6 Boe ma Yesus nataa nae, “Ta'o ia. Lele' ia, Au fai ngga nda fe'e losa sa. Te mete ma hei mae mii, na, sud'i 'a fai hira' o bisa. 7 Atahori sia raefafo' ia ra nda binci nggi sa. Te ara binci Au, huu Au 'utud'u basa tatao-nono'i na ra. Te rala na ra de'ulaka'. 8 Hita fai malole agaman deka nema ena. Hela neu fo 'aka' hei mii mi'ihulu' sia Yerusalem. Au nda fe'e nau 'uu sa, huu fain nda fe'e losa sa.” 9 Ana 'ola' basa na'o naa, boe ma Ana leo neu 'a profinsi Galilea.

10 Lele' 'od'i na ra lao reu tungga atahori Yahud'i ra fai malolen sia Yerusalem, Yesus o tungga neu boe. Te Ana neu na'ab'ab'ambi aon, naa fo atahori nda bub'ulu' sa. 11 Lele' fai malole mia Yerusalem, atahori Yahud'i ra malangga na ra sangga E. Ara ratane rae, “Atahori naa sia bee, e?”

12 Atahori hetar 'utu-'utu so'al Eni. Ruma rae, “Eni, atahori malole'.”

Ruma fai rae, “Hoko'! Eni, mana peko-leleko' hii 'a laka-ese atahori hetar.” 13 Te nda hambu esa saa boe nambarani 'ola' relo-relo so'al Yesus sa, huu ara ramatau malangga naa ra.

14 Nandaa noo fai malole' a banggi ruan, ma Yesus nisi' Ume Hule-o'e Huu' a rala neu. Boe ma nanori sia naa. 15 Boe ma atahori Yahud'i ra malangga na ra heran rae, “Atahori ia nda nanori nae' nita 'ona' hita sa. Te ta'o bee de Ana nahine dala' hetar 'ona' ia?”

16 Boe ma Yesus nafad'e se nae, “Rena, e. Dala-d'ala' fo Au 'unori' ra, nda mia 'a Au mesa' nggo sa, te mia Eni mana denu Au' a. 17 Atahori mana teb'e-teb'e' nau tao tungga Lamatualain hihii-nanaun, dei fo ana nahine, Au nenori ngga naa, teb'e-teb'e' nema mia Lamatualain, do nema mia 'aka' Au mesa' nggo. 18 Huu atahori mana 'ola' nendi 'aka' mesa' ne koasan, eni sangga 'a nara'. Te atahori mana nau so'u-b'oti' na ra malole neu atahori mana denu eni' a, na, tantu ana 'ola' noo rala ndoos. Boe ma ana nda na'ena peko-leleko' sa. 19 Ba'i Musa fee Lamatualain Hohoro-lalanen neu nggi ena. Te hei nda tao tungga sa. Dad'i, ta'o bee de hei sangga-sangga dala' fo mae tao misa Au?”

20 Basa ma atahori hetar ratane rae, “'Ola' saa, ia? Mbei ma nitur tao nggo, do? Seka mana sangga dala' fo nae tao nisa nggo?”

21 Boe ma Yesus nataa nae, “Ta'o ia. Au fe'e tao 'a manad'ad'i manaseli' mata' esa' a sia fai hule-o'e' a, te basa hei miminasa ena. 22 Te lao-lao esa, hei tao-ues sia fai hule-o'e' a, 'ona' ia boe: ba'i Musa na'onda' sunat hohoro-lalanen nae, mete ma atahori bonggi nala ana tou', na, neu fai kafalun, hei musi sunat anad'iki' naa. 'Ita' mae fai' naa, nandaa noo fai hule-o'e' o, hei musi sunat e. (Te tungga matetun, hohoro-lalane' naa ra ra'ahulu' ba'i Musa. Huu Lamatualain fee hohoro-lalane' naa ra ra'ahulu' neu ba'i Abraham.)^b 23 Dad'i mete ma sunat anad'iki' esa nandaa noo fai hule-o'e', na, nda sala noo ba'i Musa hohoro-lalanen sa, na, ta'o bee de hei miminasa Au, huu Au 'u'uhahai' atahori keko' nandaa noo fai hule-o'e'? Nda nandaa noo dud'u'at sa, to!?^c 24 'Afi' nile atahori tungga 'aka' dala-d'ala' fo hei bisa mita noo mata ma ra. Dud'u'a naru' fo timba-tai basa-b'asa' e noo malolole dei, basa fo fe'e mi'etu' noo matetu' ena.”

