Hi mepug sin ambi pah-pinan iij, es le' he miminab hi tuam een meki lasi malinat pah-pinan. Hi on le' bijae paron mese le' aal nahine he naah aah, le' antee in tabug ate, anlolog. Hi mhukum ma mimate atoni alekot, le' ka napenin naan fa meinuan he namneob ok anbin hi humam ma hi matam.

Atoni amu'it sin! Leko nneis, amkae mse'-se'ul nai! Fun mane'at huma'-huma' of lo he ansaen ki. Hi mu'im sin anmulai namle'un eeh. Ma hi bale pakel amasat sin, naem sin of ansolo nani sin. Hi noni mnatu' ma muti' sin ka ma'upa' een fa lee. Ma sin of naah nafani' ki, on le' aij notu hau meto'. On meel em es pah-pinan ii he namsoup gue, mes hi mtaisibu fe' he mibguab bale maten? Hi mu'im sin of anjalin bukti nak, hi ka mihine fa meel es le' ma'upa' nbi Uisnenog In human ma In matan.^b

7 Aok-abjaan ala ki! Hi lo he mnalan ambi hatas ma paot tal Usi' ankoen On anfani neem. Mail kiim atoni tani le' anpao nok alan noi in lelel nesan. Ulan ahunut ee anmofu, lalit in nseen. Lalit in npao nteni ulan le' natolob ma namonib in senat een. Ka loog fa te, nasufan ma nafguan. Ma in tabug antee te, tuaf naan annao nseki ma noun. 8 Hi lo he mnalan on le' nane msa'. Amha'tani hi tuam een, natuin ka loog fa leen ate, Usi' ankoen On anfani neem!

9 Aok-abjaan ala ki! Naik ammamunu'. Sekog he mmamunu', mmamunu' piut. Maut he Uisnenog of es anhukum ki! Mail kiim! Fun Afeek Lasij sonaf neno tunan, anhake nalali et hi maatm een naan.

10 Aok-abjaan ala ki! Mituin aleta' na'ko Uisnenog In mafefa knino' sin. Maski sin napenin susal ma mane'at huma'-huma', mes sin nalan een haa. 11 Kalu anmu'i tuaf le' nabe'i nalan anbi susal ma mane'at, hit tlomi he tbo'is tanaeb in kanan. On le' nai Ayup. In napeni susal huma'-huma', mes in nalan matani'. Lalit Uisnenog nekan ee anmofu noi ne, es on naan In anmulai n'atol noi nai Ayup saa'-saa' le' naleek. Uisnenog anmo'e on naan, natuin In Amanekat ma Amahoet.^c

12 Amnono ala ki! Hi naik mihakeb supat. Kalu hi he mak, “lekog”, mitae mak “lekog” haa. Kalu hi he mak, “kahaf”, mitae mak, “kahaf”. On le' nane, noog aah. Naik ambainesi he mihakeb lasi supat amteek amates le anbi pah-pinan. Ai' mihakeb supat mak, “anbi Uisnenog In kanan” le' anmoni et sonaf neno tunan. Ka nmu'i fa upan saa'-saa' kalu mihakeb supat huma'-huma'. Natuin kalu on nane, of amsimo mani ho hukum, natuin ho lasi supat sin.^d

13 Kalu nmu'i tuaf na'ko ki napeni susal, leko nneis in an'onen. Ma kalu anmu'i tuaf anmalinan, leko nneis in ansii ma nbo'is Uisnenog. 14 Kalu anmu'i tuaf na'ko ki napeni menas, leko nneis amhone amepu kliij sin, ma mtoti sin he ntaon mina' anbi amenat naan, ma n'onen een neki Uisnenog In kanan, maut he Uisnenog naleko' amenat naan.^e 15 Es on naan kalu hi m'onen amenat, ma mpalsai namneo-namneo moi Uisnenog, Uisnenog naleko' amenat naan. Kalu amenat naan anmo'e nsaan, Uisnenog of annose nani in sanat sin. 16 Kalu na'ko ki ammo'e msaan, hi lo he mmanaku' sanat es nok es. Nok lalan naan, lo hi m'onen es nok es ate, maut he hi mjali alekot.

Tuaf le' in nekan knino' ma namneo, in onen nahenu nok kuasat matani', ma nabe'i napeni in nesan. 17 Taiti leta' na'ko nai Elia. In mansian on le' hit amsa'. Mes tabug in n'onen he naik na'uul antein, ulan naan nasnaas naan, ma ka nmofu niit fa tal antee toon tenu ma stena'.^f 18 Lalit in n'onen he ntoti ulan, ma ulan naan anmofu nani tabug naan. Ma'ug sin natolo ma nnoo maten, ma sekit amnonut amsa'.^g

19 Aok-abjaan ala ki! Kalu anmu'i tuaf na'ko ki le' anmo'e nsaan ma nasaitan saa'-saa' le' namneo, lalit anmu'i tuaf le' nbaban ee nfani neem noi Uisnenog In laal amneot, naan naleek. 20 Mimnau milek-leko'! Kalu hi mbaban tuaf le' anmo'e nsaan, he in nfani neem noi Uisnenog, ma in na'piis, hi msoi maan ee, maut he in nmoni piut nok Uisnenog. Nok lalan naan, Uisnenog annose nani in sanat sin le' namfau naan.^h

On le' naan.