Ananias noo Safira mate, huu rae sob'a Lamatualain Dula-d'ale na
5
Lele' naa tou' esa, naran Ananias. Saon, naran Safira. Ara o raseo rae ombat esa boe. 2 Te ara rala rala' esa fo ra'afuni' doi' ruma mia rae a feli na. Seo basa rae a ma, Ananias neu nafad'e Lamatualain ded'enu na ra 'oi, “Hai fe'e seo basa rae ombat esa. Hai mae fee basa doin neu Lamatualain.” 3 Te Petrus 'ai e 'oi, “Woi! Ananias! Ho seli teb'e, o! Ta'o bee de mu'ufuni' doi rae naa? Ralam de'ulaka' seli ena, huu ho tungga nitu ra malanggan hihii-nanau na. Ho mumburani leleko' Lamatualain Dula-d'ale Meumare na! 4 Matetun, ta'o ia! Ho mae seo raem, do nda seo sa o, naa sia 'a nggo. Seo basa ena, mae fee doin basa e, do hoko' o, naa sia 'a nggo. Te ta'o bee de ho tao ta'o naa e? Ho sob'a-sob'a munggonggoa hita atahori ia, te nda hambu atahori bisa nanggonggoa Lamatualain sa!”
5 Rena Petrus 'ola' ta'o naa boe, 'aib'oi' ma Ananias na'aloli, de mate neu' ena. Basa atahori mana rena dud'uit naa, ramatau rae mate. 6 Boe ma ana soru' hira maso', de mboti-mbalu Ananias ao-sisin, de reu ra'oi e.
7 Ma mbei ma Lii' telu fai, ma Ananias saon nema. Te ana nda bub'ulu' saa sa boe. 8 Ma Petrus natane nae, “Ta'o bee, ina'? Ina' se seo rae a felin ba'u ia, do?”
Ma ana nataa nae, “Teb'e, ama'. Felin ba'u a naa ena.”
9 Boe ma Petrus 'ai e nae, “Ta'o bee de moo saom mala hara' esa fo sob'a Lamatualain Dula-d'ale na? Mete neu ena! Atahori mana reu ra'oi saom fe'e bali' ena. Mbei fai ena te, ara ndoro rendi ao-sisim fo ra'oi sia saom bob'oa na.”
10 Rena Petrus 'o'olan, 'aib'oi' ma, ina' naa na'aloli de mate neu' ena. Ana soru' ra bali' ma, ara rita ina' naa mate ena. De ndoro rendi ao-sisin reu ra'oi e sia saon bob'oa na.
11 Basa atahori mana ramahere Yesus ra, ramatau. Ma basa atahori fea' mana rena Ananias noo Safira mamaten, ramatau boe.
Petrus se ra'ahahai' atahori hetar
12 Lele' naa, Yesus ded'enu na ra tao manad'ad'i manaseli' nae' seli, de atahori ra rita. Ara hii risi' Ume Hule-o'e Huu' ma ra'ab'ue rala' esa sia mane Soleman Ume Loos na. 13 Lele' naa atahori hetar koa Lamatua' Yesus atahori na ra. Mete ma hambu atahori nda fe'e namahere Yesus sa, na, ana nda nambarani maso' na'ab'ue noo se sa.
14 Te atahori mana ramahere Yesus, boe ramaheta. Hambu tou' ma ina' boe. 15 Lele' naa dad'i 'ona' naa, losa atahori ra rendi atahori mamahed'i' ra, de tao neu nenei' ata sia dala' suu na. Ara dud'u'a 'oi, “Wii! Mete ma Petrus noo Yohanis lao' tungga ia, mae 'aka' a ru'a se salaon dai atahori mamahed'i' ia ra o, ara hai.” 16 Lele' naa, atahori ra rema nda rama'etu mia kambo-kambo' sia Yerusalem suun sa. Ara rendi atahori hed'is ra, de Lamatua' ded'enu na ra rahai' basa se. Ara o rendi atahori nitu tao' ra, de Lamatua' ded'enu na ra mbuu hendi basa nitu ra dea reu.