25 Basa naa ma, hambu atahori hira mia kota Yerusalem ratatane rae, “Atahori ia, ara sangga fo rae tao risa E, do? 26 Wee, seli, o! Ana 'ola' relo-relo sia atahori hetar mata na ra. Te nda hambu esa denu E nee-nee sa boe. Tungga hei, na, ta'o bee? Mbei ma mana to'u koasa ra bub'ulu' ena do hoko', rae Atahori ia, naeni Kristus, fo Lamatualain helu mema' nae haitua nema' a ena, do? 27 Te 'aka' na, ta'o ia: lele' Lamatualain haitua Kristus nema, atahori nda rahine Eni mia bee nema sa boe. Te hita tahine Atahori ia mia bee nema ena.”

28 Lele' naa, Yesus fe'e nanori atahori sia Ume Hule-o'e Huu' a sod'a na. Lele' rena atahori ra 'ola-'ola' ta'o naa, boe ma Ana natane se noo hara deres nae, “Hei du'a mae, hei mihine Au, ma bub'ulu' teb'e Au 'uma mia bee, do? Au nda 'uma sia ia tungga 'a hihii-nanau ngga sa. Huu mana denu Au ia, teb'e-teb'e' sia. Hei nda mihine E sa boe. 29 Te Au 'uhine E, huu Au 'uma mia E, ma Eni mana denu Au na.”

30 Basa boe ma, ara rae humu E. Te nda hambu esa bisa to'u nala E sa, huu fain nda fe'e losa sa. 31 Mia atahori hetar mana sia naa ra, hambu hetar ramahere E boe. Ara 'ola-'ola' rae, “Atahori ia tao manad'ad'i manaseli' hetar ena. Ma lele' Kristus nema, mbei ma Ana nda tao lena' mia Atahori ia sa, to?”

32 Sia atahori hetar talad'a na ra, hambu atahori hira mia partei agama Farisi ra boe. Ara rena atahori hetar 'ola' 'utu-'utu dala' naa ra so'al Yesus. Basa ma, ara roo malangga agama Yahud'i ra malangga na ra denu atahori hira mana ranea Ume Hule-o'e Huu' a, fo reu humu Yesus.

33 Boe ma Yesus nafad'e nae, “Au fai ngga fo hambu 'u'ub'ue 'oo nggi, hela' a mbei ena. Nda doo' sa ena te, Au lao bali' isi' Eni mana denu Au' a. 34 Dei fo mete ma, hei mae sangga Au, te ama nda mindaa sa. Huu Au 'ae 'uu sia mamana' esa, fo hei nda bisa tungga sa.”

35 Basa ma, atahori Yahud'i ra malangga na ra esa natane esa nae, “Atahori ia nae neu sia bee? Ana neu sia mamana' bee, fo hita nda tandaa too E sa? Ana nae neu keke sia atahori Yahud'i fo masod'an sea-saranggaa sia nusa dea', do? Ana nae neu nanori atahori mana pake ded'ea Yunani sia naa, do? Do, ta'o bee? 36 Eni masud na saa, de Ana 'ola' nae, ‘Hei nau sangga Au, te nda hambu sa.’ Boe ma, ‘Au 'ae 'uu sia mamana' esa, fo hei nda bisa tungga sa’?”

