Lamatua' Yesus 'ola-'ola' noo ina' esa sia Samaria
4
1-2 Mete ma ta'asasama' Yohanis noo Yesus, na, Yesus ana mana tungga na ra mulai sarani atahori hetar lena' mana tungga E. Yesus nda sarani atahori sa, 'aka' Eni ana mana tungga na ra mana sarani atahori. Basa ma, lele' Yesus bub'ulu' 'oi, atahori mia partei agama Farisi rena ara sarani atahori hetar lena', 3 boe ma noo ana mana tungga na ra lao hela nusa Yud'ea, de bali' risi' profinsi Galilea. 4 Te ara musi lao tungga profinsi Samaria fo risi' profinsi Galilea. 5 Ara lao, de ara losa kota esa sia Samaria, naran Sikar, deka-d'eka noo rae fo ba'i Yakob fee neu anan Yusuf.a 6-8 Sia naa, hambu oe mata' esa, naran ‘Yakob oen’. Reorendu boe ma, Yesus se losa naa. Ana named'a bengge mia sira lalao na ra, de Ana 'endo' hahae aon sia oe naa. Boe ma Ana mana tungga na ra lao hela mesa' ne neu naa, de reu hasa nanaat sia kota rala.Boe ma ina' esa mia kota naa nema ha'i oe sia oe mata' naa. De Yesus no'e mbali e nae, “'A'a. Au bisa 'o'e oe nininu' mbei, do?”
9 Te ina' naa nggengger, huu atahori Yahud'i nda nau ra'ab'ue roo atahori Samaria ra sa. De ana natane bali' Yesus nae, “Wee! To'o atahori Yahud'i. Au ia, atahori Samaria. Nda sala sa, do? To'o mo'e minu sia au, e?”b
10 Yesus nafad'e nae, “Ta'o ia. Mete ma 'a'a bub'ulu' saa fo Lamatualain nae fee basa atahori, ma muhine Au mana 'o'e 'inu ia, Seka, na, tantu 'a'a no'e oe mia Au. Boe ma Au fee oe mana nendi masod'a'.”c
11 Ina' naa nae, “To'o nda ma ember hahando' sa. Boe ma oe mata' ia, roman seli. Mia bee nema To'o hambu oe mana nendi masod'a' naa? Oe naa hambu sia bee fai? 12 Tantu To'o nda manaseli' lena' hai ba'i Yakob ma sa! Eni mana lao hela oe mata' ia fee hai. Boe ma eni o ninu mia oe mata' ia boe. Eni ana na ra, roo banda na ra o 'ona' naa boe.”
13 Yesus nataa nae, “Musuned'a, e! Atahori mana ninu mia oe mata' ia, dei fo ana na'amad'a selu' fai. 14 Te atahori mana ninu oe fo Au fee' a, dei fo ana nda na'amad'a selu' sa ena. Huu oe fo Au fee' naa, 'ona' oe mata' sa mana nasapupura' dea nema. Oe naa, nendi masod'a matetu' nda mana 'etu' sa.”
15 Ina' naa nae, “Mete ma ta'o naa, na, To'o fee au oe naa leo, fo 'ona bee, na, au sud'i boe 'u'umad'a fai! Noo ta'o naa, au sud'i boe 'uma ha'i 'usufafali oe sia ia fai.”
16 Boe ma Yesus denu nae, “Ta'o ia. 'A'a bali' dei. Mo'e 'a'a saom fo bali' 'uma sia ia.”
17-18 Ana nataa nae, “Te au nda masao' sa.”
Boe ma Yesus nae, “Teb'e. Mufad'e noo rala ndoos. Huu saom lima ena. Boe ma mana sia 'ale' ia, nda saom sa.”
19 Boe ma ina' naa nae, “Awii! Ia naa au 'uhine ena, To'o ia, Lamatualain mana 'ola-'olan esa. 20 Naa, au 'ae 'utane. Hai atahori Samaria ra bei-ba'i ma ra be'utee neu Lamatualain sia lete Gerisim.d Te hei atahori Yahud'i ra mae, mete ma nau be'utee neu Lamatualain, basa atahori musi reu sia Yerusalem. Tungga To'o, matetun, ta'o bee?”
