3 Lele' naa, hambu ina' esa fo ara humu rala e lele' ana hohongge. Boe ma meser agama roo atahori Farisi hira o lea rendi e nisi' Yesus. De Ara ra'asusuu' ina' naa nambarii' sia basa se mata na ra. 4 Boe ma rafad'e Yesus rae, “Papa Meser. Ina' ia, ara hambu rala e lele' ana hohongge. 5 Naa, tungga ba'i Musa Hohoro-lalanen na ra, hambu parenda' 'oi, ‘atahori mana hohongge musi nenehonda' fatu neu losa mate.’ Tungga Papa, na, ta'o bee?”^a 6 Ara rae te'e-sii sob'a E, fo ara bisa rundu sala' ma ra'atutud'a' E.

Yesus nda nataa neu' ena sa, te Ana 'endo' daka'-d'aka' de sura' sia rae a, nendi' lima 'u'u na. 7 Ara 'aka' ratane rakandondoo' E. Basa ma Ana nambarii', de nafad'e se nae, “Ta'o ia. Mete ma hambu mia hei nda tao mita sala' sa, na, eni mana mbia fatu na'ahulu' fo hukun ina' ia.” 8 Basa ma Ana 'endo' daka'-d'aka' fai, de sura' selu' neu rae a.

9 Lele' ara rena 'o'olan ma, ara mae. Huu sia rala na ra, ara bub'ulu' rae, sira o tao rita sala' boe. Basa ma ara lao esa-esa', mia lasi' losa soru' ra. Doo-d'oo ma, hela' a Yesus noo ina' a mesa' ne sia naa. 10 Boe ma Yesus nambarii' fai, ma natane nae, “Hee? Ara sia bee ena? Nda hambu atahori sia ia nau fee sala' fo hukun nggo, do?”

11 Boe ma nataa nae, “Nese, Papa.”

Yesus nafad'e e nae, “Au o nda nau hukun nggo sa boe. Bali' leo. Te musuned'a. 'Afi' tao sala' fai!”]^b

12 Basa ma Yesus 'ola' selu' fai noo atahori hetar naa ra nae, “Au ia, 'ona' manggarelo' soa' neu atahori sia raefafo' ia. Atahori mana tungga Au nda nasod'a sia ma'ahatu' a sa, te ana leo sia manggarelo' mana nendi masod'a ndoo-tetu' a.”^c

13 Hambu atahori Farisi hira rasapaa rae, “Weh! Mae dad'i sakasii soa' neu aom, do? Nda bisa sa! Huu tungga hita hohoro-lalanen, musi atahori laen dad'i sakasii soa' neu atahori esa, nda 'aka' atahori naa mesa' ne sa. Dad'i hai nda simbo, ma nda nau mimihere sa.”^d

14 Yesus nataa nae, “Ta'o ia. Mae Au dad'i sakasii soa' neu ao ngga, te 'o'ola ngga naa, teb'e. Huu Au mesa' nggo bub'ulu' teb'e Au lao' mia bee 'uma, boe ma 'ae bee 'uu. Hei nda bub'ulu' Au mia bee 'uma sa, boe ma nda bub'ulu' dei fo Au bee 'uu sa boe. 15 Hei nile atahori mendi' atahori titimba-tatai na. Te Au nda pake atahori titimba-tatain fo nile atahori esa sa boe. 16 Mete ma Au nile atahori, Au timba-tai ngga naa, ndaa. Huu Au nda nile mesa' nggo sa, te Au tao basa-b'asa naa ra 'u'ub'ue 'oo Ama ngga mana denu Au' a. 17 'Afi' lilii'. Huu nenesura' sia hei hohoro-lalane agamam 'oi, ‘Mete ma hambu atahori sakasii rua 'ola' 'ona esa' dala' esa, na, dei fo fe'e nenesimbo' tungga hita hohoro-lalane na ena.’ 18 Dad'i nda 'aka' Au mesa' nggo dad'i sakasii so'al ao ngga sa. Huu Ama ngga mana denu Au' a o, dad'i sakasii ma 'ola' so'al Au boe.”

19 Ara ratane rae, “Amam naa, sia bee?”

Boe ma Yesus nataa nae, “Hei nda mihine teb'e Au sa. Hei o nda mihine Au Ama ngga sa boe. Huu mete ma hei mihine teb'e Au, tantu mihine E boe.”

20 Basa ia ra, Yesus nafad'e lele' Ana nanori sia Ume Hule-o'e Huu' a, deka-d'eka sia mamana' fo rad'uru rendi' neu doi kolete. Nda hambu esa humu E sa boe, huu fain nda fe'e losa sa.

21 Yesus tute 'o'olan mbali se nae, “Dei fo Au lao hela nggi, 'uu sia mamana' laen. Dei fo ama sangga Au, te nda hambu sa, huu hei nda mi'ena hak mii sia mamana' naa sa. De mete ma hei mate, naa ama fe'e lemba-misaa sala-kilu ma ra.”

