16
Au 'ufad'e dala' ia ra neu nggi, naa fo ama 'afi' dinggo' hela Au. 2 Dei fo atahori Yahud'i ra 'oi hendi nggi mia sira ume hule-o'e na. Nda 'aka' naa sa, te dei fo hambu fula-fai fo, mete ma atahori tao risa nggi, na, ara du'a rae sira tao malole' soa' neu Lamatualain. 3 Ara tao ta'o naa mbali nggi, huu ara nda rahine teb'e Au sa. Ara o nda rahine Ama ngga sa boe. 4 Te Au 'ufad'e dala' ia ra neu nggi, de mete ma dala' ia ra dad'i, na, hei bisa misined'a mae, Au 'ufad'e mema' neu nggi mia lele ulu' a. Ma'ahulun a, Au nda fe'e 'ufad'e nggi sa, huu Au fe'e 'u'ub'ue 'oo nggi doo-doo.”Lamatualain Dula-d'alen ue-tatao na
5 Yesus nanori selu' nae, “Lele' ia, Au bali' 'uu sia Mana Denu Au 'uma sia raefafo' ia. Te nda hambu mia hei mitane mae, ‘Papa mae muu sia bee?’ 6 Huu Au 'ufad'e dala' ia ra neu nggi ena, naeni de rala ma ra susa seli ena. 7 Te saa fo Au 'ufad'e neu nggi naa, teb'e. Mete ma Au 'uu, naa malolen seli soa' neu nggi. Huu mete ma Au nda 'uu sa, na, Mana Nuni a nda nema natud'u dala' fee nggi sa. Mete ma Au 'uu, na, Au haitua E fee neu nggi.
8 Lele' Ana nema ena, Ana natud'u neu atahori sia raefafo' ia 'oi, rala na ra ma tatao na ra sala. Ana kokoe se fo tungga dala masod'a ndoo-tetu' a. Ma Ana fee nesenened'a' neu se 'oi, dei fo Lamatualain nau na'etu' ded'ea na ra 'oi, sira ndaa do sala. 9 Mana Nuni a natud'u sala na ra, huu ara nda ramahere Au sa. 10 Ana natud'u dala masod'a ndoo-tetu' a boe. Huu Au bali' 'isi' Ama ngga, dei fo hei nda mita Au sa ena. Naeni de Mana Nuni a nema fo nggati Au. 11 Ana o natud'u nae, Lamatualain nau na'etu' atahori ded'ean noo ndoo-tetu', huu Lamatualain na'etu' ded'eat fee nitu ra malanggan ena, mana parenda sia raefafo' ia.
12 Fe'e hambu dala' hetar fo Au 'ae 'ufad'e neu nggi, te hei nda fe'e bisa mihine lele' ia sa. 13 Te lele' Dula-d'ale' mana natud'u dala-d'ala ndoo-tetu' a nema ena, na, Ana nalalao nggi fo ama bisa mihine basa dala ndoo-tetu' a. Ana nda 'ola' mia Eni mesa' ne sa, te Ana nau nafad'e saa fo Eni rena mia Ama ngga. Ana nae nafad'e neu nggi, saa mana nae dadi sia fai mana nema' ra. 14 Ana nau so'u nananaru Au, huu Ana nau soi basa dala ndoo-tetu' so'al Au, ma natud'u neu nggi boe. 15 Basa mana dad'i' Ama ngga 'enan, dad'i Au 'ena ngga boe. Naeni de Au 'ola' faa' ra 'ae, dei fo Lamatualain Dula-d'alen soi basa dala ndoo-tetu' so'al Au, ma natud'u neu nggi boe.”
Hei rala ma ra musi susa ra'ahulu', dei fo fe'e mimiho'o ena
16 Yesus nafad'e selu' nae, “Nda doo' sa te, hei nda mita Au sa ena. Ma nda doo' sa fai te, hei mita Au fai.”
17 Basa ma, Ana mana tungga na ra ruma 'ola-'ola' rae, “Papa masud ma saa, de mae, ‘Nda doo' sa te, hei nda mita Au sa ena. Ma nda doo' sa fai te, hei mita Au fai.’ Ma ta'o bee de Ana 'ola' nae, ‘Huu Au 'ae 'uu sia Ama ngga’?” 18 Boe ma ratatane rae, “Eni masud na saa, de 'oi, ‘Nda doo' sa fai’? Hita nda tahine sa.”