Lamatua' Yesus ded'enu na ra hambu sususa'
17 Lele' naa, atahori mana tungga Lamatua' Yesus ded'enu na ra, boe ramaheta. Naa de, agama Yahud'i malangga monaen na noo nonoo na ra mia partei Saduki, rambed'a' rala'. 18 De ara reu humu rala Yesus ded'enu na ra, fo tao se bui rala reu.a
19 Te temba' neu boe, Lamatualain aten esa mia sorga nema nisi' bui a, de soi lelesu a. Basa de noo se dea reu. Ana denu se nae, 20 “Mii mema' sia Ume Hule-o'e Huu' a. Mifad'e basa' e neu atahori sia naa, fo ara tungga Lamatualain Dala Masod'a Feun ia.”
21 Mbila fefetu anan, ara tungga Lamatualain aten parenda na. Ara risi' Ume Hule-o'e Huu' a sod'an, de ranori atahori ra sia naa.
Nda doo' sa ma, malangga monae' a noo nonoo na ra rema roo atahori monaen noo lasi-lasi 'ad'at mia basa Isra'el. Ara ra'ab'ue fo rae paresa' ded'ea agama so'al Lamatua' Yesus ded'enu na ra. Basa de ara denu mana manea' ra reu ha'i Petrus se mia bui, fo rae nggero ded'eat naa.
22 Mana manea ra losa bui a te, Petrus se nese. De ara reu rafad'e atahori monaen ra sia mamana nggero ded'eat agama naa. 23 Ara rafad'e 'oi, “Ama ngga ra, e! 'Afi' miminasa. Hai losa bui a ma, hai mita lelesu ra mana nggoe mates. Ma atahori mana ranea' bui ra rambarii' sia naa. Lele' hai denu se soi lelesu a fo maso', te hai nda mita saa sa boe.”
24 Rena ta'o naa ma, malangga agama Yahud'i ra malangga na ra, noo malangga mana manea Ume Hule-o'e Huu', basa se 'ona' mamanggonggoa' ra, huu mopo dud'u'a na ra.
25 Basa ma, hambu atahori esa nema nafad'e 'oi, “Ama ngga ra, e! Rena dei! Atahori fo ama' se tao mia bui a, ara sia dea' ia sie! Ara ranori atahori ra sia Ume Hule-o'e Huu' a!”
26 Rena ta'o naa ma, malangga mana manea Ume Hule-o'e Huu' a no'e ana boa na ra, fo reu humu selu' Petrus noo nonoo na ra. Te ana boa na ra ramatau, huu atahori nae' rena Petrus 'ola-'ola'. 'Afi' losa ara ramue ma mbia risa mana manea ra. Naa de, ara reu humu selu' Petrus se, te ara nda rambarani ha'i noo deres sa.
27 Basa ma ara roo Petrus se risi' mamana paresa' ded'eat. Boe ma malangga monae' a natane se, 28 'oi, “Hai 'ai nggi fo 'afi' minori so'al Atahori mana nae tao dala masod'a feu' naa, to? Hei ia ra, langga fatu! Hei nda taoafi' neu hai parenda ma sa, te hei tungga 'a hihii-nanau ma ra! Hei mii minori ndule Yerusalem. 'Ona' a hei mbia sala' nema hai, mae hai mana denu atahori tao risa Yesus.”b
29 Basa de Petrus nambarii' dad'i basa ded'enu' ra mana 'ola-'ola na. De ana nataa nae,
“Ama ngga ra, e! Mete ma atahori parendan lab'an Lamatualain hihii-nanaun, hai nda tungga e sa. Huu hai musi tungga 'a Lamatualain parenda na! 30 Atahori mana soi hai dala masod'a feu ma, naeni Yesus. Eni, atahori fo hei mbaku misa sia hau nggangge'. Mia dalahulun, hita ba'i na ra hule-o'e neu Lamatualain. Lamatualain ia, mana fee Yesus nasod'a bali'.
