Ara pili atahori hitu fo tao mata' neu atahori hata-taa' ra
6
Lele' naa, Lamatua' Yesus atahori na ra boe ramaheta. Te ara 'ola' ded'eat rua. Ruma, atahori Yahud'i mana 'ola' ded'ea Aram. Ma ruma atahori Yahud'i mana 'ola' ded'ea Yunani. Doo-d'oo ma hambu nereresit sia bab'anggi karua' naa ra. Mana 'ola' ded'ea Yunani ra nda hii roo mana 'ola' ded'ea Aram ra sa. Ara rae, “Ia, nda matetu' sa! Mete ma hei bab'anggi nanaat fai-fai esa, na, 'afi' pili-tad'a! Te hai ina falu ma ra nda hambu bab'anggi na ra sa.”2 Naa de, ded'enu kasanahulu rua' ra, ro'e ra'ab'ue basa Lamatua' Yesus atahori na ra. De ara 'ola' rae, “Toronoo ngga ra, e! Mete ma hai hahae fo tao mata' neu 'a hei nanaa-nininu ma ra, na, bisa, te naa nda nandaa sa! Huu hai musi minori Lamatualain Ded'ea-'o'olan nakandoo 'a. 3 Dad'i malole lena', hei pili atahori hitu mia nggi. Sangga atahori had'a malole', mana rahine rendi ao na ra, ma rahine dala' nae', ma Lamatualain Dula-d'alen ator masod'a na ra. Mete ma hei pili mala atahori 'ona' naa ena, dei fo hai so'u se fo tao mata' neu nanaa-nininu' ra. 4 Naa fo hai bisa mi'iena kaka'et nae' fo hule-o'e noo minori Lamatualain Ded'ea-'o'ola na.”
5 Boe ma ara tungga Petrus se 'o'ola na ra. De ara pili atahori hitu.
Esa naran Stefanus. Ana namahere teb'e-teb'e' neu Lamatua' Yesus, ma Lamatualain Dula-d'ale Meumaren pake e. Ma laen ra:
Filipus,
Prokorus,
Nikanor,
Timon,
Parmenas,
ma Nikolas mia kota Antiokia. Ana nda atahori Yahud'i sa, te maso' agama Yahud'i ena.
6 Basa de, ara roo atahori kahitu' ia ra, risi' Lamatua' ded'enu na ra. Ara ndae lima na ra neu se, ma hule-o'e fo so'u se dad'i atahori mana tao mata' neu nanaa-nininu'. Naa fo, atahori hata-taa' ra hambu 'ona esa'.
7 Dad'i Lamatualain Ded'ea-'o'olan nened'ui-b'engga sia bee-b'ee. Atahori mana tungga Yesus Dala Masod'an, boe ramaheta rakandoo 'a sia Yerusalem. Malangga agama Yahud'i hetar ra o lali risi' Yesus atahori na ra boe.
Ara humu rala Stefanus
8 Lele' naa Lamatualain natud'u rala malolen neu Stefanus. Ana o fee koasa fo Stefanus tao manad'ad'i manaseli' noo dala-d'ala manaseli' fo atahori hetar rita noo mata-ao na ra. 9 Sia naa, atahori Yahud'i hira rema mia mamana doo-d'oo'. Naeni kota Kirene, kota Aleksandria, profinsi Kalikia, noo profinsi Asia. Dalahulun ara dad'i atahori fea' ra aten, te doo-d'oo ma malangga na ra mbo'i se. Basa ma ara ra'ab'ue sia Yerusalem. Ara hii 'a maso' risi' ume hule-o'e' esa naran, ‘Ate Nenembo'it’. Lao esa boe, ara rena Stefanus 'o'olan, te nda hii sa, de rareresi roo e. 10 Te Stefanus, atahori mahinen seli, huu ana 'ola' nendi' koasa mia Lamatualain Dula-d'ale Meumare na. Naa de, ara nda rasenggi' e sa. 11 Dad'i ara sangga dala de'ulaka'. Ara bae atahori hira fo reu 'ola' leleko' rae, “Hai rena atahori ia 'ola' na'atutud'a' Musa noo Lamatualain! Mema' ana na'amuti ta'o naa!”
12 Ara dunggu-mbau atahori ra, losa lasi-lasi' 'ad'at Yahud'i ma meser agama ra rena boe. Ara ramanasa, de reu humu Stefanus, ma roo e nisi' mamana nggero ded'ea agama. 13 Sakasii leleko na ra 'ola' leli so'al Stefanus rae, “Atahori ia 'aka' 'ola' de'ulaka' so'al Ume Hule-o'e Huu' a. Ana o hii 'ola' nalutu Lamatualain parendan fo ba'i Musa na'onda' fee hita' a. 14 Hai o rena e 'ola' nae Yesus, atahori Nasaret naa, nae ndefa' hendi Ume Hule-o'e Huu' a. Ma Ana o nae nggari hendi hita hohoro-lalane' 'ad'at na ra fo ba'i Musa na'onda' fee hita 'a!”
15 Boe ma, basa atahori mana 'endo' ra'ab'ue sia mamana nggero ded'ea agama, mete ramemeu Stefanus, huu matan 'ona' Lamatualain aten mia sorga.