Malangga agama Yahud'i ra malangga na ra ro'e Petrus noo Yohanis
4
Lele' naa, Petrus noo Yohanis fe'e 'ola-'ola' roo atahori naa ra, te atahori moko-moko hira rema. Sira, malangga agama Yahud'i ma malangga mana manea Ume Hule-o'e Huu' a, noo atahori mia partei agama Saduki. Ara rema fo ramue Petrus noo Yohanis. 2 Ara ramanasa, huu Petrus noo Yohanis hii rafad'e basa atahori ra 'oi, “Yesus nasod'a bali' mia mamaten ena! Noo naa, Ana soi dala' fee atahori mates ra fo rasod'a bali'.”a 3 De ara parenda sira atahori na ra reu humu ru'a se. Te, huu relo a nae 'a tena, de ara tao ru'a se bui rala reu, fo mbila fefetun, dei fo ara nggero ded'eat naa. 4 Te mia atahori mana hii rena Yesus ded'enu na ra, atahori nae' rataa 'oi, saa fo sira ranori' naa, mema' ndaa. Naa de, atahori na ra boe ramaheta losa 'aka' a tou' ra o rifon lima ena. 5 Mbila' neu boe ma, atahori monaen Yahud'i ra ra'ab'ue mia Yerusalem. Naeni, malangga ra, lasi 'ad'at, roo meser agama Yahud'i ra. 6 Agama Yahud'i Malangga monaen na o sia naa boe. Eni naran Hanas. Atahori monaen laen ra, Kayafas, Yohanis, Aleksander, noo malangga monaen a bob'onggi laen na ra o sia naa boe. 7 Basa se maso' ma, ara parenda atahori reu ha'i Petrus noo Yohanis, fo rema rataa sia malangga naa ra. Ru'a se maso' ma, ara ratane 'oi, “Ta'o bee de hei mi'ihahai' atahori keko' naa? Hei pake see koasa na? See fee hei 'isin de mimbirani tao ta'o naa?”
8 Basa ma Lamatualain Dula-d'alen tao nambarani Petrus de nataa 'oi,
“Ama ngga ra, e! Ama' se mana dad'i atahori monaen ma lasi-lasi 'ad'at Isra'el ra! 'Afi' miminasa mete ma hai bingun mbei. 9 'Ona' a ama' se mae mid'ed'ea moo hai, huu hai tulun mihai' atahori keko' esa. Boe ma mitane hai pake see koasa na? 10 Dad'i au 'ae 'utaa ta'o ia: Ama' se ne'o fe'e misined'a atahori Nasaret fo naran, Yesus. Naeni Kristus, fo Lamatualain dud'u mema' mia dalahulu na. Te ama' se mbaku misa E sia hau nggangge'. Te Lamatualain fee Ne nasod'a bali' mia mamate na. Au nau ama' se roo basa atahori Isra'el bub'ulu', te hai mihai' atahori keko' a pake Yesus koasa na. 11 Yesus ia, fo ara sura' mema' sia Lamatualain susuran 'oi,
‘Hambu fatu esa fo tukan ra nggari hendi e;
te ia naa, fatu a dad'i fatu netehuu' ena.’b
12 Sia ndule raefafo', Lamatualain nda soi dala fea' fee masoi-masod'a' neu hita sala na ra sa. 'Aka' a dala' esa. Naeni, Yesus. Mete ma nda Eni sa, na, nda hambu atahori esa bisa fee masoi-masod'a' neu nggita sa boe.”
13 Atahori mana 'endo' sia naa ra bub'ulu' 'oi Petrus noo Yohanis, atahori anad'iki 'ona' atahori nda baca ma sura' rahine sa. Ara titindindii' a neu ru'a se mbarani na ra, huu ru'a se 'ola' nda ra'afuni' sa. Lena' fai, ara bub'ulu' ru'a se ei' esa roo Yesus. 14 Naa de bafa na ra ra'ateme losa nda bisa 'ola' nae' sa, huu atahori mana hai mia kekon o nambarii' sia mata na ra boe. 15 Basa naa ma, ara denu ru'a se 'oi, “Hei dea mii dei.”
Boe ma ara 'ola-'ola' fo sangga dala'. 16 Rae, “Toronoo ngga ra, e! Hita tao ta'o bee neu atahori karua' ra ia ra? Basa atahori sia Yerusalem bub'ulu' rae sira tao manadad'i manaseli' ia. Hita tafanii' saa fai, te bukti na sia ena na. 17 Malole lena' ata sangga dala', fo ded'eat ia 'afi' sud'i nened'uit sia bee-b'ee. Ata ta'atatau' ru'a se, fo ara 'afi' ranori selu' Yesus dala masod'a na. Mete ma ara nda nau rena sa, naa rahine neu' ena!”
