2 Hit ala kit taguab atsaan huma'-huma'. Mes tuaf le' nabe'i npaloli naan in fefan, in nabe'i n'atol in tuan amsa'. 3 Taiti leta' ta'ko bijakasel. Hit tabe'i t'atol bijakasel he natuin hit lomik, atteetk ahaa in afliug. 4 Aleta' abjaan na'ko bnao oel. Ani naek ee anfuu bnao oel nuu-mneem natuin in lomin. Mes kamudi aan'-aan' ahaa mmees, in nabe'i n'atol naan abnao oel naan in anaon, natuin anaa' abnaog naan in alomin. 5 On nane msa', hit fefak. Fefak le' ii, aan'-ana'. Mes in mepug sin, manenu le'uf!^a

Naan on le' sasiu aan' es, le' nabe'i notu nale'un nasi naek es. 6 Fefaf naan, on le' ai apinat. Hit tabe'i tpake hit fefak he tale'un ale' kanan lasij. Hit fefak iij nabe'i nale'un hit monik ee nok atemen. Lasi amle'ut namfau nbi pah-pinan iij, anpoin na'ko mansian ee in fefan. Ma nitu le'uf een sin anakaf anaek ee msa', anpake mansian in fefan he nanaob in mepug sin.

7 Mansian nabe'i anheke mu'i fuij, lalit na'aem sin he anjalin mu'i aem. On nane msa', kaun anonok, kolog, ma ika' anbi tasij nanan. 8 Mes ka nmu'i fa tuaf es fa fe', le' n'atol naan in fefan. Natuin fefaf naan, bale amle'ut mese, le' ka t'atol taan ee fa. In on le' lasog le' antaam seen nani hit aok, tal antee tmaat.

9-10 Nok fefaf mese, hit tpules ma tsekun tuaf. Naan ka naleko fa! Hit atpake hit fefak he tbo'is Ama' Uisnenog. Lalit nok fefaf le' nane msa', hit tsekun ma ta'akan hit aok-abjaan, le' Uisnenog anmo'el natuin In human ma In masan. On mee m'es on le' naan?^b

11 Ka nuug fa he oe mata' mese npulan napoitan oe aminat ma miin masi'. 12 Ka nuug fa he manus nafgua timubana! Ma ka nuug fa he pena' napune anggur! Fun senat lo he nafgua ma nanees natuin in neog.^c Nahuum on le' hit ka tabe'i fa he tkui oe alekot na'ko nifug miin masi'.

13 Tuaf le' nahine lasi natuin Uisnenog In hinet, naik anpaas on ma naik nanaeb in tuan. Fun in nahine nak, in hinet naan na'uu na'ko Uisnenog. Maut he in naklila' in mahinen naan anbi monit amneot. 14-15 Kalu ho mneek meen moi tuaf es, ai' mumofu tuaf es he ho mseka', naik munaeb om mak ho atoni ahine lasi alekot ko! Naan, ho mumoe. Fun monit on le' naan ka natai fa nok ‘atoni ahine lasi alekot’. Mu'unu' tuaf, ai' mumofu tuaf, ka na'uu fa na'ko Uisnenog. Naan, atoni' pah-pinan iij in amnekin sin. Naan namnees nok tuaf-tuaf le' ka nnona' fa sin tuak een noi Uisnenog. Taos een naan, natuin nitu le'uf een sin lalan. 16 Fun kalu anmu'i neek meen noi es, ai' ammamofun, of anmu'i taisibug huma'-huma', ma mansian anmo'en maufinu huma'-huma'.

17 Mes lasi hinet le' na'uu na'ko Uisnenog, es le' ii: nahunut in anmo'e kit he tmoni knino'. Lalit in nfee kit neek halan es nok es, tapalan tahiinl ok, attalan piut, ma neek tees. In nesan amsa' nmo'e hit nekak naleek, tlomi he tmabaab, tataiba' tahine lasij, ma ka tbelok fa koti-mmaat toi tuaf abjaan sin. 18 Ma tuaf le' naklila' laal halan of napeni in upan alekot. Naan on le' atoni' nseen finij, namuni te in napeni nafani' in nesan alekot.