so'u hei dad'i 'ona' lambu lantera mana nendi manggarelo' fee atahori fea', nda atahori Yahud'i ra sa,
fo hei delo minggirelo dala' mana nisi' Au,
fo Au mbo'i hendi se mia sala na ra.
Ma hei musi mitud'u dala' naa neu basa atahori ndule raefafo' ia.’”r
48 Lele' atahori fea' fo nda atahori Yahud'i ra sa rena ta'o naa ma, ara ramaho'o rae mate. Ara koa-kio Lamatualain rae, “Koa-kio Lamatualain! Hara-lii Malolen, malolen seli!” Mia sira hambu atahori fo Lamatualain na'etu' basa ma doon, fo bisa rasod'a rakandoo roo E. Basa se ramahere Lamatua' Yesus.
49 Lamatualain Ded'ea-'o'olan nened'ui-b'engga' ndule basa mamana' sia nusa naa.
50 Sia kota naa, hambu atahori monaen tou'-ina'. Ruma rala na ra hii Lamatualain. Te atahori Yahud'i ra malangga na ra reu ratatale atahori monaen naa ra, fo mbuu hendi Paulus noo Barnab'as mia sira nusa na. 51 Lele' ru'a se lao' hela kota naa, ma ara tao tungga 'adat esa, naeni ngganggafur afu mia ei na ra, fo netud'u 'oi, atahori sia kota naa nda rena sira sa. Basa de ru'a se rasad'ea lao hela kota naa. De risi' kota sa, naran Ikonium.s
52 Te atahori mana ramahere Lamatua' Yesus sia Antiokia, ramaho'o, huu Lamatualain Dula-d'ale Meumaren tao manggatee rala na ra.