21 Yesus nataa nae, “'A'a mumuhere neu 'o'ola ngga ia dei, huu ia teb'e. Mae be'utee neu Lamatualain sia lete' ia do, sia Yerusalem do, dei fo losa fain, ru'a se nda ra'ena ngguna sa ena. 22 Hei atahori Samaria nda mihine nae' sa, so'al mimihere neu seka. Te hai atahori Yahud'i mihine nae', so'al Lamatualain fo hai be'utee neu 'a. Huu Ana nae pake hai fo soi dala', naa fo atahori hambu masoi-masod'a' mia sala-kilu na ra. 23 Dei fo losa fain, naeni mia lele' ia, atahori mana be'utee teb'e neu hita Aman sia sorga, na, ara be'utee neu E tungga Dula-d'alen, ma tungga ndoo-tetu' a. Huu Ama' sia sorga hii atahori mata' naa ra mana be'utee neu E. 24 Huu Lamatualain naa, dula-d'ale'. De atahori mana be'utee neu E musi be'utee tungga Dula-d'alen, ma tungga matetu' a.”
25 Ina' naa nafad'e nae, “Au bub'ulu' Mesias naa nae nema ena, naeni atahori 'ingga rae, ‘Kristus’, fo Lamatualain helu-fuli mema' nae haitua nema' a. Lele' Ana nema ena, na, dei fo nafad'e basa-b'asa' e neu nggita.”
26 Yesus nataa nae, “Ia eni, Au ena, fo mana 'ola-'ola' lele' ia.”
27 Nandaa noo lele' naa, Ana mana tungga na ra bali' mia kota rala rema. Ara heran, huu rita E 'ola-'ola' noo ina Samaria esa. Te nda hambu esa natane mbali ina' naa nae, “Nau saa?” Boe ma nda hambu esa natane Yesus nae, “Saa de Papa 'ola-'ola' moo ina' ia?”
28 Basa ma, ina' a lao hela nggusin mia naa, de lao bali' kota rala neu. Boe ma ana dui neu atahori sia naa ra nae, 29 “'Ima mete sob'a Atahori ia dei! Te Ana nafad'e relo-relo basa-b'asa saa fo au tao 'ita' ra ena. Se'u-se'u te Eni ia, Kristus, fo Lamatualain helu nae haitua nema' a!” 30 De atahori ra dea rema mia kota naa, de reu se'u Yesus.
31 Lele' ina' naa fe'e bali' neu sia kota rala, ma Yesus ana mana tungga na ra kokoe E rae, “Papa Meser! 'Uma mua dei!”
32 Te nataa nae, “Au ma nanaat ena, te hei nda bub'ulu' sa.”
33 Ana mana tungga na ra esa natane esa rae, “Ta'o bee ia? Seka mana nema de fee Ne nanaat?”
34 Te Yesus nafad'e nae, “Ta'o ia. Lamatualain denu Au fo tao tungga Eni hihii-nanaun, ma 'ulalao ue-tataon losa basa. Naa 'ona' nanaat soa' neu Au. 35 Naa, hei biasa memete' sia tine-osi, basa fo takseer mae, ‘Fe'e fula haa fai, dei fo fe'e bisa 'etu-'oru ena.’ Rena, e! Au 'ufad'e. Mete ma hei mete ma'ab'eb'esa, tine-osi ra lele' ia randaa 'etu-'oru ena. Tine ra, 'ona' atahori hetar sia naa rema risi' hita. Huu sira rahehere ramahere neu Au ena. 36 Nda 'aka' ta'o naa sa, te mana 'etu-'oru mana rad'uru buna-b'oa na ra sia nggud'an rala, sangga rae simbo rala nggad'i na ra ena. Sira 'ona' atahori mana natud'u dala' fo atahori ramahere neu Lamatualain, fo hambu masoi-masod'a ndoo-tetu' nda mana 'etu' sa. Noo ta'o naa, atahori mana sela fini, noo atahori mana 'etu-'oru buna-b'oa' ra, ramaho'o reu esa. 37 Atahori rae, ‘Atahori esa sela fini, ma atahori laen mana nad'uru buna-b'oa na ra.’ Naa teb'e ena. 38 Au denu nggi fo mii mid'uru buna-b'oa' mia atahori laen ue-osa na. Mema' hei nda tao ues naa sa, te hei o hambu hahambu' mia beb'engge na ra.”
