Sulat le' ii, na'ko au nai Paulus kau, Uisnenog In aan lelu' ma aan leka', ma Yesus Kristus In haef. In anleek kau he 'nao 'ha'tani neek palsait noi tuaf een le' In anpili naan sin. In anleek kau msa' he utoon lalan amneot he sin anmonin natuin Uisnenog In alomin. Nok lalan naan, Uisnenog In nonot sin, nafnekan he nmonin nok Ne piut-piut. Tabug Uisnenog ka najalib fa pah-pinan iij fa fe', In anpaa' nani mnak, In nonot sin of anmonin piut nok Ne. Ma In ka namoe nahine fa. Antee in tabug ee on nane, Uisnenog natoon maat-maat am nak, In he ansoi nafetin mansian na'ko sin sanat sin, he sin nabe'i nmoni nabal-balan nokan. Lalit In naplenat kau, he 'nao utoon Tu'in Alekot naan noi mansian ok-oke' 'bi meel am meel.

Titus! Ho on le' au aanh ee kuuk, natuin hit nua kit atpalsai toi Kristus. Es on naan au 'onen 'oi Ama' Uisnenog, ma Yesus Kristus le' ansoi nafetin kit, he Sin naklila' Sin neek alekot noi ko, he ho mmoni mbi taimamut ma tainine', ma mahalan nekaf es nok es.^a

5 Nenog naa, au ufeek he usaitan ko mbi pulau Kreta, he ho mube'i m'atol maan mepug fauk ambi naan. Maut he ho mpili maan anaakf een noi too slani' anbin koot mese-mese. Naik amniken atolan le' au utoon ulali sin noi ko, anmatoom nok tuaf-tuaf le' nanaak jema'at, es le': 6 kalu mlomi he mpili tuaf he nanaak ma nnaa' jema'at, in lo he naik anmu'i sanat saa'-saa'. In lo he nakii' anbi matsaos nok bifeel mese' aah. In anah sin amsa' anpalsain Yesus Kristus. Naik-naika tuaf abjaan sin nak, sin le' naan, es le' teef es ate anmo'en taisibug, ma antanhai atolan. 7 Natuin anaak jema'at een naan, nanaob Uisnenog In mepug, es on naan sin lo he nmonin nok neek amneot, ma sin kaank een lo anfoo menin. Naik ampili maan tuaf le' anlomi he nanaeb in tuan; le' labah ate natoo'; amninu lalu mafu; amabanat; akoni nonij. 8 Tuaf le' nanaak noi jema'at sin lo he nlomin he nsimo sekog haa anbin sin umel. Sin lo he nlomi haa lasi alekot; neek tainine', atai lasij, neek aknino', ma ntahan nahine in tuan. 9 Sin lo he nnaa' nahel-helan Uisnenog In A'an ma Plenat, le' nahunut hit tanoni' ma tatoon sin noi sin. Nok lalan naan, sin nabe'i naklila' Uisnenog In lalan amneot noi tuaf abjaan sin, ma nabe'i nanono naan anoni' le' anbeon.^b

10 Fun anmu'i tuaf namfau le' anlomin he nlaban anoni' le' amneot, le' naguab een, alafgua-lafug. Anneis-neis atoni Yahudis sin le' nak, ale' too mfaun sin le' anlomin he napenin sako sanat ma laal a'honis, lo he naheli' een. 11 Sin nasekeb nonot abjaan, he sin naloon na'ko Uisnenog In anoni' le' amneot, ma anpake sin anoni' le' ansaan ma nbeo. Sin aal he n'etun ahaa loit, neki lalan le' he namoen guah. Tuaf-tuaf on le' naan, lo he npooh sin feefk een, maut he sin naik nanoni' nsanan piut-piut. 12 Tabug mese, sin amnaiti neel es na'ko pulau Kreta natoon kuuk sin neel am nak,

13 Namneo. Abiten balel naan, on le' naan! Es on naan ho lo he mutuku mufani amoet een naan, he mha'tani mteni sin lasi palsait noi Uisnenog. 14 Lalit sin naik anneen anteni' atoni Yahudis sin aleta' moel een, ma sin naik natuin plenat na'ko tuaf-tuaf le' antita napasib anoni' amneot.

15 Mumnau muleko'! Noi tuaf le' in nekan ee knino', ale' saa'-saa' amsa' knino'. Mes noi tuaf le' in nekan ee anmesi'ook ma ka npalsai fa Uisnenog, ale' saa'-saa' amsa' anmesi'ook. Natuin sin neek een ma tenab sin nhainisi nanin. 16 Sin nmanaku nak sin nahine Uisnenog. Mes sin amonik een, on le' ka nahinel Ee fa. Sin naguab een, naik, mes anmo'el ate, naik. Namneo-namneo sin lo punu een! Sin ka nlomin fa he natuin Uisnenog In alomin. Naik mifneek moi tuaf-tuaf on le' naan, natuin sin ka nabe'i fa he anmo'en alekot!