Petrus nasala'e aon so'al eni sarani atahori nda Yahud'i ra sa
11
Petrus fe'e nda bali' sa, te Yesus ded'enu na ra roo atahori mamahere' laen ra mia Yerusalem rena rae atahori nda Yahud'i ra sa simbo rala Lamatualain Hara-lii Malolen ena. 2 Petrus losa Yerusalem ma, atahori mamahere' hira mia partei Yahud'ia fee sala' neu e, 3 rae, “Hee! Ho tao ta'o bee naa? Bub'ulu' hita 'ad'at na, do hoko'? Mumburani misi' atahori nda Yahud'i ra umen sa! Ma mua-minu moo se! 'Afi' ta'o naa, te ara nda fe'e tungga hita 'ad'at sunat na sa! De ara nda randaa ra'ab'ue roo hita sa!”4 Basa de Petrus dui basa manad'ad'i' ra nae, 5 “Fai' esa, au mia kota Yope ma, au hule-o'e, de Lamatualain natud'u au 'ona' meit esa. 'Ona' lalai a sii, ma teme loa-naru' esa sou. Teme' a doko-d'oko sia bukun kahaa' ra. Boe ma teme' a loe nisi' au. 6 Au 'ukuloloik teme' rala neu ma, 'ita banda mata'-mata'. Ita banda ei haa', banda mana nod'o', ma mbui' mata'-mata'. Basa se, hita atahori Yahud'i ra banda neluli na ra. 7 Basa ma, au rena hara' esa denu nae, ‘Petrus! Fela leo! Hala banda ia ra, fo mua leo!’
8 Te au 'utaa 'ae, ‘Nda bisa sa, Malangga! 'Afi' ta'o naa! Au nda fe'e 'ua 'ita banda mata' naa ra sa! Basa banda naa ra, hai atahori Yahud'i ra miluli!’
9 Te hara' naa naselu bali' nae, ‘Mete ma Lamatualain nafad'e nae saa meumare' ena, na, 'afi' mae manggenggeo' fai!’
10 Au 'ita teme' a sou lao telu boe ma, neneb'oti' bali' lalai a neu.
11 Lele' naa, atahori telu losa ume naa boe. Ara mia Kaisarea, rema sangga au. 12 Boe ma Lamatualain Dula-d'ale Meumaren nafad'e au nae, ‘'Onda fo tungga atahori ia ra leo. 'Afi' mumutau. Mae sira, atahori fea' ra o, ho 'afi' melumud'u se, ma 'afi' mae manggenggeo' ra.’ Au rena basa boe ma, hita atahori kanee na ra ia ra, o tungga roo au misi' Kaisarea. Sia naa, basa hai misi' malangga sold'ad'u Roma sa ume na. 13 Ana dui nae fai hira mana lao' naa, nita Lamatualain aten mia sorga nambarii' sia eni umen, de nae, ‘Denu atahori reu sia Yope, fo ro'e atahori sa, naran Simon Petrus. 14 Dei fo atahori naa natud'u neu nggo, moo basa ume isi ma ra, Lamatualain dalan fo fee masoi-masod'a' neu nggi, ma 'ose hendi sala ma ra.’
15 Naa de, lele' au 'utud'u Lamatualain Dala Masod'an neu se, 'aib'oi' ma ara simbo Dula-d'ale Meumare' a, 'ona' hita simbo' a boe. 16 Au 'ita 'ona' naa, ma 'usuned'a Lamatua' Yesus 'o'olan nae, ‘Yohanis sarani hei noa 'a oe, te Lamatualain nau tao lena' naa fee nggi, huu naa Ana fee Dula-d'ale Meumaren neu nggi.’b 17 Dad'i Lamatualain mana fee Dula-d'alen neu se 'ona' Ana fee nggita boe. De hei nau au lab'an Lamatualain, do ta'o bee? Au 'ae 'ola' saa fai?”
