Yakob'is mamaten; Petrus maso' bui; ma atahori mamahere' ra hule-o'e na ra
12
Lele' naa, mane Herod'esa tao doid'oso Lamatua' Yesus atahori na ra ruma. 2 Ana parenda atahori fo reu tati risa Yakob'is. Yakob'is naa, Yohanis 'a'a na. 3 Yakob'is mamaten, tao malangga Yahud'i ra rala na ra ramaho'o. Herod'es nita ta'o naa ma, ana boe fua-fua' a. De nandaa noo fai monae' fo rae Feta Roti Nda Tao Bib'it Sa,b ana denu atahori reu humu Petrus fai. 4 Ara humu rala e, de tao e bui rala neu. Boe ma ara dud'u sold'ad'u tana' haa fo ranea bangganggati' Petrus hatu'-rerelo na. Tana' esa naa, atahori haa. Tungga Herod'es hihiin, ana nae na'etu' Petrus ded'ean sia atahori hetar matan, mete ma basa fefetas naa.c 5 Dad'i lele' Petrus mia bui rala, Lamatua' Yesus atahori na ra hule-o'e nda rama'etu sa, ro'e fo Lamatualain mete-se'u e.Lamatualain mbo'i Petrus mia bui a
6 Mbila' neu ma, Herod'es nae na'etu' Petrus ded'ea na mia atahori hetar mata na ra. Tetemba' naa, ara pa'a Petrus noo rante rua mia bui rala. Ana sunggu' mia sold'ad'u rua talad'a na ra. Ma sold'ad'u ruma ranea sia lelesu a mata'.
7 'Aib'oi' ma, Lamatualain aten esa mia sorga nambarii' sia naa, ma kama a naronda manggarelo'. Boe ma, Ana fafae Petrus nae, “Petrus, e! Fela lai-lai leo!” Boe ma rante besi' a 'etu mia liman neu' ena. 8 Basa ma, ate a denu e nae, “'Olu bad'um noo laopei ma!” Petrus 'olu basa ma, ate a denu e fai 'oi, “'Olu bad'u dea ma, fo tungga au leo!”
9 Boe ma Petrus tungga e, ma lao hela bui a. Te Petrus nae ne'o, eni nalamein. Tao-tao te, dad'i teb'e ta'o naa. 10 Ara seli mamana nanea' kaesan noo karuan ma, ara losa lelesu besi' a. Lelesu a nenesoi' aon, de ru'a se dea reu tungga dala' mana kota neu. 'Aib'oi' ma, Lamatualain' aten lao hela Petrus neu naa.
11 Ate naa mopo boe ma, Petrus med'a nae, “Mema' teb'e! Ia naa au fe'e bub'ulu' ena. Lamatualain teb'e-teb'e' haitua aten fo mbo'i au mia Herod'es lima na. Lamatualain tao ta'o naa, fo atahori Yahud'i ra dud'u'a de'ulakan 'afi' dai au.”
12 Basa ma, Petrus nisi' ina' esa ume na. Ina' a naran Maria. Eni, Yohanis mama na. Yohanis nara fean, Markus. Sia naa atahori hetar ra'ab'ue hule-o'e, ro'e Lamatualain tulu-fali Petrus noo ded'ea na. 13 Petrus losa naa boe ma, ana ded'eu ma nggasi mia lelesu ine' a. Boe ma ate ina' esa, naran Rode neu nakaloloik seka mana nema' naa. 14 Ana rena Petrus haran boe ma, nahine neu' ena. Ana namaho'o seli, de rala neu lai-lai fo nafad'e atahori ra nae, “We! Petrus rii-rii sia dea'!” Te huu ana bingun de ana lilii' soi lelesu fee Petrus.
15 Te ara rataa rae, “Hoko' to ma! 'Afi' 'andiao' ta'o naa!”
Te ana lab'an nae, “Hoko'! Teb'e-teb'e' Petrus hara na! Ana sia dea' naa!”
Te ara sub'a-sub'a 'a rae, “Mbei ma, atahori naa, Lamatualain aten mia sorga mana nanea Petrus.”
16 Ara fe'e ralelea, te Petrus 'aka' a nggasi nakandondoo' a, losa ara reu soi lelesu a. Soi rala ma, ara titindindii, huu naa, Petrus. 17 Petrus lalaes liman fo ara nee-nee. Boe ma ana dui ta'o bee de Lamatualain soi eni mia bui a. Basa de, ana denu se nae, “Mii mifad'e basa ia ra neu Yakob'is noo ded'enu' laen ra.” Boe ma, Petrus lao nisi' mamana fea'.
18 Mbila fefetun ma, sold'ad'u mana manea' ra rita rae Petrus nese ena. Ara bingun ma ramatau seli, huu nda rita' rae dei fo saa dad'i neu sira sa boe. 19 Herod'es bub'ulu' ma, ana parenda se reu sangga Petrus. Te nda randaa roo e sa. Boe ma Herod'es denu se paresa' sold'ad'u mana manea' ra. Paresa' basa ma, ana denu tao risa basa se.
Basa boe ma, Herod'es lao hela Yud'ea, de leo sia kota Kaisarea.
Mane Herod'es Agripa mate
20 Lele' naa, hambu atahori mia kota rua, naran Tirus ma Sid'on. Ara hii hasa nanaat sia mane Herod'es nusa na. Te doo' ena, mane' a bamusu' noo se. De ara rala rala' sa rae reu bad'ame' roo e. Ara here nononggo' esa fo reu randaa roo Herod'es sia Kaisarea. Losa naa ma, reu ra'ab'ue roo atahori esa sia mane' a umen, naran Blastus. Eni malangga sia mane' a ume panggat na. Ara rala hara' sa roo Blastus, fo ana dad'i mana kokoe-nanasi na ra, fo soi dala' fee se randaa roo Herod'es.
21 Basa de, Herod'es na'ahei' simbo' se, de ra'etu' rala fai' esa fo randaa. Fai' naa, ara tao fefeta monae'. Herod'es 'olu bad'u panggat na, de 'endo' mia kad'era parenda na. Boe ma ana 'ola' noo se. 22 Atahori mana sia naa ra rena haran, ma ara koa boti' e rae, “Rena hara' naa! Ia nda atahori haran sa! Hara' ia, meulaun seli. De la'i songgo e!” 23 'Aib'oi' ma, Lamatualain aten esa mia sorga fee Herod'es hed'is esa, huu ana simbo kokoa' ena, ma seti hendi Lamatualain. De lalati' ra raa Herod'es aon losa ana mate.
24 Noo basa manad'ad'i' naa ra, Lamatualain Hara-lii Malolen boe nened'ui-b'engga', ma atahori mana tungga Lamatua' Yesus Dala Masod'an boe ramaheta.
25 Barnab'as noo Saulus rendi basa atahori Antiokia ra tutulu-fafali na ra Yerusalem reu ma, ara bali' risi' Antiokia. Ara roo ana soru' esa, naran Yohanis. Te ara o ro'e e, rae Markus boe.