Lamatua' Yesus 'ona' hau anggor huu'
15
Yesus 'ola' nae, “Rena, e! Hei nenepa'a' moo Au. Au 'ona' hau anggor huu' esa. Te Au ia, anggor huu matetu'!a Ma Ama ngga 'ona' mana tao osi. 2 Dad'i atahori mana 'aka' 'ola' nae eni nenepa'a' noo Au, te nda tao saa-saa sa boe, na, Ama ngga nggari hendi e, 'ona' mana tao osi a tati hendi basa dana nda mab'oa' ra sa. Te basa atahori mana nenepa'a' teb'e noo Au, na, Ama' tao nameu manggenggeo' mia ralan, 'ona' mana tao osi a nggute na'a'e'eku dana' esa fo bau nab'oa hetar. 3 Au Ded'ea-'o'ola ngga naa, bisa tao nameu rala ma ra ena, 'ona' mana tao osi a tao nameu hau huu na ra dana na ra. 4 Hei musi nenepa'a' mikindoo moo Au, 'ona' Au nenepa'a' 'oo nggi. Huu dana' mana nene'ungga hendi' mia huun nda bisa nab'oa saa-saa sa boe. Hei 'ona' naa boe. Hei nda bisa tao mala saa-saa malole' sa, mete ma hei nda nenepa'a' mikindoo moo Au sa.
5 Au ia, 'ona' anggor huu' esa. Hei ia, 'ona' hau anggor a dana na ra. Dad'i atahori mana nenepa'a' nakandoo noo Au, ma Au nenepa'a' 'oo e, na, eni 'ona' dana' esa mana nab'oa hetar nakandoo 'a. Huu, mete ma hei nda nenepa'a' mikindoo moo Au sa, na, hei nda bisa tao saa-saa malole' sa boe. 6 Atahori nda mana nenepa'a' nakandoo noo Au sa, eni 'ona' dana' esa nda na'ena ngguna saa sa boe. Atahori biasa 'ungga hendi dana' mata' naa, fo hela e meto. Boe ma atahori rad'uru rala dana' naa ra, fo nggari se risi ai, fo lalangge hendi se. 7 Te mete ma hei nenepa'a' mikindoo moo Au, ma Ded'ea-'o'ola ngga leo nakandoo sia rala ma ra, na, ama bisa mo'e sud'i 'a saa mbali Lamatualain, na, Ana fee nggi.
8 Mete ma ama tao dala malole' hetar, 'ona' dana' esa nab'oa hetar, naa so'u nananaru Lamatualain. Noo ta'o naa, hei o mitud'u mae, hei, Au ana mana tungga ngga ra boe.
9 'Ona' Ama' sue Au, Au o sue nggi 'ona' naa boe. Hei musi nenepa'a' mikindoo moo Au, naa fo Au bisa 'utud'u susue ngga neu nggi boe. 10 Mete ma hei tao tungga Au parenda ngga ra, na, hei nenepa'a' mikindoo moo Au, ma Au bisa 'utud'u susue ngga neu nggi. Naa 'ona' Au tao tungga Ama ngga parendan, ma Ana natud'u susuen nakandoo neu Au.
11 Au 'ufad'e dala' ia ra neu nggi eni' a fai ma'ahulun, naa fo rala ma ra bisa ma'ahee, 'ona' Au rala ngga ma'ahee boe. Huu Au nau fo rala ma ra bau ramaho'o! 12 Au parenda ngga ta'o ia: hei esa musi sue esa, 'ona' Au sue nggi ena.b 13 Mete ma atahori esa sad'ia mate fo nonoon bisa nasod'a, na, ana sue teb'e nonoo na. Nda hambu susue' manaseli' lena' naa sa. 14 Mete ma hei tao tungga mikindoo 'a Au parenda ngga, ama dad'i Au nonoo ngga ra. 15 Au nda nau 'o'e nggi, 'ae Au ‘ate ngga ra’ sa. Huu ate esa nda nahine teb'e eni malanggan hihii-nanaun sa. Te Au 'o'e nggi, 'ae Au ‘nonoo’ ngga, huu Au soi relo-relo basa-b'asa' e, fo Ama ngga natud'u neu Au' a ena. 16 Hei nda pili Au sa. Te Au mana pili ma so'u nggi fo milalao ue-tataos ia. Dad'i ama musi mii tao dala malole' hetar mana na'atataa' doo'. Naa 'ona' anggor huu' esa mana nab'oa malole nakandoo 'a. Mete ma hei tao ta'o naa, na, hei bisa mo'e sud'i 'a saa sia Ama ngga, na, Ana fee nggi. 17 Dad'i Au parenda neu nggi ia, ta'o ia: hei esa musi sue esa.”
Atahori sia raefafo' ia binci Lamatua' Yesus atahori na ra
18 Yesus tute 'o'olan nae, “Mete ma atahori sia raefafo' ia binci nggi, na, misined'a te ara binci ra'ahulu' Au ena. 19 Mete ma hei ia ra, 'ona' atahori laen sia raefafo' ia, tantu ara sue nggi. Te hei nda 'ona' se sa. Huu Au pili 'ala nggi fo ama saranggaa mia se. Naa de ara binci nggi.
20 'Afi' lilii' Au 'ufad'e neu nggi' a 'ae, ‘Ate esa manaselin nda lena' eni malanggan sa.’ Dad'i mete ma ara tao doid'oso Au, tantu ara o tao doid'oso nggi boe. Mete ma ara rena Au Ded'ea-'o'ola ngga, na, ara o rena nggi boe.c 21 Dei fo ara tao nggi doid'oso, huu hei nenepa'a' moo Au. Huu ara o nda rahine Mana Denu Au' a sa boe. 22 Mete ma Au nda 'uma 'ola' 'ita 'oo se sa, fo 'utud'u dala masod'a ndoo-tetu' neu se sa, na, ara du'a rakandoo rae, sira nda ra'ena sala' saa sa boe. Te Au 'uma ena, ma 'ola' 'ona' naa ena. Dad'i lele' ia, mete ma ara tao sala', na, ara nda ra'ena netehuu' fo 'ola' rae, ‘Wee! Hai nda bub'ulu' mae hai tao' naa, sala sa.’
23 Atahori mana binci Au, ana o binci Ama ngga boe. 24 Au tao manad'ad'i manaseli' mata'-mata' sia mata na ra ena, fo atahori laen nda fe'e tao rita sa. Mete ma Au nda fe'e tao 'ita dala' naa ra sa, na, ara nda nau simbo Au sa o, ara nda sala sa. Tao-tao te, ara rita manad'ad'i manaseli' fo Au tao' ra ena. Mae 'ona' naa o, ara fe'e binci Au 'oo Ama ngga sia sorga boe. 25 Te basa dala' ia ra dad'i fo tao natetu saa mana nenesura' mema' sia Lamatualain Hohoro-lalanen rala 'oi, ‘Ara binci Au. Tao-tao te sira binci Au, naa nda hambu netehuu' saa sa boe.’d