Naik mutuin taos ma mo'et pah-pinan
4
Hi mmatoe ma mmabaan es nok es. In lasin saa'? Naan natuin anbi hi sonam ma hi tnaanm een naan, anmu'i tuaf-tuaf le' namin lalan he nhaliin sin tuak een kuuk. 2 Hi msinimakan bale' mese, mes hi 'niim een ka nteen fa he npoe naan. Lalit hi neekm een namenan, ammatoe ma ammabaan, tal antee hi mlomi he mimate es ate, ka mimtau fa.Natuin hi ka m'onen fa, ma ka mtoti fa na'ko Uisnenog, es on naan hi ka mipenij ee fa. 3 Maski hi m'onen mifeek haug-fatug amsa', mes hi ka mipeni fa saa' le' hi mtotij, natuin hi mtoti mituin ahaa hi tenab le' he minokab hi salit mese-mese.
4 Namneo-namneo hi atoni ka aki'at ki fa! Hi on le' amatsaos le' anmakake. Kalu hi mituin taos ma mo'et pah-pinan, hi mmo'e hi tuam een ammamuus mok Uisnenog. Namneo! 5 Es on naan Uisnenog In Sula Knino' anluul am nak, “Uisnenog natguaba' In Asmana Knino' et hit nekak. Es on nane, Asmana Knino' naan In alomin takii' tabaal atbij haa Na. Fun In le' naan, aktino'.” 6 Saa' antein, Uisnenog anlomi fe' he anfee nathoeb In nekan alekot amsa'. Es on naan Sula Knino' anluul am nak:
“Uisnenog anlaban tuaf le' nalatan in tuan,
mes In naklila' In nekan alekot noi tuaf le' neek apalat.”a
7 Uisnenog naan, Anakaf! Es on naan amnona' hi tuam een naan moi Ne, he mituin In lomin. Hi naik mituin nitu le'uf een sin anakaf anaek in lomin. Amlaban matani' moi ne. Nok lalan naan, in of naen nasaitan ki. 8-9 Mami lalan he hi msoob leko' ma mmoni nekaf mese mok Uisnenog. Nok lalan naan, In npaumaak ki.
Hoi, mansian le' amonit amle'ut ki! Hi lo he minoon ma mimneob hi monim. Ma hi le' neek masbake' een! Hi lo he mnao mne'o mituin Uisnenog, ma naik ambelok moi a'liij ma ane'ug antein. Tal antee nenog ii, hi monim een anbij ahaa malinat. Es on naan tabug ii, misnaas nai! Hi mihine milali mak hi neekm een nasbaken, natuin hi sanat sin. Leko nneis, hi amtoof om ma mkae mse'-se'ul nai. 10 Kalu hi mihine namneo-namneo mak, hi ka ma'upa' ki fa anbi Uisnenog In human ma In matan, In of naiti nalatan ki mjali tuaf-tuaf le' ma'upa' anbi In human ma In matan.
Naik miguab mile'uf es
11 Aok-abjaan ala ki! Naika miguab mile'uf es nok es. Fun kalu hi mmo'e on nane, ma misaeb sanat piut noi tuaf abjaan, hi mtanhai milali Uisnenog In atolan le' nak, “Ho lo he mneek ho aom-abjaan, nahuum on le' ho mneek ho tuam aan kuum.” Ma kalu hi ka mituin fa atolan naan, hi milatan milali hi tuam een annesi na'ko Uisnenog In Atolan. 12 Uisnenog nekin On es nahakeb Atolan naan. Es on naan In es le' anmu'i hak he nafeek hit lasin. In nekin On es anmu'i hak he ansoi nafetin kit, ai' anhukum namate kit. Hi ka mmu'i fa hak he mifeek atoni' sin lasin, ai' miguab mile'uf tuaf abjaan een sin kanak alekot.
Naik minaeb om
13 On ii! Hi lo he mihine, he naik miguab am mak, “Nenog ii, ai' anmiu, hai he mnao moi koot nael ee oo! Hai he mnao mitgua maan on le' toon mese. Ma hai he misosa' he miis maan ba-baun!” 14 Ho muhine saa' le' nmiu ma nsina' te he njali? Ka tiit tani fa tuaf es, le' nahine naan in monit ee on le' mee. Mansian in amonin on le' nipug, le' mamnita' labah, lalit namneek.b 15 Leko nneis hi miguab am mak, “Kalu Uisnenog anneek kit, maut he hit atmoon. Ma kalu Uisnenog nlomi te, maut he hit tabe'i tmo'e ii.” 16 Natuin kalu hi ka miguab fa on le' naan, hi aal minaeb aah om. Naan on le' hi mniken mani Uisnenog anbi hi tenab sin. Naan sanat anaek!
17 Mimnau milek-leko'! Tuaf le' nahine nalali saa' es le' namneo, mes ka nmo'e natuin fa on naan, naan on le' in nmo'e nsaan nalali msa'.