Lamatua' Yesus tao nahai' atahori poke' esa
9
Basa naa ma, Yesus se lao. Boe ma nita atahori poke' esa, poke' eni' a bonggi hendi ena. 2 Basa ma, Yesus ana mana tungga na ra ratane rae, “Papa Meser! Seka mana tao sala', de atahori ia dad'i poke 'ona' ia? Lao' mia mesa' ne do, huu ina-ama na ra?”3 Yesus nataa nae, “Atahori poke' ia nda tao sala' sa. Boe ma ina-ama na ra o nda tao sala' fo ana poke sa boe. Bonggi e 'ona' naa, fo 'ona bee naa basa atahori rita Lamatualain ue-tatao malolen noo ne'ehahai' e. 4 Lamatualain mana denu Au. Dad'i hita musi tao tahehere fo talalao Eni ue-tataon lele' manggarelo' a fe'e sia. Huu dei fo ma'ahatu' a nema ena, atahori nda bisa tao ues sa ena. 5 Lele' Au fe'e sia raefafo' ia, Au 'ona' manggarelo' a mana naronda soa' neu basa atahori.”a
6 Yesus 'ola' basa na'o naa, boe ma Ana puras miru neu rae a. Basa ma Ana 'endo' daka-d'aka, de seseb'o' rae a dad'i tane. Boe ma ana lelemu tane a neu atahori poke' a mata na. 7 Basa ma Ana helu nae, “Muu sia lifu Siloam, fo safe matam sia naa.” (Sia ded'ea Ibrani, Siloam sosoan nae, ‘haitua nema’.) Basa de, atahori poke' a naa neu, de narou mata na. Lele' ana heo' bali' nema, ma ana bisa nita ena!b
8 Basa naa ma, atahori mana sia ume bob'oa na ra, ma mana parnaa rita e soa 'a hule-hule', ratatane rae, “Wee! Ia atahori poke', fo fe'esa'an mana 'endo' hule-hule', to?”
9 Atahori ruma rae, “Teb'e! Naa eni ena!”
Atahori ruma fai rae, “Hoko'! Eni, matan mahombe' 'ona' atahori naa boe!”
Te atahori naa nafad'e nae, “Hoko'! Ia au ena! Fe'esa'an fo poke' a!”
10 Basa ma ratane rae, “Ta'o bee de bisa mita 'ona' ia, e?”
11 Boe ma ana nataa nae, “Ta'o ia! Atahori fo naran Yesus naa, tao tane, de Ana lelemu neu mata ngga. Boe ma Ana denu au nae, ‘Muu sia lifu Siloam, fo murou matam sia naa.’ De au tao tungga. Naeni de ia naa au bisa 'ita ena!”
12 Basa ma ratane rae, “De atahori naa sia bee?”
Ma ana nataa nae, “Te'ee, de!”
Atahori Farisi ra paresa' atahori fo ma'ahulun poke' a
13-14 Fai' naa, lele' Yesus seseb'o' tane a, ma tao atahori poke' a bisa nita, nandaa noo atahori Yahud'i ra fai hahae tao ue-osan. Boe ma ara rendi atahori fo ma'ahulun poke' a, neu nataa sia partei agama Farisi ra atahori na ra. 15 Basa ma, atahori Farisi ra ratane rae, “Mufad'e sob'a dei! Ta'o bee de ia naa bisa mita ena?”
Ana nataa nae, “Ta'o ia. Atahori naa tao tane neu mata ngga. Basa de au 'uu 'urou mata ngga. Ia naa au bisa 'ita ena.”
16 Hambu atahori Farisi ruma rae, “Atahori mana tao nahai' nggo naa, nda mia Lamatualain sa. Hai bub'ulu', huu Ana nalena-langga hohoro-lalane' so'al fai hahae tao ue-osa'.”
Hambu ruma fai rae, “Ta'o bee de atahori mana tao sala' bisa tao manad'ad'i manaseli' ta'o naa?” Basa ma rareresi losa ara saranggaa.
17 Dad'i ara ratane selu' atahori fo fe'esa'an poke' a rae, “Tungga nggo, na, Atahori mana tao nalaa matam naa, atahori mata' bee?”
Ana nataa nae, “Tungga au, na, Eni, Lamatualain mana 'ola-'olan esa.”
18 Te atahori Yahud'i ra malangga na ra nda ramahere rae, atahori naa parnaa poke, te ia naa bisa nita ena. Boe ma ara denu reu ro'e ina-aman fo rema rataa. 19 Lele' ara rema, ma malangga ra ratane rae, “Atahori ia, hei anam, do? Teb'e do hoko'! Mema' ana poke eni' a bonggi e, do? Basa ma, ta'o bee de ia naa ana bisa nita?”
