Lamatualain Dula-d'alen dai atahori ra
2
1-2 Ndaa noo atahori Yahud'i ra fai malolen, fo ara ro'e 'oi ‘Fai Pentakosta’,a basa atahori mana tungga Lamatua' Yesus ra ra'ab'ue sia ume esa.b 'Aib'oi' ma, ara rena lii' mia lalai a 'ona' sanggu-anin. Lii' naa monaen seli, losa atahori mana sia naa ra nda hambu rena esa noo esa sa. 3 Ma ara rita 'ona' ai mbila' mana banggi-b'anggi' neu se sia esa-esa' ata. 4 Boe ma Lamatualain Dula-d'alen dai basa se. De ara 'ola-'ola' rendi' atahori fea' ded'ea na ra, tungga Dula-d'ale' a fee se 'ola'. 5 Lele' naa, atahori Yahud'i hetar mia nusa' mata'-mata' sia raefafo' a, rema ra'ab'ue sia Yerusalem huu rala na ra, hii-nau tungga Lamatualain. 6 Ara rena lii' naa boe ma rakarumbu risi' mamana' naa. Esa-esa' rena ded'ea na ra mia Lamatua' Yesus atahori na ra bafa na ra, de ara titindindii. 7 Basa se mboo-mboo' a, ma rae, “Atahori mana 'ola' ia ra, basa se atahori Galilea ra, to? 8 Te tao' bee de hita rena ara 'ola' rendi' hita esa-esa' ded'ea na ra? 9 Hita ia ra, mia nusa' hetar. Mia nusa Partia, Med'ia, Elam, Mesopotamia, Yud'ea, Kapad'okia, Pontus, Asia, 10-11 Frigia, Pamfilia, Masir, ma Lib'ia deka noo kota Kirene; ma ruma mia kota Roma; ruma fai mia pulu Kreta, ma rae Arab. Ruma atahori Yahud'i, ma ruma atahori mia nusa-nusa fea' mana maso' agama Yahud'i ena. Te ata rena atahori ia ra 'ola' rendi' hita ded'ea ta ra. Ara 'ola' manaseli' fo Lamatualain tao hela' ra. We! Hita titindindii ma!”
12 Basa se mboo-mboo' a, de esa natane mbali esa 'oi, “Ta'o bee de dad'i 'ona' naa, e? Ia, sosoan saa, e?”
13 Te hambu atahori fea' ra ra'ae'ei se rae, “Woi! 'Afi' fad'uli se! Te naa ra, mana mafu' seli ena!”
Petrus so'u 'o'olat sia atahori hetar matan'
14 Sia naa hambu Petrus noo Lamatua' Yesus ded'enu kasanahulu esa na ra. Petrus mata neu de 'ola' neu atahori nae' mana ma'ab'ue' sia naa. 'Ola' nahere' nae, “Ina-ama', toronoo ngga ra, e! Hei atahori Yahud'i, ma hei atahori mana 'ima leo sia kota Yerusalem! Pasa ndiki ma ra malolole fo rena au 'o'ola ngga ia, te hambu saa manaseli' au 'ae 'ufad'e nggi. 15 'Afi' mae atahori ia ra mafu. Nda ta'o naa sa! Misined'a, nda hambu atahori rinu mafu fefetu ana' sa. 'Oras ia fe'e lii' sio! 16 Hei rena atahori ia ra 'ola-'ola' rendi hei ded'ea ma ra. Matetun, ta'o ia: ma'ahulun, Lamatualain nafad'e basa mema' dala' ia, pake mana 'ola-'olan Yoel 'oi:
17 ‘Lamatualain nae, “Mia fai mate'en,
Au fee Dula-d'ale ngga neu basa atahori.
Hei ana tou' ma ana feto ma ra,
Au pake dad'i mana 'ola-'ola ngga ra.
Hei ana soru ma ra,
hambu rita saa fo Au 'ae 'utud'u neu se.
Hei atahori lasi ma ra,
ralamein saa fo Au 'ae fee se rita.
18 Nandaa noo fai mate'en,
Au fee Dula-d'ale ngga neu Au atahori ngga ra.