18 Ara rena Petrus nasala'e aon ta'o naa, ma ara nda fee sala' neu e sa ena. Basa se koa-kio Lamatualain 'oi, “We! Manaseli' ma! Lamatualain o soi dala' fo atahori fea' ra lao hela dala sala na ra, fo Ana 'ose hendi sala na ra. Noo ta'o naa, ara o rasod'a rakandoo roo E boe.”
Lamatua' Yesus atahori na ra sea-saranggaa sia bee-b'ee. Sira hetar ra'ab'ub'ue sia kota Antiokia
19 Lele' atahori ra tao risa Stefanus ena, ara o tao doid'oso ma ra'asususa' Yesus atahori na ra boe. Naa de, Yesus atahori na ra sea-saranggaa. Ruma rela risi' nusa Finisia. Ruma risi' pulu Siprus, ruma fai rela ra'ad'od'oo' losa kota Antiokia sia nusa Siria. Boe ma ara rafad'e Lamatua' Yesus Hara-lii Malolen sia bee-b'ee. Te ara rafad'e 'a atahori Yahud'i na ra. Te nda rafad'e atahori fea' ra sa.c
20 Te hambu Lamatua' atahori na ra mia pulu Siprus ma kota Kirene. Ruma rela rakandoo kota Antiokia reu sia nusa Siria. Sira ia rafad'e Lamatua' Yesus Hara-lii Malolen neu atahori nda Yahud'i ra sa. 21 Lamatualain fee koasan neu se, de atahori mana ramahere neu Lamatua' Yesus boe ramaheta.
22-24 Basa naa ma, Lamatua' Yesus atahori na ra sia Yerusalem rena rae atahori fea' ra sia Antiokia ramahere Yesus ena. De ara denu atahori esa, naran Barnab'as, neu se'u se. Barnab'as ia, rala malole', ma namahere teb'e-teb'e' neu Lamatualain. Lamatualain Dula-d'alen o nalalao e boe.
Losa naa ma, ana nita nae, mema' teb'e. Lamatualain ue-tao sia atahori fea' ra talad'a na ra ena. De ralan namaho'o. Ana huhuar se, fo ara tungga rakandoo Lamatua' Dala Masod'an noo teb'e-teb'e'. Noo ta'o naa, Lamatua' atahori na ra boe ramaheta.
25 Basa ma, Barnab'as lao Tarsus neu fo sangga Saulus. 26 Ana nandaa noo Saulus ma, ana kokoe e, fo bali' Antiokia reu. Ru'a se leo sia Antiokia ra'ab'ue roo Lamatua' atahori na ra, losa too esa. Tungga fai, ara ranori Lamatua' Dala Masod'an neu atahori nae'. (Sia Antiokia, dei de atahori ro'e Lamatua' Yesus atahori na ra rae, ‘atahori Kristen’).d
27 Ru'a se fe'e sia Antiokia ma, atahori hira rema mia Yerusalem. Sira ia, Lamatualain mana 'ola-'ola na. 28 Mana 'ola-'ola' esa, naran Agab'us. Lamatualain Dula-d'alen nafad'e e nae, “Dei fo ndoe-la'as manaseli' dad'i ndule raefafo', losa nggoro-nggoro' ra.” De ana neu nafad'e selu' atahori ra. ('o'olan, dad'i lele' Mane Monae' Kaesar Roma naran Klaudius, to'u parenda'.)e 29 Lamatua' Yesus atahori na ra mana sia Antiokia ra rena Agabus 'o'olan ma, ara rala hara' fo rad'uru doi' fee toronoo mamahere manasusa' ra sia profinsi Yud'ea. Esa-esa' fee tungga hahambu na. 30 Ara ra'ad'uru basa doi' ra ma, ara dud'u Barnab'as noo Saulus, fo rendi doi' ra fee neu lasi sarani' ra sia naa, fo ara banggi neu atahori manasusa' ra.