19 Yesus nahine ara rae ratane mbali E dala' esa. Boe ma Ana 'ola' nae, “Faa' ra Au 'ola' 'ae, ‘Nda doo' sa te, hei nda mita Au sa ena. Ma nda doo' sa fai te, hei mita Au fai.’ Hei mitatane 'ona' naa, to?
20 Malole boe, mete ma hei mae bub'ulu' ta'o naa. Au o 'ae 'ufad'e nggi ta'o ia: dei fo hei nggae ma rala ma ra susa, te atahori laen sia raefafo' ia rala na ra ramaho'o. Mae rala ma ra susa 'ona' naa, te dei fo rala ma ra ramaho'o bali' boe. 21 Naa 'ona' ina' esa named'a nambeta nae bonggi. Ralan susa nala seli, huu sususan nema ena. Te mete ma ana bonggi nala anad'iki' naa ena, sususan mopo hendi e neu' ena. Ralan namaho'o boe, huu hambu atahori feu' esa neneb'onggi' sia raefafo' ia ena. 22 Hei 'ona' naa boe. Lele' ia, hei nggae ma rala ma ra susa. Te doo-d'oo ma, Au 'uma se'u nggi fai, dei fo rala ma ra ramaho'o bali' boe. Mete ma dala' naa dad'i ena, na, nda hambu atahori esa sa boe bisa kai-b'aa nala rala nemeho'o ma ra sa.
23 Lele' dala' naa ra dad'i ena, na, hei nda mitatane saa-saa mbali Au sa ena. Teb'e! Au 'ufad'e selu' nggi fai 'ae, mete ma ama mo'e sud'i 'a saa mia Ama ngga mendi' Au nara ngga, na, dei fo Ana tao ta'o naa fee nggi boe.a 24 Losa lele' ia, hei nda fe'e mo'e saa-saa mendi' Au nara ngga sa. De mo'e leo, fo ama simbo. Noo ta'o naa, hei rala ma ra bisa ramaho'o teb'e.”
Lamatua' Yesus nasenggi' basa koasa mana sia raefafo' ia
25 Yesus tute 'o'olan nae, “Losa lele' ia, Au biasa 'unori nggi 'endi' nekendandaa'. Te dei fo hambu fai', Au nda 'unori 'endi' nekendandaa' sa ena. Huu Au 'ae 'ola' relo-relo so'al Ama ngga. 26 Mete ma fain losa ena, na, hei mesa' nggi hule-o'e fo mo'e mbali Ama ngga mendi' Au nara ngga. Au nda sud'i hule-o'e fee nggi sa ena. 27 Ama ngga sue nggi, huu hei sue Au. Boe ma mimihere mae, Lamatualain mana denu Au. 28 Ma'ahulun, Au lao hela Ama ngga, fo leo 'u'utataa' sia raefafo' ia. Te lele' ia, Au 'ae lao hela raefafo' ia, fo 'uu leo bali' 'oo E.”
29 Rena ta'o naa, boe ma Yesus ana mana tungga na ra rafad'e rae, “Naa! Lele' ia, Papa 'ola' relo-relo, ma nda munori mendi' nekendandaa' sa ena! 30 Hai mimihere ena mae, Papa bub'ulu' basa dala' ra. Atahori nda parluu ratane saa-saa mbali Papa sa ena, huu Papa bub'ulu' mu'uhulu' saa fo ara rae ratane, ma eni netaan ta'o bee. Naa natud'u hai 'oi, Papa nema mia Lamatualain.”
31 Boe ma Yesus natane se nae, “Teb'e, do? Lele' ia hei mimihere Au, do? 32 Ta'o ia. Mbei anak fai, naeni 'oras ia, basa hei mela sea-saranggaa. Atahori esa-esa' lao hela Au, fo neu keke sia eni mamana heheli na. Mae 'ona' naa o, Au nda mesa' nggo sa, huu Ama ngga na'ab'ue noo Au. 33 Au 'ufad'e dala' ia ra neu nggi ena, fo rala ma ra bisa nee-nee lino-lino, huu ama nenepa'a' moo Au. Huu dei fo atahori sia raefafo' ia tao ra'asususa' ma doid'oso nggi. Te tao manggatee rala ma ra, huu Au 'usenggi' basa koasa mana sia raefafo' ia ena!”