Yohanis 5

Lamatua' Yesus tao nahai' atahori keko' esa sia lifu Batesda

Basa naa ma, hambu fai malole agama Yahud'i esa. Naeni de Yesus se lao risi' Yerusalem. 2 Sia naa, hambu lifu esa na'ena nembeleon lima mana deka-d'eka noo lelesu esa, naran Lelesu Bib'i Lombo. Sia sira ded'ea Aram na, lifu naa naran ‘Batesda’.^a 3 Hambu atahori mamahed'i' hetar biasa reu rahani sia nembeleo' naa ra. Conto 'ona': atahori poke', atahori keko', ma atahori nda mana na'aunda' nala sa. [Ara rahani fai' bee fo oe a nanggongga. 4 Huu lao-lao esa, Lamatualain aten mia sorga oe rala neu, fo tao oe a nanggongga. Basa naa fo seka nahulu' oe rala neu, na, eni hai mia hed'i-nggarau na.]^b

5 Naa, sia naa hambu atahori esa namahed'i too telu nulu falu (38) ena. 6 Boe ma Yesus nita atahori naa sunggu' sia naa. Ana bub'ulu' atahori naa namahed'i eni' a doo' ena, de natane nae, “'A'a, e! Mae hai, do?”

7 Ana nataa nae, “Au nau, Papa. Te eni kai-b'aan, naeni: lele' oe a nanggongga, nda hambu atahori 'o'o au oe rala 'uu sa. Mete ma au sob'a ao ngga, na, atahori laen rala reu ra'ahulu' au ena.”

8 Boe ma Yesus denu e nae, “Mumburii' leo! Lulu mala neneim, fo bali' leo.” 9 Yesus 'ola' basa ta'o naa, boe ma atahori naa hai neu' ena. Basa ma ana fela, 'o'o nenein, de ana lao bali' neu' ena.

Manad'ad'i' naa nandaa noo atahori Yahud'i ra fai hule-o'e na. 10 Basa ma atahori Yahud'i ra malangga na ra rafad'e mbali atahori mana fe'e hai' naa rae, “Woi! Bub'ulu', do hoko'? Fai' ia, fai hahae tao ue-osa'. Tungga hita agaman hohoro-lalanen, atahori nda bole 'o'o nenei' sa, huu naa o naran, tao ue-osa' boe!”^c

11 Ana nataa nae, “Ad'uu, ama ngga ra, e! Ama' se 'afi' miminasa. Huu Atahori mana tao nahai' au naa, mana parenda au nae, ‘Lulu neneim, fo bali' leo.’”

12 Basa ma ara ratane mbali e rae, “Heh! Mana denu nggo lulu nenei' naa, seka?”

13 Te atahori naa nda nahine Yesus naa, seka sa boe. Huu Yesus dea neu nee-nee tungga atahori hetar talad'a na ra.

14 Nda doo' sa, ma Yesus nandaa bali' noo atahori naa mia Ume Hule-o'e Huu' a sod'a na. Boe ma Yesus nafad'e nae, “Rena, e! Ia naa ho hai ena. 'Afi' tao sala' fai, naa fo 'afi' hambu dala nda malole' lena' sa fai.”

15 Basa ma, atahori naa neu sangga atahori Yahud'i ra malangga na ra, de nafad'e nae, “Mana tao nahai' au naa, Eni naran, Yesus.” 16 Naa de ara mulai tao doid'oso Yesus, huu Ana na'ahahai' atahori, nandaa noo fai hule-o'e'.

17 Te Yesus nafad'e se nae, “Ta'o ia. Au Ama ngga nda hahae tao ue-osa' sa. Dad'i Au o tao ues 'ukundoo 'a boe.”

Lamatua' Yesus nataa aon nae, Lamatualain Anan Eni

18 Huu atahori Yahud'i ra malangga na ra cap rae, Yesus nalena-langga sira hohoro-lalane fai hahae tao ue-osan, naeni de ara sangga dala deres lena' fo rae tao risa E. Lelenan fai, Ana o nae, Lamatualain naa, Eni Ama na. Noo 'ola' ta'o naa, Ana so'u aon 'ona' Lamatualain boe.

19 Yesus nafad'e se nae, “Teb'e! Au 'ufad'e mema' 'ae, Au mesa' nggo nda tao 'ala saa-saa mia ao ngga sa boe. Huu Au ia, Lamatualain Ana na. Naeni de Au bisa tao tungga 'aka' saa fo Au 'ita Ama ngga tao' a. Au 'ita Ama ngga tao saa, na, Au o tao tungga ta'o naa boe. 20 Au Ama ngga sia sorga sue nala Au seli, naeni Eni Ana na. Ana o natud'u neu Au basa-b'asa' fo Ana tao' ra. Dei fo Ana nau natud'u neu Au dala-d'ala manaseli' lena' fai, naa fo ama heran! 21 Au Ama ngga tao nasod'a bali' atahori mates ra. 'Ona' naa boe, dei fo Au fee masod'a ndoo-tetu' a neu sud'i 'a seka, tungga hihii-nanau ngga. 22 Matetun, ta'o ia: Ama' mesa' ne nda na'etu' huku-d'oki' fee neu atahori sa. Te Ana fee basa' e neu Au ena, huu Au ia, Eni Ana na. Basa fo Au mana 'u'etu' 'ae, atahori tao ndoo-tetu', do hoko'. 23 Au Ama ngga nau fo basa atahori fee had'a-hormat neu Au, 'ona' ara fee had'a-hormat neu Eni boe. Huu atahori nda mana fee had'a-hormat neu Au sa, naeni Eni Anan ia, na, ana o nda fee had'a-hormat neu Ama' mana denu Au sa boe.