18 Basa ma ara ro'e ru'a se maso', de rafad'e rae, “Besa-b'esa, e! Hei 'ona' minori so'al Yesus fai!”.
19 Te Petrus noo Yohanis rataa rae, “Sob'a ama' se dud'u'a ao ma ra. Bee malole lena'? Tungga ama' se parendan, do, tungga Lamatualain? 20 Te hai mita moo mata-ao ma ra ma rena mendi' ndiki' ma ra dala' nae' ena. Ta'o bee de hai musi mi'iteme bafa ma ra losa hai nda bisa mifad'e atahori laen ra sa!”
21 Petrus noo Yohanis rataa basa ta'o naa, te atahori mana nggero ded'eat naa ra 'ai selu' se. Boe ma ara mbo'i rua' se, huu nda rita' rae nggero se ta'o bee sa boe. Ara o ramatau, 'afi' losa atahori mana sia dea' ra fela ramue. Te atahori nae' sia dea' koa-kio Lamatualain, huu atahori keko' a hai ena. 22 (Atahori keko' naa, doid'oso too haa nulu lena ena, dei de fe'e lao' nala na.)
Yesus atahori na ra hule-o'e fo 'afi' ramatau
23 Lele' ara mbo'i Petrus noo Yohanis, ma ru'a se bali' risi' nonoo na ra. Ara dui rae malangga agama Yahud'i ra malangga na ra roo lasi-lasi 'ad'at ra 'ai se ena. 24 Boe ma, nonoo na ra basa se, ra'ab'ue rala' esa de hule-o'e rae, “Lamatualain mana na'ena koasa monae'. Ama' mana na'ad'ad'ad'i' lalai noo raefafo', noo basa isi-oe na.c 25 Dalahulun, Ama' Dula-d'ale Meumaren pake ba'i Daud dad'i mana 'ola-'ola na. Ana nafad'e mema' nae, dei fo atahori lab'an Yesus. Ma ana sura' nae:
‘Atahori mia nusa fea' ra ramanasa huu ded'ea anin;
Ara tao leli ena, huu ded'eat mana nda na'ena huu-tonggo' sa.
26 Mane raefafo' ra ra'ab'ue fo reu ratati lab'an Lamatualain;
ma malangga ra sangga dala' fo reu lab'an Lamatualain noo Kristus,
naeni Atahori fo Lamatualain dud'u mia doon neu.’d
27 Saa fo ba'i Daud sura' basa' a, ia naa dad'i ena. Dalahulun, sosoan fe'e sambu-sambu, te ia naa manggarelo' ena. Mema' sia ia, mane Herod'es noo hofernor Pontius Pilatus ra'ab'ue roo hai atahori lasi-lasi ma ra mia Isra'el, ma nusa fea' ra malangga na ra. Basa se ra'ab'ue rala hara' esa fo lab'an Yesus, fo Ama' dud'u mema' a.e 28 Ia naa, hai mihine basa naa nandaa noo Ama' hihii-nanaun, tungga sa fo Ama' na'etu' mia doon neu. 29 Ia naa, mete sob'a, te ara ra'atatataa' tao hai mimitau. Dad'i Ama' fee hai mimbirani. Fo hai mii mifad'e atahori ra sia bee-b'ee, Lamatualain Hara-lii Malolen so'al Yesus. Ma hai nda 'afi' mimitau saa sa boe. 30 Hai mo'e Ama' fee koasa, fo hai mihai' atahori mamahed'i' ra. Hai o mo'e koasa fo tao manadad'i manaseli' ra fo atahori bub'ulu' koasa naa, mema' nema mia Atahori Meumare fo Ama' denu' a, naeni Yesus. Lamatualain, hai hule-o'em 'aka 'a ia ena.”
31 Ara hule-o'e ma, ume fo ara ra'ab'ue sia' naa, nanggongga. Boe ma Lamatualain Dula-d'ale Meumaren, dai basa se. Basa de, ara dea reu rafad'e Lamatualain Hara-lii Malolen, noo nda bambi-b'ambi sa.
Atahori mamahere' ra rasod'a lemba bera' ma ramaho'o 'ona esa'
32 Basa boe ma, basa atahori mana ramahere Yesus ra, rala' esa, ma rasod'a noo susue'. Nda hambu manad'e'u' sa, ma ara hii fee saa-saa neu fea' ra. Esa-esa' ator sud'i 'a saa na ra, fo pake ra'ab'ue.f 33 Basa ma Lamatualain fee koasa neu ded'enu na ra, fo rafad'e atahori 'oi Lamatua' Yesus nasod'a bali' ena. Huu sira rita noo mata na ra ena. Basa ma Lamatualain fee papala-b'ab'anggi' lena' seli neu se. 34-35 Hambu atahori mia sira e, seo rae noo ume na ra, ma fee doi na neu Lamatua' ded'enu na ra. De ara pake tulu-fali neu atahori nae' parluu na. Naa de, ara nda to'a-taa saa sa boe.
36-37 Conto 'ona' Yusuf. Eni ia, Lewi tititi-nonosin mia pulu Siprus. Lamatua' ded'enu na ra bab'ae na ra 'e'ekun ‘Barnab'as’, sosoan, ‘atahori mana huhuar atahori fea'’. Ana seo raen ombat esa, de nendi doin fee neu Lamatua' ded'enu na ra.