39 Lele' naa, hambu atahori Samaria hetar sia kota naa ramahere neu Yesus, huu ina' naa 'o'olan nae, “Ana nakambembela nab'asa' basa-b'asa saa fo au tao 'ita' ra.” 40 Basa ma lele' ara rema risi' Yesus, ara kokoe teb'e-teb'e mbali E rae, “Papa leo moo hai sia ia leo!” Boe ma Ana leo na'atataa' fai rua sia naa.
41 Boe ma atahori laen hetar o ramahere neu E, huu Eni 'o'ola na. 42 Ara rafad'e ina' naa rae, “Afis naa, hai rena 'a 'o'olam. Te ia naa hai mimihere neu E, huu hai rena mata' mia E. Hai bub'ulu' teb'e mae, Atahori ia, mana bisa fee basa nggita masoi-masod'a' sia raefafo' ia mia sala-kilu ta ra.”
Lamatua' Yesus tao nahai' pagau esa anan
43 Yesus se leo fai rua mia naa, boe ma ara lao rakandoo risi' profinsi Galilea. 44 (Lao esa Yesus 'ola' nita nae, “Atahori nda hii fee had'a-hormat neu Lamatualain mana 'ola-'olan sia eni kambon sa.”)e 45 Dalahulun, lele' nda fe'e feta Paska sa, atahori Galilea hetar reu sia kota Yerusalem fo tao fai malole sia naa. Boe ma ara hambu rita basa saa fo Yesus tao sia Yerusalem. Naeni de lele' Ana bali' Galilea neu, ara simbo E noo malole.f 46 Basa ma Yesus se lao rakandoo reu selu' sia kambo Kana sia profinsi Galilea. Ana tao nita oe dad'i anggor mia naa.
Lele' naa, hambu pagau esa sia kota Kapernaum. Ana monen namahed'i.g 47 Lele' pagau naa rena 'oi, Yesus bali' nisi' Galilea mia profinsi Yud'ea, ma ana lao neu sia Kana de sangga Yesus. Nandaa noo Yesus ma ana 'aka' kokoe E, fo 'onda nema tao nahai' ana na. Huu ana' naa nae 'a mate ena.
48 Yesus nafad'e pagau naa nae, “Mete ma hei nda mita Au tao manad'ad'i' mata'-mata' sa na, hei nda nau mimihere Au sa!”
49 Pagau naa nataa nae, “Papa, tulun 'uma dei. Te hoko', na, ana ngga mate a ia ena.”
50 Basa ma Yesus nafad'e neu e nae, “Bali' leo. Te anam naa, masod'a'.”
Boe ma ana heo' bali' neu' ena, huu ana namahere Yesus 'o'olan naa. 51 Lele' ana bali', ma atahori mana tao ues na ra rema randaa roo e sia dala' rae, “Ama' 'afi' susa fai, huu ama' anan masod'a'.”
52 Basa ma natane se nae, “Ana hai eni' a mia lii' hira?”
Ara rataa rae, “Eni' a afis a lii' esa, matob'i' a 'onda mema'.” 53 Basa ma pagau a nasaned'a neu' ena nae, anan hai neu' ena, eni' a mia lele' Yesus nafad'e nae, “Ama' anan masod'a'.” Boe ma ana noo basa ume isi na ra ramahere neu Yesus.
54 Dad'i ia, manad'ad'i manaseli' karuan fo Yesus tao lele' Ana lao hela Yud'ea, fo neu sia Galilea.