37 Nandaa noo fefetas fai matete'en, mana dad'i fai monae manaseli' naa, ma Yesus nambarii' de nameli nae, “Rena, o! Seka na'amad'a, na, nema sia Au fo ninu!^d 38 Mete ma hambu mana ramahere Au, na, nema ninu neu' ena! Huu nenesura' mema' sia Lamatualain Susura Meumaren 'oi, ‘Oe mana nendi masod'a' dei fo nasapupura' dea nema mia atahori mamahere' ra rala na ra.’ Basa fo, ara hambu masod'a ndoo-tetu' a. Noo ta'o naa, ara o tulu-fali atahori laen fo hambu masod'a ndoo-tetu' a boe.”^e

39 Naa, Yesus 'ola' so'al Lamatualain Dula-d'alen, huu basa atahori mana ramahere Yesus dei fo simbo Dula-d'ale' naa. Te lele' Yesus 'ola' na'o naa, ara nda fe'e simbo Dula-d'ale' a sa, huu Lamatualain nda fe'e fee sa. Mema' Lamatualain nda fe'e fee sa, huu Ana nda fe'e so'u nananaru Yesus sa.

40 Atahori hetar sia naa rena Yesus 'ola' ta'o naa. Boe ma ruma 'ola-'ola' rae, “Tantu Atahori ia, Lamatualain mana 'ola-'olan, fo Ana helu mema' eni' a fai ma'ahulun!”^f

41 Hambu ruma fai rae, “Hoko'! Eni, Kristus, fo Lamatualain dud'u mema' mia fai ma'ahulun!”

Te hambu ruma fai, rasapaa rae, “Nda bisa sa! Huu Kristus, nda atahori Galilea sa. Teb'e, to? 42 Huu nenesura' sia Lamatualain Susura Meumaren 'oi, Kristus naa, mane Daud tititi-nonosi na. Sia mamana' laen o nenesura' 'oi, Eni, atahori Betlehem, naeni mane Daud kambo na. 'Ona' naa, to?”^g 43 Dad'i atahori ra saranggaa huu Yesus. 44 Hambu atahori hira o rae to'u rala E boe. Te nda hambu to'u rala E sa.

45 Basa ma, mana ranea Ume Hule-o'e Huu' a, mana rema rae humu Yesus, bali' risi' malangga agama Yahud'i ra malangga na ra roo atahori Farisi ra. Boe ma atahori moko-monaen ra ratane rae, “Woi! Saa de hei nda mendi E nema sa?”

46 Ara rataa rae, “Awii! Nda hambu atahori esa 'ola' nita 'ona' E sa boe!”

47 Atahori Farisi naa ra ratane rae, “Heh! Hei o nenepeko-leleko' ena boe, do? 48 Misined'a, e! Nda hambu mia hita atahori Farisi ra, do, mia malangga-malangga ra ramahere E sa. Teb'e, do? Mete ma atahori moko-monaen ra nda ramahere sa, na, saa de hei nau mimihere neu E fai? 49 Te atahori hetar ia ra mana nau ramahere neu E, nda rahine Lamatualain Hohoro-lalanen sa. Dei fo Lamatualain hukun se beran seli!”

50 Te sia naa hambu atahori Farisi esa, naran Nikod'emus. Eni, tetemba-tetemba' na neu 'ola-'ola' nita noo Yesus. Basa ma natane mbali se nae,^h 51 “Ta'o bee? Tungga hita agaman hohoro-lalanen, na, hita ta'etu' mema' atahori ded'ea na, do? Do, hita musi rena e dei, fo tatane ana tao saa, dei fo fe'e bisa ta'etu' ded'ea na?”

52 Boe ma ara bua e rae, “Weh! Ho ia, atahori Galilea 'ona' E, do? Paresa' lutu'-lelo' Lamatualain Susura Meumaren dei! Se'u malolole fo bub'ulu' mae, nda hambu Lamatualain mana 'ola-'olan esa sa boe nema mia Galilea!”

53 [Boe ma ara rasid'a, de basa se bali'.ⁱ