22 Basa ma atahori Yahud'i ra malangga na ra esa natane esa nae, “Ana 'ola' saa ia? Ana nae tao nisa aon, do? Huu Ana 'oi, ‘Hei nda bisa mii sia mamana' naa sa.’”

23 Boe ma Yesus nafad'e mbali se nae, “Hei mia raefafo' sia rae'. Te Au mia lalai sia ata'. Hei atahori mia raefafo' ia. Te Au atahori nda mia raefafo' ia sa. 24 Naeni de Au 'ufad'e faa' ra 'ae, mete ma hei mate, ama fe'e lemba-misaa sala-kilu ma ra. Huu mete ma hei nda mimihere sa mae, Au ia, naeni Kristus, fo Lamatualain haitua nema' a ena, dei fo hei mate, na, tantu ama fe'e lemba-misaa sala-kilu ma ra.”

25 Basa ma ratane rae, “Weh! Ho ia, seka?”

Yesus nataa nae, “Au 'ufad'e mema' mia fefeun ena.^e 26 Hambu dala' hetar fo Au bisa 'ufad'e so'al hei. Hei sala ma ra nae' boe. Te Au nda nau 'utud'u dala' naa ra sa. Naa, Mana denu Au 'uma sia ia naa, mete ma Ana 'ola', Ana 'ola' 'aka' ndoo-tetu' a. Ma Au 'ufad'e neu 'aka' atahori sia raefafo' ia, dala-d'ala' fo Au rena mia Eni ena.” 27 (Eni masud na, Aman sia sorga. Te ara nda rahine masud na sa boe).

28 Boe ma Yesus 'ola' fai nae, “Dei fo mete ma hei londa nggangge Au, Atahori Matetu' ia, sia hau nggangge' ata, dei fo hei mihine mae, Au ia, naeni Kristus. Au nda tao saa-saa mia ao ngga sa, te Au 'unori 'aka' dala-d'ala' fo Ama ngga sia sorga nanori neu Au ena. 29 Mana denu Au' a, na'ab'ue noo Au nakandoo 'a. Ana nda parnaa hela nita Au mesa' nggo sa, huu Au 'aka' tao tungga Eni hihii-nanau na.”

30 Lele' Yesus nafad'e dala' ia ra, ma atahori hetar ramahere E boe.

31 Basa ma, Yesus nafad'e neu atahori Yahud'i ra mana ramahere neu Eni a nae, “Mete ma hei misod'a nenepa'a' moo Au Ded'ea-'o'ola ngga ra, ma hei minori mikindoo mia Au, na, hei dad'i Au ana mana tungga ngga teb'e-teb'e'. 32 Basa fo hei bisa bub'ulu' dala-d'ala ndoo-tetu' ra. Ma dala-d'ala ndoo-tetu' naa, mana mbo'i nggi, de ama nda 'afi' dad'i ate sa ena.”

33 Basa ma ara rasapaa rae, “Hee! Hai ia, nda atahori aten sa! Huu hai ia, ba'i Abraham tititi-nonosi na! Dad'i ta'o bee de 'ola' mae, dei fo hai nenembo'it?”^f

34 Boe ma Yesus nafad'e neu se nae, “Au 'o'ola ngga naa, teb'e. Huu basa atahori fo rasod'a' tao sala' ra, dad'i 'ona' ate esa 'aka' tungga-tungga 'a sala' hihii-nanau na. 35 Te eni biasan, ta'o ia: ate ra nda biasa simbo hata-heto' mia malangga sa. Huu 'aka' malangga anan mana simbo hata-heto' naa. 36 Dad'i mete ma Au, naeni Lamatualain Anan, 'ose hendi sala-kilu ma ra, na, hei nenembo'it ena, ma nda dad'i sala' a aten sa ena. Noo ta'o naa, hei nenembo'it teb'e ena, de sud'i boe tungga sala' a hihii-nanaun fai!

37 Au bub'ulu' hei ia, naeni ba'i Abraham tititi-nonosi na. Mae 'ona' naa boe o, hei 'aka' sangga-sangga dala' fo mae tao misa Au, huu ama nda nau simbo Au nenori ngga sa. Huu sia rala ma ra, nda hambu mamana' fo mbed'a' Au Ded'ea-'o'ola ngga sa ena. 38 Au 'ufad'e dala-d'ala' fo 'ita' ra, fo Ama ngga natud'u neu Au ena. Ma hei tao tungga dala-d'ala' fo hei rena mia ama ma ra.”

39 Ara rataa rae, “Hai ia, ba'i Abraham tititi-nonosin!”

Yesus nafad'e nae, “Mete ma hei dad'i ba'i Abraham tititi-nonosin teb'e, na, hei tao tungga e. 40 Te ba'i Abraham nda tao nita de'ulaka' 'ona' hei tao' naa sa! Huu hei 'aka' sangga dala' fo mae tao misa Au. Tao-tao te Au ia, mana 'ufad'e neu nggi dala-d'ala ndoo-tetu' a, fo Au rena mia Lamatualain. 41 Hei tatao ma ra, mema' nda nela na'ad'oo' mia hei amam sa.”