24 Teb'e! Au 'ufad'e mema'. Atahori mana rena Au 'o'ola ngga, ma namahere Lamatualain mana denu Au, na, ana hambu masoi-masod'a ndoo-tetu' nda mana basa' a sa. Lamatualain nda huku-d'oki e sa ena. Huu atahori naa nda hambu huku-d'oki mamates a ena, te ana maso' dad'i neu atahori mana nasod'a nakandoo noo Lamatualain. 25 Teb'e! Au 'ufad'e mema'. Fain deka-d'eka nema ena, naa de eni' a mia lele' ia, atahori mates ra o rena hara' mia Au boe, naeni Lamatualain Ana na. Huu atahori mana rena ma simbo malole' Au 'o'ola ngga, dei fo ana hambu masod'a ndoo-tetu' a. 26 Basa masod'a' ra ra'oka sia Au Ama ngga. Ana o fee Au masod'a ndoo-tetu' a boe. Huu Au ia, Eni Ana na. 27 Au Ama ngga o fee hak noo koasa neu Au, fo 'u'etu' basa atahori huku-d'oki na ra, huu Au ia, naeni Atahori Matetu' a. 28 Ama 'afi' nggengger, huu mbei anak fai te basa atahori mana mate' ra rena Au hara ngga. 29 Basa fo ara rasod'a bali'. Boe ma ara dea rema mia rates ra. Atahori fo dalahulun tao malole', hambu masoi-masod'a ndoo-tetu' a nda mana basa' sa. Te atahori fo dalahulun tao' a de'ulaka', hambu huku-d'oki' nakandoo 'a.”^d

Hambu sakasii hetar dui-b'engga so'al Lamatua' Yesus

30 Yesus tute 'o'olan nae, “Au nda tao 'ala saa-saa sa, mete ma Au nda fe'e rena mia Ama ngga sa. Au rena 'ala dei fo Au fe'e 'u'etu' atahori ded'ea na. Huu naa, saa fo Au 'u'etu' naa, ndaa. Huu Au nda tungga 'a hihii-nanau ngga sa, te tungga 'a Ama ngga hihii-nanau na. Huu Eni mana denu Au na!

31 Mete ma 'aka' Au mesa' nggo 'ufad'e so'al Au ao ngga, na, Au 'o'ola ngga naa, nda nenesimbo tungga hohoro-lalane' sa. 32 Te hambu atahori laen dad'i sakasii so'al Au. Ma Au bub'ulu' ara 'ola' noo matetu' so'al Au. 33 Hei denu mita atahori reu ratane Yohanis mana sarani' a. Ma ana 'ola' noo matetu' so'al Au.^e 34 Tao-tao te, Au nda parluu atahori netaan sa. Te Au fee nesenened'a' dala' ia ra, naa fo ama bisa hambu masoi-masod'a' mia sala-kilu ma ra. 35 Yohanis 'o'olan naa, 'ona' lambu esa naronda manggarelo'. Lele' rondan fe'e manggarelo', rala ma ra mimiho'o.

36 Tao-tao te hambu Atahori manaseli' lena' Yohanis mana 'ola' matetu' so'al Au. Naeni Ama ngga sia sorga mana fee Au ue-tataos hetar, fo 'ulalao losa basa. Ue-tataos ia ra mana ratud'u bukti 'oi, Ama' mana denu Au. 37 Ma Eni mana denu Au' a, Ana 'ola' noo matetu' so'al Au boe. Naa, hei nda fe'e rena mita haran sa, do, mete mita mata aon sa.^f 38 Lamatualain Ded'ea-'o'olan nda nasod'a sia rala ma ra sa, huu nda mimihere Au, fo Ana denu' a sa. 39 Hei hii 'a paresa' lutu'-lelo' Lamatualain Susura Meumaren, huu du'a mae dei fo hei hambu dala' sia naa fo misod'a ndoo-tetu' nda mana 'etu' sa. Tao-tao te, Susura naa ra rafad'e so'al Au. 40 Te hei nda nau 'ima misi' Au, fo dad'i atahori ngga, naa fo ama bisa hambu masoi-masod'a ndoo-tetu' nda mana basa' sa.

41 Au nda parluu atahori so'u rananaru Au sa. 42 Te Au 'uhine teb'e-teb'e' hei rala ma ra. Naeni de Au bub'ulu' 'ae, hei nda mi'ena susue-lalai' neu Lamatualain sa. 43 Au 'uma sia raefafo' ia, huu Ama ngga mana to'u koasa denu Au 'uma. Te hei nda simbo Au sa. Tao-tao te, mete ma hambu atahori laen nema nendi koasan, na, hei simbo e noo malole'. 44 Hei esa noo esa hii 'a kokoat a. Te hei nda taoafi', Lamatualain koa nggi, do hoko' sa. Tao-tao te, Eni, Lamatualain! Nda hambu laen sa ena. Dad'i mete ma hei nda taoafi' neu E sa, 'ona bee fo hei bisa mimihere neu E?

45 'Afi' du'a mae, Au mana mbia sala' neu nggi sia Au Ama ngga mata na. Hoko'. Mana mbia sala' neu nggi, naeni ba'i Musa. Tao-tao te, hei mimihena neu e, huu eni mana fee nggi Lamatualain Hohoro-lalane na. 46 Mete ma hei mimihere teb'e neu Musa, tantu hei o mimihere neu Au boe. Huu eni sura' so'al Au. 47 Te, huu hei nda mimihere teb'e neu saa fo ana sura' a sa, 'ona bee fo hei nau mimihere saa fo Au 'ola' a? Ne'o hoko', to!”