31 Ma Lamatualain o so'u E dad'i lima 'ona na. Dad'i ia naa, Yesus to'u koasa 'ona' mane monae'. Ana soi dala' fo atahori ra nenembo'it mia sala na ra. Ana nau fee dala' neu hita atahori Isra'el ia ra, fo hahae mia sala-singgo ta ra. Noo ta'o naa, Lamatualain ralan ma'asufu losa nda mete hita atahori Isra'el ra sala na ra sa ena. 32 Te hita ia ra, tita noo hita mata na ra tae Yesus mema' mate ena, te Ana nasod'a bali'. Ia naa Lamatualain Dula-d'ale Meumaren boe o nafad'e dala' ia neu atahori mana tungga Yesus Dala Masod'a na.”
33 Petrus 'ola' basa ma, basa atahori mana 'endo' sia mamana paresa' ded'eat naa, ramue losa ara rae tao risa Lamatua' ded'enu na ra. 34 Te sia naa o hambu atahori esa tungga paresa' ded'eat naa. Naran Gamaliel. Atahori nae' fee had'at neu e, huu eni meser mahine' sia partei agama Farisi. De lele' Petrus 'ola' basa, de ara rae tao risa e, te Gamaliel nambarii' de denu atahori ra rendi Petrus se dea reu. 35 Ara dea reu boe ma, ana 'ola' noo malangga ra sia naa 'oi,
“Toronoo ngga ra, e! Ata besa-b'esa, o! 'Afi' losa hita haelai tao de'ulaka atahori ia ra. Ata du'a naru' dei. 36 Hei fe'e misined'a atahori esa naran Teud'as, to? Ana mate doo' ena, te fe'e masod'an, ana so'u aon 'oi, eni atahori monae', losa mbei ma atahori natun haa tungga e. Te lele' atahori tao risa e, ana mana tungga na ra rela sea-saranggaa, losa nda mita mata-mbana na ra sa ena. Ara rela raeo ena!
37 Hei musi misined'a dud'uit esa fai. Lele' naa mana parenda ra reken atahori sia nusa' ia. Hambu atahori esa, naran, Yud'as, mia profinsi Galilea. Atahori nae' tungga e boe. Te atahori tao risa e. De basa atahori mana tungga e o rela dii-'ona losa mopo se.
38 Dad'i toronoo ngga ra, e! Au du'a ta'o ia: ata 'afi' tao tisa se. Hela se neu' ena. Mete ma nenori na ra noo leleo-lalao na ra lao' mia atahori, mae ta'o bee o nda na'atataa' nala doo' sa, te mopo se neu' ena. 39 Te mete ma nenori na ra nema mia Lamatualain, naa hei nda bisa mitud'a' se sa. De hei besa-b'esa dei. 'Afi' losa hei lab'an Lamatualain.”
Gamaliel 'ola' basa ma, ara ra'ahei' tungga e. 40 Basa naa ma, ara ro'e ded'enu' naa ra rala' reu, de ara denu atahori ra filo se. Ara 'ai se fo sud'i 'ingga-'ingga' Yesus nara na. Basa de, ara mbo'i hendi se.
41 De Lamatua' ded'enu na ra lao hela mamana nggero ded'eat naa. Ara du'a rae mae nara na ra ma'afoo huu tungga Yesus, te ramaho'o huu Lamatualain nita se randaa hambu sususa' 'ona' naa. Naa de, rala na ra ramaho'o seli. 42 Tungga fai, ara reu ranori atahori rae, “Atahori fo Lamatualain dud'u mia dalahulun, naeni Yesus.” Ara rafad'e dala' naa nakandoo 'a sia atahori ra ume na ra, ma sia Ume Hule-o'e Huu' a boe.