Te ara rasapaa rae, “Hee! Hai ia, ana nenehengge-nee'! 'Afi' mae, hai ia, ana tias! Huu hai Amam, 'aka' esa' a, naeni Lamatualain!”

42 Boe ma Yesus nafad'e se nae, “Te mete ma Lamatualain teb'e-teb'e' dad'i hei Amam, tantu hei sue Au. Huu Au 'uma mia E, ma Au sia ia. Au nda 'uma tungga 'a hihii-nanau ngga sa. Te Au 'uma, huu Eni mana denu Au. 43 Ta'o bee de hei nda mihine Au 'o'ola ngga sa? Mbei ma hei nda nau rena sa, do?

44 Hei ia, mata' sa 'ona' nitu ra malangga na. Huu hei hii 'a tao tungga eni hihii-nanaun! Mia fefeun, eni mana tao nisa atahori. Eni lab'an dala ndoo-tetu', ma tola hendi basa ndoo-tetu' ra. Mete ma ana peko-leleko', naa mema' eni biasa na. Huu eni mana peko-leleko', ma mana 'ombo-koson huu na. 45 Au ia, mana 'ufad'e dala ndoo-tetu' a, te hei nda mimihere Au sa. 46 Sob'a! Seka mia hei bisa natud'u nala' bukti nae, Au tao sala' ena? Heran, e! Mete ma Au 'ola' ndoo-tetu', tao' bee de hei nda nau mimihere Au sa?

47 Naa, atahori mana lao' mia Lamatualain rena Ded'ea-'o'ola na. Te hei ia, nda lao' mia Lamatualain sa, naeni de hei nda hii rena Au sa.”

48 Atahori Yahud'i ra malangga na ra, rataa rae, “Weh! Hai 'ola' naa teb'e ena. Huu hai mifad'e ena, Ho ia, nda atahori Yahud'i matetu' sa, te Ho atahori Samaria. Nitu a o sia ralam ena boe!”

49 Boe ma Yesus nataa nae, “Nitu a nda sia Au rala ngga sa. Au fee had'a-hormat neu Ama ngga sia sorga, te hei nda fee had'a-hormat neu Au sa. 50 Au nda so'u ao ngga fo 'utud'u manaseli ngga sa. Te hambu Esa nau natud'u Au manaseli ngga. Hela Eni mana na'etu' nae Au 'o'ola ngga ndaa, do hoko'.

51 Au Ded'ea-'o'ola ngga, mema' teb'e! Ma, atahori mana rena ma tao tungga Ded'ea-'o'ola ngga, nda mate sa.”

52 Rena 'ona' naa, ma atahori Yahud'i ra malangga na ra rafad'e E rae, “Ia naa, hai bub'ulu' ho 'ola' 'ona' mulu' e, huu nitu a sia ralam ena. Ba'i Abraham mate ena. Lamatualain mana 'ola-'ola dalahulu na ra o, mate ena boe. Te ho mae, ‘atahori mana rena ma tao tungga Au Ded'ea-'o'ola ngga ra, nda mate sa.’ Mema' ho mumulu ena! 53 Do du'a mae ho manaseli' lena' ba'i Abraham mana mate' a? Do, Ho manaseli' lena' Lamatualain mana 'ola-'olan fo mana mate' ra ena, do? Ho du'a, mae Ho ia, seka?”

54 Boe ma Yesus nataa nae, “Mete ma Au mana so'u ao ngga, atahori nda nau simbo sa. Tao-tao te, Au nda so'u-so'u' ao ngga sa, te Ama ngga mana so'u nanaru Au. Eni fo hei mitaa mae, hei Lamatualain ma. 55 Te hei nda mihine E sa. Au 'uhine E noo malole. Mete ma Au 'ae nda 'uhine malole E sa, na, Au mana 'ombo-koson, 'ona' hei boe. Te Au 'uhine malole E, ma Au o tao tungga Ded'ea-'o'olan boe. 56 Hei ba'i Abraham ma ralan namaho'o seli, lele' ana nahani nae nita Au 'u'uma ngga. Mema' Ana nita ena, de ana ma'ahee.”

57 Atahori Yahud'i ra malangga na ra rafad'e rae, “Ho nda fe'e too lima nulu sa boe! Te mae ho mita ba'i Abraham ena. Teb'e, do?”

58 Boe ma Yesus nataa nae, “Teb'e! Huu ba'i Abraham nda fe'e sia sa, te Au sia ena.”

59 Boe ma, atahori naa ra ha'i fatu fo rae honda E, huu Ana so'u aon 'ona' Lamatualain. Te Ana lao' bambi-b'ambi de dea neu mia Ume Hule-o'e Huu' a sod'a na.^g