Petrus na'ahahai' atahori keko' esa
3
Fai' esa, lii' telu bob'on, Petrus noo Yohanis risi Lamatualain Ume Hule-o'e Huu na. Ara rae hule-o'e roo atahori laen ra. 2 Ara rae maso' tungga lelesu ine' esa naran ‘Lelesu Meulau'’. Sia naa ara rita tou keko' esa. Ana keko eni' a maman bonggi e. Tungga fai atahori lu'a rendi e nisi' mamana' naa fo ana bisa hule-hule' sud'i 'a saa sia atahori mana maso' risi' Ume Hule-o'e Huu' a. 3 Ana nita Petrus noo Yohanis rae rala reu, ma ana loo liman de no'e 'oi, “Ama ngga ra, e! Sue au dei. Fee au saa mbei dei.” 4 Ru'a se mete malolole e, ma Petrus 'oi, “'A'a! Mete ia dei!”
5 Atahori naa boti' matan fo mete ru'a se, ma dud'u'a nae, “Wi! Ru'a se, rae fee au saa o.”
6 Te Petrus 'oi, “'A'a! Au nda ma doi' sen esa sa boe. Te au 'ae fee nggo, saa fo au hambu 'oras ia. 'A'a rena malolole, e! Noo koasa mia Yesus Kristus, atahori Nasaret naa, au denu nggo mumburii' fo lao' leo!”
7 Boe ma Petrus to'u atahori keko' naa lima 'onan, de nafefela e. Ma ei na ra hai reu' ena. 8 'Aib'oi' ma, ana teteek nambarii', ma lao' neu-nema, fo sob'a ei na ra. Basa de ana tungga maso' nisi' Ume Hule-o'e' rala neu noo ru'a se. Ana lao' teteek noo koa-kio Lamatualain. 9 Ma basa atahori ra o rita e lao' noo koa-kio Lamatualain boe.
10 Ara rahine e ma ara titindindii. Ara 'oi, “Eni atahori keko' mana hule-hule' ma soa 'endo' sia Lelesu Meulau' a, to? Saa de bisa ta'o naa, e?”
Petrus so'u 'o'olat mia Ume Hule-o'e Huu' a rala
11 Basa ma, atahori naa tungga deka-d'eka Petrus noo Yohanis. Telu' se losa ume loos esa naran ‘Ume Loos Mane Soleman’. Boe ma, basa atahori rema heo rala se noo titindindii. 12 Lele' Petrus nita atahori naa ra, boe ma ana 'ola' 'oi, “We! Atahori Isra'el ra, e! Ta'o bee de toronoo' ra titindindii mete dala' ia? Ta'o bee de hei mete mimemeu mikindoo 'a hai? Hei mae atahori ia lao' huu hai pake mod'o, do, huu hai manggate tungga Lamatualain? Do, ta'o bee? 13 Au 'ae 'ufad'e ta'o ia: Hita bei-ba'i na ra, Abraham, Isak, noo Yakob, be'utee neu Lamatualain. Ana mana so'u boti' Yesus, Eni atahorin, fo Ana pili nala' a. Yesus naa, atahori fo fai ma'ahulun hei nggari hendi fee neu hofernor Pilatus. Hofernor nae mbo'i hendi E, te hei lab'an hihiin, naa fo ana nda mbo'i E sa.a 14 Te Yesus, Atahori nda ma sala' sa. Ralan malole'. Hofernor nae mbo'i E, te basa nggi lab'an e. De'ulaka' manaseli' fai, hei dunggu-mbau denu e mbo'i atahori de'ulaka' esa, tukan tati nisa atahori, fo fee bali' neu nggi.b 15 Hei mana tao misa Yesus. Te huu Eni mana tao hita tasod'a. Mema' Ana mate ena, te Lamatualain tao nasod'a bali' E mia mamate na. Hai mita E noo mata ao ma ra ena.
16 Hei mihine atahori keko' ia. Ia naa, ana ma'ad'ere ena, te hai nda mana tao mihai' e sa. Hai nda mi'ena koasa saa sa boe. Koasa naa mema' mia Yesus. Atahori ia ma'ad'ere bali' ena, huu namahere Lamatua' Yesus. Yesus mana na'ahahai' e sia hei mata ma ra.
17 Toronoo ngga ra, e! Ia naa au bub'ulu' 'ae hei, moo malangga ma ra, tao de'ulaka' neu Yesus te hei nda bub'ulu' eni nenendin sa. 18 Te Lamatualain nafad'e mema' so'al Kristus mia doon neu pake mana 'ola-'ola na ra nae, Atahori fo Ana pili nala' a, musi lemba doid'oso'. Ia naa, dala' naa dad'i ena. 19 Huu naa, hei musi lao hela sala ma ra, fo bali' misi' Lamatualain fo Ana fee ambon ma nda nasaned'a hei sala ma ra sa ena. 20 Dei fo Lamatualain tao manggatee hei rala ma ra. Ana o nae haitua bali' fee nggi, Kristus fo Ana pili nala' a. Kristus naa, naeni Yesus fo ma'ahulun Ana haitua fee nggi' a. 21 Ma'ahulun, Ana 'ola' pake mana 'ola-'ola na ra 'oi, ‘Dei fo Lamatualain natetu basa' e dad'i feu'!’ Naa de, Yesus musi nahati sia Mamana Meumaren losa fain nema, fo Ana nafeu basa dala' ra.
22 Ma'ahulun, ba'i Musa o 'ola' fee atahori Isra'el ra nae,
‘Dei fo hei Lamatualain ma mana na'ena hak parenda nggi, denu Atahori esa mia hei fo dad'i mana 'ola-'olan, 'ona' Ana pake au dad'i mana 'ola-'ola na. Dad'i hei musi pasa ndiki ma ra fo rena saa fo Ana nae nafad'e nggi' a.c 23 Te seka nda hii rena Atahori naa 'o'olan sa, dei fo ana saranggaa mia Lamatualain atahori na ra, ma nda ma hak noo se sa fai.’d
24 Nda 'aka' a ba'i Musa 'ola' ta'o naa sa. Te Lamatualain o pake atahori laen ra fo dad'i mana 'ola-'ola na ra. Ara rafad'e ta'o naa boe. 'Ona' a Lamatualain pake ba'i Samuel fo nafad'e saa fo hita tita noo mata ta ra 'ale' ia. 25 Lamatualain o helu hita ba'i Abraham na nae,
‘Mia ho tititi-nonosi ma ra, au fee papala-b'ab'anggi' neu atahori mia basa nusa' sia raefafo' ia.’e
De ia naa, hehelu-fufuli' fo ma'ahulun Lamatualain fee neu mana 'ola-'ola na ra, dad'i sia hei, au toronoo atahori Isra'el ngga ra. 26 Lamatualain haitua Anan, fo Ana pili nala' a, nema natud'u dala' fo hei lao hela sala ma ra. Noo ta'o naa, Ana natud'u rala malolen neu nggi. Lamatualain haitua Ana' naa na'ahulu' fee nggi, dei fo fee nusa fea' ra. Naa dad'i papala-b'ab'anggi' fee basa nggita.”