Au fee neu tou',
ma Au fee neu ina' ra boe.
Dei fo ara 'ola' saa fo Au 'ufad'e neu se.
19-21 Mate'en te, Lamatualain fain losa. Te 'ale' ia fai' naa nda fe'e nema sa,
de Au tao 'u'uhulu' manad'ad'i manaseli' ra sia lalai ata.
Relo a dad'i ma'ahatu';
ma fulan dad'i mbilas 'ona' raa' e.
Au o tao saa-saa manaseli' sia raefafo' mbenan boe.
'Ona' a raa', ai, noo masu bub'ue-b'ub'ue' hene ata reu.
Losa Lamatualain fai manaselin naa ra, naa seka ra mana rameli ro'e tulun Lamatualain,
naa sira mana hambu masoi-masod'a'.’”c
Yoel nafad'e basa naa ena, eni' a ma'ahulu na.
22 Dad'i toronoo atahori Isra'el ra, e! Pasa ndiki ma ra rena au 'o'ola ngga. Lamatualain dud'u basa Yesus, atahori Nasaret naa. Hei mihine mae naa teb'e, huu mita basa Lamatualain pake Yesus tao manadad'i manaseli' ra ma dala-d'ala manaseli' ra. Hei o mihine basa ia ra, huu Yesus tao manadad'i manaseli' naa ra sia hei talad'a ma. 23 Te hei misa E. Hei kokoe atahori de'ulaka' ra fo mbaku risa E sia hau nggangge' ata. Te huu, Lamatualain bub'ulu' basa naa mia dalahulun neu, fo mema' naa ndaa noo dud'u'a na.d 24 Mema' hei tao doid'oso Yesus losa Ana mate teb'e-teb'e'. Te Lamatualain nda nau E mate nakandoo sa. De Ana mbo'i e mia mamates a koasan ma tao nasod'a bali' E. Huu mamates a koasan nda nasenggi' E sa.e
25 Dalahulun mane Daud sura' so'al Yesus ta'o ia:
‘Au bub'ulu' 'ae Lamatualain noo au.
Naa de, nda hambu saa sa boe bisa tao natud'a' au,
huu Lamatualain sia au bob'oa ngga nakandoo 'a.
26 De au rala ngga namaho'o.
Au koa-kio E 'ukundoo 'a,
ma au 'uhani e noo matu-matu.
27 Ana nda hela au ao samana ngga sia atahori mates ra mamanan sa.
Lamatualain nda hela Atahori Meumaren ao-sisin ma'afoo sia rates rala sa.
28 Lamatualain natud'u dala masod'a ndoos neu au.
Naa de, rala ngga namaho'o seli,
huu Lamatualain noo au.’f
Mane Daud sura' basa naa ra ena, eni' a ma'ahulu na.
29 Dad'i toronoo ngga ra, e! Fee 'isin au dei, fo au 'ola' relo-relo 'oo nggi so'al hita ba'i Daud na. Ana 'ola' ta'o naa, te ana nda natud'u aon sa. Hita bub'ulu' naa, huu ana mate ma ra'oi hendi ena. Raten fe'e sia hita talad'an losa fai' ia. 30 Mane Daud ia, dad'i Lamatualain mana 'ola-'ola na. Ana bub'ulu' Lamatualain helu basa pake susumba' 'oi, dei fo Daud tititi-nonosin esa to'u parenda'. Lamatualain dud'u Atahori naa eni' a dalahulu na.g 31 Lele' naa, Daud mete doo-d'oo' neu ena. Ma ana nafad'e na'ahulu' so'al Atahori fo Lamatualain dud'u basa' a. Dei fo Atahori naa mate, ma nasod'a bali'. Daud o nafad'e nae Atahori naa nda leo nakandoo sia atahori mates ra mamanan sa, ma ao-sisin o nda ma'afoo sa boe.
