1-2 Tabe na'ko au, nai Yohanis kau, es le' Yesus Kristus In aan lelu ma aan leka'.

Au 'luul a'bi sulat le' iij, anmatoom nok saa'-saa' le' of he anjalin. Au upeni lasin naan on ii: Uisnenog nekin On es anpukai sin ma natonan sin noi Yesus Kristus. Ma Uisnenog anlelu Nai Yesus he natoon noi In aan lelu ma aan leka' sin. Lalit Nai Yesus anlelu In ahake es na'ko sonaf neno tunan, he nnao nasoitan ma naklila' lasin iij ok-oke' noi kau, he au 'luul 'ani sin. Fun ka loog fa nteni te, lasin le' iij ok-oke' lo he anjalin. Es on naan hi lo he mneen milek-leko' Uisnenog In A'an ma Plenat le' Nai Yesus natoon nalalij ee.

3 Ale' tuaf een ok-oke' le' antae lulat le' iij tal antee tuaf abjaan annenan amsa', sin n'ua lekon. Ma tuaf le' nneen ma natniin lulat iij in hanan, ma nmo'e natuin in lasi manpaa', sin n'ua lekon amsa'. Fun in tabug naan he npaumak-maak he neem eeh.

4 Tabe na'ko kau 'oi Uisnenog In jema'at hitu etan propinsi Asia.

Au 'toti he Uisnenog naklila' In nekan alekot noi ki, he hi mibe'i mmoni mbi taimamut ma tainine', ma mmahalan nekaf es nok es. Fun na'ko nahunut, In lo Uisnenog naanj ee, tal antee tabug ii, ma tal antee nabal-baal. Au 'toti msa' he In Asmana Knino' naklila' In nekan alekot noi ki, he hi mibe'i mmoni mbi taimamut ma tainine', ma mmahalan nekaf es nok es. Au 'ail Asmana Knino' naan, nahuum on le' smanaf hiit le' anbaisenun noi Uisnenog In atoko' plenat.^{a b} 5 Au 'toti msa' he Yesus Kristus naklila' In nekan alekot noi ki, he hi mibe'i mmoni mbi taimamut ma tainine', ma mmahalan nekaf es nok es. In naguab piut-piut ma maat-maat anmatoom nok saa'-saa' le' Uisnenog natoon noi Ne. Nahunut, In anmaat namneo-namneo, mes Uisnenog namonib nafani' Ee, he In anjali tuaf ahunut le' anmoni nfani na'ko maten. In anjali Anaak Kesel amsa' noi ale' kanan kesel anbi pah-pinan.

Natuin Nai Yesus anneek kit, es on nane In nat'opab In naa' nasaib noi kit. Nok lalan In amaten naan, In anfai lalan he nsoi nafetin naan kit na'ko hit sanat een sin kuasan.^c 6 Lalit In naiti nanaeb kit atjali In too nuug, maut he hit tmepu toi In Amaf, Ama' Uisnenog. Yesus Kristus lo mapina'-maklaha', ma In kuasat naan ka natfeek niit fa. Namneo!^d

7 Es on naan mail milek-leko'! Tabug iij, Nai Yesus ma In Amaf etan sonaf neno tunan. Mes ka loog fa te, In ansanu neem anbi nopel. Mansian pah-pinan iij ok-oke' of niit Ee. On nane msa' noi tuaf een le' napaug Ee faijan unu'. Ma ale' uuf ma pah anbin pah-pinan iij antoof ok ma ankaen nse'-se'ul een, natuin sin nahinel Ee. Lasin le' iij ok-oke' lo he anjalin namneo-namneo. Namneo on naan!^e

8 Uisnenog nak,

9 Natuin hit aal-ala kit atpalsai ok-oke' tak, Nai Yesus naan hit Kesel, es on nane, au 'jali hi aom-abjaan. Anmu'i tuaf abjaan namaunun, natuin hit tatuin Nai Yesus, ma sin anhamu'i kit ok-oke'. Mes Nai Yesus anha'tani nalali hit nekak, he hit tabe'i talan piut-piut. Natuin au utoon ulali 'oi tuaf-tuaf anmatoom nok Uisnenog In A'an ma Plenat, ma unoni' tuaf anmatoom nok Nai Yesus, anmu'i tuaf le' ansekun. Es on naan tabug iij sin anheke kau ma anpolin kau noi pulug le' iij, kanan Patmos. 10 Tabug mese', nateef nok neno onen, Uisnenog In Asmanan neman kau. Nok askeken ate, au 'neen hanaf mese matani' le'uf neem na'ko au kotik. In hanan nahuum on le' haan akniit. 11 Hanaf naan anleek kau mnak, “Yohanis! Au he uklila' ko lasij es. Saa'-saa' le' ho miit sin, ho lo he mluul sin. Lalit ho msonu' sin moi jema'at hiit, es le' jema'at een abiten koot Efesus, koot Smirna, koot Pergamus, koot Tiatira, koot Sardis, koot Filadelfia, ma koot Laodikia.”

12 Au 'neen on nane, au 'niik ee he uhine 'ak sekog es le' naguab nok kau. Mes au 'iit ahaa paku ana' hiit, le' nateke sin anbin paku 'tokof na'ko noni mnatu'. 13 Ma Atonij mese anhake nbi pakun naan sin atnaank een. In masan on le' Mansian Namneo-Namneo. In anpake soo-balu mnanu es, le' in amnanun antee in in haen, ma nasae beti nonij es. Betik naan nafleon ee npe'o in abasan.^g 14 In anaak funu een muti' on abas.^h In maatn een anpinan on le' aij.ⁱ 15 In haen een, anpinan on le' besi mtasa' le' atutu besin noutug ma mtasa' le'uf. In hanan naslutu' on le' oe bonij.^j 16 Anbi in animan ane'ug, in annaa' maklafu' hiit. Suni es 'aikaf nuug anpoi na'ko In fefan. In human anpiin on le' manas.

17 Tabug au 'iit Atonij naan, au nekak namneek ma a'tiloot a'bi In haen. Mes in abaleo kau neki In animan ane'ug, lalit In naguab am nak, “Anah! Naik mumtau! Natuin ale' saa'-saa' sin na'uun ma naba'an na'ko Kau, anmulai na'ko ahunut tal antee amunit.^k 18 Nahunut, Au 'maat, mes tabug iij ho miit kuum! Au 'moni 'faan, ma Au of a'moni piut tal antee nabal-baal. Au es le' anaa' aletu', le' ube'i a'letu ma a'fai balel noi amates sin, he umonib ufani' sin. 19 Ho lo he mluul ale' saa'-saa' le' ho miit sin tabug iij, ma mluul saa'-saa' le' of he anjalin. 20 Au utoon 'ani ko in oten on ii: paku noni hitu een naan, in oten, jema'at hiit. Ma maklafu' hitu een le' ho miit sin anbin Au nimak ane'ug, es le' ahake neno tunan tuaf hiit le' nekin hanaf na'kon Uisnenog noi jema'at hitu een le' naan.”