20 Atahori naa ina-ama na ra rataa rae, “Ia eni ena, mema' hai anam. Boe ma mema' ana poke eni' a bonggi e. 21 Te hai nda bub'ulu', ana pake saa de ia naa ana bisa nita sa. Seka mana tao nalaa matan, hai o nda bub'ulu' sa boe. Eni, monae' ena. Netane sia e, huu ana bisa dui aon!” 22 Ara 'ola' ta'o naa, huu ara ramatau atahori Yahud'i ra malangga na ra. Huu ara bub'ulu' 'oi, malangga ra rala' esa rae, “Mete ma hambu atahori rataa rae, Yesus, naeni Kristus, na, hita musi mbuu hendi atahori mana nataa na'o naa mia hita atahori Yahud'i ra ume hule-o'e na.” 23 Naeni de atahori naa ina-ama na ra, rataa rae, “Eni monae' ena, de netane sia e.”
24 Basa de ara ro'e selu' atahori fo fe'esa'an poke' naa. Boe ma ara rae, “Ta'o ia! Musi mutaa noo matetu' sia Lamatualain matan fo munea na ra malole na. Huu hai mihine teb'e', Yesus naa, atahori de'ulaka'.”
25 Atahori fo parnaa poke' a nataa nae, “Ama' se 'afi' miminasa, e! Huu au nda 'uhine 'ae Eni, atahori de'ulaka' do hoko' sa. Te au 'uhine teb'e-teb'e', naeni, fe'esa'an au poke'; te ia naa, au bisa 'ita ena.”
26 Ara ratane fai rae, “Ana tao nggo ta'o bee? Ana buka matam ta'o bee?”
27 Boe ma ana nataa nae, “Hee! Faa' ra au dui ena, te hei nda nau rena sa. Saa de hei nau 'a au dui selu' fai? Se'u te ama' se nau mae dad'i ana mana tunggan boe, do?”
28 Basa ma ara rarai e, ma rae, “Hela neu fo 'aka' mesa' nggo dad'i ana mana tunggan! Huu hai ia, ba'i Musa ana mana tungga na ra. 29 Hai bub'ulu' Lamatualain 'ola-'ola' noo ba'i Musa. Te hai nda bub'ulu' Atahori naa, nema mia ndola' bee sa boe.”
30 Atahori fo ma'ahulun poke' a nataa nae, “Heran, e! Hei nda mihine Ana mia bee nema sa boe. Tao-tao te Eni mana tao nalaa mata ngga de ia naa au 'ita ena. 31 Basa nggita bub'ulu' tae, Lamatualain nda rena atahori de'ulaka' ra sa, to? Te Lamatualain rena atahori rala ndoos, mana nasod'a tao tungga Eni hihii-nanau na.c 32 Eni' a Lamatualain na'ad'ad'ad'i' lalai noo raefafo' losa lele' ia, nda hambu dud'uit esa sa boe, so'al atahori tao nahai' atahori poke' mana poke eni' a bonggi hendi e, fo ana bisa nita. 33 Dad'i mete ma Yesus nda nema mia Lamatualain sa, tantu Ana nda bisa tao nala saa sa boe, to?”
34 Boe ma ara rataa rae, “Weh! Ho ia, atahori de'ulaka' mia inam bonggi hendi nggo! Ta'o bee de bisa du'a mae ho bisa munori bali' hai fai?” Basa ma ara mbuu hendi e mia sira ume hule-o'e na.
Atahori mana nda nau simbo manggarelo matetu' a sa 'ona' atahori poke'
35 Lele' Yesus rena ara mbuu hendi atahori fe'esa'an poke' a mia ume hule-o'e' a, ma Ana neu sangga atahori naa, losa hambu e. Boe ma Ana nae, “Ta'o bee! Mumuhere Atahori Matetu' a, do?”
36 Ana natane bali' nae, “Eni seka, Papa? Tulun nefad'e dei, naa fo au bisa 'umuhere E boe.”
37 Boe ma Yesus nafad'e nae, “Mundaa moo E ena. Naeni Au ia, mana 'ola-'ola' noo nggo lele' ia.”
38 Basa ma atahori naa nae, “Papa, au 'umuhere!” Boe ma ana sende' lulu-langgan de be'utee mbali Yesus.
39 Basa ma Yesus 'ola' mbali e nae, “Au 'uma sia raefafo' ia fo 'utud'u atahori ra sala-kilu na ra, naa fo atahori poke' ra rita, ma atahori mata meu-malaa' ra dad'i poke'.”
40 Sia naa hambu atahori Farisi hira rena 'o'olan boe. Boe ma ara ratane rae, “Ta'o bee, ia? Teb'e-teb'e' hai nda poke' sa, to?”
41 Yesus nataa nae, “Ta'o ia. Mete ma mema' hei nda poke' sa, na, nda hambu mana fee sala' neu nggi sa. Te mae, hei atahori mata meu-malaa' ra. Naeni de hei fe'e lemba-d'oi sala ma ra.”