32 Atahori fo Daud 'ola-'ola' a, naeni Yesus! Lamatualain tao nasod'a bali' E mia mamate na. Ma basa hai o mita Ana nasod'a bali' ena. 33 'Oras ia, Lamatualain so'u Yesus fo to'u panggat monae'. Ana 'endo' sia Lamatualain bob'oa 'onan, sia mamana' fo Lamatualain sad'ia hela' a. Aman o fee Ne Dula-d'ale Meumare', tungga hehelun mia dalahulun neu. Ana o helu nae fee Dula-d'ale Meumaren, neu nggita boe. Dad'i saa fo hei rena noo mita 'oras ia, naa Lamatualain fee Dula-d'ale Meumare na. 34 Daud nda hene sorga neu sa, te nafad'e 'oi,
‘Lamatualain 'ola' noo au malangga ngga 'oi,
“'Endo' sia Au bob'oa 'ona ngga sia mamana' fo Au sad'ia hela' a,
35 losa au tao musu ma ra ta'alok neu nggo.’”h
36 Naa de basa atahori Isra'el ra musi rahine teb'e-teb'e' so'al Yesus fo hei mbaku misa mia hau nggangge' a. Eni ia, Kristus fo Lamatualain dud'u eni' a ma'ahulu na. Eni o mana na'ena hak parenda nggita!”
37 Rena ta'o naa ma, atahori ra fale rala na ra reu' ena. De ara ratane Petrus noo ded'enu' laen ra 'oi, “'A'a ngga ra, e! Hai musi tao saa fai?”
38 Petrus nataa 'oi, “Hei musi lao hela sala-singgo ma ra fo tungga Lamatualain. Basa naa, musi mo'e sarani, dad'i neu bukti 'oi hei tungga Yesus Kristus Dala Masod'an ena. Naa o dad'i bukti 'oi Lamatualain 'ose hendi basa sala ma ra boe. Ma hei o hambu Lamatualain Dula-d'ale Meumaren boe.
39 Lamatualain helu ta'o naa neu basa atahori mana maso' dad'i Eni atahori na. Ana helu ta'o naa fee hei atahori Isra'el moo tititi-nonosi ma ra. Ana o helu fee atahori fea' ra boe.”
40 Petrus 'ola' loa-naru' neu se fo nafad'e se 'oi, “Ia naa, atahori nae' ra'ad'od'oo' mia dala' masod'a ndoos. De hei musi besa-b'esa, fo 'afi' tungga atahori de'ulaka' ra dala na. Te tungga 'a Lamatualain dala ndoo-tetu na. Naa fo, hei hambu masoi-masod'a' ma misod'a mikindoo moo E.”
41 Boe ma atahori nae' simbo Petrus 'o'ola na. Ara tungga Yesus Dala Masod'an, ma ro'e sarani. Fai' naa, atahori rifon telu maso' dad'i Yesus atahori na ra. 42 Ara hii ra'ab'ue roo atahori fea' mana tungga Yesus ra. Ara malole esa noo esa. Tungga fai ara manggate rena nenori' mia Yesus ded'enu na ra. Ara hii hule-o'e ra'ab'ue ma ara o hii raa ra'ab'ue boe.
Atahori mamahere' ra dala masod'a na ra
43 Lele' naa, Lamatua' Yesus ded'enu na ra tao manad'ad'i manaseli' hetar, losa atahori ra titindindii ma ramatau. 44 Atahori mana tungga Lamatua' Yesus Dala Masod'an, ra'ab'ue ma rasod'a roo rala' esa, losa saa fo sira 'enan o, pake ra'ab'ue boe.i 45 Ruma o raseo sud'i 'a saa ma hata-heto na ra, ma bab'anggi doin neu atahori mamahere' ra, tungga esa-esa' parluu na. 46 Tungga fai ara hii ra'ab'ue sia Lamatualain Ume Hule-o'e Huu na. Ara raa tungga-tungga ume noo rala nemeho'ot. Basa se rasod'a hii tulu-fali esa noo esa, ma ara o nda de'u sa boe. 47 Tungga fai, ara koa-kio Lamatualain nda nama'etu sa. Basa atahori dea' ra hii roo se. Tungga fai, Lamatualain fee masoi-masod'a' neu atahori, de ara ra'ab'ue roo Lamatua' Yesus atahori na ra. Naa de, ara boe ramaheta rakandoo 'a.